The Comprehensive Aramaic Lexicon

06:01	ܒܬܪ ܗܠܝܢ ܐܙܠ ܠܗ ܡܪܢ ܠܥܒܪܐ ܕܝܡܬܐ ܕܓܠܝܠܐ ܕܛܒܪܝܣ
06:02	ܘܐܙܠ ܒܬܪܗ ܟܢܫܐ ܣܓܝܐܐ ܡܛܠ ܕܚܙܝܢ ܗܘܘ ܐܬܘ̈ܬܐ ܕܥܒܕ ܗܘܐ ܥܠ ܟܪ̈ܝܗܐ
06:03	ܘܣܠܩ ܠܗ ܡܪܢ ܠܛܘܪܐ ܘܬܡܢ ܝܬܒ ܗܘܐ ܥܡ ܬܠܡ̈ܝܕܘܗܝ

06:04	ܘܩܪܝܒ ܗܘܐ ܥܕܥܝܕܐ ܕܦܛܝܪ̈ܐ ܕܝܗܘ̈ܕܝܐ܂

06:05	ܘܐܪܝܡ ܥܝܢ̈ܘܗܝ ܡܪܢ ܘܚܙܐ ܟܢܫܐ ܣܓܝܐܐ ܕܐܬܐ ܠܘܬܗ ܐܡܪ ܠܦܝܠܝܦܘܣ ܐܝܡܟܐ ܢܙܒܢ ܠܚܡܐ܂ ܠܗܠܝܢ ܐܢܫܐ ܕܢܐܟܠܘܢ
06:06	ܗܘ ܕܝܢ ܐܝܟ ܡܢܣܐ ܠܗ ܫܐܠܗ ܗܘ ܓܝܪ ܝܕܥ ܗܘܐ ܡܢܐ ܥܬܝܕ ܠܡܥܒܕ܂
06:07	ܐܡܪ ܠܗ ܦܝܠܝܦܘܣ܂ ܕܡܐܬܝܢ ܕܝܢܪܝܢ ܠܚܡܐ ܠܐ ܣܦܩ ܠܗܘܢ ܟܕ ܩܠܝܠ ܩܠܝܠ ܢܐܟܠܘܢ
06:08	ܐܡܪ ܠܗ ܚܕ ܡܢ ܬܠܡܝܕ̈ܘܗܝ ܕܫܡܗ ܐܢܕܪܝܘܣ ܐܚܘܗܝ ܕܫܡܥܘܢ ܟܐܦܐ܂
06:09	ܥܠ ܛܠܝܐ ܚܕ ܐܝܬ ܬܢܢ܂ ܚܡ̈ܫ ܓܪ̈ܝܨܢ܂ ܕܣܥܪ̈ܐ ܘܬܪ̈ܝܢ ܢܘܢ̈ܝܢ܂ ܐܠܐ ܠܗܠܝܢ ܟܘ̈ܠܗܘܢ ܡܢܐ ܥܒܕܝܢ
06:10	ܐܡܪ ܠܗܘܢ ܐܣܡܟܘ ܐܢܫܐ ܥܣܒܐ ܕܝܢ ܣܓܝ ܗܘܐ ܒܗ ܒܐܬܪܐ ܐܡܪ ܠܗܘܢ ܙܠܘ ܐܣܡܟܘ ܐܢ̈ܫܐ ܥܠ ܝܘܪܩܐ܂ ܘܟܕ ܐܣܡܟܘ ܐܢܘܢ
06:11	ܗܝܕܝܢ ܫܩܠ ܝܫܘܥ ܗܢܘܢ ܚܡܫܐ ܠܚܡ̈ܝܢ ܘܬܪ̈ܝܢ ܢܘܢܝܢ ܘܬܠܐ ܒܫܡܝܐ ܘܒܪܟ ܥܠܘܗܝ ܘܩܨܐ ܐܢܘܢ ܘܦܠܓ ܠܬܠܡܝܕܘܗܝ ܕܢܣܝܡܘܢ ܩܕܡ ܣܡܝܟܐ
