← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60043: OS Jn

Click on a word for lexical analysis
Click on a red-colored coordinate for comments and/or translations of the line

previous chapter


18:01 ܗܠܝܢ ܡܠܠ ܝܫܘܥ ܘܢܦܩ ܥܡ ܬܠܡܝܕܘܗܝ ܠܥܒܪܐ ܕܪܓܠܬܐ ܕܩܕܪܘܢ ܛܘܪܐ܂ ܐܬܪ ܕܐܝܬ ܗܘܬ ܓܢܬܐ ܘܥܠ ܠܬܡܢ ܗܘ ܘܬܠܡܝ̈ܕܘܗܝ܂
18:02 ܝܗܘܕܐ ܕܝܢ ܡܫܠܡܢܐ ܝܕܥ ܗܘܐ ܠܗ ܠܗܝ ܕܘܟܬܐ ܡܛܠ ܕܙܒ̈ܢܝܢ ܣܓܝ̈ܐܐ ܟܢܫ ܗܘܐ ܬܡܢ ܝܫܘܥ ܥܡ ܬܠܡܝܕܘܗܝ
18:03 ܝܗܘܕܐ ܕܝܢ ܡܫܠܡܢܐ ܕܒܪ ܥܡܗ ܐܣܦܝܪ ܘܡܢ ܪ̈ܒܝ ܟܗ̈ܢܐ ܘܦܪ̈ܝܫܐ ܘܕܚ̈ܫܐ ܘܟܢܫܐ ܕܥܡܐ ܟܕ ܫܩܝ̈ܠܝܢ ܢܦܛܪܐ ܘܠܡ̈ܦܕܐ ܘܐܬܐ ܬܡܢ
18:04 ܘܟܕ ܚܙܐ ܝܫܘܥ ܟܘܠ ܡܐ ܕܐܬܐ ܥܠܘܗܝ ܢܦܩ ܐܡܪ ܠܗܘܢ ܡܢܐ ܒܥܝܢ ܐܢܬܘܢ
18:05 ܐܡܪ̈ܝܢ ܠܗ ܠܝܫܘܥ ܢܨܪܝܐ ܐܡܪ ܠܗܘܢ ܐܢܐ ܐܢܐ ܩܐܡ ܗܘܐ ܕܝܢ ܐܦ ܝܗܘܕܐ ܠܘܬܗܘܢ
18:06 ܘܟܕ ܐܡܪ ܗܠܝܢ ܝܫܘܥ ܕܐܢܐ ܐܢܐ ܐܙܠܘ ܠܒܣܬܪܗܘܢ܂ ܘܢܦܠܘ ܥܠ ܐܪܥܐ܂
18:07 ܘܬܘܒ ܐܡܪ ܠܗܘܢ ܝܫܘܥ ܠܡܢ ܒܥܝܢ ܐܢܬܘܢ ܐܡܪܝܢ ܠܗ ܠܝܫܘܥ ܢܨܪܝܐ܂
18:08 ܐܡܪ ܠܗܘܢ ܐܡܪܬ ܠܟܘܢ ܕܐܢܐ ܐܢܐ ܐܢ ܠܝ ܒܥܝܢ ܐܢܬܘܢ ܫܒܘܩܘ ܐܙܠܝܢ܂
18:09 ܕܬܫܠܡ ܡܠܬܐ ܗܝ ܕܐܡܪ ܗܘܐ ܕܐܝܠܝܢ ܕܝܗܒܬ ܠܝ܂ ܠܐ ܐܘܒܕܬ ܡܢܗܘܢ
