The Comprehensive Aramaic Lexicon

07:01	ܒܬܪ ܗܠܝܢ ܡܗܠܟ ܗܘܐ ܝܫܘܥ ܒܓܠܝܠܐ܂ ܠܐ ܓܝܪ ܐܝܬ ܗܘܐ ܠܗ ܫܘܠܛܢܐ ܠܡܗܠܟܘ ܒܝܗܘܕ܂ ܡܛܠ ܕܝܗ̈ܘܕܝܐ ܒܥܝܢ ܗܘܘ ܠܡܩܛܠܗ܀
07:02	ܘܩܪܒ ܗܘܐ ܥܕܥܕܐ ܕܝܗ̈ܘܕܝܐ ܕܡ̈ܛܠܐ܂
07:03	ܘܐܡܪܘ ܗܘܘ ܠܗ ܐܚ̈ܘܗܝ܂ ܫܢܐ ܠܟ ܡܟܐ ܘܙܠ ܠܝܗܘܕ܂ ܕܢܚܙܘܢ ܬܠܡ̈ܝܕܝܟ ܥܒ̈ܕܐ ܕܥܒܕ ܐܢܬ܂
07:04	ܠܝܬ ܓܝܪ ܐܢܫ ܕܥܒܕ ܡܕܡ ܒܛܘܫܝܝ ܘܨܒܐ ܕܢܗܘܐ ܒܓܠܝܐ܂ ܐܢ ܗܠܝܢ ܥܒܕ ܐܢܬ ܚܘܐ ܢܦܫܟ ܠܥܠܡܐ܂
07:05	ܥܕܡܐ ܓܝܪ ܠܗܝܕܝܢ ܐܦܠܐ ܐܚ̈ܘܗܝ ܗܝܡܢܘ ܗܘܘ ܒܗ܂
07:06	ܐܡܪ ܠܗܘܢ ܝܫܘܥ܂ ܙܒܢܝ ܥܕܡܐ ܠܗܫܐ ܠܐ ܡܛܐ܂ ܕܝܠܟܘܢ ܕܝܢ ܙܒܢܟܘܢ ܒܟܠܥܕܢ ܡܛܝܒ ܗܘ܂
07:07	ܘܠܐ ܡܫܟܚ ܥܠܡܐ ܠܡܣܢܟܘܢ܂ ܠܝ ܕܝܢ ܣܢܐ ܠܝ ܥܠܡܐ܂ ܡܛܠ ܕܡܣܗܕ ܐܢܐ ܥܠܘܗܝ ܕܒܝܫܝܢ ܐܢܘܢ ܥܒ̈ܕܘܗܝ܂
07:08	ܐܢܬܘܢ ܣܩܘ ܠܥܕܥܕܐ ܗܢܐ܂ ܐܢܐ ܠܐ ܣܠܩ ܐܢܐ ܠܥܕܥܕܐ܂ ܡܛܠ ܕܠܐ ܥܕܡܐ ܠܗܫܐ ܫܠܡ ܙܒܢܐ ܕܝܠܝ܂
07:09	ܟܕ ܗܠܝܢ ܐܡܪ܂ ܦܫ ܠܗ ܒܓܠܝܠܐ܂
07:10	ܘܟܕ ܣܠܩܘ ܐܚ̈ܘܗܝ܂ ܗܝܕܝܢ ܐܦ ܗܘ ܣܠܩ ܠܥܕܥܕܐ܂ ܠܐ ܥܝܢ ܒܓܠܐ ܐܠܐ ܒܛܘܫܝܝ܂

07:11	ܝܗ̈ܘܕܝܐ ܕܝܢ ܒܥܝܢ ܗܘܘ ܠܗ ܒܥܕܥܕܐ܂ ܘܐܡܪܝܢ ܗܘܘ ܐܝܟܘ ܗܘ܂