06:12	ܘܟܕ ܣܒܥܘ ܐܡܪ ܡܪܢ ܠܬܠܡܝܕܘܗܝ ܟܢܫܘ ܩܨܝܐ ܕܐܝܬܪܘ ܕܡܕܡ ܠܐ ܢܐܒܕ
06:13	ܘܟܢܫܘ ܐܢܘܢ ܩܨܝܐ ܕܝܬܪܘ ܡܢܗܘܢ ܘܡܠܘ ܬܪܥܣܪ ܩܘ̈ܦܝܢܝܢ ܝܘܬܪܢܐ ܕܗܢܝܢ ܚܡܫ ܓܪ̈ܝܨܢ ܕܣܥܪ̈ܐ ܘܕܗܢܘܢ ܬܪܝܢ ܢܘܢ̈ܝܢ ܗܘܘ ܗܘܘ ܕܝܢ ܓܒܪ̈ܐ ܕܐܟܠܘ ܗܘܘ ܡܢ ܠܚܡܐ ܗܢܐ ܐܠܦܝܢ ܚܡܫܐ
06:14	ܗܢܘܢ ܕܝܢ ܐܢܫܐ ܟܕ ܚܙܘ ܐܬܐ ܗܝ ܕܥܒܕ ܐܡܪܝܢ ܗܢܘ ܫܪܝܪܐܝܬ ܢܒܝܐ ܕܐܬܐ ܠܥܠܡܐ܂
06:15	ܘܐܬܪܥܝܘ ܗܘܘ ܕܢܚܛܦܘܢܗ ܕܢܥܒܕܘܢܗܝ ܡܠܟܐ ܗܘ ܕܝܢ ܝܫܘܥ ܝܕܥ ܘܫܒܩ ܐܢܘܢ ܘܣܠܩ ܠܗ ܠܛܘܪܐ ܗܘ ܒܠܚܘܕܘܗܝ
06:16	ܘܟܕ ܗܘܐ ܪܡܫܐ ܢܚܬܘ ܬܠܡܝܕܘܗܝ ܠܝܡܐ
06:17	ܘܝܬܒܘ ܒܣܦܝܢܬܐ ܘܐܬܝܢ ܗܘܘ ܠܥܒܪܐ ܠܟܦܪܢܚܘܡ ܡܛܠ ܕܚܫܟܬ ܗܘܬ ܠܗ ܘܠܐ ܐܬܐ ܗܘܐ ܠܘܬܗܘܢ ܝܫܘܥ
06:18	ܘܐܫܬܓܫܬ ܥܠܝܗܘܢ ܝܡܬܐ ܘܪܘܚܐ ܪܒܬܐ ܢܫܒܬ ܗܘܬ
06:19	ܘܟܕ ܕܒܪܘ ܐܝܟ ܚܡܫܐ ܐܣܛܕܘܬܐ ܐܘ ܬܠܬܝܢ ܘܚܙܘ ܠܝܫܘܥ ܕܐܬܐ ܥܠ ܡܝܐ ܟܕ ܡܗܠܟ ܘܨܒܐ ܗܘܐ ܕܢܥܒܪ ܥܠܝܗܘܢ ܘܟܕ ܩܪܒ ܠܘܬ ܣܦܝܢܬܗܘܢ܂ ܐܬܚܘܪܘ ܡܢ ܕܚܠܬܗܘܢ܂
06:20	ܗܘ ܕܝܢ ܝܫܘܥ ܐܡܪ ܠܗܘܢ ܐܢܐ ܐܢܐ ܠܐ ܬܕܚܠܘܢ
06:21	ܘܟܕ ܢܣܒܘܗܝ ܒܣܦܝܢܬܐ ܒܫܥܬܐ ܣܦܝܢܬܐ ܗܝ ܗܘܬ ܠܘܬ ܐܪܥܐ ܗܝ ܕܐܙܠܝܢ ܗܘܘ ܠܗ܀
