The Comprehensive Aramaic Lexicon

11:01	ܘܗܘܐ ܕܟܪܝܗ ܠܥܙܪ ܡܢ ܒܝܬ ܥܢܝܐ ܐܚܘܗ ܕܡܪܝܡ ܘܕܡܪܬܐ
11:02	ܡܪܝܡ ܕܝܢ ܗܕܐ ܐܝܬܝܗ ܕܐܫܝܓܬ ܪ̈ܓܠܐ ܕܝܫܘܥ ܐܚܘܗ ܗܘܐ ܕܗܕܐ ܗܘ ܠܥܙܪ ܕܟܪܝܗ ܗܘܐ
11:03	ܫܠܚ ܕܝܢ ܠܗ ܬܪܬܝܗܝܢ ܐܚܘܬܗ ܠܝܫܘܥ ܡܪܢ ܗܐ ܟܪܝܗ ܗܘ ܕܪܚܡ ܐܢܬ
11:04	ܟܕ ܫܡܥ ܝܫܘܥ ܐܡܪ ܗܢܐ ܟܘܪܗܢܐ ܠܐ ܗܘܐ ܠܡܘܬܐ ܐܠܐ ܚܠܦ ܬܫܒܘܚܬܗ ܕܐܠܗܐ ܕܢܫܬܒܚ ܒܗ ܒܪܗ
11:05	ܗܘ ܕܝܢ ܝܫܘܥ ܡܚܒ ܗܘܐ ܠܗܠܝܢ ܬܠܬܝܗܘܢ ܐܚܐ ܠܡܪܝܡ ܠܡܪܬܐ ܠܠܥܙܪ܂
11:06	ܘܡܢ ܕܫܡܥ ܕܟܪܝܗ ܠܥܙܪ ܩܘܝ ܥܠ ܕܘܟܬܗ ܬܪ̈ܝܢ ܝܘܡ̈ܝܢ
11:07	ܘܐܡܪ ܠܬܠܡܝܕܘܗܝ ܬܘ ܢܐܙܠ ܠܝܗܘܕ
11:08	ܐܡܪ̈ܝܢ ܠܗ ܬܠܡܝܕ̈ܘܗܝ ܪܒܢ ܗܐ ܝܗܘ̈ܕܝܐ ܒܥܝܢ ܗܘܘ ܠܡܪܓܡܟ ܘܬܘܒ ܐܙܠ ܐܢܬ ܠܬܡܢ
11:09	ܐܡܪ ܠܗܘܢ ܝܫܘܥ ܠܐ ܬܪܬܥܣܪܐ ܫܥܝܢ ܐܝܬ ܒܝܘܡܐ ܡܢ ܕܒܐܝܡܡܐ ܡܗܠܟ ܠܐ ܡܬܩܠ ܡܛܘܠ ܕܚܙܐ ܢܘܗܪܗ ܕܥܠܡܐ ܗܢܐ܂
11:10	ܡܢ ܕܒܠܠܝܐ ܕܝܢ ܡܗܠܟ ܡܬܩܠ ܡܛܠ ܕܢܘܗܪܐ ܠܝܬ ܒܗ
11:11	ܘܟܕ ܐܡܪ ܗܠܝܢ ܐܡܪ ܠܗܘܢ ܠܥܙܪ ܪܚܡܢ ܫܟܒ ܐܠܐ ܐܙܠ ܐܢܐ ܕܐܥܝܪܘܗܝ
11:12	ܐܡܪܝܢ ܠܗ ܡܪܢ ܐܢ ܕܡܟ ܗܘ ܚܝܐ܂
