← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60043: OS Jn

Click on a word for lexical analysis
Click on a red-colored coordinate for comments and/or translations of the line

previous chapter


13:01 ܡܢ ܩܕܡ ܦܛܝܪ̈ܐ ܕܝܢ ܝܕܥ ܗܘܐ ܝܫܘܥ ܕܐܬܬ ܠܗ ܫܥܬܗ ܕܢܫܢܐ ܡܢ ܗܢܐ ܥܠܡܐ ܠܘܬ ܐܒܘܗܝ ܐܚܒ ܠܕܝܠܗ ܕܒܗܢܐ ܥܠܡܐ ܘܥܕܡܐ ܠܐܚܪܝܬܐ ܐܚܒ ܐܢܘܢ
13:02 ܘܗܘܬ ܐܚܫܡܝܬܐ ܘܣܛܢܐ ܐܪܡܐ ܗܘܐ ܒܠܒܗ ܕܝܗܘܕܐ ܒܪ ܫܡܥܘܢ ܣܟܪܝܘܛܐ ܐܝܟ ܕܢܫܠܡܝܗܝ܂
13:03 ܘܗܘ ܝܫܘܥ ܡܛܠ ܕܝܕܥ ܗܘܐ ܕܟܘܠ ܡܕܡ ܝܗܒ ܐܒܐ ܒܐܝܕ̈ܘܗܝ܂ ܘܝܕܥ ܗܘܐ ܕܡܢ ܠܘܬ ܐܠܗܐ ܐܬܐ ܘܠܘܬ ܐܠܗܐ ܐܙܠ
13:04 ܩܡ ܐܢܝܚ ܢܚܬܘܗܝ܂ ܘܢܣܒ ܣܕܘܢܐ ܡܚܐ ܒܚܨ̈ܘܗܝ
13:05 ܘܢܣܒ ܡܝ̈ܐ ܐܪܡܝ ܒܠܩܢܐ ܕܫܝܓܬܐ ܘܫܪܝ ܗܘܐ ܡܫܝܓ ܪ̈ܓܠܐ ܕܬܠܡܝ̈ܕܘܗܝ ܘܡܫܦܪ ܒܣܕܘܢܐ ܕܡܚܐ ܒܚܨܘܗܝ
13:06 ܘܟܕ ܡܛܐ ܠܘܬ ܫܡܥܘܢ ܟܐܦܐ ܐܡܪ ܠܗ ܫܡܥܘܢ ܐܢܬ ܡܪܝ ܪ̈ܓܠܝ ܡܫܝܓ ܐܢܬ ܠܝ܂
13:07 ܐܡܪ ܠܗ ܝܫܘܥ ܡܕܡ ܕܥܒܕ ܐܢܐ ܠܟ ܠܐ ܝܕܥ ܐܢܬ ܡܢ ܒܬܪ ܙܒܢܐ ܕܝܢ ܬܕܥ܂
13:08 ܐܡܪ ܠܗ ܫܡܥܘܢ ܠܥܠܡ ܠܐ ܡܫܝܓ ܐܢܬ ܠܝ ܪ̈ܓܠܝ ܐܡܪ ܠܗ ܝܫܘܥ ܐܠܐ ܡܫܝܓ ܐܢܐ ܠܟ ܠܝܬ ܠܟ ܥܡܝ ܡܢܬܐ܂
13:09 ܐܡܪ ܠܗ ܫܡܥܘܢ ܡܕܝܢ ܡܪܝ ܠܐ ܪ̈ܓܠܝ ܒܠܚܘܕ ܬܫܝܓ ܠܝ ܐܠܐ ܐܦ ܐܝ̈ܕܝ ܘܐܦ ܪܝܫܝ
13:10 ܐܡܪ ܠܗ ܝܫܘܥ܂ ܡܢ ܕܣܚܐ ܗܘ ܠܐ ܣܢܝܩ ܐܠܐ ܪ̈ܓܠܘܗܝ ܒܠܚܘܕ ܢܫܝܓ ܡܛܠ ܕܟܘܠܗ ܕܟܐ ܗܘ ܘܐܦ ܐܢܬܘܢ ܕܟܝܢ ܐܢܬܘܢ܂ ܐܠܐ ܠܐ ܟܠܟܘܢ܂