07:12	ܘܪܛܢܐ ܣܓܝܐܐ ܐܝܬ ܗܘܐ ܥܠܘܗܝ ܒܥܡܐ܂ ܘܐܝܬ ܗܘܘ ܕܐܡܪܝܢ ܕܛܒܐ ܗܘ܂ ܘܐܝܬ ܗܘܘ ܕܐܡܪܝܢ ܠܐ ܗܘܐ ܛܒܐ܂ ܐܠܐ ܡܛܥܐ ܥܡܐ ܗܘ܂
07:13	ܐܢܫ ܕܝܢ ܥܝܢܒܓܠܐ ܠܐ ܡܡܠܠ ܗܘܐ ܥܠܘܗܝ܂ ܡܛܠ ܕܚܠܬܐ ܕܝ̈ܗܘܕܝܐ܀
07:14	ܘܟܕ ܦܠܓܘ ܝܘ̈ܡܬܐ ܕܥܕܥܕܐ ܕܡ̈ܛܠܐ܂ ܣܠܩ ܝܫܘܥ ܠܗܝܟܠܐ܂ ܘܡܠܦ ܗܘܐ܂
07:15	ܘܡܬܕܡܪܝܢ ܗܘܘ ܝܗܘ̈ܕܝܐ ܘܐܡܪܝܢ܂ ܐܝܟܢܐ ܝܕܥ ܗܢܐ ܣܦܪܐ ܕܠܐ ܝܠܦ܂
07:16	ܐܡܪ ܠܗܘܢ ܝܫܘܥ܂ ܝܘܠܦܢܝ ܠܐ ܗܘܐ ܕܝܠܝ܂ ܐܠܐ ܕܡܢ ܕܫܕܪܢܝ܂
07:17	ܘܡܢ ܕܨܒܐ ܕܢܥܒܕ ܨܒܝܢܗ܂ ܝܕܥ ܝܘܠܦܢܐ ܗܢܐ ܐܢ ܡܢ ܐܠܗܐ ܗܘ܂ ܐܘ ܐܢܐ ܡܢ ܨܒܘܬ ܢܦܫܝ ܡܡܠܠ ܐܢܐ܂
07:18	ܡܢ ܕܡܢ ܨܒܘܬ ܪܥܝܢܗ ܓܝܪ ܡܡܠܠ܂ ܫܘܒܚܐ ܕܢܦܫܗ ܒܥܐ܂ ܘܡܢ ܕܫܘܒܚܐ ܕܡܢ ܕܫܕܪܗ ܒܥܐ܂ ܫܪܝܪ ܗܘ ܘܥܘܠܐ ܠܝܬ ܒܗ܂
07:19	ܠܐ ܗܘܐ ܡܘܫܐ ܝܗܒ ܠܟܘܢ ܐܘܪܝܬܐ܂ ܘܠܐ ܐܢܫ ܡܢܟܘܢ ܢܛܪ ܦܘܩ̈ܕܢܝܗ܂
07:20	ܠܝ ܠܡܢܐ ܒܥܝܢ ܐܢܬܘܢ ܠܡܩܛܠܢܝ܂ ܐܡܪܝܢ ܠܗ ܐ̈ܢܫܐ ܕܝܘܐ ܐܝܬ ܒܟ܂ ܡܢܘ ܒܥܐ ܠܡܩܛܠܟ܂
07:21	ܐܡܪ ܠܗܘܢ ܝܫܘܥ܂ ܚܕ ܥܒܕܐ ܥܒܕܬ ܠܥܢ̈ܝܟܘܢ܂ ܘܟܠܟܘܢ ܡܬܕܡܪܝܢ ܐܢܬܘܢ܂
