← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60421: EphFid

Click on a word for lexical analysis
Click on a red-colored coordinate for comments and/or translations of the line

02:00.00 ܥܠ ܩܠܐ ܕܐܠܗܐ ܒܪ̈ܚܡܘܗܝ
02:01.01 ܛܘܒܘܗܝ ܠܐܝܢܐ ܕܩ݂ܒܥ ܠܗ ܡܚܙܝܬܐ ܫܦܝܬܐ ܕܩܘܫܬܐ
02:01.02 ܘܚ݂ܙܐ ܒܓܘܗ݀ ܡܘܠܕܟ ܕܪܒ ܗ݂ܘ ܡܢ ܟܠ ܠܫ̈ܢܝܢ܀
02:01.00 ܥܘܢܝܬܐ ܃ ܠܟ ܫܘܒܚܐ ܩܠܗ ܕܐܒܘܗܝ
02:02.01 ܛܘܒܘܗܝ ܠܐܝܢܐ ܕܐܬܩܪܒ ܠܘܬ ܝܕܥܬܐ ܕܫܪܪܐ
02:02.02 ܘܐܝܠܦ ܒܗ݀ ܕܠܐ ܡܬܥܩܒ ܐܠܗܐ ܡܢ ܒܪܢܫܐ܀
02:03.01 ܛܘܒܘܗܝ ܠܐܝܢܐ ܕܗܘܐ ܡܪܝ ܡܠܚܐ ܕܩܘܫܬܐ ܒܗܢ ܕܪܐ
02:03.02 ܘܠܐ ܦܟܗܬ ܗܝܡܢܘܬܗ ܒܝܬ ܦܟܝܗ̈ܐ ܕܒܨܝܢ ܠܟ܀
02:04.01 ܛܘܒܘܗܝ ܠܐܝܢܐ ܕܐܟܪܟ ܬܘܒ ܫܘܪܐ ܕܫܬܩܐ ܠܡܫܡܥܬܗ
02:04.02 ܘܠܐ ܬܪܥܘܗܝ ܫܘ̈ܐܠܝܗܘܢ ܕܚܟܝ̈ܡܐ ܕܐܩܪܒܘ ܥܡܟ܀
02:05.01 ܛܘܒܘܗܝ ܠܐܝܢܐ ܕܐܘܥܝ ܠܗ ܓܦ̈ܐ ܕܪܘܚܐ ܟܣܝܐܝܬ
02:05.02 ܘܡܐ ܕܗܘܐ ܕܪܫܐ ܒܐܪܥܐ ܫܒܩܗ ܘܣܠܩ ܠܫܡܝܐ܀
02:06.01 ܛܘܒܘܗܝ ܬܘܒ ܠܐܝܢܐ ܕܗ݂ܘܐ ܡܠܚܐ ܠܗܝܡܢܘܬܗ
02:06.02 ܘܡܢ ܡܚܫ̈ܘܠܐ ܕܚܪܝܢܐ ܠܠܡܐܢܐ ܕܫܬܩܐ ܢܥܪܘܩ܀
02:07.01 ܛܘܒܘܗܝ ܠܐܝܢܐ ܕܐܪܓܫ ܬܘܒ ܕܡܚܝܠܐ ܗ݂ܝ ܡܠܬ ܦܘܡܗ
02:07.02 ܘܠܐ ܡ݂ܨܐ ܥܘܒܗ ܣܦܩ ܠܗ ܠܗ݀ܘ ܝܠܕܐ ܕܠܐ ܡܬܡܠܠ܀
02:08.01 ܛܘܒ ܠܕܐܗܡܝ ܠܫܢܗ ܡܢ ܫܪܒܐ ܕܠܐ ܡܦܣ ܠܗ
02:08.02 ܛܘܒ ܠܐܝܢܐ ܕܫ݂ܚܩ ܢܦܫܗ ܒܡܕܡ ܕܥܠܘܗܝ ܐܬܦܩܕ܀
02:09.01 ܛܘܒ ܠܕܙܡܪ ܟܢܪܗ ܙܡܝܪ̈ܬܐ ܕܙܡܪ ܕܘܝܕ
02:09.02 ܓܠܝ̈ܬܐ ܕܠܐ ܡܬܕܪ̈ܫܢ ܘܟܣܝ̈ܬܐ ܕܠܐ ܡܬܒܨܝܢ܀
02:10.01 ܛܘܒܘܗܝ ܠܐܝܢܐ ܕܥܒ݂ܕ ܠܗ ܡܣܐܬܐ ܕܩܘܫܬܐ ܟܠܝܘܡ
02:10.02 ܘܬܩ݂ܠ ܒܗ݀ ܟܠ ܫܘ̈ܐܠܘܗܝ ܕܠܐ ܢܫܐܠ ܝܬܝܪ̈ܬܐ܀
02:11.01 ܛܘܒܘܗܝ ܠܐܝܢܐ ܕܥܒ݂ܕ ܠܗ ܟܝܠܐ ܬܪܝܨܐ ܕܡ݂ܬܡܚܝ
