The Comprehensive Aramaic Lexicon

05:01	ܒܬܪ ܗܠܝܢ ܗܘܐ ܗܘܐ ܥܕܥܕܐ ܕܝ̈ܗܘܕܝܐ܂ ܘܣܠܩ ܗܘܐ ܝܫܘܥ ܠܐܘܪܫܠܡ܂
05:02	ܘܐܝܬ ܗܘܐ ܒܐܘܪܫܠܡ ܕܘܟܬܐ ܚܕܐ ܕܡܥܡܘܕܝܬܐ ܕܡܬܩܪܝܐ ܥܒܪܐܝܬ ܒܝܬ ܚܣܕܐ܂ ܘܐܝܬ ܒܗ݀ ܚܡ̈ܫܐ ܐܣ̈ܛܘܝܢ܂
05:03	ܘܪܡܝܢ ܗܘܘ ܒܐ̈ܣܛܘܐ ܣܘܓܐܐ ܕܟܪ̈ܝܗܐ܂ ܘܣ̈ܡܝܐ ܘܝܒ̈ܝܫܐ ܘܡܚ̈ܓܪܐ܂
05:05	ܘܐܝܬ ܗܘܐ ܬܡܢ ܓܒܪܐ ܚܕ ܕܬܠܬܝܢ ܘܬܡܢܐ ܫ̈ܢܝܢ ܟܪܝܗ ܗܘܐ܂
05:06	ܘܟܕ ܚܙܝܗܝ ܝܫܘܥ ܕܪܡܐ܂ ܝܕܥ ܕܙܒܢܐ ܣܓܝܐܐ ܐܝܬ ܠܗ܂ ܐܡܪ ܠܗ ܨܒܐ ܐܢܬ ܕܬܗܘܐ ܫܪܝܪ܂
05:07	ܐܡܪ ܠܗ ܡܪܝ ܠܝܬ ܠܝ ܐܢܫ ܕܡܐ ܕܐܬܙܝܥܘ ܡ̈ܝܐ ܢܚܬܢܝ ܠܡܥܡܘܕܝܬܐ܂ ܘܥܕ ܐܢܐ ܐܬܐ ܐܚܪܢ ܡܢ ܩܕܡܝ ܢܚܬ܂
05:08	ܐܡܪ ܠܗ ܝܫܘܥ܂ ܩܘܡ ܫܩܘܠ ܥܪܣܟ ܘܗܠܟ ܙܠ ܠܒܝܬܟ܂
05:09	ܘܒܗ݀ ܒܫܥܬܐ ܐܬܚܠܡ ܓܒܪܐ ܗܘ ܘܗܠܟ܂ ܘܗܘ ܗ݀ܘ ܝܘܡܐ ܫܒܬܐ ܗܘܬ܂
05:10	ܐܡܪܝܢ ܠܗ ܝܗ̈ܘܕܝܐ܂ ܫܒܬܐ ܗܝ ܠܐ ܫܠܝܛ ܠܟ ܕܬܫܩܘܠ ܥܪܣܟ܂
05:11	ܐܡܪ ܠܗܘܢ ܗܘ ܗܘ ܕܐܚܠܡܢܝ܂ ܗܘ ܐܡܪ ܠܝ ܕܫܩܘܠ ܥܪܣܟ ܘܗܠܟ܂
05:12	ܐܡܪܝܢ ܠܗ ܡܢܘ ܗܢܐ ܓܒܪܐ ܕܐܡܪ ܠܟ ܕܫܩܘܠ ܥܪܣܟ ܘܗܠܟ܂
05:13	ܘܗܘ ܕܐܬܐܣܝ ܠܐ ܝܕܥ ܗܘܐ ܡܢܘ܂ ܗܘ ܓܝܪ ܝܫܘܥ ܫܢܝ ܗܘܐ ܠܗ ܡܢ ܕܘܟܬܐ ܠܚܒܪܬܗ݀܂ ܡܛܠ ܟܢܫܐ ܕܐܢܫܐ܂
05:14	ܒܬܪ ܗܠܝܢ ܐܫܟܚܗ ܗܘܐ ܝܫܘܥ ܠܗ݀ܘ ܕܐܬܐܣܝ ܒܗܝܟܠܐ܂ ܘܐܡܪ ܠܗ܂ ܗܐ ܚܠܝܡ ܐܢܬ ܬܘܒ ܠܐ ܬܚܛܐ܂ ܕܠܡܐ ܢܓܕܫ ܠܟ ܕܒܝܫ ܡܢ ܩܕܡܝܐ܂
