The Comprehensive Aramaic Lexicon

08:12	ܬܘܒ ܐܡܪ ܠܗܘܢ ܝܫܘܥ ܐܢܐ ܐܢܐ ܢܘܗܪܗ ܕܥܠܡܐ ܡܢ ܕܒܬܪܝ ܐܬܐ ܠܐ ܡܗܠܟ ܒܚܫܘܟܐ ܐܠܐ ܡܫܟܚ ܠܗ ܢܘܗܪܐ ܕܚ̈ܝܐ
08:13	ܐܡܪ̈ܝܢ ܠܗ ܝܗܘܕ̈ܝܐ ܕܐܢܬ ܥܠ ܢܦܫܟ ܡܣܗܕܬ ܠܐ ܗܘܬ ܫܪܝܪܐ ܣܗܕܘܬܟ
08:14	ܐܡܪ ܠܗܘܢ ܝܫܘܥ ܐܦܢ ܐܢܐ ܡܣܗܕ ܐܢܐ ܥܠ ܢܦܫܝ܂ ܫܪܝܪܐ ܗܝ ܣܗܕܘܬܝ܂ ܡܛܠ ܕܝܕܥܢܐ ܐܝܡܟܐ ܐܬܝܬ ܘܠܐܝܠܟܐ ܐܙܠ ܐܢܐ܂ ܘܐܢܬܘܢ ܠܐ ܐܝܡܟܐ ܐܬܝܬ܂ ܘܠܐ ܠܐܝܠܟܐ ܐܙܠܢܐ
08:15	ܐܢܬܘܢ ܕܝܢ ܐܝܟ ܕܠܦܓܪܐ ܗܘ ܕܝܢܝܢ ܐܢܬܘܢ܂ ܐܢܐ ܠܐܢܫ ܠܐ ܕܐܢ ܐܢܐ
08:16	ܘܐܢ ܕܐܢ ܕܝܢܝ ܫܪܝܪ ܗܘ܂ ܡܛܠ ܕܠܐ ܗܘܝܬ ܒܠܚܘܕܝ܂ ܐܠܐ ܐܢܐ ܘܡܢ ܕܫܕܪܢܝ܂
08:17	ܘܒܐܘܪܝܬܟܘܢ ܟܬܝܒ ܕܣܗܕܘܬܐ ܕܬܪ̈ܝܢ ܓܒܪ̈ܝܢ ܫܪܝܪܐ ܗܝ
08:18	ܐܢܐ ܐܢܐ ܕܣܗܕ ܐܢܐ ܥܠ ܢܦܫܝ ܘܐܒܐ ܕܫܕܪܢܝ ܣܗܕ ܥܠܝ
08:19	ܐܡܪ̈ܝܢ ܠܗ ܐܝܠܟܐ ܗܘ ܐܒܘܟ܂ ܐܡܪ ܠܗܘܢ ܠܝ ܠܐ ܝܕܥܝܢ ܐܢܬܘܢ܂ ܐܦܠܐ ܠܐܒܝ ܐܠܘ ܠܝ ܝܕܥܬܘܢ܂ ܐܦ ܠܐܒܝ ܝܕܥܝܢ ܗܘܝܬܘܢ܂
08:20	ܗܠܝܢ ܡܠܠ ܒܝܬ ܓܙܐ܂ ܘܒܗܝܟܠܐ ܘܠܐ ܐܢܫ ܐܚܕܗ ܗܘܐ ܡܛܠ ܕܠܐ ܐܬܬ ܗܘܬ ܫܥܬܗ܀
08:21	ܬܘܒ ܐܡܪ ܠܗܘܢ ܝܫܘܥ ܐܢܐ ܐܙܠ ܐܢܐ ܠܝ܂ ܘܬܒܥܘܢܢܝ܂ ܘܬܡܘܬܘܢ ܒܚ̈ܛܗܝܟܘܢ ܘܠܐܬܪ ܕܐܢܐ ܐܙܠ ܐܢܐ ܐܢܬܘܢ ܠܐ ܡܫܟܚܝܢ ܐܢܬܘܢ ܠܡܐܬܐ
08:22	ܐܡܪܝܢ ܝܗܘܕܝܐ ܠܗܘܢ ܒܢܦܫܗܘܢ ܠܡܐ ܟܝ ܢܩܛܠ ܢܦܫܗ ܕܐܡܪ ܕܠܐ ܡܫܟܚܝܢ ܐܢܬܘܢ ܠܡܐܬܐ ܠܐܬܪ ܕܐܙܠܢܐ
