The Comprehensive Aramaic Lexicon

04:01	ܟܕ ܕܝܢ ܝܕܥ ܡܪܢ ܕܫܡܥܘ ܦܪܝܫܐ ܣܓܝ ܕܬܠܡܝܕܐ ܣܓܝܐܐ ܥܒܕ ܗܘܐ ܝܬܝܪ ܡܢ ܝܘܚܢܢ
04:02	ܡܛܠ ܕܠܐ ܗܘܐ ܗܘ ܡܪܢ ܒܠܚܘܕ ܡܥܡܕ ܗܘܐ ܐܠܐ ܬܠܡܝܕܘܗܝ
04:03	ܘܫܒܩܗ ܠܝܗܘܕ ܘܐܙܠ ܠܗ ܬܘܒ ܠܓܠܝܠܐ
04:04	ܟܕ ܥܒܪ ܗܘܐ ܒܐܬܪ̈ܐ ܕܫܡܪܝܐ
04:05	ܘܐܬܐ ܗܘܐ ܠܟܪܟܐ ܚܕ ܕܫܡܪ̈ܝܐ ܕܡܬܩܪܐ ܗܘܐ ܫܟܝܡ ܠܘܩܒܠ ܩܪܝܬܐ ܗܝ ܕܝܗܒ ܗܘܐ ܝܥܩܘܒ ܠܝܘܣܦ ܒܪܗ
04:06	ܘܐܝܬ ܗܘܐ ܬܡܢ ܡܥܝܢܐ ܕܡ̈ܝܐ ܕܝܥܩܘܒ ܘܐܬܐ ܡܪܢ ܘܝܬܒ ܠܥܠ ܡܢܗ ܕܡܥܝܢܐ ܐܝܟ ܕܢܬܢܝܚ ܡܢ ܥܡܠܐ ܕܐܘܪܚܐ ܘܟܕ ܗܘ ܡܪܢ ܝܬܒ ܐܝܬ ܗܘܝ ܫ̈ܥܐ ܫܬ
04:08	ܘܬܠܡܝܕܘܗܝ ܥܠܘ ܗܘܘ ܠܗܘܢ ܠܗܘ ܟܪܟܐ ܕܢܙܒܢܘܢ ܠܗܘܢ ܣܝܒܪܬܐ
04:07	ܘܐܬܬ ܐܢܬܬܐ ܚܕܐ ܡܢ ܫܡܪܝܢ ܕܬܡܠܐ ܡܝܐ ܘܐܡܪ ܠܗ ܡܪܢ ܗܒܝ ܠܝ ܡܝ̈ܐ ܐܫܬܐ
04:09	ܐܡܪܐ ܠܗ ܗܝ ܐܢܬܬܐ ܫܡܪܝܬܐ ܗܐ ܐܢܬ ܝܗܘܕܝܐ ܐܢܬ ܐܝܟܢܐ ܫܐܠ ܐܢܬ ܠܝ ܡ̈ܝܐ ܠܡܫܬܐ܂ ܡܛܘܠ ܕܝܗܘ̈ܕܝܐ ܠܐ ܡܬܚܫܚܝܢ ܥܡ ܫܡܪܝܐ܂
04:10	ܐܡܪ ܠܗ ܐܠܘ ܝܕܥܐ ܗܘܝܬܝ ܡܘܗܒܬܐ ܕܐܠܗܐ ܘܡܢܘ ܗܢܐ ܕܐܡܪ ܠܟܝ ܗܒܝ ܠܝ ܐܫܬܐ ܐܢܬܝ ܫܐܠܐ ܗܘܝܬܝ ܠܗ ܘܝܗܒ ܗܘܐ ܠܟܝ ܡ̈ܝܐ ܚܝ̈ܐ܂
04:11	ܐܡܪܐ ܠܗ ܐܦܠܐ ܕܘܠܐ ܐܝܬ ܠܟ ܘܒܪܐ ܥܡܝܩܐ ܗܝ ܡܢ ܐܝܡܟܐ ܐܝܬ ܠܟ ܡܝܐ ܚܝܐ