11:13	ܗܘ ܕܝܢ ܝܫܘܥ ܥܠ ܕܡܝܬ ܗܘ ܠܗ ܠܥܙܪ ܐܡܪ ܗܘܐ ܠܗܘܢ ܘܗܢܘܢ ܣܒܪܝܢ ܗܘܘ ܕܥܠ ܫܢܬܐ ܗܘ ܐܡܪ
11:14	ܬܘܒ ܐܡܪ ܠܗܘܢ ܝܫܘܥ ܦܫܝܩܐܝܬ ܠܥܙܪ ܡܝܬ ܠܗ
11:15	ܘܚܕܢܐ ܡܛܠܬܟܘܢ ܕܬܗܝܡܢܘܢ ܕܠܐ ܗܘܝܬ ܬܡܢ ܐܠܐ ܗܠܟܘ ܢܐܙܠ ܠܘܬܗ
11:16	ܐܡܪ ܠܗܘܢ ܬܐܘܡܐ ܠܚܒܪܘܗܝ ܬܠܡܝܕܐ ܬܘ ܐܦ ܐܢܚܢܢ ܢܐܙܠ ܢܡܘܬ ܥܡܗ
11:17	ܘܟܕ ܐܬܐ ܝܫܘܥ ܠܒܝܬ ܥܢܝܐ ܐܫܟܚ ܕܩܒܪܘܗܝ ܠܠܥܙܪ ܡܢ ܩܕܡܘܗܝ ܐܪܒܥܐ ܝܘܡ̈ܝܢ
11:18	ܘܗܘܬ ܕܝܢ ܒܝܬ ܥܢܝܐ ܪܚܝܩܐ ܡܢ ܐܘܪܫܠܡ ܐܣܛܕܘܬܐ ܚܡܫܬܥܣܪ ܕܗ̈ܘܝܢ ܡܝܠܐ ܬܪܝܢ
11:19	ܘܣܓܝܐܐ ܡܢ ܝܗܘܕܝܐ ܢܦܩܘ ܠܒܝܬ ܥܢܝܐ ܕܢܡܠܘܢ ܒܠܒܗ ܕܡܪܬܐ ܘܕܡܪܝܡ
11:20	ܘܟܕ ܫܡܥܬ ܡܪܬܐ ܕܝܫܘܥ ܐܬܐ ܢܦܩܬ ܠܐܘܪܥܗ ܘܡܪܝܡ ܦܫܬ ܒܒܝܬܐ
11:21	ܘܐܡܪܐ ܠܗ ܡܪܬܐ ܠܝܫܘܥ ܐܠܘ ܠܟܐ ܗܘܝܬ ܠܐ ܡܐܬ ܗܘܐ ܐܚܝ
11:22	ܐܠܐ ܐܦ ܗܫܐ ܝܕܥܢܐ ܕܡܕܡ ܕܫܐܠܬ ܠܐܠܗܐ ܝܗܒ ܠܟ
11:23	ܐܡܪ ܠܗ ܝܫܘܥ ܢܩܘܡ ܐܚܘܟܝ
11:24	ܐܡܪܬ ܠܗ ܡܪܬܐ ܝܕܥܐ ܐܢܐ ܕܒܩܝܡܬܐ ܒܝܘܡܐ ܐܚܪܝܐ
11:25	ܐܡܪ ܠܗ݀ ܝܫܘܥ ܐܢܐ ܐܢܐ ܢܚܡܬܐ ܘܡܢ ܕܡܗܝܡܢ ܒܝ ܐܦܢ ܡܐܬ ܢܚܐ
11:26	ܘܡܢ ܕܚܝ ܘܡܗܝܡܢ ܒܝ ܠܥܠܡ ܠܐ ܡܐܬ ܡܗܝܡܢܬܝ ܗܠܝܝܢ
11:27	ܐܡܪܐ ܠܗ ܡܪܬܐ ܐܝܢ ܡܪܝ ܡܗܝܡܢܐ ܐܢܐ ܕܐܢܬ ܗܘ ܡܫܝܚܐ ܒܪܗ ܕܐܠܗܐ ܕܥܬܝܕ ܠܡܐܬܐ ܠܥܠܡܐ