13:11 ܝܕܥ ܗܘܐ ܓܝܪ ܡܢ ܕܡܫܠܡ ܠܗ܂ ܡܛܘܠ ܗܘ ܐܡܪ ܗܕܐ ܡܠܬܐ܂
13:12 ܟܕ ܐܫܝܓ ܕܝܢ ܪ̈ܓܠܝܗܘܢ ܢܣܒ ܢܚܬܘܗܝ ܘܐܣܬܡܟ ܐܡܪ ܠܗܘܢ ܝܕܥܝܢ ܐܢܬܘܢ ܡܢܐ ܥܒܕܬ ܠܟܘܢ
13:13 ܗܐ ܩܪܝܢ ܐܢܬܘܢ ܠܝ ܪܒܢ ܘܡܪܢ ܘܫܦܝܪ ܐܡܪ̈ܝܢ ܐܢܬܘܢ ܐܝܬܝ ܓܝܪ
13:14 ܘܐܢ ܐܢܐ ܪܒܟܘܢ ܘܡܪܟܘܢ ܪ̈ܓܠܝܟܘܢ ܡܫܝܓܢܐ ܠܟܘܢ ܟܡܐ ܘܠܐ ܠܟܘܢ ܕܐܦ ܐܢܬܘܢ ܬܗܘܘܢ ܡܫܝܓܝܢ ܪ̈ܓܠܐ ܚܕ ܕܚܕ
13:15 ܗܢܐ ܕܝܢ ܛܘܦܣܐ ܕܚܘܝܬܟܘܢ ܕܐܝܟܢܐ ܕܥܒܕܬ ܠܟܘܢ ܬܗܘܘܢ ܥܒܕܝܢ܀
13:16 ܐܡܝܢ ܐܡܝܢ ܐܡܪܢܐ ܠܟܘܢ ܕܠܝܬ ܥܒܕܐ ܕܪܒ ܡܢ ܡܪܗ ܘܠܐ ܫܠܝܚܐ ܕܪܒ ܡܢ ܡܢ ܕܫܕܪܗ
13:17 ܐܢ ܗܠܝܢ ܬܕܥܘܢ ܘܬܥܒܕܘܢ ܛܘܒ̈ܝܟܘܢ
13:18 ܠܐ ܗܘܐ ܥܠ ܟܘܠ ܐܢܫ ܐܡܪܢܐ܂ ܡܛܠ ܕܝܕܥܢܐ ܠܐܝܠܝܢ ܕܓܒܝܬ܂ ܐܠܐ ܡܛܠ ܕܢܫܠܡ ܟܬܒܐ܂ ܕܐܡܪ ܕܡܢ ܕܐܟܠ ܥܡܝ ܠܚܡܐ ܐܪܝܡ ܥܠܝ ܥܩܒܗ܂
13:19 ܡܢ ܗܫܐ ܐܡܪܢܐ ܠܟܘܢ ܡܢ ܩܕܡ ܕܠܐ ܢܗܘܐ ܕܡܐ ܕܗܘܐ ܬܕܥܘܢ ܕܐܢܐ ܐܢܐ
13:20 ܐܡܝܢ ܐܡܪܢܐ ܠܟܘܢ ܕܡܢ ܕܡܩܒܠ ܠܡܢ ܕܡܫܕܪ ܐܢܐ ܠܝ ܗܘ ܡܩܒܠ ܘܡܢ ܕܠܝ ܡܩܒܠ ܠܡܢ ܕܫܠܚܢܝ ܗܘ ܡܩܒܠ܂
13:21 ܘܟܕ ܐܡܪ ܗܠܝܢ ܝܫܘܥ ܐܬܙܝܥ ܒܪܘܚܗ ܘܐܣܗܕ ܘܐܡܪ ܐܡܝܢ ܐܡܪܢܐ ܠܟܘܢ ܕܚܕ ܡܢܟܘܢ ܡܫܠܡ ܠܝ܂
13:22 ܬܠܡܝܕܘܗܝ ܕܝܢ ܚܝܪܝܢ ܗܘܘ ܚܕ ܒܚܕ ܘܡܬܕܡܪܝܢ ܕܥܠ ܡܢ ܟܝ ܐܡܪ
13:23 ܚܕ ܡܢ ܬܠܡܝܕܘܗܝ ܕܝܫܘܥ ܐܝܢܐ ܕܡܪܢ ܪܚܡ ܗܘܐ ܗܘ ܕܣܡܝܟ ܗܘܐ ܒܥܘܒܗ
13:24 ܪܡܙ ܠܗ ܫܡܥܘܢ ܟܐܦܐ ܕܢܫܐܠܝܘܗܝ ܥܠ ܡܢ ܐܡܪ
13:25 ܗܘ ܬܠܡܝܕܐ ܕܪܚܡ ܗܘܐ ܠܗ܂ ܝܫܘܥ ܢܦܠ ܥܠ ܚܕܝܗ ܕܝܫܘܥ ܘܐܡܪ ܠܗ ܡܪܝ ܡܢܘ ܗܢܐ
