← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60043: OS Jn

Click on a word for lexical analysis
Click on a red-colored coordinate for comments and/or translations of the line

previous chapter


16:01 ܗܠܝܢ ܕܝܢ ܡܠܠܬ ܥܡܟܘܢ ܕܠܐ ܬܬܟܫܠܘܢ܂
16:02 ܢܦܩܘܢܟܘܢ ܓܝܪ ܡܢ ܟܢܘܫܬܗܘܢ ܘܬܐܬܐ ܫܥܬܐ ܕܡܢ ܕܢܩܛܘܠܟܘܢ ܢܣܒܪ ܕܠܐܠܗܐ ܦܠܚ
16:04 ܗܠܝܢ ܡܠܠܬ ܒܟܘܢ ܕܡܐ ܕܐܬܬ ܫܥܬܐ ܬܥܗܕܘܢ ܕܐܡܪܬ ܠܟܘܢ ܗܠܝܢ ܕܠܐ ܐܡܪܬ ܠܟܘܢ ܡܢ ܩܕܝܡ ܡܛܘܠ ܕܥܡܟܘܢ ܗܘܝܬ
16:05 ܗܫܐ ܕܝܢ ܕܐܙܠܢܐ ܠܘܬ ܡܢ ܕܫܕܪܢܝ ܠܐ ܐܢܫ ܡܢܟܘܢ ܡܫܐܠ ܠܝ ܠܐܝܟܐ ܐܙܠ ܐܢܬ
16:06 ܡܛܠ ܕܐܡܪܬ ܠܟܘܢ ܓܝܪ ܗܠܝܢ ܘܐܬܬ ܟܪܝܘܬܐ ܘܡܠܬ ܠܒܘܬܟܘܢ
16:07 ܐܠܐ ܐܢܐ ܫܪܪܐ ܐܡܪܢܐ ܠܟܘܢ܂ ܕܦܩܚ ܠܟܘܢ ܕܐܢܐ ܐܙܠ ܡܛܠ ܕܐܢ ܐܢܐ ܠܐ ܐܙܠܢܐ ܦܪܩܠܛܐ ܠܐ ܐܬܐ ܠܘܬܟܘܢ܂ ܡܐ ܕܐܙܠܬ ܕܝܢ ܡܫܕܪܢܐ ܠܟܘܢ ܦܪܩܠܛܐ
16:08 ܡܐ ܕܐܬܐ ܕܝܢ ܗܘ ܢܟܣܝܘܗܝ ܠܥܠܡܐ ܒܚ̈ܛܗܘܗܝ ܘܥܠ ܙܕܝܩܘܬܗ ܘܥܠ ܕܝܢܐ܂
16:09 ܘܥܠ ܚܛ̈ܝܐ ܕܠܐ ܗܝܡܢܘ ܒܝ
16:10 ܘܥܠ ܙܕܝܩܘܬܐ ܕܝܢ ܕܠܘܬ ܐܒܝ ܐܙܠܢܐ ܘܡܟܝܠ ܠܐ ܬܘܒ ܚܙܝܢ ܐܢܬܘܢ ܠܝ
16:11 ܥܠ ܕܝܢܐ ܕܝܢ ܕܐܪܟܘܢܗ ܕܥܠܡܐ ܗܢܐ ܕܝܢ ܗܘ
16:12 ܣܓܝ ܐܝܬ ܠܝ ܠܡܐܡܪ ܠܟܘܢ ܐܠܐ ܠܐ ܡܫܟܚܝܢ ܐܢܬܘܢ ܠܡܫܩܠܘ ܝܘܡܢܐ
16:13 ܡܐ ܕܐܬܬ ܕܝܢ ܪܘܚܐ ܕܫܪܪܐ ܗܝ ܬܕܒܪܟܘܢ ܒܟܠܗ ܫܪܪܐ܂ ܡܛܠ ܕܠܐ ܬܡܠܠ ܡܢ ܪܥܝܢ ܢܦܫܗ ܐܠܐ ܟܘܠ ܕܬܫܡܥ ܗܘ ܬܐܡܪ ܘܥܠ ܟܠ ܡܐ ܕܐܬܐ ܬܣܒܪܟܘܢ
16:14 ܘܗܝ ܬܫܒܚܢܝ ܡܛܠ ܕܡܢ ܕܝܠܝ ܬܣܒ ܗܝ ܘܬܣܒܪܟܘܢ
16:15 ܕܡܕܡ ܕܐܝܬ ܠܐܒܝ ܕܝܠܝ ܗܘ ܡܛܠ ܗܢܐ ܐܡܪܬ ܠܟܘܢ ܕܡܢ ܕܝܠܝ ܬܣܒ ܘܬܣܒܪܟܘܢ
16:16 ܩܠܝܠ ܘܠܐ ܬܚܙܘܢܢܝ ܘܬܘܒ ܩܠܝܠ ܘܬܚܙܘܢܢܝ ܕܐܙܠ ܐܢܐ ܠܘܬ ܐܒܝ
16:17 ܘܐܡܪ̈ܝܢ ܬܠܡܝܕܘܗܝ ܚܕ ܠܚܕ ܡܢܐ ܗܝ ܗܕܐ ܕܐܡܪ ܕܩܠܝܠ ܘܠܐ ܬܚܙܘܢܢܝ ܘܬܘܒ ܩܠܝܠ ܘܬܚܙܘܢܢܝ ܘܕܐܡܪ ܕܐܙܠ ܐܢܐ ܠܝ ܠܘܬ ܐܒܝ܂