04:12	ܕܠܡܐ ܐܢܬ ܪܒ ܐܢܬ ܡܢ ܝܥܩܘܒ ܐܒܘܢ ܕܗܘ ܝܗܒ ܠܢ ܒܪܐ ܗܕܐ ܘܐܦ ܗܘ ܡܢܗ ܐܫܬܝ ܘܒܢܘܗܝ ܘܥܢܗ
04:13	ܐܡܪ ܠܗ ܡܪܢ ܟܠ ܕܢܫܬܐ ܡܢ ܗܠܝܢ ܡܝܐ ܬܘܒ ܢܨܗܐ
04:14	ܘܟܠ ܕܢܫܬܐ ܡܢ ܡܝܐ ܕܐܢܐ ܐܬܠ ܠܗ ܠܐ ܢܨܗܐ ܠܥܠܡ ܐܠܐ ܡܝܐ ܗܢܘܢ ܕܝܗܒ ܐܢܐ ܠܗ ܢܗܘܘܢ ܒܗ ܡܥܝܢܐ ܕܡܝ̈ܐ ܕܪܕܝܢ ܠܚܝܐ ܕܠܥܠܡ

04:15	ܐܡܪܐ ܠܗ ܗܝ ܐܢܬܬܐ ܡܪܝ ܗܒ ܠܝ ܐܫܬܐ ܡܢ ܗܠܝܢ ܡܝܐ ܕܠܐ ܗܘܝܬ ܨܗܝܐ ܘܐܬܝܐ ܕܠܝܐ ܡܢ ܗܡܟܐ܂

04:16	ܐܡܪ ܠܗ ܡܪܢ ܙܠܝ ܩܪܝ ܠܝ ܠܒܥܠܟܝ܂ ܘܬܝ ܠܗܪܟܐ܂
04:17	ܐܡܪܐ ܠܗ ܠܝܬ ܠܝ ܒܥܠܐ ܐܡܪ ܠܗ ܡܪܢ ܫܦܝܪ ܐܡܪܬܝ ܕܠܝܬ ܠܝ ܒܥܠܐ
04:18	ܡܛܠ ܕܚܡܫ̈ܐ ܒܥ̈ܠܝܢ ܗܘܘ ܠܟܝ܂ ܘܗܢܐ ܕܐܝܬ ܠܟܝ ܗܫܐ ܠܐ ܗܘܐ ܒܥܠܟܝ܂ ܗܕܐ ܫܪܝܪܬܐ ܐܡܪܬܝ܂
04:19	ܐܡܪܐ ܠܗ ܡܪܝ ܚܙܝܢܐ ܕܢܒܝܐ ܐܢܬ܂
04:20	ܐܒܗܝܢ ܒܗܢܐ ܛܘܪܐ ܣܓܕܘ܂ ܘܐܢܬܘܢ ܐܡܪܝܢ ܐܢܬܘܢ ܕܒܐܘܪܫܠܡ ܗܘ ܒܝܬ ܣܓܕܬܐ܂
04:21	ܐܡܪ ܠܗ ܡܪܢ ܐܢܬܬܐ ܗܝܡܢܢܝ܂ ܕܐܬܝܐ ܫܥܬܐ ܕܠܐ ܒܗܢܐ ܛܘܪܐ ܘܠܐ ܒܐܘܪܫܠܡ ܬܣܓܕܘܢ ܠܐܒܐ܂
04:22	ܐܢܬܘܢ ܣܓܕܝܢ ܐܢܬܘܢ ܠܡܐ ܕܠܐ ܝܕܥܝܢ ܐܢܬܘܢ ܘܐܢܚܢܢ ܣܓܕܝܢ ܐܢܚܢܢ ܠܡܐ ܕܝܕܥܝܢ ܐܢܚܢܢ ܕܚ̈ܝܐ ܡܢ ܝܗܘܕܐ ܐܢܘܢ
04:23	ܐܠܐ ܗܐ ܐܬܝܐ ܫܥܬܐ ܘܗܫܐ ܐܝܬܝܗ ܕܣ̈ܓܘܕܐ ܫܪܝܪ̈ܐ ܢܣܓܕܘܢ ܠܐܒܐ ܒܪܘܚܐ ܘܒܫܪܪܐ܂ ܘܐܦ ܐܒܐ ܓܝܪ ܗܠܝܢ ܐܢܘܢ ܣ̈ܓܘܕܐ ܒܥܐ܂
