← Back
The Comprehensive Aramaic Lexicon
← Return to the Text Browser
click on the file description for more information

60043: OS Jn

Click on a word for lexical analysis
Click on a red-colored coordinate for comments and/or translations of the line

previous chapter


03:01 ܘܐܝܬ ܗܘܐ ܕܝܢ ܬܡܢ ܓܒܪܐ ܡܢ ܦܪܝܫܐ ܫܡܗ ܗܘܐ ܢܝܩܕܡܘܣ܂ ܘܗܘ ܗܢܐ ܓܒܪܐ ܐܪܟܘܢܐ ܗܘܐ ܕܝܗܘܕܝܐ
03:02 ܐܬܐ ܠܘܬ ܡܪܢ ܒܠܝܠܐ ܘܐܡܪ ܠܗ ܪܒܝ ܝܕܥܝܢ ܐܢܚܢܢ ܕܡܢ ܐܠܗܐ ܐܫܬܕܪܬ ܠܢ ܡܠܦܢܐ ܡܛܠ ܕܠܐ ܐܢܫ ܡܫܟܚ ܗܠܝܢ ܢܣܐ ܠܡܥܒܕ ܐܠܐ ܡܢ ܕܐܠܗܐ ܥܡܗ
03:03 ܐܡܪ ܠܗ ܡܪܢ ܐܡܝܢ ܐܡܝܢ ܐܡܪܢܐ ܠܟ ܕܐܢ ܐܢܫ ܠܐ ܡܬܝܠܕ ܡܢ ܕܪܫ ܠܐ ܡܫܟܚ ܕܢܚܙܐ ܡܠܟܘܬܗ ܕܐܠܗܐ
03:04 ܐܡܪ ܠܗ ܢܝܩܕܡܘܣ ܐܝܟܢܐ ܡܫܟܚ ܕܢܬܝܠܕ ܓܒܪܐ ܣܒܐ ܕܠܡܐ ܡܫܟܚ ܬܘܒ ܠܟܪܣܗ ܕܐܡܗ ܠܡܥܠ ܘܡܕܪܫ ܠܡܬܝܠܕܘ
03:05 ܐܡܪ ܠܗ ܡܪܢ ܐܡܝܢ ܐܡܝܢ ܐܡܪܢܐ ܠܟ ܕܐܢ ܐܢܫ ܠܐ ܡܬܝܠܕ ܡܢ ܪܘܚܐ ܘܡܝܐ܂ ܠܐ ܡܫܟܚ ܠܡܥܠ ܠܡܠܟܘܬܗ ܕܐܠܗܐ܂
03:06 ܡܕܡ ܕܝܠܝܕ ܡܢ ܒܣܪܐ ܒܣܪܐ ܗܘ܂ ܘܡܕܡ ܕܝܠܝܕ ܡܢ ܪܘܚܐ ܪܘܚܐ ܗܘ ܡܛܠ ܕܐܠܗܐ ܪܘܚܐ ܗܘ ܚܝܐ
03:07 ܘܠܐ ܬܬܕܡܪ ܕܐܡܪܬ ܠܟܘܢ ܠܡܬܝܠܕܘ ܠܟܘܢ

03:08 ܪܘܚܐ ܐܬܪ ܕܨܒܝܐ ܢܫܒܐ ܘܩܠܗ ܫܡܥ ܐܢܬ ܐܠܐ ܠܐ ܡܢ ܐܝܡܟܐ ܐܬܬ ܝܕܥ ܐܢܬ ܘܠܐ ܠܐܝܠܟܐ ܐܙܠܐ ܗܟܢܐ ܐܢܘܢ ܐܝܠܝܢ ܕܝܠܝܕܝܢ ܡܢ ܡ̈ܝܐ ܘܪܘܚܐ