18:10 ܫܡܥܘܢ ܕܝܢ ܟܐܦܐ ܫܡܛ ܣܝܦܗ ܘܡܚܝܗܝ ܠܥܒܕܗ ܕܪܒ ܟܗܢܐ ܘܫܩܠܗ ܐܕܢܗ ܕܝܡܝܢܐ܂ ܘܫܡܗ ܕܓܒܪܐ ܡܠܟܘ
18:11 ܘܐܡܪ ܝܫܘܥ ܠܟܐܦܐ ܐܗܦܟ ܣܝܦܟ ܠܕܘܟܬܗ ܟܣܐ ܕܝܗܒ ܠܝ ܐܒܝ ܠܐ ܐܫܬܝܘܗܝ
18:12 ܘܗܝ ܐܣܦܝܪ ܘܟܠܝܪܟܐ ܘܕܚܫܐ ܕܝܗܘܕܝܐ ܐܣܪܘܗܝ
18:13 ܘܐܝܬܝܘܗܝ ܠܘܩܕܡ ܠܘܬ ܚܢܢ ܚܡܘܗܝ ܕܩܝܦܐ ܕܗܘ ܗܘܐ ܪܒ ܟܗܢܐ ܕܗܝ ܫܢܬܐ
18:24 ܚܢܢ ܕܝܢ ܫܕܪܗ ܟܕ ܐܣܝܪ ܠܘܬ ܩܝܦܐ ܪܒ ܟܗܢܐ
18:14 ܗܘ ܕܡܠܟ ܗܘܐ ܠܝܗܘ̈ܕܝܐ ܕܘܠܐ ܕܚܕ ܓܒܪܐ ܢܡܘܬ ܥܠ ܐ̈ܦܝ ܥܡܐ
18:15 ܫܡܥܘܢ ܕܝܢ ܟܐܦܐ ܘܚܕ ܡܢ ܬܠܡܝܕܐ ܡܚܟܡܘܬܗ ܗܘܐ ܕܪܒ ܟܗܢܐ ܡܛܠ ܗܢܐ ܥܠ ܥܡ ܝܫܘܥ ܠܕܪܬܐ܀
18:19 ܪܒ ܟܗܢܐ ܕܝܢ ܡܫܐܠ ܗܘܐ ܠܗ ܠܝܫܘܥ ܥܠ ܬܠܡܝܕܘܗܝ ܡܢ ܐܢܘܢ ܘܥܠ ܝܘܠܦܢܗ܂ ܐܝܢܐ ܗܘ
18:20 ܐܡܪ ܠܗ ܝܫܘܥ ܐܢܐ ܥܝܢܒܓܠܐ ܡܠܠܬ ܥܡ ܥܠܡܐ ܘܒܟܘܠ ܙܒܢ ܐܠܦܬ ܒܟܢܘܫܬܐ ܘܒܗܝܟܠܐ ܘܐܬܪ ܕܟܠܗܘܢ ܝܗܘܕܝܐ ܡܬܟܢܫܝܢ ܘܡܕܡ ܒܛܘܫܝܐ ܠܐ ܡܠܠܬ܂
18:21 ܗܫܐ ܕܝܢ ܡܢܐ ܡܫܐܠ ܐܢܬ ܠܝ܂ ܫܐܠ ܠܐܝܠܝܢ ܕܫܡܥܘ ܡܢܐ ܡܠܠܬ ܥܡܗܘܢ܂ ܗܐ ܗܢܘܢ ܝܕܥܝܢ ܡܕܡ ܕܡܠܠܬ
18:22 ܟܕ ܡܠܠ ܗܠܝܢ ܚܕ ܡܢ ܕܚܫ̈ܐ ܕܩܝܡܝܢ ܡܚܝܗܝ ܥܠ ܦܟܗ ܠܝܫܘܥ܂ ܘܐܡܪ ܠܗ ܗܟܢܐ ܡܬܝܒ ܐܢܬ ܦܬܓܡܐ ܠܪܒܟܗܢܐ܂
18:23 ܐܡܪ ܠܗ ܝܫܘܥ ܫܦܝܪ ܡܠܠܬ܂ ܠܡܢܐ ܡܚܝܬܢܝ܀
