← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60421: EphFid

Click on a word for lexical analysis
Click on a red-colored coordinate for comments and/or translations of the line

03:00.00 ܒܪ ܩܠܗ
03:01.01 ܛܘܒܘܗܝ ܠܐܝܢܐ ܕܫܘ݂ܐ ܡܪܝ ܕܒܚܘܒܐ ܪܒܐ ܢܩܪܝܟ
03:01.02 ܒܪܐ ܚܒܝܒܐ ܐܝܟ ܕܩܪܟ ܗ݂ܘ ܐܠܗܐ ܝܠܘܕܟ܀
03:01.00 ܥܘܢܝܬܐ ܃ ܠܟ ܫܘܒܚܐ ܒܪܗ ܕܐܠܗܐ
03:02.01 ܛܘܒܘܗܝ ܠܐܝܢܐ ܕܚܣ݂ܠ ܡܪܝ ܦܘܡܗ ܡܢ ܟܠ ܫܘܐ̈ܠܝܢ
03:02.02 ܘܩܪܟ ܗܘܐ ܒܪܐ ܕܐܠܗܐ ܕܩܪܬܟ ܪܘܚܐ ܕܩܘܕܫܐ܀
03:03.01 ܛܘܒܘܗܝ ܠܐܝܢܐ ܕܫܘܐ ‍[‍ܡܪܝ‍]‍ ܕܢܗܝܡܢ ܬܡܝܡܐܝܬ
03:03.02 ܘܢܩܪܝܟ ܒܪܐ ܐܝܟ ܕܩܪܘ ܟܠܗܘܢ ܫ̈ܠܝܚܐ ܘܢܒ̈ܝܐ܀
03:04.01 ܛܘܒܘܗܝ ܠܐܝܢܐ ܕܝܕܥ ܡܪܝ ܕܠܐ ܡܬܥܩܒܐ ܪܒܘܬܟ
03:04.02 ܘܟܐܐ ܒܠܫܢܗ ܩܠܝܠ ܕܒܫܬܩܐ ܢܝܩܪ ܝܠܕܟ܀
03:05.01 ܛܘܒܘܗܝ ܠܐܝܢܐ ܕܩܢ݂ܐ ܡܪܝ ܥܝܢܐ ܫܦܝܬܐ ܕܒܗ݀ ܢܚܙܐ
03:05.02 ܟܡܐ ܚܝ̈ܓܝܢ ܡܢܟ ܥܝܪ̈ܐ ܘܟܡܐ ܡܪܚ ܒܪ ܐܢܫܐ܀
03:06.01 ܛܘܒܘܗܝ ܠܐܝܢܐ ܕܡܬܚ ܡܪܝ ܪܥܝܢܗ ܘܐܬܒܩܝ ܒܟ
03:06.02 ܕܠܐ ܣ̈ܦܩܢ ܠܟ ܒܪ̈ܝܬܐ ܘܐܘܕܝ ܕܫ݂ܘܐ ܕܬܫܪܐ ܒܗ܀
03:07.01 ܛܘܒܘܗܝ ܠܐܝܢܐ ܕܝ݂ܕܥ ܡܪܝ ܕܐܠܗܐ ܐܢܬ ܒܪ ܐܠܗܐ
03:07.02 ܘܝܕܥ ܢܦܫܗ ܕܒܪ ܡܢܘ ܕܡܝܘܬܐ ܗ݂ܘ ܒܪ ܡܝܘܬܐ܀
03:08.01 ܛܘܒܘܗܝ ܠܐܝܢܐ ܕܐܬܒܝܢ ܕܐܕܘܢܝ ܗ݂ܘ ܝܠܘܕܟ
03:08.02 ܘܐܬܕܟܪ ܐܦ ܝܠܕܗ ܕܝܠܗ ܕܒܪ ܐܕܡ ܗ݂ܘ ܥܦܪܢܐ܀
03:09.01 ܛܘܒܘܗܝ ܠܐܝܢܐ ܕܐܬܒܝܢ ܕܥܝܪ̈ܐ ܒܫܬܩܐ ܡܘܕܝܢ ܠܟ
03:09.02 ܘܢܨܐ ܩܠܝܠ ܥܡ ܢܦܫܗ ܕܟܡܐ ܡܪܚ ܠܫܢܗ܀
03:10.01 ܛܘܒܘܗܝ ܠܐܝܢܐ ܕܐܫܬܘܕܥ ܕܫܡܝܐ ܕܠܥܠ ܫܠܝܐ
03:10.02 ܘܐܪܥܐ ܕܠܬܚܬ ܫܓܝܫܐ ܘܫܠܝ ܢܦܫܗ ܒܝܬ ܓ̈ܠܠܐ܀
03:11.01 ܛܘܒܘܗܝ ܠܐܝܢܐ ܕܝܠܦ ܡܪܝ ܕܣܪܦܐ ܡܩ݁ܕܫ ܘܫܠܐ
03:11.02 ܣܪ̈ܦܐ/ܣܦܪ̈ܐ#2/ ܕܝܢ ܡܒܨܐ ܗ݂ܘ ܒܨܝܢ ܫܒܘܩ ܕܣܦܪ̈ܐ ܘܓܒܝ ܕܣܪ̈ܦܐ܀
03:12.01 ܡܢܘ ܕܝܢ ܠܐ ܢܬܕܡܪ ܕܐܢܬ ܝܬܒ ܥܠ ܝܡܝܢܐ
03:12.02 ܘܥܦܪܐ ܕܝ݁ܬܒ ܥܠ ܥܦܪܐ ܥܠ ܩܩܠܬܗ ܒܨܐ ܠܟ܀
03:13.01 ܛܘܒܘܗܝ ܠܐܝܢܐ ܕܝ݂ܕܥ ܡܪܝ ܕܒܥܘܒܐ ܐܢܬ ܕܐܝܬܘܬܐ
03:13.02 ܘܐܬܕܟܪ ܕܐܦ ܗ݂ܘ ܢܦܠ ܠܗ ܒܥܘܒܗ݀ ܕܐܪܥܐ ܝܠܕܬܗ܀
03:14.01 ܡܢܘ ܡܪܝ ܠܐ ܢܬܕܡܪ ܕܐܢܬ ܒܪܘܝܐ ܕܟܠ ܒܪ̈ܝܢ
03:14.02 ܒ݁ܥܐ ܕܢܒܨܝܟ ܒܪܢܫܐ ܕܢܦܫܗ ܡܢܐ ܗ݂ܝ ܠܐ ܝ݁ܕܥ܀
03:15.01 ܗܢܘ ܬܗܪܐ ܕܐܢܬ ܗ݂ܘ ܡܪܝ ܝܕܥ ܠܗ ܠܐܒܘܟ ܒܠܚܘܕ
03:15.02 ܘܡܫܬܥܠܐ ܥܦܪܐ ܫܝܛܐ ܕܐܦ ܠܐܒܘܟ ܒܟ ܡܪܝ ܢܒܨܐ܀
03:16.01 ܛܘܒܘܗܝ ܠܐܝܢܐ ܕܗܘܐ ܡܪܝ ܐܠܗܝܐ ܒܕܘܒܪ̈ܘܗܝ
03:16.02 ܕܡܐ ܕܩܕܫ ܢܦܫܗ ܢܩܪܝܟ ܐܠܗܐ ܒܪ ܐܠܗܐ܀
03:16.00 ܫܠܡ