06:22	ܘܠܝܘܡܐ ܐܚܪܢܐ ܟܢܫܐ ܗܘܐ ܘܚܙܐ ܕܚܕܐ ܗܘܬ ܕܥܒܪܘ ܒܗ ܬܠܡܝܕܘܗܝ ܘܗܘ ܡܪܢ ܠܐ ܗܘܐ ܥܡܗܘܢ ܘܣܦܝܢܬܐ ܐܚܪܬܐ ܨܝܕܝܗܘܢ ܠܐ ܗܘܬ ܐܠܐ ܐܢ ܗܝ ܕܬܠܡܝ̈ܕܘܗܝ ܣܠܩܘ ܠܗ
06:23	ܘܣܦܝܢܐ ܐܬܝ ܡܢ ܛܝܒܪܘܣ ܐܬܪ ܕܐܟܠܘ ܠܚܡܐ
06:24	ܘܐܬܘ ܠܟܦܪ ܢܚܘܡ ܠܥܒܪܐ ܕܝܡܬܐ ܘܒܥܝܢ ܗܘܘ ܠܗ
06:25	ܘܟܕ ܐܫܟܚܘܗܝ ܐܡܪܝܢ ܠܗ ܪܒܢ ܐܡܬܝ ܐܬܝܬ ܠܟܐ
06:26	ܐܡܪ ܠܗܘܢ ܝܫܘܥ ܐܡܝܢ ܐܡܪܢܐ ܠܟܘܢ ܕܠܐ ܗܘܐ ܡܛܠ ܕܚܙܝܬܘܢ ܐܬܘܬܐ ܬܒܥܘܢܢܝ ܐܠܐ ܡܛܠ ܕܐܟܠܬܘܢ ܠܚܡܐ ܘܣܒܥܬܘܢ
06:27	ܠܐ ܬܦܠܚܘܢ ܡܐܟܘܠܬܐ ܕܐܒܕܐ ܐܠܐ ܦܠܚܘ ܡܐܟܘܠܬܐ ܕܡܩܘܝܐ ܠܚܝܐ ܕܠܥܠܡ ܐܝܕܐ ܕܢܬܠ ܠܟܘܢ ܒܪܗ ܕܐܢܫܐ ܠܗܢܐ ܓܝܪ ܚܬܡ ܐܠܗܐ ܐܒܐ
06:28	ܐܡܪܝܢ ܠܗ ܡܢܐ ܢܥܒܕ ܕܢܦܠܘܚ ܥܒܕܐ ܕܐܠܗܐ
06:29	ܐܡܪ ܠܗܘܢ ܝܫܘܥ ܗܢܐ ܗܘ ܥܒܕܐ ܕܐܠܗܐ ܕܬܗܝܡܢܘܢ ܒܡܢ ܕܫܕܪ ܗܘ
06:30	ܐܡܪܝܢ ܠܗ ܡܢܐ ܐܬܐ ܥܒܕ ܐܢܬ ܕܢܚܙܐ ܘܢܗܝܡܢ ܒܟ
06:31	ܐܒܗܝܢ ܡܢܢܐ ܐܟܠܘ ܒܡܕܒܪܐ ܐܝܟ ܕܟܬܝܒ ܕܠܚܡܐ ܡܢ ܫܡܝܐ ܝܗܒ ܠܗܘܢ
06:32	ܐܡܝܢ ܐܡܝܢ ܐܡܪܢܐ ܠܟܘܢ ܕܠܐ ܗܘܐ ܡܘܫܐ ܝܗܒ ܠܟܘܢ ܠܚܡܐ ܡܢ ܫܡܝܐ ܐܠܐ ܐܒܝ ܗܘ ܢܬܠ ܠܟܘܢ ܠܚܡܐ ܕܫܪܪܐ ܡܢ ܫܡܝܐ
06:33	ܠܚܡܗ ܓܝܪ ܕܐܠܗܐ ܐܝܬܘܗܝ ܕܢܚܬ ܡܢ ܫܡܝܐ܂ ܘܚܝܐ ܝܗܒ ܠܥܠܡܐ܂