03:09 ܐܡܪ ܠܗ ܢܝܩܕܝܡܘܣ ܐܝܟܢܐ ܡܫܟܚܐ ܗܕܐ ܠܡܗܘܐ܂
03:10 ܐܡܪ ܠܗ ܡܪܢ ܐܢܬ ܗܘ ܡܠܦܢܗ ܕܐܝܣܪܐܝܠ ܘܗܠܝܢ ܠܐ ܝܕܥ ܐܢܬ܂
03:11 ܐܡܝܢ ܐܡܪܢܐ ܠܟ ܕܡܕܡ ܕܝܕܥܝܢ ܐܢܚܢܢ ܡܡܠܠܝܢ ܐܢܚܢܢ ܘܡܕܡ ܕܚܙܝܢ ܐܢܚܢܢ ܡܣܗܕܝܢ ܐܢܚܢܢ ܘܣܗܕܘܬܢ ܠܐ ܡܩܒܠܝܢ ܐܢܬܘܢ
03:12 ܐܢ ܥܠ ܐܝܠܝܢ ܕܒܐܪܥܐ ܐܢܝܢ ܐܡܪܬ ܠܟܘܢ ܘܠܐ ܡܗܝܡܢܝܢ ܐܢܬܘܢ ܐܝܟܢܐ ܐܢ ܥܠ ܐܝܠܝܢ ܕܒܫܡܝܐ ܐܢܝܢ ܐܡܪ ܠܟܘܢ ܬܗܝܡܢܘܢܢܝ܂
03:13 ܘܠܐ ܐܢܫ ܣܠܩ ܠܫܡܝܐ ܐܠܐ ܗܘ ܕܢܚܬ ܡܢ ܫܡܝܐ ܒܪܗ ܕܐܢܫܐ ܗܘ ܕܐܝܬܘܗܝ ܡܢ ܫܡܝܐ
03:14 ܘܐܝܟܢܐ ܕܐܪܝܡ ܗܘܐ ܡܘܫܐ ܚܘܝܐ ܒܡܕܒܪܐ܂ ܗܟܢܐ ܗܘܐ ܠܗ ܠܡܬܬܪܡܘ ܠܒܪܗ ܕܐܢܫܐ
03:15 ܕܟܘܠ ܡܢ ܕܡܗܝܡܢ ܒܗ ܠܐ ܢܐܒܕ ܐܠܐ ܢܗܘܘܢ ܠܗ ܚܝܐ ܕܠܥܠܡ
03:16 ܗܟܢܐ ܓܝܪ ܐܚܒ ܐܠܗܐ ܠܥܠܡܐ ܐܝܟܢܐ ܕܠܒܪܗ ܝܚܝܕܗ ܫܕܪ ܕܟܘܠ ܡܢ ܕܢܗܝܡܢ ܒܗ ܠܐ ܢܐܒܕ ܐܠܐ ܚܝܐ ܕܠܥܠܡ ܐܝܬ ܠܗ
03:17 ܠܐ ܓܝܪ ܫܕܪ ܐܠܗܐ ܠܒܪܗ ܕܢܕܘܢܘܗܝ ܠܥܠܡܐ ܐܠܐ ܕܥܠܡܐ ܒܗ ܢܚܐ
03:18 ܡܢ ܕܡܗܝܡܢ ܒܗ ܠܐ ܡܬܕܝܢ ܘܡܢ ܕܠܐ ܡܗܝܡܢ ܒܗ ܕܝܢ ܥܠ ܕܠܐ ܗܝܡܢ ܒܫܡܗ ܕܒܪܐ ܒܚܝܪܐ
03:19 ܗܢܘ ܕܝܢܐ ܕܐܬܐ ܢܘܗܪܐ ܠܥܠܡܐ ܘܥܠܡܐ ܪܚܡ ܠܚܫܘܟܐ ܝܬܝܪ ܡܢ ܕܠܢܘܗܪܐ ܡܛܠ ܕܒܝܫܝܢ ܥܒܕܘܗܝ
03:20 ܟܘܠ ܡܢ ܕܣܢܝܬܐ ܓܝܪ ܥܒܕ ܣܢܐ ܠܢܘܗܪܐ ܘܠܐ ܐܬܐ ܠܢܘܗܪܐ ܕܠܐ ܢܬܚܙܘܢ ܥܒܕܘܗܝ
03:21 ܘܡܢ ܕܥܒܕ ܫܦܝܪ̈ܬܐ ܡܬܩܪܒ ܠܘܬ ܢܘܗܪܐ ܕܢܬܚܙܐ ܥܒܕܗ ܕܒܐܠܗܐ ܥܒܝܕܝܢ܀
03:22 ܘܡܢ ܒܬܪ ܗ̈ܠܝܢ ܐܬܐ ܠܗ ܡܪܢ ܘܬܠܡܝܕܘܗܝ ܠܝܗܘܕ ܘܬܡܢ ܥܡܕ ܗܘܐ܂ ܘܥܡܕ ܥܡܗܘܢ
