The Comprehensive Aramaic Lexicon

046:01	ܕܐܬܦܩܕ ܕܠܐ ܢܐܟܘܠ ܐܡܪܚ ܘܐܟ݂ܠ܂ ܠܗܢܐ ܕܠܐ ܐܬܦܩܕ
046:02	ܡܢܗ܃ ܟܡܐ ܝܬܝܪ ܪܗܛ ܠܗ܂ ܐܠܐ ܡܛܠ ܕܐܬܓܙܪ ܠܗ
046:03	ܥܠܝܗܘܢ ܕܢܗܘܘܢ ܒܥܡܠܐ ܘܒܕܘܥܬܐ܂ ܘܒܟܐ̈ܒܐ ܘܒ̈ܚܒܠܐ܂
046:04	ܕܠܐ ܟܕ ܐܟܠܝܢ ܡ݂ܢ ܐܝܠܢܐ ܘܚ̈ܝܝܢ ܠܥܠܡ݂܂ ܢܩܘܘܢ ܠܗܘܢ
046:05	ܒܗܠܝܢ ܚ̈ܝܐ ܡܢ̈ܘܠܐ ܠܥܠܡ܂ ܟܠܐ ܠܗܘܢ ܡ݂ܢ ܕܠܡܐܟܠ
046:06	ܡܢܗ ܟܕ ܥܛܝܦܝܢ ܠܘܛܬܐ܂ ܗ݀ܘ ܕܟܕ ܚܣܝܟܝܢ ܡ݂ܢ ܠܘܛܬܐ
046:07	ܘܥܛܝܦܝܢ ܫܘܒܚܐ݂܂ ܕܢܬܠܗ ܠܗܘܢ ܐܬܛܝܒ ܗܘܐ܀

046:08	ܕܠܐ ܗܟܝܠ ܬܗܘܐ ܠܗ݀ ܡܘܗܒܬܐ ܡܚܝܢܝܬܐ ܠܕܐܘܢܐ܂

046:09	ܘܬܒܐܫ ܠܗܘܢ ܗܕܐ ܕܢܣܒܝܢ ܗܘܘ ܒܝܕ ܐܝܠܢܐ ܕܚ̈ܝܐ܂ ܡ݂ܢ
046:10	ܗ݀ܝ ܕܩܢܘ ܒܝܕ ܐܝܠܢܐ ܕܐܝܕܥܬܐ܂ ܡ݂ܢ ܗ݀ܘ ܓܝܪ ܕܩܢܘ ܟܐ̈ܒܐ
046:11	ܕܙܒܢܐ܂ ܗܢܘ ܕܝܢ ܠܟܐ̈ܒܝ ܙܒܢܐ܂ ܕܠܥܠܡ ܥܒ݂ܕ ܗܘ݂ܐ ܠܗܘܢ܂
046:12	ܡ݂ܢ ܗ݀ܘ ܩܢܘ ܡܘܬܐ܂ ܕܫ݁ܪܐ ܡܢܗܘܢ ܦܟܪ̈ܐ ܕܟܐ̈ܒܝܗܘܢ܂
046:13	ܗܢܐ ܕܝܢ ܩܒܝܪ̈ܝ ܒܚܝ̈ܝܗܘܢ ܥ݁ܒܕ ܗܘܐ ܠܗܘܢ܂ ܕܠܥܠܡ
046:14	ܡܫ̈ܬܢܩܝ ܒܟܐ̈ܒܝܗܘܢ ܫ݁ܒܩ ܗܘ݂ܐ ܠܗܘܢ܂ ܟܠܐ ܠܗܘܢ
046:15	ܗܟܝܠ ܡ݂ܢ ܐܝܠܢ ܚܝ̈ܐ݂܂ ܡܛܠ ܕܐܦܠܐ ܙܕܩ ܗܘ݂ܐ ܕܚܝ̈ܐ ܡܥ̈ܕܢܐ
046:16	ܒܐܪܥ ܠܘ̈ܛܬܐ ܢܬܝܗܒܘܢ ܗܘܘ܂ ܘܚܝ̈ܝ ܥܠܡ ܒܥܠܡܐ
046:17	ܥܒܘܪܐ ܢܫܬܟܚܘܢ ܗܘܘ܀
046:18	ܒܪܡ ܕܝܢ ܐܠܘ ܐܟܠܘ݂܂ ܚܕܐ ܡ݂ܢ ܬܪ̈ܬܝܢ ܗܘܝܐ ܗܘܬ܂ ܕܐܘ
046:19	ܓܙܪ ܕܝܢ݂ܐ ܕܡܘܬܐ ܢܬܕܓܠ ܗܘܐ݂܂ ܐܘ ܡܚܝܢܘܬܗ ܕܐܝܠܢ
046:20	ܚܝ̈ܐ ܬܬܟܕܒ ܗܘܬ܂ ܕܠܐ ܗܟܝܠ ܓܙܪ ܕܝܢܐ ܕܡܘܬܐ ܢܫܬܪܐ
046:21	ܗܘ݂ܐ ܘܕܠܐ ܡܚܝܢܘܬܗ ܕܐܝܠܢ ܚܝ̈ܐ ܬܬܕܓܠ ܗܘܬ݂܂ ܡܪܚܩ
046:22	ܠܗ ܠܐܕܡ ܡ݂ܢ ܬܡܢ܂ ܕܕܠܡܐ ܐܦ ܡ݂ܢ ܐܝܠܢ ܚܝ̈ܐ ܢܚܣܪ
046:23	ܗܘ݂ܐ܂ ܐܝܟܢܐ ܕܡ݂ܢ ܐܝܠܢ ܝܕܥܬܐ ܐܣܬܓܦ ܗܘܐ܀ ܡܫܕܪ
046:24	ܠܗ ܟܝܬ ܠܡܦܠܚ ܐܪܥܐ ܕܐܬܢܣܒ ܡ݂ܢ ܬܡ݂ܢ܂ ܕܢܗܦܘܟ
046:25	ܘܢܬܥܕܪ ܒܝܕ ܥܡܠܐ ܕܐܪܥܐ܂ ܗ݀ܘ ܐܝܢܐ ܕܐܣܬܓܦ ܗܘܐ
046:26	ܒܢܝܚܐ ܕܓܢܬܐ܀
046:27	ܒܡܦܩܗ ܕܝܢ ܕܡ݂ܢ ܦܪܕܝܣܐ݂܂ ܡܟܬܒ ܕܐܟܪܟ ܡ݂ܢ
046:28	ܡ̈ܕܢܚܝ ܦܪܕܝܣܐ ܕܥܕܢ܂ ܟܪܘܒܐ ܘܫܢܢܐ ܕܚܪܒܐ ܕܡܬܗܦܟܐ܂
046:29	ܠܡܛܪ ܐܘܪܚܐ ܕܐܝܠܢܐ ܕܚܝ̈ܐ܂ ܣܝܓܗ ܕܝܢ ܚܝ̈ܐ ܗܘܐ܂ ܗ݀ܘ
046:30	ܕܡ݂ܢ ܢܦܫܗ ܡܬܗܦܟ ܗܘܐ ܠܡܛܪ ܐܘܪܚܗ ܕܐܝܠܢ
046:31	ܚܝ̈ܐ܂ ܡ݂ܢ ܐܝܢܐ ܕܠܡܡܪܚܘ ܘܠܡܩܛܦ ܐܒܗ ܨܒ݂ܐ