16:18 ܡܢܘ ܟܝ ܗܢܐ ܩܠܝܠ ܕܐܡܪ
16:19 ܝܫܘܥ ܕܝܢ ܝܕܥ ܡܢܐ ܒܥܝܢ ܗܘܘ ܠܡܫܐܠܘܬܗ ܐܡܪ ܠܗܘܢ ܡܒܥܐ ܒܥܝܢ ܐܢܬܘܢ ܠܗܕܐ ܕܐܡܪܬ ܠܟܘܢ ܕܩܠܝܠ ܘܠܐ ܬܚܙܘܢܢܝ ܘܬܘܒ ܩܠܝܠ ܘܬܚܙܘܢܢܝ
16:20 ܐܡܝܢ ܐܡܝܢ ܐܡܪ ܐܢܐ ܠܟܘܢ ܕܬܒܟܘܢ ܘܬܐܠܘܢ ܘܬܬܢܚܘܢ ܘܥܠܡܐ ܢܚܕܐ ܐܢܬܘܢ ܬܐܨܦܘܢ ܐܠܐ ܟܪܝܘܬܟܘܢ ܠܚܕܘܬܐ ܬܗܘܐ܂
16:21 ܐܢܬܬܐ ܡܐ ܕܝܠܕܐ ܟܪܝܐ ܗܝ ܠܗ ܡܛܠ ܕܡܛܐ ܝܘܡܐ ܕܡܘܠܕܗ ܘܡܐ ܕܝܠܕܬ ܒܪܐ ܠܐ ܥܗܕܐ ܐܘܠܨܢܗ ܡܛܠ ܚܕܘܬܐ ܕܐܬܝܠܕ ܒܪ ܐܢܫܐ ܒܥܠܡܐ
16:22 ܘܐܦ ܐܢܬܘܢ ܗܫܐ ܟܪܝܐ ܠܟܘܢ ܬܘܒ ܐܚܙܝܟܘܢ ܘܢܚܕܐ ܠܒܟܘܢ ܘܚܕܘܬܟܘܢ ܠܐ ܐܢܫ ܢܣܒ ܡܢܟܘܢ
16:23 ܘܒܗܘ ܝܘܡܐ ܡܕܡ ܠܐ ܬܫܐܠܘܢ ܡܢܝ ܐܡܝܢ ܐܡܝܢ ܐܡܪܢܐ ܠܟܘܢ ܕܟܘܠ ܡܐ ܕܬܫܐܠܘܢ ܠܐܒܝ ܒܫܡܝ ܢܬܠ ܠܟܘܢ
16:24 ܥܕܡܐ ܠܗܫܐ ܠܐ ܫܐܠܬܘܢ ܒܫܡܝ ܫܐܠܘ ܘܬܣܒܘܢ ܕܬܗܘܐ ܚܕܘܬܟܘܢ ܡܫܡܠܝܐ܂
16:25 ܗܠܝܢ ܡܠܠܬ ܥܡܟܘܢ ܒܦܠܐܬܐ ܐܬܝܐ ܕܝܢ ܫܥܬܐ ܕܥܝܢܒܓܠܐ ܐܚܘܟܘܢ ܥܠ ܐܒܝ
16:26 ܒܗܘ ܝܘܡܐ ܬܫܐܠܘܢ ܒܫܡܝ ܘܠܐ ܐܡܪܢܐ ܠܟܘܢ ܕܐܢܐ ܐܒܥܐ ܡܢ ܐܒܝ ܥܠ ܐܦ̈ܝܟܘܢ
16:27 ܐܠܐ ܗܘ ܐܒܝ ܪܚܡܟܘܢ ܕܐܢܬܘܢ ܪܚܡܬܘܢܢܝ ܘܕܗܝܡܢܬܘܢ ܕܡܢ ܠܘܬ ܐܠܗܐ ܢܦܩܬ
16:28 ܐܬܝܬ ܠܥܠܡܐ ܘܬܘܒ ܐܙܠ ܐܢܐ ܠܘܬ ܐܒܐ
16:29 ܐܡܪܘ ܠܗ ܬܠܡܝܕܘܗܝ ܗܐ ܐܦ ܗܫܐ ܦܫܝܩܐܝܬ ܡܡܠܠ ܐܢܬ ܘܦܠܐܬܐ ܐܦܠܐ ܚܕܐ ܐܡܪܬ ܠܢ
16:30 ܗܫܐ ܝܕܥܝܢ ܐܢܚܢܢ ܕܟܘܠ ܡܕܡ ܝܕܥ ܐܢܬ ܘܠܐ ܣܢܝܩ ܐܢܬ ܕܠܐܢܫ ܬܫܐܠ ܒܗܕܐ ܡܗܝܡܢܝܢ ܐܢܚܢܢ ܕܡܢ ܐܠܗܐ ܐܫܬܕܪܬ
16:31 ܐܡܪ ܠܗܘܢ ܝܫܘܥ ܗܫܐ ܗܐ ܡܗܝܡܢܝܢ ܐܢܬܘܢ ܠܝ
16:32 ܗܐ ܐܬܝܐ ܫܥܬܐ ܘܐܬܬ ܕܬܬܒܕܪܘܢ ܐܢܫ ܠܐܬܪܗ ܘܬܫܒܩܘܢܢܝ܂ ܒܠܚܘܕܝ܂ ܘܠܐ ܗܘܝܬ ܒܠܚܘܕܝ ܕܐܒܐ ܥܡܝ ܗܘ
16:33 ܗܠܝܢ ܐܡܪܬ ܕܢܗܘܐ ܠܟܘܢ ܒܝ ܫܠܡܐ ܘܒܥܠܡܐ ܢܗܘܐ ܠܟܘܢ ܐܘܠܨܢܐ ܐܠܐ ܠܐ ܬܕܚܠܘܢ ܐܢܐ ܓܝܪ ܙܟܝܬܗ ܠܥܠܡܐ܂

next chapter