06:34	ܐܡܪܝܢ ܠܗ ܡܪܢ ܒܟܠܙܒܢ ܗܒ ܠܢ ܡܢ ܗܢܐ ܠܚܡܐ
06:35	ܐܡܪ ܠܗܘܢ ܐܢܐ ܐܢܐ ܠܚܡܐ ܕܚܝܐ ܡܢ ܕܐܬܐ ܠܘܬܝ ܠܐ ܢܟܦܢ ܘܡܢ ܕܡܗܝܡܢ ܒܝ ܠܐ ܢܨܗܐ ܠܥܠܡ
06:36	ܐܠܐ ܐܡܪܬ ܠܟܘܢ ܕܚܙܝܬܘܢ ܘܠܐ ܡܗܝܡܢܝܢ ܐܢܬܘܢ
06:37	ܟܘܠ ܡܢ ܕܝܗܒ ܠܝ ܐܒܐ ܠܘܬܝ ܢܐܬܐ ܘܡܢ ܕܠܘܬܝ ܢܐܬܐ ܠܐ ܐܦܩܝܗܝ
06:38	ܕܢܚܬܬ ܡܢ ܫܡܝܐ ܠܐ ܗܘܐ ܕܐܥܒܕ ܨܒܝܢܝ ܐܠܐ ܕܐܥܒܕ ܨܒܝܢܗ ܕܐܒܝ ܕܫܕܪܢܝ
06:39	ܗܢܘ ܕܡܢ ܟܠ ܡܐ ܕܝܗܒ ܠܝ ܠܐ ܐܘܒܕ ܐܦܠܐ ܡܕܡ ܐܠܐ ܐܩܝܡܝܘܗܝ ܒܝܘܡܐ ܐܚܪܝܐ
06:40	ܡܛܠ ܕܗܢܘ ܨܒܝܢܗ ܕܡܗܝܡܢ ܒܒܪܐ ܐܝܬ ܠܗ ܚܝܐ ܕܠܥܠܡ ܘܐܩܝܡܘܗܝ ܒܝܘܡܐ ܐܚܪܝܐ
06:41	ܝܗܘܕܝܐ ܕܝܢ ܪܛܢܝܢ ܗܘܘ ܥܠ ܕܐܡܪ ܕܐܢܐ ܐܢܐ ܠܚܡܐ ܕܢܚܬ ܡܢ ܫܡܝܐ
06:42	ܘܐܡܪܝܢ ܗܢܐ ܠܐ ܗܘܐ ܝܫܘܥ ܒܪ ܝܘܣܦ ܘܐܢܚܢܢ ܝܕܥܝܢ ܠܐܒܘܗܝ ܐܝܟܢܐ ܐܡܪ ܕܡܢ ܫܡܝܐ ܢܚܬ
06:43	ܐܡܪ ܠܗܘܢ ܠܐ ܬܪܛܢܘܢ ܚܕ ܥܡ ܚܕ
06:44	ܠܐ ܐܢܫ ܡܫܟܚ ܕܢܐܬܐ ܠܘܬܝ ܐܠܐ ܐܝܢܐ ܕܢܓܕ ܠܗ ܐܒܐ ܕܫܕܪܢܝ ܘܐܢܐ ܐܩܝܡܝܘܗܝ ܒܝܘܡܐ ܐܚܪܝܐ
06:45	ܟܬܝܒ ܓܝܪ ܒܢܒܝܐ ܕܢܗܘܘܢ ܟܠܗܘܢ ܡܠܦܐ ܕܐܠܗܐ ܟܘܠ ܡܢ ܕܫܡܥ ܡܢ ܐܒܐ ܘܝܠܦ ܡܢܗ܂ ܐܬܐ ܠܘܬܝ
06:46	ܠܐ ܗܘܐ ܡܛܠ ܕܚܙܐ ܐܢܫ ܠܐܒܐ ܐܠܐ ܡܢ ܕܠܘܬ ܐܠܗܐ ܐܝܬܘܗܝ ܗܘ ܚܙܐ ܠܐܠܗܐ ܐܒܐ