05:15	ܘܐܙܠ ܓܒܪܐ ܗܘ ܘܐܡܪ ܠܝܗ̈ܘܕܝܐ܂ ܕܝܫܘܥ ܗܘ ܗܘ ܕܐܚܠܡܢܝ܂
05:16	ܘܡܛܠܬܗ ܪܕܦܝܢ ܗܘܘ ܝܗ̈ܘܕܝܐ ܠܝܫܘܥ܂ ܥܠ ܕܠܡܢܐ ܥܒܕ ܗܠܝܢ ܒܫܒܬܐ܂
05:17	ܗܘ ܕܝܢ ܝܫܘܥ ܐܡܪ ܠܗܘܢ܂ ܐܒܝ ܥܕܡܐ ܠܗܫܐ ܥܒ̈ܕܐ ܥܒܕ܂ ܡܛܠ ܗܢܐ ܘܐܦ ܐܢܐ ܥܒܕܢܐ܂
05:18	ܝܗ̈ܘܕܝܐ ܕܝܢ ܡܛܠ ܗܕܐ ܡܠܬܐ ܒܥܝܢ܂ ܗܘܘ ܠܡܩܛܠܗ܂ ܠܐ ܒܠܚܘܕ ܡܛܠ ܕܫܪܐ ܗܘܐ ܫܒܬܐ܂ ܐܠܐ ܡܛܠ ܕܠܐܠܗܐ ܐܒܝ ܩܪܐ ܗܘܐ܂ ܘܡܦܚܡ ܗܘܐ ܢܦܫܗ ܥܡ ܐܠܗܐ܂
05:19	ܐܡܪ ܠܗܘܢ ܝܫܘܥ܂ ܐܡܝܢ ܐܡܝܢ ܐܡܪܢܐ ܠܟܘܢ܂ ܕܠܐ ܡܫܟܚ ܒܪܐ ܡܕܡ ܡܢ ܨܒܘܬ ܢܦܫܗ ܠܡܥܒܕ ܐܦܠܐ ܡܕܡ ܕܠܐ ܚܙܐ ܠܐܒܘܗܝ ܕܥܒܕ܂ ܐܠܐ ܡܐ ܕܐܒܘܗܝ ܥܒܕ ܘܐܦ ܒܪܐ ܒܗ ܡܬܕܡܐ܂
05:20	ܐܒܐ ܓܝܪ ܪܚܡ ܗܘ ܠܒܪܗ܂ ܘܟܠܡܕܡ ܕܥܒܕ ܡܚܘܐ ܠܗ܂ ܕܗܘ ܢܥܒܕ܂ ܘܕܝܬܝܪܝܢ ܡܢ ܗܠܝܢ ܥܒ̈ܕܐ ܡܚܘܐ ܠܗ܂ ܘܠܐ ܬܬܕܡܪܘܢ ܕܐܡܪܬ ܠܟܘܢ܂
05:21	ܐܝܟܢܐ ܓܝܪ ܕܐܒܐ ܡܚܐ ܡܝ̈ܬܐ ܘܡܩܝܡ ܠܗܘܢ܂ ܗܟܢܐ ܐܦ ܒܪܐ ܡܚܐ ܠܐܝܠܝܢ ܕܡܗܝܡܢܝܢ ܒܗ܂
05:22	ܐܒܐ ܓܝܪ ܠܐܢܫ ܠܐ ܢܕܘܢ܂ ܐܠܐ ܟܘܠܗ ܕܝܢܐ ܠܒܪܗ ܢܬܠܝܘܗܝ܂
05:23	ܕܟܠ ܐܢܫ ܢܝܩܪ ܠܒܪܐ ܐܝܟܢܐ ܕܡܝܩܪ ܠܐܒܐ܂ ܘܡܢ ܕܠܒܪܐ ܠܐ ܡܝܩܪ ܐܦܠܐ ܠܐܒܐ ܕܫܕܪܗ ܡܝܩܪ܂
05:24	ܐܡܝܢ ܐܡܝܢ ܐܡܪܢܐ ܠܟܘܢ܂ ܕܡܢ ܕܫܡܥ ܡܠܬܝ ܘܡܗܝܡܢ ܠܡܢ ܕܫܕܪܢܝ܂ ܐܝܬ ܠܗ ܚܝ̈ܐ ܕܠܥܠܡ܂ ܘܠܕܝܢܐ ܠܐ ܐܬܐ܂ ܡܛܠ ܕܫܢܝ ܠܗ ܡܢ ܡܘܬܐ ܠܚ̈ܝܐ܂
