← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60100: AGnEx (Aphrem on Genesis and Exodus)

Click on a word for lexical analysis
Click on a red-colored coordinate for comments and/or translations of the line

previous chapter


037:01 ܗܘܐ ܒܠܚܘܕ ܕܠܐ ܢܐܟܠܘܢ ܡܢܗ ܐܬܦܩܕܘ܂ ܐܠܐ ܕܐܦ
037:02 ܠܐ ܡܬܩܪܒܘ ܢܬܩܪܒܘܢ ܠܘܬܗ܂ ܘܝܕܥ ܠܗ ܕܡܛܠ ܕܠܐ
037:03 ܢܫܬܒܘܢ ܒܫܘܦܪܗ ܕܐܝܠܢܐ ܩܕܡ ܙܗܪ ܐܢܘܢ ܡ݂ܢ ܚܙܬܗ܂
037:04 ܕܡܛܠ ܗܢܐ ܟܕ ܡܓܪܓ ܠܗ݀ ܠܚܘܐ ܕܬܚܘܪ ܒܗ ܐܡ݂ܪ܂
037:05 ܠܐ ܗܘ݂ܐ ܠܡ ܡܡܬ ܬܡܘܬܘܢ܂ ܡܛܠ ܕܝܕܥ ܐܠܗܐ ܕܒܝܘܡܐ
037:06 ܕܐܟܠܝܢ ܐܢܬܘܢ ܡܢܗܘܢ ܡܬܦܬܚܢ ܥܝ̈ܢܝܟܘܢ܂ ܘܗ݀ܘܝܢ
037:07 ܐܢܬܘܢ ܐܝܟ ܐܠܗܐ ܝܕܥ̈ܝ ܛܒܬܐ ܘܒܝܫܬܐ܀ ܚܘܐ ܕܝܢ
037:08 ܫܒܩܬ ܕܬܬܒܝܢ ܒܡ̈ܠܝ ܚܘܝܐ܂ ܕܐܝܟ ܡܢܣܝܢܐ ܠܗܦܟܐ ܐܡ݂ܪ
037:09 ܐܢܝܢ ܠܗܠܝܢ ܕܐܬܡܠܠ ܡ݂ܢ ܐܠܗܐ܂ ܘܕܬܗܦܟ ܥܠܘܗܝ
037:10 ܘܬܐܡܪ܂ ܕܐܝܟܢܐ ܡܬܦܬܚܢ ܥܝ̈ܢܝ ܟܕ ܠܐ ܐܚܝ̈ܕܢ܂
037:11 ܘܐܝܟܢܐ ܡ݂ܢ ܡܐܟܘܠܬܗ ܕܦܐܪܐ ܝܕܥܐ ܐܢܐ ܒܝܬ ܛܒ
037:12 ܠܒܝܫ܂ ܕܗܐ ܩܕܡ ܕܐܟܘܠ ܐܝܬܝܗܝܢ ܨܐܕܝ܂ ܐܪܦܝܬ ܕܝܢ ܗܠܝܢ
037:13 ܕܠܘܩܒܠ ܚܘܝܐ ܠܡܐܡܪ ܘ݁ܠܐ ܗܘܐ ܠܗ݀܂ ܘܐܝܟ ܨܒܝܢܗ
037:14 ܕܚܘܝܐ݂܂ ܥܝ̈ܢܝܗ݀ ܡ݂ܢ ܚܘܝܐ ܕܩܕܡܝܗ݀ ܫܩܠܬ݂܂ ܘܒܐܝܠܢܐ