06:47	ܐܡܝܢ ܐܡܝܢ ܐܡܪܢܐ ܠܟܘܢ ܕܡܢ ܕܡܗܝܡܢ ܠܐܠܗܐ ܐܝܬ ܠܗ ܚܝܐ
06:48	ܐܢܐ ܐܢܐ ܠܚܡܐ ܕܚܝܐ܂
06:49	ܐܒܗܝܟܘܢ ܐܟܠܘ ܡܢܢܐ ܒܚܘܪܒܐ ܘܡܝܬܘ܂
06:50	ܗܢܘ ܠܚܡܐ ܕܢܚܬ ܡܢ ܫܡܝܐ ܕܢܐܟܘܠ ܐܢܫ ܡܢܗ ܘܠܐ ܢܡܘܬ
06:51	ܐܢܐ ܐܢܐ ܠܚܡܐ ܚܝܐ ܕܢܚܬ ܡܢ ܫܡܝܐ ܘܡܢ ܕܢܐܟܘܠ ܡܢ ܠܚܡܝ ܢܚܐ ܠܥܠܡ ܘܠܚܡܐ ܐܝܢܐ ܕܐܢܐ ܐܬܠ ܦܓܪܝ ܗܘ ܕܥܠ ܐ̈ܦܝ ܚܝܘܗܝ ܕܥܠܡܐ
06:52	ܘܢܨܝܢ ܗܘܘ ܝܗܘ̈ܕܝܐ ܚܕ ܥܡ ܚܕܐ ܘܐܡܪ̈ܝܢ ܐܝܟܢܐ ܡܫܟܚ ܗܢܐ ܕܢܬܠ ܠܢ ܦܓܪܗ ܠܡܐܟܠ
06:53	ܘܐܡܪ ܠܗܘܢ ܝܫܘܥ ܐܡܝܢ ܐܡܝܢ ܐܡܪܢܐ ܠܟܘܢ ܕܐܢ ܠܐ ܬܐܟܠܘܢ ܦܓܪܗ ܕܒܪܗ ܕܐܢܫܐ ܘܬܫܬܘܢ ܕܡܗ܂ ܠܝܬ ܠܟܘܢ ܚܝ̈ܐ ܒܟܘܢ
06:54	ܡܢ ܕܐܟܠ ܕܝܢ ܦܓܪܗ ܘܫܬܐ ܕܡܗ ܐܝܬ ܠܗ ܚܝܐ ܕܠܥܠܡ ܘܐܢܐ ܐܩܝܡܘܗܝ ܒܝܘܡܐ ܐܚܪܝܐ
06:55	ܦܓܪܝ ܫܪܝܪܐܝܬ ܡܐܟܘܠܬܐ ܗܘ ܘܕܡܝ ܫܪܝܪܐܝܬ ܡܫܬܝܐ ܗܘ
06:56	ܡܢ ܕܐܟܠ ܦܓܪܝ ܘܫܬܐ ܕܡܝ ܒܝ ܗܘ ܘܐܢܐ ܒܗ܂
06:57	ܐܝܟܢܐ ܕܫܕܪܢܝ ܐܒܐ ܚܝܐ ܘܐܢܐ ܚܝ ܡܛܠ ܐܒܝ ܡܢ ܕܢܐܟܘܠ ܦܓܪܝ ܢܗܘܐ ܚܝ ܡܛܠܬܝ
06:58	ܗܢܐ ܗܘ ܠܚܡܐ ܕܢܚܬ ܡܢ ܫܡܝܐ ܠܐ ܗܘܐ ܐܝܟ ܗܘ ܕܐܟܠܘ ܐܒܗܝܟܘܢ ܘܡܝܬܘ ܡܢ ܕܡܢ ܗܢܐ ܠܚܡܐ ܢܐܟܠ ܢܚܐ ܠܥܠܡ