03:23 ܘܐܦ ܝܘܚܢܢ ܡܥܡܕ ܗܘܐ ܒܥܝܢ ܢܘܢ ܕܥܠ ܓܢܒ ܫܠܝܡ ܡܛܠ ܕܡ̈ܝܐ ܐܝܬ ܗܘܐ ܬܡܢ ܣܓܝܐܐ ܘܐܬܝܢ ܗܘܘ ܐܢܫܐ ܘܥܡܕܝܢ
03:24 ܡܛܠ ܕܠܐ ܢܦܠ ܗܘܐ ܥܕܡܐ ܠܗܫܐ ܒܝܬ ܐܣܝܪܐ ܝܘܚܢܢ܀
03:25 ܗܘܬ ܗܘܬ ܕܝܢ ܒܥܬܐ ܠܚܕ ܡܢ ܬܠܡܝܕܘܗܝ ܕܝܘܚܢܢ ܥܡ ܝܗܘܕܝܐ ܥܠ ܬܕܟܝܬܐ
03:26 ܘܐܬܘ ܠܘܬ ܝܘܚܢܢ ܘܐܡܪ̈ܝܢ ܠܗ ܪܒܢ ܗܘ ܕܥܡܟ ܗܘܐ ܒܥܒܪܐ ܕܝܘܪܕܢܢ ܘܐܢܬ ܣܗܕܬ ܥܠܘܗܝ ܗܐ ܐܦ ܗܘ ܡܥܡܕ ܘܣ̈ܓܝܐܐ ܠܘܬܗ ܐܬܝܢ
03:27 ܐܡܪ ܠܗܘܢ ܝܘܚܢܢ ܠܐ ܡܫܟܚ ܒܪ ܐܢܫܐ ܠܡܣܒ ܐܦܠܐ ܡܕܡ ܐܠܐ ܐܢ ܐܬܝܗܒ ܠܗ ܡܢ ܫܡܝܐ܂
03:28 ܐܢܬܘܢ ܕܝܢ ܣܗܕܘ ܠܝ ܕܐܡܪܬ ܕܐܢܐ ܠܐ ܗܘܝܬ ܡܫܝܚܐ܂ ܐܠܐ ܫܠܝܚܐ ܐܢܐ ܕܡܢ ܩܕܡܘܗܝ
03:29 ܡܛܠ ܕܡܢ ܕܐܝܬ ܠܗ ܟܠܬܐ ܗܘܝܘ ܚܬܢܐ ܘܪܚܡܗ ܕܚܬܢܐ ܗܘ ܡܢ ܕܩܐܡ ܘܨܐܬ ܠܗ܂ ܘܚܕܘܬܐ ܪܒܬܐ ܚܕܐ ܡܛܠ ܩܠܗ ܕܚܬܢܐ ܗܕܐ ܚܕܘܬܝ ܗܐ ܡܛܠܩܐ ܗܝ ܗܟܝܠ
03:30 ܠܗ ܗܘ ܘܠܐ ܠܡܪܒܐ ܘܠܝ ܠܡܒܨܪ
03:31 ܡܛܠ ܕܗܘ ܕܝܢ ܕܡܢ ܠܥܠ ܐܬܐ ܠܥܠ ܡܢ ܟܘܠ ܗܘ ܘܐܝܢܐ ܕܡܢ ܐܪܥܐ ܗܘ ܒܐܪܥܐ ܗܘ ܘܡܢ ܐܪܥܐ ܡܡܠܠ ܘܐܝܢܐ ܕܡܢ ܫܡܝܐ ܐܬܐ ܠܥܠ ܡܢ ܟܘܠܗܘܢ ܗܘ
03:32 ܘܡܕܡ ܕܫܡܥ ܐܘ ܚܙܐ ܡܣܗܕ
03:33 ܗܘ ܕܝܢ ܕܩܒܠ ܣܗܕܘܬܗ ܚܬܡ ܕܫܪܪܐ ܐܠܗܐ ܗܘ
03:34 ܡܛܠ ܕܐܝܢܐ ܕܐܠܗܐ ܫܠܚ ܡܠܐ ܗܘ ܕܐܠܗܐ ܡܡܠܠ ܕܠܐ ܗܘܐ ܓܝܪ ܒܟܝܠܬܐ ܝܗܒ ܐܠܗܐ ܐܒܐ
03:35 ܐܠܐ ܠܒܪܗ ܪܚܡ ܘܝܗܒ ܟܠ ܒܐܝܕܘܗܝ
03:36 ܡܢ ܕܡܗܝܡܢ ܒܒܪܐ ܐܝܬ ܠܗ ܚܝܐ ܕܠܥܠܡ ܘܐܝܢܐ ܕܠܐ ܡܗܝܡܢ ܠܒܪܐ ܠܐ ܢܚܙܐ ܚܝܐ ܐܠܐ ܪܘܓܙܗ ܕܐܠܗܐ ܢܗܘܐ ܥܠܘܗܝ

next chapter