07:22	ܡܛܠ ܗܢܐ ܡܘܫܐ ܝܗܒ ܠܟܘܢ ܓܙܘܪܬܐ܂ ܠܐ ܗܘܐ ܡܛܠ ܕܡܢܗ ܗܝ ܡܢ ܡܘܫܐ܂ ܐܠܐ ܡܛܠ ܕܡܢ ܐܒ̈ܗܝܟܘܢ ܗܝ܂ ܘܒܝܘܡܐ ܕܫܒܬܐ ܓܙܪܝܢ ܐܢܬܘܢ ܒܪܢܫܐ܂
07:23	ܘܐܢ ܒܪܢܫܐ ܡܬܓܙܪ ܒܫܒܬܐ ܕܠܐ ܢܫܬܪܐ ܢܡܘܣܐ ܕܡܘܫܐ܂ ܥܠܝ ܪܛܢܝܢ ܐܢܬܘܢ ܕܠܟܠܗ ܒܪܢܫܐ ܐܚܠܡܬ ܒܝܘܡܐ ܕܫܒܬܐ܂
07:24	ܠܐ ܬܗܘܘܢ ܕܝܢܝܢ ܐ̈ܦܝܢ ܐ̈ܦܝܢ܂ ܐܠܐ ܕܝܢܐ ܟܐܢܐ ܕܘܢܘ܂
07:25	ܘܐܡܪܝܢ ܗܘܘ ܐܢܫܐ ܡܢ ܒ̈ܢܝ ܐܘܪܫܠܡ܂ ܠܐ ܗܘܐ ܗܢܐ ܗܘ ܕܒܥܝܢ ܗܘܘ ܠܡܩܛܠ܂
07:26	ܘܗܐ ܥܝܢ ܒܓܠܐ ܩܐܡ ܘܡܡܠܠ܂ ܘܐܢܫ ܡܕܡ ܠܐ ܐܡܪ ܠܗ܂ ܟܒܪ ܫܪܝܪܐܝܬ ܝܕܥܘ ܩܫ̈ܝܫܝܢ ܕܗܢܐ ܗܘ ܡܫܝܚܐ܂
07:27	ܐܠܐ ܠܗܢܐ ܗܐ ܝܕܥܝܢ ܚܢܢ ܠܗ ܡܢ ܐܝܡܟܐ ܗܘ܂ ܘܡܫܝܚܐ ܐܡܬܝ ܕܐܬܐ܂ ܠܐ ܐܢܫ ܝܕܥ ܡܢ ܐܝܡܟܐ ܗܘ܀
07:28	ܘܐܪܝܡ ܗܘܐ ܝܫܘܥ ܩܠܗ ܒܗܝܟܠܐ܂ ܟܕ ܡܠܦ ܘܐܡܪ܂ ܠܝ ܝܕܥܝܢ ܐܢܬܘܢ܂ ܘܡܢ ܐܝܡܟܐ ܐܢܐ܂ ܝܕܥܝܢ ܐܢܬܘܢ܂ ܡܢ ܨܒܘܬ ܢܦܫܝ ܠܐ ܐܬܝܬ܂ ܐܠܐ ܫܪܝܪ ܗܘ ܡܢ ܕܫܕܪܢܝ܂ ܗܘ ܐܝܢܐ ܕܐܢܬܘܢ ܠܐ ܝܕܥܝܢ ܐܢܬܘܢ ܠܗ܂
07:29	ܐܢܐ ܕܝܢ ܝܕܥ ܐܢܐ ܠܗ܂ ܕܠܘܬܗ ܐܢܐ܂ ܘܗܘ ܫܕܪܢܝ܂
07:30	ܘܒܥܘ ܗܘܘ ܠܡܐܚܕܗ܂ ܘܠܐ ܐܢܫ ܐܪܡܝ ܥܠܘܗܝ ܐ̈ܝܕܝܐ܂ ܡܛܠ ܕܠܐ ܐܬܬ ܗܘܬ ܫܥܬܗ܂