06:59	ܗܠܝܢ ܐܡܪ ܒܟܦܪܢܚܘܡ ܒܟܢܘܫܬܐ ܟܕ ܡܠܦ ܗܘܐ
06:60	ܘܣ̈ܓܝܐܐ ܡܢ ܬܠܡܝܕܘܗܝ ܐܡܪܝܢ ܗܘܘ ܕܩܫܝܐ ܗܝ ܗܕܐ ܡܠܬܐ ܡܢ ܡܫܟܚ ܠܡܫܡܥܗ܂
06:61	ܝܫܘܥ ܕܝܢ ܟܕ ܝܕܥ ܕܪܛܢܝܢ ܗܘܘ ܬܠܡܝܕܘܗܝ ܐܡܪ ܠܗܘܢ ܗܕܐ ܡܟܫܠܐ ܠܟܘܢ
06:62	ܐܢ ܕܝܢ ܬܚܙܘܢ ܠܒܪܗ ܕܐܢܫܐ ܟܕ ܣܠܩ ܠܐܬܪ ܕܐܝܬܘܗܝ ܗܘܐ ܡܢ ܩܕܝܡ܂
06:63	ܪܘܚܐ ܗܘ ܕܡܚܝܐ ܦܓܪܐ ܐܢܬܘܢ ܕܝܢ ܐܡܪܝܢ ܐܢܬܘܢ ܦܓܪܐ ܡܕܡ ܠܐ ܡܗܢܐ ܡܠܐ ܕܡܠܠܬ ܥܡܟܘܢ ܪܘܚܐ ܐܢܝܢ ܘܚܝܐ
06:64	ܐܠܐ ܐܝܬ ܡܢܟܘܢ ܕܠܐ ܡܗܝܡܢܝܢ ܝܕܥ ܗܘܐ ܓܝܪ ܝܫܘܥ ܡܢ ܩܕܝܡ ܡܢ ܕܡܫܠܡ ܠܗ
06:65	ܐܡܪ ܠܗܘܢ ܡܛܠ ܗܢܐ ܐܡܪܬ ܠܟܘܢ ܕܠܐ ܐܢܫ ܡܫܟܚ ܕܢܐܬܐ ܠܘܬܝ ܐܠܐ ܝܗܝܒ ܠܗ ܡܢ ܐܒܐ
06:66	ܡܛܠ ܗܕܐ ܡܠܬܐ ܣܓܝܐܐ ܡܢ ܬܠܡܝܕܘܗܝ ܐܙܠܘ ܠܗܘܢ ܘܠܐ ܡܗܠܟܝܢ ܗܘܘ ܥܡܗ
06:67	ܐܡܪ ܠܬܪܥܣܪܬܗ ܕܠܡܐ ܘܐܦ ܐܢܬܘܢ ܨܒܝܢ ܐܢܬܘܢ ܠܡܐܙܠ ܠܟܘܢ
06:68	ܐܡܪ ܠܗ ܫܡܥܘܢ ܟܐܦܐ ܡܪܝ ܠܘܬ ܡܢ ܢܐܙܠ ܡܠܬܐ ܕܚܝܐ ܕܠܥܠܡ ܐܝܬ ܠܟ
06:69	ܘܐܢܚܢܢ ܗܝܡܢܢ ܘܝܕܥܢ ܕܐܢܬ ܗܘ ܡܫܝܚܐ ܒܪܗ ܕܐܠܗܐ܂
06:70	ܐܡܪ ܠܗܘܢ ܠܐ ܗܘܐ ܐܢܐ ܓܒܝܬܟܘܢ ܠܟܠܟܘܢ ܘܐܦ ܡܢܟܘܢ ܚܕ ܣܛܢܐ ܗܘ
06:71	ܐܡܪ ܗܘܐ ܕܝܢ ܥܠ ܝܗܘܕܐ ܣܟܪܝܘܛܐ ܡܛܠ ܕܗܘ ܥܬܝܕ ܗܘܐ ܠܡܫܠܡܘܬܗ ܚܕ ܡܢ ܬܪܥܣܪܬܐ܀