11:28	ܘܟܕ ܐܡܪܬ ܗܠܝܢ ܐܙܠܬ ܡܫܬܩܐܝܬ ܩܪܬ ܠܡܪܝܡ܂ ܘܐܡܪܐ ܠܗ܂ ܪܒܢ ܐܬܐ ܘܩܪܐ ܠܟܝ܂
11:29	ܘܟܕ ܫܡܥܬ ܡܪܝܡ ܫܘܪܬ ܘܚܦܝܛܐܝܬ ܐܙܠܬ ܠܘܬܗ
11:30	ܘܗܘ ܝܫܘܥ ܠܐ ܥܕܡܐ ܠܗܫܐ ܥܠ ܗܘܐ ܠܩܪܝܬܐ ܐܠܐ ܒܗ ܗܘܐ ܒܕܘܟܬܐ ܕܐܪܥܬܗ ܗܘܬ ܡܪܬܐ
11:31	ܐܦ ܗܢܘܢ ܕܡܠܝܢ ܗܘܘ ܒܠܒܗ ܕܡܪܝܡ ܟܕ ܚܙܘ ܕܗܟܘܬ ܬܘܗܬ ܢܦܩܬ ܐܙܠܘ ܠܗܘܢ ܒܬܪܗ ܣܒܪܝܢ ܗܘܘ ܕܠܩܒܪܐ ܐܙܠܐ ܠܡܒܟܐ܂
11:32	ܘܗܝ ܡܪܝܡ ܟܕ ܡܛܬ ܠܘܬܗ ܕܝܫܘܥ ܢܦܠܬ ܥܠ ܪ̈ܓܠܘܗܝ܂ ܘܐܡܪܐ ܠܗ ܐܠܘ ܬܢܢ ܗܘܝܬ ܡܪܝ ܠܐ ܡܐܬ ܗܘܐ ܐܚܝ܂
11:33	ܘܗܘ ܝܫܘܥ ܟܕ ܚܙܗ ܕܒܟܝܐ ܘܚܙܐ ܠܝܗܘ̈ܕܝܐ ܗܢܘܢ ܕܥܡܗ ܕܒ̈ܟܝܢ܂ ܪܬܚ ܒܢܦܫܗ ܘܐܬܥܙܙ ܒܪܘܚܗ
11:34	ܘܐܡܪ ܐܝܠܟܐ ܣܡܬܘܢܝܗܝ܂ ܐܡܪܝܢ ܠܗ ܡܪܢ ܬܐ ܚܙܝ
11:35	ܘܐܬܝܢ ܗܘܝ ܕܡܥ̈ܘܗܝ ܕܝܫܘܥ
11:36	ܘܟܕ ܚܙܘ ܝܗܘ̈ܕܝܐ ܐܡܪ̈ܝܢ ܗܘܘ܂ ܚܙܘ ܟܡܐ ܪܚܡ ܗܘܐ ܠܗ܂
11:37	ܘܐܝܬ ܡܢܗܘܢ ܕܐܡܪ̈ܝܢ ܗܘܘ ܕܗܢܘ ܕܦܬܚ ܥܝܢ̈ܘܗܝ ܕܗܘ ܕܣܡܐ ܗܘܐ ܡܢ ܟܪܣܐ ܕܐܡܗ܂ ܠܐ ܥܘܕ ܡܫܟܚ ܗܘܐ ܕܢܥܒܕ ܗܢܐ ܕܠܐ ܢܡܘܬ܂
11:38	ܝܫܘܥ ܕܝܢ ܟܕ ܡܬܥܙܙ ܗܘܐ ܒܝ̈ܢܘܗܝ ܘܠܗ܂ ܐܬܐ ܠܒܝܬ ܩܒܘܪܐ ܘܗܘ ܒܝܬ ܩܒܘܪܐ ܢܩܝܪܐ ܗܘܐ܂ ܐܝܟ ܡܥܪܬܐ ܘܡܚܦܝ ܬܪܥܗ ܒܟܐܦܐ܂