08:23	ܐܡܪ ܠܗܘܢ ܝܫܘܥ ܐܢܬܘܢ ܡܢ ܬܚܬܝܐ ܐܢܬܘܢ ܘܐܢܐ ܡܢ ܥܠܝܐ ܐܢܐ ܐܢܬܘܢ ܡܢ ܗܢܐ ܐܢܬܘܢ ܥܠܡܐ ܘܐܢܐ ܠܐ ܗܘܝܬ ܡܢܗ܂
08:24	ܐܡܪܬ ܠܟܘܢ ܕܬܡܘܬܘܢ ܒܚܛܗܝܟܘܢ ܐܢ ܠܐ ܡܗܝܡܢܝܢ ܐܢܬܘܢ ܕܐܢܐ ܐܢܐ ܬܡܘܬܘܢ ܒܚܛܗܝܟܘܢ
08:25	ܐܡܪܝܢ ܠܗ ܐܢܬ ܡܢ ܐܢܬ ܐܡܪ ܠܗܘܢ ܝܫܘܥ ܪܫܐ ܕܐܡܠܠ ܐܢܐ ܥܡܟܘܢ
08:26	ܕܣܓܝ ܐܝܬ ܠܝ܂ ܕܐܡܠܠ ܥܠܝܟܘܢ ܘܕܐܕܘܢ ܐܠܐ ܡܢ ܕܫܕܪܢܝ ܫܪܝܪ ܗܘ ܘܐܝܠܝܢ ܕܫܡܥܬ ܡܢܗ ܡܡܠܠܢܐ ܒܥܠܡܐ܂
08:27	ܘܠܐ ܝܕܥܘ ܕܥܠ ܐܒܐ ܐܡܪ ܠܗܘܢ܀
08:28	ܬܘܒ ܐܡܪ ܠܗܘܢ ܝܫܘܥ ܟܕ ܬܪܝܡܘܢܗܝ ܠܒܪܗ ܕܐܢܫܐ ܗܝܕܝܢ ܬܕܥܘܢ ܕܐܢܐ ܐܢܐ ܘܡܕܡ ܡܢ ܨܒܘܬ ܢܦܫܝ ܠܐ ܥܒܕܢܐ ܐܠܐ ܐܝܟܢܐ ܕܐܠܦܢܝ ܐܒܐ ܗܟܘܬ ܡܡܠܠ ܐܢܐ܂
08:29	ܘܡܢ ܕܫܕܪܢܝ ܥܡܝ ܗܘ ܘܠܐ ܫܒܩܢܝ ܡܛܠ ܕܐܢܐ ܡܕܡ ܕܫܦܪ ܠܗ ܥܒܕܢܐ ܒܟܠܙܒܢ
08:30	ܘܟܕ ܗܠܝܢ ܡܡܠܠ ܗܘܐ ܣܓܝܐܐ ܗܝܡܢܘ ܒܗ
08:31	ܗܝܕܝܢ ܐܡܪ ܝܫܘܥ ܠܗܢܘܢ ܝܗܘܕܝܐ ܕܗܝܡܢܘ ܒܗ ܐܢ ܐܢܬܘܢ ܬܟܬܪܘܢ ܠܘܬ ܡ̈ܠܝ ܫܪܝܪܐܝܬ ܬܠܡܝܕܝ ܐܢܬܘܢ܂
08:32	ܘܬܕܥܘܢ ܫܪܪܐ ܘܗܘ ܫܪܪܐ ܢܚܪܪܟܘܢ
08:33	ܐܡܪܝܢ ܠܗ ܙܪܥܗ ܐܢܚܢܢ ܕܐܒܪܗܡ ܐܢܚܢܢ ܘܡܢ ܡܬܘܡ ܥܒܕܘܬܐ ܠܐ ܦܠܝܚܐ ܠܢ ܐܝܟܢܐ ܐܡܪ ܐܢܬ ܕܬܗܘܘܢ ܒܢܝ ܚܐܪܐ
08:34	ܐܡܪ ܠܗܘܢ ܡܪܢ ܐܡܝܢ ܐܡܝܢ ܐܡܪܢܐ ܠܟܘܢ ܕܡܢ ܕܥܒܕ ܚܛܝܬܐ ܥܒܕܐ ܗܘ܂
08:35	ܘܥܒܕܐ ܠܐ ܡܩܘܐ ܠܥܠܡ ܗܘ ܒܒܝܬܐ ܒܪܐ ܕܝܢ ܒܒܝܬܐ ܠܥܠܡ ܗܘ