05:25	ܐܡܝܢ ܐܡܝܢ ܐܡܪܢܐ ܠܟܘܢ܂ ܕܐܬܝܐ ܫܥܬܐ ܘܐܦ ܗܫܐ ܐܝܬܝܗ܂ ܕܐܦ ܡ̈ܝܬܐ ܢܫܡܥܘܢ ܩܠܗ ܕܒܪܗ ܕܐܠܗܐ ܘܢܚܘܢ܂
05:26	ܐܝܟܢܐ ܓܝܪ ܕܠܐܒܐ ܐܝܬ ܚܝ̈ܐ ܒܩܢܘܡܗ܂ ܗܟܢܐ ܝܗܒ ܐܦ ܠܒܪܐ ܕܢܗܘܘܢ ܐܝܬ ܠܗ ܚ̈ܝܐ ܒܩܢܘܡܗ܂
05:27	ܘܐܫܠܛܗ ܥܠ ܕܝܢܐ
05:28	ܕܒܪܗ ܗܘ ܕܐܢܫܐ܂ ܘܠܐ ܬܬܕܡܪܘܢ ܒܗܕܐ܂ ܕܗܐ ܟܠܗܘܢ ܐܝܠܝܢ ܕܒܩ̈ܒܪܐ ܐܢܘܢ܂ ܢܫܡܥܘܢ ܩܠܗ ܕܐܠܗܐ ܘܢܚܘܢ
05:29	ܘܢܦܩܘܢ܂ ܘܐܝܠܝܢ ܕ̈ܥܒܕܝ ܛܒܬ̈ܐ ܐܢܘܢ ܢܗܘܘܢ ܠܩܝܡܬܐ ܕܚ̈ܝܐ܂ ܘܐܝܠܝܢ ܕܥܒ̈ܕܝ ܒܝ̈ܫܬܐ ܐܢܘܢ ܢܗܘܘܢ ܠܩܝܡܬܐ ܕܕܝܢܐ܂

05:30	ܠܐ ܡܫܟܚ ܐܢܐ ܡܕܡ ܡܢ ܨܒܘܬ ܪܥܝܢܝ ܠܡܥܒܕ܂ ܐܠܐ ܐܝܟܢܐ ܕܫܡܥ ܐܢܐ ܕܐܢ ܐܢܐ܂ ܘܕܝܢܝ ܟܐܢ ܗܘ܂ ܠܐ ܓܝܪ ܒܥܐ ܐܢܐ ܨܒܝܢܝ܂ ܐܠܐ ܒܥܐ ܐܢܐ ܨܒܝܢܗ ܕܡܢ ܕܫܕܪܢܝ܂

05:31	ܐܢ ܐܢܐ ܡܣܗܕ ܐܢܐ ܥܠ ܢܦܫܝ܂ ܣܗܕܘܬܝ ܠܐ ܗܘܬ ܫܪܝܪܐ܂
05:32	ܐܚܪܢ ܗܘ ܣܗܕ ܥܠܝ܂ ܘܝܕܥܝܢ ܐܢܬܘܢ ܕܫܪܝܪܐ ܗܝ ܣܗܕܘܬܗ ܕܐܣܗܕ ܥܠܝ܂
05:33	ܐܢܬܘܢ ܫܕܪܬܘܢ ܠܘܬ ܝܘܚܢܢ܂ ܘܐܣܗܕ ܒܫܪܪܐ܂
05:34	ܐܢܐ ܕܝܢ ܠܐ ܗܘܐ ܡܢ ܒܪ ܐܢܫܐ ܢܣܒ ܐܢܐ ܣܗܕܘܬܐ܂ ܐܠܐ ܗܠܝܢ ܐܡܪ ܐܢܐ ܕܐܢܬܘܢ ܬܚܘܢ܂
05:35	ܗܘ ܫܪܓܐ ܗܘܐ܂ ܕܝܩܕ ܘܡܢܗܪ܂ ܐܢܬܘܢ ܕܝܢ ܨܒܝܬܘܢ ܕܬܫܬܒܗܪܘܢ ܕܫܥܬܐ ܒܢܘܗܪܗ܂
