The Comprehensive Aramaic Lexicon

050:01	ܕܥܒܕܬ ܠܐܚܪܢܐ ܢܫܐܠ ܥܠܘܗܝ܀ ܐܡ݂ܪ ܠܗ ܟܝܬ ܕܡܢܐ
050:02	ܥܒܕܬ܂ ܠܗ݀ܘ ܕܐܠܘ ܠܐ ܕܝܕܥ ܕܡܢܐ ܥܒܕܬ܃ ܠܘ ܥܠ ܥܒܕܟ
050:03	ܡܫܐܠ ܗܘܐ ܠܟ܂ ܟܕ ܕܝܢ ܠܐ ܨܒ݂ܐ ܩܐܝܢ ܕܢܐܡܪ ܐܦܠܐ
050:04	ܥܠ ܗ݀ܝ ܕܥܒܕ܂ ܐܬܓܠܝܬ ܥܠܘܗܝ ܐܝܕܥܬܗ ܘܦܪܣܝܬܗ܂
050:05	ܘܐܡܪܬ ܕܕܡܗ ܕܐܚܘܟ ܓܥ݁ܐ ܠܘܬܝ ܡ݂ܢ ܐܪܥܐ܀
050:06	ܡܢܐ ܗܟܝܠ ܐܡ݁ܪ ܐܢܬ ܩܐܝܢ܂ ܬܥܒܕ ܟܐܢܘܬܐ
050:07	ܬܒܥܬܐ ܠܕܡܐ ܕܓܥܐ ܠܘܬܗ݀ ܐܘ ܠܐ܂ ܠܐ ܗܐ ܐܘܪܟܬܝ
050:08	ܠܟ ܕܬܬܘܒ܂ ܠܐ ܐܬܢܟܪܝܬܝ ܠܝܕܥܬܗ݀ ܘܫܐܠܬܟ ܐܝܟ ܠܐ
050:09	ܝܕܘܥܬܐ ܕܬܘܕܐ܂ ܡܟܝܠ ܕܠܡܫܦܪ ܠܐ ܫܦܪ ܠܟ܂ ܐܝܟ
050:10	ܕܐܡܪܬܝ ܠܟ܂ ܘܐܬܝܬ ܠܚܛܗܐ ܕܩܕܡܬܝ ܙܗܪܬܟ ܕܠܐ
050:11	ܬܐܬܐ ܠܗ݂܂ ܠܝܛ ܐܢܬ ܡ݂ܢ ܟܠܗ݀ ܐܪܥܐ܂ ܥܠ ܕܐܥܝܩܬ
050:12	ܠܐܕܡ ܘܚܘܐ ܐܒ̈ܗܐ ܕܟܘܠܗ݀ ܐܪܥܐ܂ ܠܝܛ ܐܢܬ ܡ݂ܢ ܐ̈ܦܝ
050:13	ܟܠܗ݀ ܐܪܥܐ܂ ܥܠ ܕܦܬܚܬܝܗܝ ܠܬܪܥܐ ܕܫܝܘܠ ܩܕܡ ܟܠܗ݀
050:14	ܐܪܥܐ܂ ܟܕ ܬܦܠܘܚ ܒܐܪܥܐ ܠܐ ܬܘܣܦ ܬܬܠ ܠܟ ܚܝܠܗ݀܂
050:15	ܥܠ ܕܨܒܝܬ ܕܐܢܬ ܒܠܚܘܕܝܟ ܬܐܟܘܠ ܚܝܠܗ݀܂ ܙܐܥ ܘܢܐܕ
050:16	ܬܗܘܐ ܒܗ݀܂ ܥܠ ܕܪܡܐܝܬ ܘܡܫܩܠܐܝܬ ܗܠܟܬ ܥܠܝܗ݀܀
050:17	ܡܛܠ ܕܝܢ ܕܒܗ ܒܥܕܢ ܠܘ̈ܛܬܐ ܐܬܓܡܪ ܒܗ ܣܘܥܪܢ
050:18	ܠܘ̈ܛܬܐ܂ ܗ݀ܘ ܕܩܕܡ ܠܘ̈ܛܬܐ ܒܝܕ ܪܡܘܬܐ ܐܡ݁ܪ ܗܘ݂ܐ܂

050:19	ܕܐܢܐ ܢܛܘܪܗ ܐܢܐ ܕܐܚܝ܀ ܒܬܪ ܠܘ̈ܛܬܐ ܡܢ ܕܐܬܢܦܠ

050:20	ܡ݂ܢ ܬܙܝܙܘܬܗ܂ ܒܝܕ ܙܘܥܐ ܘܢܘܕܐ ܕܫ݂ܪܐ ܥܠܘܗܝ ܐܡ݂ܪ܂
050:21	ܕܪܒܐ ܗ݂ܝ ܣܟܠܘܬܝ ܡ݂ܢ ܕܠܡܫܒܩ܂ ܠܐ ܕܝܢ ܐܬܩܒܠܬܝ ܠܗ
050:22	ܗܕܐ ܠܬܘܬܐ݂܂ ܡܛܠ ܕܠܐ ܗܘ݂ܐ ܒܥܕܢ ܕܐܫܬܐܠ ܐܡܪܗ݀
050:23	ܗܘ݂ܐ܂ ܐܝܟ ܗ݀ܘ ܓܝܪ ܕܒܩܛܝܪܐ ܐܡܪܗ݀ ܗܘܐ܂ ܕܡ݂ܢ ܒܬܪ
050:24	ܙܘܥܗ ܘܢܘܕܗ ܐܡܪܗ݀ ܗܘ݂ܐ܀
050:25	ܩܐܝܢ ܕܝܢ ܚܠܦ ܕܢܓܥܐ ܡܓܪܬ ܪܘܚܐ܃ ܕܕܠܡܐ ܒܒܥܘܬܐ
050:26	ܢܦܝܣܗ݀ ܠܟܐܢܘܬܐ܂ ܒܪܗܝܒܘܬܗ ܐܘ ܒܨܢܝܥܘܬܗ ܐܡ݂ܪ
050:27	ܗܘܐ܂ ܕܗܐ ܐܦܩܬܢܝ ܡ݂ܢ ܐ̈ܦܝ ܐܪܥܐ܂ ܒܗܕܐ ܕܠܛܬܢܝ ܡ݂ܢ
050:28	ܐ̈ܦܝ ܐܪܥܐ܂ ܘܡ݂ܢ ܩܕܡܝܟ ܡܟܝܠ ܠܡܛܫܐ ܠܝ܂ ܡܛܠ ܕܠܝܬ
050:29	ܬܘܒ ܒܝܬ ܐ̈ܦܝ ܠܡܩܡ ܩܕܡܝܟ ܥܠ ܕܣܪܒܬ ܒܐ̈ܦܝܟ܂ ܘܐܡܪܬ
050:30	ܕܠܘ ܢܛܘܪܗ ܐܢܐ ܕܐܚܝ܂ ܘܕܗܘܝܬ ܠܝ ܡ݂ܢ ܟܕܘ ܙܐܥ݁ ܘܢܐ݁ܕ
050:31	ܒܐܪܥܐ݂܂ ܢܗܘܐ ܕܟܠ ܕܢܫܟܚܢܝ ܢܩܛܠܢܝ܀ ܐܘ ܩܐܝܢ ܐܢ