11:39	ܐܡܪ ܝܫܘܥ ܫܩܘܠܘ ܟܐܦܐ ܗܕܐ ܐܡܪܐ ܠܗ ܡܪܬܐ ܡܪܝ ܡܢܐ ܫܩܠܝܢ ܠܗ ܠܟܐܦܐ ܕܗܐ ܣܪܝ ܠܗ܂ ܡܛܠ ܕܐܪ̈ܒܥܐ ܠܗ ܝܘܡ̈ܝܢ܂
11:40	ܐܡܪ ܠܗ ܐܡܪܬ ܠܟܝ ܕܐܢ ܬܗܝܡܢܝܢ ܬܚܙܝܢ ܫܘܒܚܗ ܕܐܠܗܐ
11:41	ܗܝܕܝܢ ܐܢܫܐ ܗܢܘܢ ܕܩܝܡܝܢ ܩܪܒܘ ܥܠܝܘܗ ܠܟܐܦܐ ܗܘ ܕܝܢ ܫܩܠ ܥܝܢ̈ܘܗܝ ܠܫܡܝܐ ܘܐܡܪ ܐܒܐ ܡܘܕܢܐ ܠܟ ܕܫܡܥܬܢܝ
11:42	ܘܐܢܐ ܝܕܥܢܐ ܕܒܟܠܙܒܢ ܫܡܥ ܐܢܬ ܠܝ ܐܠܐ ܡܛܠ ܟܢܫܐ ܗܢܐ ܕܐܢܫܐ ܐܡܪܢܐ ܗܠܝܢ ܕܢܗܝܡܢܘܢ ܕܐܢܬ ܫܕܪܬܢܝ
11:43	ܘܟܕ ܗܠܝܢ ܐܡܪ ܩܥܐ ܒܩܠܐ ܪܡܐ ܘܐܡܪ ܠܥܙܪ ܦܘܩ ܬܐ ܠܒܪ܂
11:44	ܘܒܗ ܒܫܥܬܐ ܢܦܩ ܗܘ ܡܝܬܐ ܟܕ ܡܥܨܒܢ ܐܝܕܘܗܝ ܘܪ̈ܓܠܘܗܝ ܒܦܣܩ̈ܝܬܐ܂ ܘܡܥܨܒܢ ܐܦܘ̈ܗܝ ܒܣܘܕܪܐ܂ ܗܝܕܝܢ ܐܡܪ ܡܪܢ ܫܪܘܘܗܝ ܘܫܒܘܩܘ ܐܙܠ܂
11:45	ܘܣܓ̈ܝܐܐ ܝܗܘ̈ܕܝܐ ܕܐܬܘ ܠܘܬ ܝܫܘܥ ܡܛܠ ܡܪܝܡ܂ ܡܢ ܗܝ ܫܥܬܐ ܗܝܡܢܘ ܒܝܫܘܥ
11:46	ܘܐܝܬ ܗܘܘ ܡܢܗܘܢ ܕܠܐ ܗܝܡܢܘܢ ܐܠܐ ܐܙܠܘ ܠܗܘܢ ܠܘܬ ܦܪܝܫܐ ܘܐܫܬܥܝܘ ܠܗܘܢ ܡܕܡ ܕܥܒܕ ܝܫܘܥ܀
11:47	ܗܝܕܝܢ ܪ̈ܒܝ ܟܗ̈ܢܐ ܘܦܪܝܫܐ ܐܬܟܢܫܘ ܘܥܒܕܘ ܐܦܪܣܢܐ ܘܐܡܪ̈ܝܢ ܗܘܘ ܡܢܐ ܢܥܒܕ ܕܗܢܐ ܓܒܪܐ ܐܬܘܬܐ ܣܓܝܐ̈ܬܐ ܥܒܕ