07:31	ܘܣ̈ܓܝܐ ܡܢ ܟܢܫܐ ܗܝܡܢܘ ܗܘܘ ܒܗ܂ ܘܐܡܪܝܢ ܗܘܘ ܡܐ ܕܐܬܐ ܡܫܝܚܐ ܕܠܡܐ ܕܝ̈ܬܝܪܢ ܡܢ ܗܠܝܢ ܐ̈ܬܘܬܐ ܕܥܒܕ ܗܢܐ ܥܒܕ܂
07:32	ܘܫܡܥܘ ܦܪ̈ܝܫܐ ܕܪܛܢܘ ܥܠܘܗܝ ܐܢܫܐ܂ ܘܫܕܪܘ ܪܒ̈ܝ ܟ̈ܗܢܐ ܘܦܪ̈ܝܫܐ ܕܢܐܚܕܘܢܗ܂
07:33	ܘܐܡܪ ܝܫܘܥ ܩܠܝܠ ܐܚܪܢ ܙܒܢܐ ܥܡܟܘܢ ܐܢܐ܂ ܘܐܙܠ ܐܢܐ ܠܝ ܠܘܬ ܡܢ ܕܫܕܪܢܝ܂
07:34	ܘܬܒܥܘܢܢܝ ܘܠܐ ܬܫܟܚܘܢܢܝ܂ ܘܐܬܪ ܕܐܢܐ ܐܙܠܢܐ ܐܢܬܘܢ ܠܐ ܡܫܟܚܝܢ ܐܢܬܘܢ ܠܡܐܬܐ܂
07:35	ܐܡܪܝܢ ܝܗ̈ܘܕܝܐ ܚܕ ܠܚܕ܂ ܠܐܝܟܐ ܟܝ ܐܙܠ ܗܢܐ ܕܠܐ ܡܫܟܚܝܢ ܐܢܚܢܢ ܠܗ ܠܡܐ ܟܝ ܠܙܪܥܐ ܕܐܪ̈ܡܝܐ ܐܙܠ ܡܠܦ܂ ܕܠܐ ܡܫܟܚܝܢ ܐܢܚܢܢ ܠܗ܂
07:36	ܐܘ ܡܢܐ ܗܝ ܡܠܬܐ ܗܕܐ ܕܐܡܪ ܕܬܒܥܘܢܢܝ ܘܠܐ ܬܫܟܚܘܢܢܝ܂ ܘܐܬܪ ܕܐܢܐ ܠܐ ܡܫܟܚܝܢ ܐܢܬܘܢ ܠܡܐܬܐ܀
07:37	ܘܒܝܘܡܐ ܪܒܐ ܕܥܕܥܕܐ ܩܐܡ ܗܘܐ ܝܫܘܥ ܘܩܥܐ ܘܐܡܪ܂ ܡܢ ܕܨܗܐ ܢܐܬܐ ܠܘܬܝ ܘܢܫܬܐ܂
07:38	ܟܘܠ ܡܢ ܕܡܗܝܡܢ ܒܝ ܐܝܟܢܐ ܕܐܡܪ ܟܬܒܐ܂ ܢܗ̈ܪܘܬܐ ܕܡ̈ܝܐ ܚ̈ܝܐ ܢܪܕܘܢ ܡܢ ܟܪܣܗ܂
07:39	ܗܕܐ ܕܝܢ ܐܡܪ ܥܠ ܪܘܚܐ ܕܥܬܝܕܝܢ ܗܘܘ ܠܡܩܒܠܘ ܐܝܠܝܢ ܕܡܗܝܡܢܝܢ ܗܘܘ ܒܗ܂ ܥܕܡܐ ܓܝܪ ܠܗܘ ܙܒܢܐ ܠܐ ܐܬܝܗܒܬ ܗܘܬ ܪܘܚܐ܂ ܡܛܠ ܕܠܐ ܩܒܠ ܗܘܐ ܥܕܡܐ ܠܗܝ ܫܥܬܐ ܫܘܒܚܐ ܝܫܘܥ܂