08:36	ܘܐܢ ܒܪܐ ܢܚܪܪܟܘܢ ܫܪܝܪܐܝܬ ܬܗܘܘܢ ܒܢܝ ܚܐܪܐ
08:37	ܝܕܥܢܐ ܕܙܪܥܗ ܐܢܬܘܢ ܕܐܒܪܗܡ ܘܒܥܝܢ ܐܢܬܘܢ ܠܡܩܛܠܢܝ ܡܛܠ ܕܡܠܬܝ ܠܐ ܢܦܩܐ ܒܟܘܢ
08:38	ܐܢܐ ܡܕܡ ܕܚܙܝܬ ܠܘܬ ܐܒܝ ܥܒܕ ܐܢܐ ܘܐܦ ܐܢܬܘܢ ܡܕܡ ܕܚܙܝܬܘܢ ܠܘܬ ܐܒܘܟܘܢ ܥܒܕܝܢ ܐܢܬܘܢ
08:39	ܐܡܪܝܢ ܠܗ ܐܒܘܢ ܕܝܠܢ ܐܒܪܗܡ ܗܘ ܐܡܪ ܠܗܘܢ ܐܢ ܒܢܘܗܝ ܐܢܬܘܢ ܕܐܒܪܗܡ ܥܒܕܘܗܝ ܕܐܒܪܗܡ ܥܒܕܘ
08:40	ܗܫܐ ܕܝܢ ܗܐ ܒܥܝܢ ܐܢܬܘܢ ܠܡܩܛܠܢܝ ܠܓܒܪܐ ܕܫܪܝܪܐܝܬ ܡܡܠܠ ܥܡܟܘܢ ܐܝܕܐ ܕܫܡܥ ܡܢ ܐܠܗܐ ܐܒܪܗܡ ܗܕܐ ܠܐ ܥܒܕ
08:41	ܐܠܐ ܐܢܬܘܢ ܥܒܕܝܢ ܐܢܬܘܢ ܥܒܕܐ ܕܐܒܘܟܘܢ ܐܡܪܝܢ ܠܗ ܐܢܚܢܢ ܠܐ ܗܘܐ ܡܢ ܓܘܪܐ ܗܘܝܢ ܚܕ ܗܘ ܐܒܐ ܐܝܬ ܠܢ ܐܠܗܐ
08:42	ܐܡܪ ܠܗܘܢ ܝܫܘܥ ܐܠܘ ܐܠܗܐ ܗܘܐ ܐܒܘܟܘܢ ܡܚܒܝܢ ܗܘܝܬܘܢ ܠܝ ܐܢܐ ܓܝܪ ܡܢ ܐܠܗܐ ܢܦܩܬ ܐܬܝܬ ܘܠܐ ܗܘܐ ܡܢ ܨܒܘܬ ܢܦܫܝ ܐܬܝܬ ܗܘ ܫܕܪܢܝ
08:43	ܡܛܠ ܡܢܐ ܡܠܬܝ ܠܐ ܡܫܬܘܕܥܝܢ ܐܢܬܘܢ ܠܐ ܓܝܪ ܡܫܟܚܝܢ ܐܢܬܘܢ ܫܡܥܝܢ ܠܗ
08:44	ܐܢܬܘܢ ܕܝܢ ܕܒܝܫܐ ܐܢܬܘܢ ܘܪܓܬܗ ܗܘ ܕܐܒܘܟܘܢ ܨܒܝܢ ܐܢܬܘܢ ܠܡܥܒܕ ܗܘ ܕܡܢ ܪܝܫ ܩܛܠ ܐܢܫܐ ܗܘܐ ܘܒܫܪܪܐ ܠܝܬܘܗܝ ܘܒܗ ܫܪܪܐ ܠܝܬ ܘܡܐ ܕܡܡܠܠ ܕܓܠܬܐ ܡܢ ܕܝܠܗ ܡܡܠܠ ܡܛܠ ܕܕܓܠܐ ܗܘ ܘܐܒܘܗܝ܂
08:45	ܐܢܐ ܕܫܪܪܐ ܡܡܠܠ ܐܢܐ ܠܐ ܡܗܝܡܢܝܢ ܐܢܬܘܢ ܠܝ
08:46	ܡܢܘ ܡܢܟܘܢ ܡܟܣ ܠܝ ܥܠ ܚܛܝܬܐ ܘܐܢ ܫܪܪܐ ܡܡܠܠ ܐܢܐ ܠܡܢܐ ܠܐ ܡܗܝܡ̈ܢܝܢ ܐܢܬܘܢ ܠܝ