02:11.02 ܒܗ݀ܘ ܕܢܒ̈ܝܐ ܘܫ̈ܠܝܚܐ ܟܝܠܐ ܕܥܒ݂ܕܬ ܟܐܢܘܬܐ܀
02:12.01 ܛܘܒ ܠܕܬܩܠܗ݀ ܠܒܥܬܗ ܥܡ ܥܘܕܪ̈ܢܐ ܕܫܡܘ̈ܥܘܗܝ
02:12.02 ܘܠܐ ܙܠܬ ܕܠܡܐ ܬܚܣܪ ܘܠܐ ܝܩ݂ܪܬ ܕܠܡܐ ܬܛܒܥ܀
02:13.01 ܛܘܒܘܗܝ ܠܐܝܢܐ ܕܠܐ ܥܒܪܗ ܠܬܚܘܡܐ ܒܩܠܝܠܘܬܗ
02:13.02 ܛܘܒ ܠܐܝܢܐ ܕܡܬܝܢܘܬܗ ܥܡ݂ܠܬ ܘܡ݂ܛܬ ܠܐܘܢܐ܀
02:14.01 ܛܘܒ ܠܕܥܡܠ ܒ݁ܥܐ ܠܗ ܠܡܕܡ ܕܡܨܐ ܡܫܟܚ ܠܗ
02:14.02 ܛܘܒ ܠܐܝܢܐ ܕܠܐ ܡܬܦܫܚ ܒܒܥܬܐ ܕܠܐ ܡܬܕܪܟܐ܀
02:15.01 ܛܘܒ ܠܐܝܢܐ ܕܗܘܐ ܠܟ ܡܪܝ ܠܫܢܗ ܐܝܟ ܩܝܬܪܐ
02:15.02 ܘܙܡ݂ܪ ܒܗ ܩ̈ܠܐ ܕܡܨܝܢ ܕܢܐܣܘܢ ܫܡܘܥܝ̈ܗܘܢ܀
02:16.01 ܛܘܒܘܗܝ ܠܐܝܢܐ ܕܩܢ݂ܐ ܡܪܝ ܩܘܫܬܐ ܕܣܡ݁ܟ ܠܡܚ̈ܝܠܐ
02:16.02 ܘܗܘܐ ܫܪܪܗ ܐܝܟ ܚܘܛܪܐ ܠܐܝܢܐ ܕܟܪܝܗ ܪܥܝܢܗ܀
02:17.01 ܛܘܒܘܗܝ ܬܘܒ ܠܐܝܢܐ ܕܗ݂ܘܐ ܚܡܝܪܐ ܛܒܐ ܝܘܠܦܢܗ
02:17.02 ܘܐܩܢܝ ܒܗ ܛܥܡܐ ܬܩܢܐ ܠܣܟܠܐ ܕܐܝܬܘܗܝ ܦܛܝܪܐ܀
02:18.01 ܛܘܒܘܗܝ ܠܐܝܢܐ ܕܡܪܩ ܠܗ݀ ܠܒܥܬܗ ܐܝܟ ܡܚܙܝܬܐ
02:18.02 ܠܚܣܝܪ̈ܝ ܗܝܡܢܘܬܐ ܕܢܫܘܘܢ ܒܗ݀ ܡܘ̈ܡܝܗܘܢ܀
02:19.01 ܛܘܒܘܗܝ ܠܐܝܢܐ ܕܗܘ݂ܐ ܠܗ ܦܬܓܡܗ ܐܝܟ ܣܡ ܚܝ̈ܐ
02:19.02 ܘܐܚܝ ܡܝ̈ܬܐ ܡ̈ܠܠܐ ܕܥܠ ܡܚܐ ܟܠ ܡܫܬܥܠܝܢ܀
02:20.01 ܛܘܒ ܠܡ݁ܢ ܕܗ݂ܘܐ ܚܪܫܐ ܒܥܕܢ ܕܝܠܕܟ ܡܬܥܩܒ
02:20.02 ܛܘܒ ܠܕܗܘܐ ܫܝܦܘܪܐ ܒܥܕܢ ܕܝܠܕܟ ܡܬܡܠܠ܀
02:21.01 ܛܘܒܘܗܝ ܠܐܝܢܐ ܕܝܕܥ ܡܪܝ ܕܩܫܐ ܗ݂ܘ ܥܘܙܗ݀ ܕܒܨܬܟ
02:21.02 ܛܘܒ ܠܐܝܢܐ ܕܝܕܥ ܕܚܠܐ ܗ݂ܘ ܛܥܡܐ ܕܡܐܡܪ ܬܫܒܘܚܬܟ܀
02:22.01 ܛܘܒܘܗܝ ܠܐܝܢܐ ܕܠܐ ܝܗ݂ܒ ܡܪܝ ܦܘܡܗ ܕܢܗܘܐ ܡܥܒܪܬܐ
02:22.02 ܠܫ̈ܘܐܠܐ ܣܟ̈ܠܐ ܕܢܒܥܘ ܡܢ ܕܪ̈ܘܫܐ ܙ̈ܠܝܠܐ܀
02:23.01 ܛܘܒܘܗܝ ܠܐܝܢܐ ܕܗܘ݂ܐ ܡܪܝ ܡܐܢܐ ܫܦܝܐ ܠܫܢܗ
02:23.02 ܘܡܠܠ ܒܗ ܩܘܫܬܐ ܕܪܕܐ ܡܢ ܨܝܕ ܢܒ̈ܝܐ ܘܫ̈ܠܝܚܐ܀
02:24.01 ܛܘܒܘܗܝ ܠܐܝܢܐ ܕܠܐ ܛܥܡܗ݀ ܠܡܐܪܬܐ ܕܚܟܡܬ ܝܘ̈ܢܝܐ
02:24.02 ܛܘܒܘܗܝ ܠܐܝܢܐ ܕܠܐ ܦܠܛܗ݀ ܠܦܫܝܛܘܬܐ ܕܫ̈ܠܝܚܐ܀