05:36	ܐܝܬ ܠܝ ܕܝܢ ܣܗܕܘܬܐ ܕܪܒܐ ܡܢ ܕܝܘܚܢܢ܂ ܥܒ̈ܕܐ ܓܝܪ ܕܝܗܒ ܠܝ ܐܒܝ ܕܐܫܠܡ ܐܢܘܢ܂ ܗܢܘܢ ܥܒ̈ܕܐ ܕܥܒܕ ܐܢܐ ܣܗܕܝܢ ܥܠܝ ܕܐܒܐ ܫܠܚܢܝ܂
05:37	ܘܐܒܐ ܕܫܠܚܢܝ ܗܘ ܣܗܕ ܥܠܝ܂ ܠܐ ܩܠܗ ܡܢ ܡܬܘܡ ܫܡܥܬܘܢ܂ ܘܠܐ ܚܙܘܗ ܚܙܝܬܘܢ܂
05:38	ܘܠܐ ܡܠܬܗ ܡܩܘܝܐ ܒܟܘܢ܂ ܡܛܠ ܕܒܐܝܢܐ ܕܗܘ ܫܕܪ ܐܢܬܘܢ ܠܐ ܡܗܝܡܢܝܢ ܐܢܬܘܢ܂
05:39	ܒܨܘ ܠܟܬ̈ܒܐ ܕܒܗܘܢ ܣܒܪܝܢ ܐܢܬܘܢ ܕܬܚܘܢ ܠܥܠܡ܂ ܘܗܢܘܢ ܟܬ̈ܒܐ ܥܠܝ ܗܘ ܣܗܕܝܢ܂ ܗܢܘܢ ܕܣܒܪܝܢ ܐܢܬܘܢ ܕܒܗܘܢ ܐܝܬ ܠܟܘܢ ܚ̈ܝܐ܂ ܗܢܘܢ ܣܗܕܝܢ ܥܠܝ܂
05:40	ܘܠܘܬܝ ܠܐ ܨܒܝܢ ܐܢܬܘܢ ܕܬܐܬܘܢ܂ ܕܢܗܘܘܢ ܠܟܘܢ ܚ̈ܝܐ܂
05:41	ܫܘܒܚܐ ܡܢ ܒ̈ܢܝ ܐܢܫܐ ܠܐ ܢܣܒ ܐܢܐ܂
05:42	ܐܠܐ ܝܕܥܬܟܘܢ ܕܚܘܒܐ ܕܐܠܗܐ ܠܝܬ ܒܟܘܢ܂
05:43	ܐܢܐ ܐܬܝܬ ܒܫܡܗ ܕܐܒܝ ܘܠܐ ܡܩܒܠܝܢ ܐܢܬܘܢ ܠܝ܂ ܘܐܢ ܐܚܪܝܢ ܢܐܬܐ ܒܫܡ ܢܦܫܗ ܠܗ݀ܘ ܬܩܒܠܘܢ܂
05:44	ܐܝܟܢܐ ܡܫܟܚܝܢ ܐܢܬܘܢ ܠܡܗܝܡܢܘ܂ ܕܫܘܒܚܐ ܚܕ ܡܢ ܚܕ ܡܩܒܠܝܢ ܐܢܬܘܢ܂ ܘܫܘܒܚܐ ܕܡܢ ܚܕ ܐܠܗܐ ܠܐ ܒܥܝܢ ܐܢܬܘܢ܂
05:45	ܠܡܐ ܣܒܪܝܢ ܐܢܬܘܢ ܕܐܢܐ ܗܘ ܐܟܠ ܩܪ̈ܨܝܟܘܢ܂ ܡܘܫܐ ܗܘ ܐܟܠ ܩܪ̈ܨܝܟܘܢ܂ ܗܘ ܕܒܗ ܡܣܒܪܝܢ ܐܢܬܘܢ܂
05:46	ܐܠܘ ܓܝܪ ܒܡܘܫܐ ܗܝܡܢܬܘܢ ܗܘܝܬܘܢ܂ ܘܐܦ ܒܝ ܡܗܝܡܢܝܢ ܗܘܝܬܘܢ܂ ܗܘ ܓܝܪ ܥܠܝ ܗܘ ܟܬܒ܂
05:47	ܘܐܢ ܕܝܢ ܒܟ̈ܬܒܘܗܝ ܕܗܘ ܠܐ ܡܗܝܡܢܝܢ ܐܢܬܘܢ܂ ܐܝܟܢܐ ܒܡ̈ܠܝ ܡܗܝܡܢܝܢ ܐܢܬܘܢ܀