18:16 ܫܡܥܘܢ ܕܝܢ ܟܐܦܐ ܩܐܡ ܗܘܐ ܡܢ ܠܒܪ ܥܠ ܘܢܦܩ ܠܗ ܬܠܡܝܕܐ ܡܚܟܡܘܬܗ ܕܪܒ ܟܗܢܐ ܘܐܡܪ ܠܢܛܪ ܬܪܥܐ ܘܐܥܠܗ ܠܫܡܥܘܢ
18:17 ܟܕ ܚܙܬܗ ܠܫܡܥܘܢ ܐܡܬܗ ܕܢܛܪ ܬܪܥܐ ܐܡܪܐ ܠܗ ܠܡܐ ܐܦ ܐܢܬ ܚܕ ܡܢ ܬܠܡܝܕܘܗܝ ܐܢܬ ܕܗܢܐ ܓܒܪܐ ܐܡܪ ܠܗ ܠܐ
18:18 ܘܩܝܡܝܢ ܗܘܘ ܕܝܢ ܬܡܢ ܥܒܕܐ ܘܕܚܫ̈ܐ ܘܣܝܡܝܢ ܗܘܘ ܠܗܘܢ ܢܘܪܐ ܒܕܪܬܐ ܕܢܫܚܢܘܢ܂ ܡܛܠ ܕܩܪܝܫ ܗܘܐ
18:25 ܩܐܡ ܗܘܐ ܕܝܢ ܐܦ ܫܡܥܘܢ ܠܘܬܗܘܢ ܘܫܚܢ ܘܐܡܪܝܢ ܠܗ ܗܠܝܢ ܐܢܫ̈ܐ ܕܫܚܢܝܢ ܠܡܐ ܐܦ ܐܢܬ ܚܕ ܡܢ ܬܠܡܝܕܘܗܝ ܐܢܬ܂ ܗܘ ܕܝܢ ܟܦܪ ܘܐܡܪ ܕܠܐ
18:26 ܘܥܢܐ ܚܕ ܡܢ ܥܒܕܘܗܝ ܕܪܒ ܟܗܢܐ ܐܚܝܢܗ ܕܗܘ ܕܦܣܩ ܗܘܐ ܫܡܥܘܢ ܟܐܦܐ ܠܗ ܐܕܢܗ ܐܡܪ ܠܗ ܠܫܡܥܘܢ ܠܐ ܐܢܐ ܚܙܝܬܟ ܥܡܗ ܒܓܢܬܐ
18:27 ܘܬܘܒ ܟܦܪ ܫܡܥܘܢ ܕܠܐ ܝܕܥܢܐ ܠܗ ܘܒܗ ܒܫܥܬܐ ܩܪܐ ܬܪܢܓܠܐ܀
18:28 ܘܟܕ ܢܓܗܬ ܕܒܪܘܗܝ ܠܝܫܘܥ ܡܢ ܠܘܬ ܩܝܦܐ ܘܐܘܒܠܘܗܝ ܠܦܪܛܘܪܝܢ ܕܢܫܠܡܘܢܗܝ ܠܗܓܡܢܐ ܗܢܘܢ ܕܝܢ ܠܐ ܥܠܘ ܠܦܪܛܘܪܝܢ ܕܠܐ ܢܬܛܘܫܘܢ ܟܕ ܐܟܠܝܢ ܦܛܝܪ̈ܐ
18:29 ܘܢܦܩ ܦܝܠܛܘܣ ܠܘܬܗܘܢ ܘܐܡܪ ܠܗܘܢ ܡܢܐ ܡܐܟܠ ܩܪܨܐ ܐܝܬ ܠܟܘܢ ܥܠ ܓܒܪܐ ܗܢܐ
18:30 ܥܢܘ ܘܐܡܪܝܢ ܐܠܘ ܠܐ ܥܒܕ ܒܝܫ̈ܬܐ ܗܘܐ ܐܦܠܐ ܡܫܠܡܝܢ ܗܘܝܢ ܠܗ ܠܟ܂
18:31 ܐܡܪ ܠܗܘܢ ܦܝܠܛܘܣ ܡܕܝܢ ܕܒܪ̈ܘܗܝ ܐܢܬܘܢ ܘܕܘܢܘܗܝ ܐܝܟ ܢܡܘܣܟܘܢ ܐܡܪܝܢ ܠܗ ܝܗܘܕܝܐ ܠܢ ܠܐ ܫܠܝܛ ܠܢ ܠܡܩܛܠ

next chapter