13:26 ܐܡܪ ܠܗ ܗܘ ܗܘ ܕܨܒܥܢܐ ܠܚܡܐ ܝܗܒܢܐ ܠܗ ܘܨܒܥ ܝܫܘܥ ܠܚܡܐ ܘܝܗܒ ܠܝܗܘܕܐ ܒܪ ܫܡܥܘܢ ܣܟܪܝܘܛܐ
13:27 ܘܒܬܪ ܠܚܡܐ܂ ܐܬܥܠܠ ܗܘܐ ܒܗ ܣܛܢܐ ܐܡܪ ܠܗ ܝܫܘܥ ܡܕܡ ܕܥܒܕ ܐܢܬ ܥܒܕ ܒܥܓܠ
13:28 ܘܬܠܡܝܕܘܗܝ ܠܐ ܝܕܥܝܢ ܗܘܘ ܥܠ ܡܢܐ ܐܡܪ
13:29 ܗܢܘܢ ܣܒܪܝܢ ܗܘܘ ܓܝܪ ܕܡܛܘܠ ܕܓܠܘܣܩܡܐ ܨܐܕܘܗܝ ܗܘܐ ܕܝܗܘܕܐ܂ ܕܡܦܩܕ ܦܩܕ ܠܗ ܡܐ ܕܢܙܒܢ ܠܥܕܥܝܕܐ ܘܡܐ ܕܢܬܠ ܠܡܣܟܢܐ܂
13:30 ܗܝܕܝܢ ܩܡ ܝܗܘܕܐ ܘܢܣܒ ܠܚܡܐ ܘܢܦܩ ܠܗ ܠܒܪ ܘܥܕܢܐ ܕܝܢ ܠܠܝܐ ܗܘܐ܂ ܘܟܕ ܢܦܩ
13:31 ܐܡܪ ܝܫܘܥ ܗܐ ܡܟܝܠ ܐܫܬܒܚ ܒܪܗ ܕܓܒܪܐ܂ ܘܐܠܗܐ ܐܫܬܒܚ ܒܗ܂
13:32 ܘܐܠܗܐ ܕܒܗ ܡܫܒܚ ܠܗ ܘܒܚܕܐ ܡܫܒܚ ܠܗ
13:33 ܒܢܝ ܩܠܝܠ ܐܚܪܢ ܥܡܟܘܢ ܐܢܐ ܘܬܒܥܘܢܢܝ ܐܝܟܢܐ ܕܐܡܪܬ ܠܝܗܘܕܝܐ ܕܐܬܪ ܕܐܢܐ ܐܙܠܢܐ ܠܐ ܡܫܟܚܝܢ ܠܡܐܬܐ ܘܗܐ ܐܦ ܠܟܘܢ ܐܡܪܬ
13:34 ܐܠܐ ܕܗܫܐ ܦܘܩܕܢܐ ܚܕܬܐ ܝܗܒܢܐ ܠܟܘܢ ܕܬܗܘܘܢ ܡܚܒܝܢ ܚܕ ܠܚܕ ܐܝܟܢܐ ܕܐܢܐ ܐܚܒܬܟܘܢ܂
13:35 ܒܗܕܐ ܓܝܪ ܢܕܥܘܢ ܟܘܠܗܘܢ ܕܬܠܡܝܕܝ ܐܢܬܘܢ ܐܢ ܚܘܒܐ ܢܗܘܐ ܒܟܘܢ ܚܕ ܠܘܬ ܚܕ
13:36 ܐܡܪ ܠܗ ܫܡܥܘܢ ܟܐܦܐ ܡܪܝ ܠܐܝܠܟܐ ܐܙܠ ܐܢܬ܂ ܐܡܪ ܠܗ ܠܐܬܪ ܕܐܙܠ ܐܢܐ ܠܐ ܡܫܟܚ ܐܢܬ ܠܡܐܬܐ ܒܗܢܐ ܙܒܢܐ ܒܐܚܪܝܬܐ ܕܝܢ ܬܐܬܐ ܒܬܪܝ܂
13:37 ܐܡܪ ܠܗ ܫܡܥܘܢ ܠܡܢܐ ܠܐ ܡܫܟܚ ܐܢܐ ܕܐܬܐ ܒܬܪܟ܂ ܗܫܐ ܢܦܫܝ ܐܣܝܡ ܚܠܦܝܟ
13:38 ܐܡܪ ܠܗ ܝܫܘܥ ܠܢܦܫܟ ܬܣܝܡ ܚ̈ܠܦܝ܂ ܐܡܝܢ ܐܡܪܢܐ ܠܟ ܕܥܕܠܐ ܢܩܪܐ ܬܪܢܓܠܐ ܬܪܬܝܢ ܙܒܢܝܢ ܕܬܠܬ ܙܒܢܝܢ ܬܟܦܪ ܒܝ

next chapter