08:47	ܡܢ ܕܡܢ ܐܠܗܐ ܗܘ ܓܝܪ ܡܠܬܐ ܕܐܠܗܐ ܫܡܥ ܡܛܠ ܗܢܐ ܠܐ ܫܡܥܝܢ ܐܢܬܘܢ ܠܗ ܡܛܠ ܕܠܐ ܗܘܝܬܘܢ

08:48	ܐܡܪܝܢ ܗܘܘ ܝܗܘܕܝܐ ܠܐ ܫܦܝܪ ܐܡܪܝܢ ܐܢܚܢܢ ܕܫܡܪܝܐ ܐܢܬ ܘܕܝܘܐ ܐܝܬ ܥܠܝܟ
08:49	ܐܡܪ ܠܗܘܢ ܝܫܘܥ ܥܠܝ ܕܝܘܐ ܠܝܬ ܐܠܐ ܠܐܒܝ ܡܝܩܪܢܐ ܘܐܢܬܘܢ ܡܨܥܪܝܢ ܐܢܬܘܢ ܠܝ
08:50	ܘܐܢܐ ܠܐ ܒܥܢܐ ܫܘܒܚܐ ܕܢܦܫܝ ܐܝܬܘܗܝ ܡܢ ܕܒܥܐ ܘܕܐܢ܂
08:51	ܐܡܝܢ ܐܡܝܢ ܐܡܪܢܐ ܠܟܘܢ ܕܡܢ ܕܡܠܬܝ ܢܛܪ ܡܘܬܐ ܠܐ ܢܛܥܡ ܠܥܠܡ܂
08:52	ܐܡܪ̈ܝܢ ܠܗ ܝܗܘܕܝܐ ܗܫܐ ܗܘ ܝܕܥܢ ܕܫܪܝܪܐܝܬ ܕܝܘܐ ܐܝܬ ܥܠܝܟ ܐܒܪܗܡ ܓܝܪ ܡܝܬ܂ ܐܢܬ ܐܡܪ ܐܢܬ ܕܡܢ ܕܡܠܬܝ ܢܛܪ ܠܐ ܢܛܥܡ ܡܘܬܐ܂
08:53	ܠܡܐ ܐܢܬ ܪܒ ܐܢܬ ܡܢ ܐܒܪܗܡ ܘܡܢ ܢܒ̈ܝܐ ܕܡܝܬܘ ܐܢܬ ܡܢ ܥܒܕܬ ܢܦܫܟ
08:54	ܐܡܪ ܠܗܘܢ ܝܫܘܥ ܐܢ ܐܢܐ ܡܫܒܚ ܐܢܐ ܢܦܫܝ ܠܐ ܗܘܐ ܡܕܡ ܫܘܒܚܝ ܐܝܬܘܗܝ ܐܒܐ ܕܡܫܒܚ ܠܝ ܗܘ ܕܐܡܪܝܢ ܐܢܬܘܢ ܕܐܠܗܢ ܗܘ
08:55	ܐܢܬܘܢ ܠܐ ܝܕܥܬܘܢܝܗܝ܂ ܐܢܐ ܝܕܥ ܐܢܐ ܠܗ܂ ܘܐܢ ܐܡܪ ܕܠܐ ܝܕܥܢܐ ܠܗ܂ ܗܘܐ ܐܢܐ ܠܝ ܟܕܒܐ ܐܟܘܬܟܘܢ ܐܢܐ ܕܝܢ ܝܕܥܢܐ ܠܗ ܘܡܠܬܗ ܢܛܪ ܐܢܐ܂
08:56	ܐܒܪܗܡ ܡܣܘܚ ܗܘܐ ܕܢܚܙܐ ܝܘܡܝ܂ ܘܚܙܐ ܘܚܕܝ
08:57	ܐܡܪ̈ܝܢ ܠܗ ܝܗܘܕܝܐ ܒܪ ܚܡܫܝܢ ܫܢ̈ܝܢ ܠܐ ܗܘܝܬ܂ ܘܐܒܪܗܡ ܚܙܟ
08:58	ܐܡܪ ܠܗܘܢ܂ ܐܡܝܢ ܐܡܝܢ ܐܡܪܢܐ ܠܟܘܢ ܕܥܕܠܐ ܢܗܘܐ ܐܒܪܗܡ ܐܢܐ ܐܝܬ ܗܘܝܬ
08:59	ܗܝܕܝܢ ܫܩܠܘ ܟܐܦܐ ܠܡܫܕܐ ܒܗ ܘܝܫܘܥ ܡܛܫܐܝܬ ܢܦܩ ܠܗ ܡܢ ܗܝܟܠܐ܀