07:40	ܘܐܢܫܐ ܡܢ ܟܢܫܐ ܕܫܡܥܘ ܡ̈ܠܘܗܝ ܐܡܪܝܢ ܗܘܘ܂ ܕܫܪܝܪܐܝܬ ܗܢܐ ܗܘ ܢܒܝܐ܂
07:41	ܐܚ̈ܪܢܐ ܐܡܪܝܢ ܗܘܘ ܗܢܐ ܗܘ ܡܫܝܚܐ܂ ܐܚ̈ܪܢܐ ܐܡܪܝܢ ܗܘܘ ܐܝܟܢܐ ܡܢ ܓܠܝܠܐ ܐܬܐ ܡܫܝܚܐ܂
07:42	ܠܐ ܗܘܐ ܗܟܢܐ ܟܬܝܒ܂ ܕܡܢ ܙܪܥܗ ܕܕܘܝܕ ܢܗܘܐ܂ ܘܡܢ ܒܝܬ ܠܚܡ ܩܪܝܬܐ ܕܝܠܗ ܕܕܘܝܕ ܐܬܐ ܡܫܝܚܐ܂
07:43	ܘܗܘܬ ܗܘܬ ܦܠܓܘܬܐ ܒܟܢܫܐ ܡܛܠܬܗ܂
07:44	ܘܐܝܬ ܗܘܘ ܡܢܗܘܢ ܕܨܒܝܢ ܗܘܘ ܕܢܐܚܕܘܢܗ܂ ܐܠܐ ܠܐ ܐܢܫ ܐܪܡܝ ܥܠܘܗܝ ܐ̈ܝܕܝܐ܂
07:45	ܘܗܦܟܘ ܗܢܘܢ ܕܚ̈ܫܐ ܠܘܬ ܪ̈ܒܝ ܟܗ̈ܢܐ ܘܦܪ̈ܝܫܐ܂ ܘܐܡܪܝܢ ܠܗܘܢ ܗܢܘܢ ܦܪ̈ܝܫܐ܂ ܐܝܟܘ ܠܐ ܐܝܬܝܬܘܢܝܗܝ܂
07:46	ܐܡܪܝܢ ܠܗܘܢ ܕܚ̈ܫܐ ܠܐ ܡܢ ܡܬܘܡ ܡܠܠ ܒܪ ܐܢܫܐ ܡܕܡ ܕܡܡܠܠ ܓܒܪܐ ܗܢܐ܂
07:47	ܐܡܪܝܢ ܠܗܘܢ ܦܪ̈ܝܫܐ ܕܠܡܐ ܐܦ ܐܢܬܘܢ ܡܛܥܐ ܛܥܝܢ ܐܢܬܘܢ܂
07:48	ܡܢ ܓܝܪ ܡܢ ܪ̈ܫܐ ܐܘ ܡܢ ܦܪ̈ܝܫܐ ܗܝܡܢܘ ܒܗ܂
07:49	ܐܠܐ ܐܢ ܩܘܛܢܐ ܐܝܢܐ ܕܠܐ ܝܕܥ ܐܘܪܝܬܐ ܕܠܝܛܝܢ ܐܢܘܢ܂
07:50	ܐܡܪ ܠܗܘܢ ܢܝܩܕܡܘܣ ܗܘ ܕܐܙܠ ܗܘܐ ܠܘܬܗ ܒܠܠܝܐ܂
07:51	ܕܠܡܐ ܠܘܩܕܡ ܐܘܪܝܬܐ ܕܝܢܐ ܠܒܪܢܫܐ ܥܕܠܐ ܢܫܡܥ ܡܢܗ ܘܢܕܥ ܡܢܐ ܥܒܕ܂
07:52	ܐܡܪܝܢ ܕܠܡܐ ܐܦ ܐܢܬ ܡܢ ܓܠܝܠܐ ܐܢܬ܂ ܒܨܝ ܘܚܙܝ ܕܢܒܝܐ ܡܢ ܓܠܝܠܐ ܠܐ ܩܡ