11:48	ܘܐܢ ܫܒܩܝܢ ܐܢܚܢܢ ܠܗ ܗܟܢܐ ܟܘܠܗܘܢ ܐܢܫ̈ܐ ܡܗܝܡ̈ܢܝܢ ܒܗ ܘܐܬܝܢ ܪ̈ܗܘܡܝܐ ܫܩܠܝܢ ܡܕܝܢܬܢ ܘܥܡܢ
11:49	ܚܕ ܡܢܗܘܢ ܕܝܢ ܩܝܦܐ ܫܡܗ ܗܘܐ ܪܒ ܟܗܢܐ ܕܝܠܗܘܢ ܕܗܝ ܫܢܬܐ ܐܡܪ ܠܗܘܢ ܗܘ ܩܝܦܐ ܐܢܬܘܢ ܠܐ ܝܕܥܝܢ ܐܢܬܘܢ ܡܕܡ
11:50	ܘܠܐ ܡܬܪܥܝܢ ܐܢܬܘܢ ܕܦܩܚ ܠܢ ܕܚܕ ܓܒܪܐ ܢܡܘܬ ܥܠ ܐܦ̈ܝ ܥܡܐ ܟܘܠܗ܂ ܘܠܐ ܟܘܠܗ ܥܡܐ ܢܐܒܕ
11:51	ܗܕܐ ܕܝܢ ܡܠܬܐ ܠܐ ܡܢ ܨܒܘܬ ܪܥܝܢܗ ܐܡܪܗ ܐܠܐ ܡܛܠ ܕܪܒ ܟܗܢܐ ܗܘܐ ܐܬܢܒܝ ܡܛܠ ܕܝܫܘܥ ܥܬܝܕ ܗܘܐ ܠܡܡܬ ܥܠ ܐܦ̈ܝ ܥܡܐ
11:52	ܘܠܐ ܥܠ ܐܦ̈ܝ ܥܡܐ ܒܠܚܘܕ ܐܠܐ ܕܐܦ ܒܢ̈ܝܐ ܕܐܠܗܐ ܕܡܒܕܪ̈ܝܢ ܢܬܟܢܫܘܢ ܠܚܕܐ
11:53	ܡܢ ܗܘ ܕܝܢ ܝܘܡܐ ܐܬܪܥܝܘ ܗܘܘ ܠܡܩܛܠܗ܀
11:54	ܝܫܘܥ ܕܝܢ ܠܐ ܡܗܠܟ ܗܘܐ ܒܦܪܪܣܝܐ ܠܥܝܢ ܝܗܘܕܝܐ ܐܠܐ ܐܙܠ ܠܗ ܠܐܬܪܐ ܕܩܪܝܒ ܠܡܕܒܪܐ ܕܡܬܩܪܐ ܐܦܪܝܡ ܘܬܡܢ ܡܬܗܦܟ ܗܘܐ ܥܡ ܬܠܡ̈ܝܕܘܗܝ
11:55	ܘܗܘܐ ܗܘܐ ܙܒܢܐ ܕܩܪܝܒܝܢ ܥܕܥܕܐ ܘܣܠܩܘ ܣܓܝܐܐ ܡܢ ܟܘܪ ܠܐܘܪܫܠܡ ܕܢܩܕܫܘܢ ܢܦܫܗܘܢ
11:56	ܘܒܥܝܢ ܗܘܘ ܠܗ ܠܝܫܘܥ ܘܐܡܪ̈ܝܢ ܚܕ ܠܚܕ ܒܗܝܟܠܐ ܣܒܪ̈ܝܢ ܐܢܬܘܢ ܕܟܒܪ ܠܐ ܐܬܐ ܠܥܕܥܕܐ

11:57	ܘܪ̈ܒܝ ܟܗ̈ܢܐ ܘܦܪ̈ܝܫܐ ܦܩܕܘ ܕܡܢ ܕܚܙܐ ܠܗ ܢܐܬܐ ܢܒܕܩ ܠܗܘܢ ܕܢܐܚܕܘܢܗ