04:24	ܐܝܠܝܢ ܕܒܪܘܚܐ ܘܒܫܪܪܐ ܣܓܕܝܢ ܠܗ܂
04:25	ܐܡܪܐ ܗܝ ܐܢܬܬܐ ܗܐ ܡܫܝܚܐ ܐܬܐ ܘܡܐ ܕܐܬܐ ܟܘܠ ܡܕܡ ܢܬܠ
04:26	ܐܡܪ ܠܗ ܡܪܢ ܐܢܐ ܐܢܐ ܕܡܡܠܠܢܐ ܥܡܟܝ܂
04:27	ܘܟܕ ܗܢܘܢ ܡܡܠܠܝܢ ܐܬܘ ܬܠܡܝܕܘܗܝ ܘܡܬܕܡܪܝܢ ܗܘܘ ܕܥܡ ܐܢܬܬܐ ܩܐܡ ܘܡܡܠܠ ܡܐܡܪ ܕܝܢ ܠܐ ܐܡܪܘ ܠܗ ܕܐܘ ܡܢܐ ܒܥܝܬ ܐܘ ܡܢܐ ܐܡܪ ܗܘܝܬ ܠܗ
04:28	ܘܗܝ ܐܢܬܬܐ ܫܒܩܬ ܩܘܠܬܗ܂ ܘܪܗܛܬ ܠܡܕܝܢܬܐ ܘܐܡܪܐ
04:29	ܬܘ ܚܙܘ ܓܒܪܐ ܕܐܡܪ ܠܝ ܟܘܠ ܡܕܡ ܕܥܒܕܬ ܠܡܐ ܗܘܝܘ ܡܫܝܚܐ
04:30	ܘܟܘܠ ܕܫܡܥ ܢܦܩ ܗܘܐ ܠܘܬܗ
04:31	ܘܒܥܝܢ ܗܘܘ ܬܠܡܝܕܘܗܝ ܕܢܐܟܘܠ ܥܡܗܘܢ ܠܚܡܐ
04:32	ܐܡܪ ܠܗܘܢ ܐܝܬ ܠܝ ܡܐܟܘܠܬܐ ܕܐܟܘܠ ܐܝܕܐ ܕܐܢܬܘܢ ܠܐ ܝܕܥܝܢ ܐܢܬܘܢ ܠܗ
04:33	ܐܡܪܝܢ ܗܢܘܢ ܚܕ ܠܚܕ ܠܡܐ ܟܝ ܐܢܫ ܐܝܬܝ ܠܗ ܡܕܡ ܠܡܐܟܠ܂
04:34	ܐܡܪ ܠܗܘܢ ܡܐܟܘܠܬܝ ܕܝܠܝ ܕܐܥܒܕ ܗܘ ܨܒܝܢܗ ܕܡܢ ܕܫܕܪܢܝ ܘܐܫܠܡܝܗܝ ܠܥܒܕܗ܂
04:35	ܠܐ ܐܢܬܘܢ ܐܡܪ̈ܝܢ ܐܢܬܘܢ ܕܐܪܒܥܐ ܐܢܘܢ ܝܪ̈ܚܝܢ ܐܚܪܢܝܢ ܘܐܬܐ ܚܨܕܐ܂ ܗܐ ܐܡܪܢܐ ܠܟܘܢ ܕܐܪܝܡܘ ܥܝܢܝܟܘܢ ܘܚܙܝܘ ܐܪܥܬܐ ܕܚܘܪ ܘܡܛܝ ܠܚܨܕܐ
04:36	ܘܡܢ ܟܕܘ ܚܨܘܕܐ ܐܓܪܐ ܢܣܒ ܘܟܢܫ ܦܐܪܐ ܠܚܝ̈ܐ ܕܠܥܠܡ ܘܙܪܘܥܐ ܘܚܨܘܕܐ ܐܟܚܕܐ ܢܚܕܘܢ܂
04:37	ܒܗܕܐ ܓܝܪ ܐܝܬܝܗ ܡܠܬܐ ܕܫܪܪܐ ܕܐܚܪܢ ܗܘ ܙܪܥ ܘܐܚܪܢ ܚܨܕ܂