037:15 ܕܐܬܦܩܕܬ ܕܠܐ ܬܬܩܪܒ ܠܗ݂ ܒܗ ܚܝܪܐ ܗܘܬ܀
037:16 ܚܘܝܐ ܕܝܢ ܫܠܝ ܠܗ܂ ܡܛܠ ܕܒܚܘܒܬܗ݀ ܡ݂ܢ ܟܕܘ ܐܪܓܫ ܗܘܐ
037:17 ܠܗ݂܂ ܠܐ ܓܝܪ ܗܟܢܐ ܡܓܪܓ ܗܘܐ ܠܗ݀ ܡ݂ܠܟܐ ܕܥܠ ܡ݂ܢ
037:18 ܐܕܢܗ݀ ܕܬܐܟܘܠ ܡ݂ܢ ܐܝܠܢܐ݂܂ ܐܝܟ ܕܡܚܬܚܬ ܗܘܐ ܠܗ݀ ܚܙܝܗ݀
037:19 ܕܟܢܫܬܗ ܨܝܕ ܐܝܠܢܐ܂ ܕܬܩܛܘܦ ܗܘܬ ܘܬܐܟܘܠ ܡ݂ܢ ܐܒܗ܀
037:20 ܡܫܟܚܐ ܗܘܬ ܓܝܪ ܕܬܐܡܪ ܠܚܘܝܐ ܕܐܠܐ ܚܙܝܐ ܐܢܐ܂
037:21 ܠܟܠ ܕܡܬܚܙܐ ܐܝܟܢܐ ܚܙܝܐ ܐܢܐ܂ ܘܐܢ ܒܝܬ ܛܒ ܠܒܝܫ
037:22 ܠܐ ܝܕܥܐ ܐܢܐ܂ ܠܡܠܟܟ ܕܐܢ ܛܒ ܐܘ ܒܝܫ ܡ݂ܢ ܐܝܟܐ
037:23 ܦܪܫܐ ܐܢܐ܂ ܠܐܠܗܘܬܐ ܕܛܒܐ ܗ݂ܝ܂ ܘܠܦܘܬܚ ܥܝ̈ܢܐ
037:24 ܕܫܦܝܪ ܗ݂ܘ ܡ݂ܢ ܐܝܟܐ ܚܟܡܐ ܐܢܐ܂ ܘܠܡܘܬܐ ܕܒܝܫܐ ܗ݂ܘ
037:25 ܡ݂ܢ ܐܝܡܟܐ ܡܫܬܘܕܥܐ ܐܢܐ܂ ܘܐܠܐ ܐܝܬܝܗܝܢ ܨܐܕܝ܂
037:26 ܐܢܬ ܨܐܕܝ ܡ݁ܢ ܐܬܝܬ܀ ܡܐܬܝܬܟ ܕܠܘܬܢ ܣܗܕܐ ܠܗܝܢ
037:27 ܠܗܠܝܢ ܕܐܝܬ ܠܘܬܢ܂ ܒܚܙܝܐ ܗ݂ܘ ܓܝܪ ܕܩܢܝܐ ܐܢܐ܂
037:28 ܘܒܦܘܪܫܢ ܛܒܬܐ ܘܒܝܫܬܐ ܕܐܝܬ ܠܘܬܝ܂ ܠܡܠܟܟ ܒܚܪܐ
037:29 ܐܢܐ܂ ܘܐܢ ܕܝܢ ܗܠܝܢ ܕܡܠܟܬ ܐܝܬܝܗܝܢ ܠܝ݂܂ ܐܝܟܐ ܗ݂ܝ ܟܠܗ݀
037:30 ܥܪܝܡܘܬܟ܂ ܕܠܐ ܐܬܡܨܝܬ ܠܡܩܡ ܒܐ̈ܦܝ ܢܟܝܠܘܬܟ܂ ܠܐ
037:31 ܐܡܪܬ ܗܠܝܢ ܠܚܘܝܐ ܕܕܠܡܐ ܬܚܝܒܗ ܗܘܬ܂ ܐܨܕܬ ܕܝܢ
037:32 ܚܝܪܗ݀ ܒܐܝܠܢܐ ܕܬܣܬܪܗܒ ܘܬܚܘܒ ܗܘܬ܀

next chapter