← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60457: IsNin (Isaac of Nineveh)

Click on a word for lexical analysis
Click on a red-colored coordinate for comments and/or translations of the line

18:140:01 ܕܢܸܣܥܪܲܢܝ܃ ܡܸܛܠ ܐܲܠܵܗܵܐ܂ ܐܼܢܵܫ ܕܹܝܢ܃ ܠܲܝܬ݁ ܗܼܘ݂ܵܐ ܠܝ݂ ܒܐܲܬ݂ܪ̈ܵܘܵܬ݂ܵܐ
18:140:02 ܗܵܢܘ݁ܢ܂ ܚܵܙܹ݁ܐ ܗܼܘܹ݁ܝܬ݂ ܠܹܗ ܓܹܝܪ ܒܠܲܝ̈ܠܵܘܵܬ݂ܵܐ ܠܲܗܵܢܵܐ ܐܲܚܵܐ܃ ܕܩܵܐܹ݁ܡ
18:140:03 ܗܼܘ݂ܵܐ܃ ܡ݂ܢ ܩܕ݂ܵܡ ܥܸܕܵܢܵܐ ܣܲܓܝ݂ܐܵܐ܂ ܐܝ݂ܬ݂ ܗܼܘ݂ܵܐ ܠܹܗ ܥܝܵܕ݂ܵܐ܃ ܕܡ݂ܢ
18:140:04 ܩܕ݂ܵܡ ܟܠܗܘ݁ܢ ܐܲܚܹ̈ܐ ܢܸܬ݁ܬ݁ܥܝ݂ܪ ܠܬܸܫܡܸܫܬ݂ܵܐ܂ ܘܲܡܫܲܪܸܐ ܗܼܘ݂ܵܐ
18:140:05 ܒܡܲܙܡܘ݁ܪܹ̈ܐ܃ ܘܐܵܙܹ݁ܠ ܗܼܘ݂ܵܐ ܒܗܘ݁ܢ ܚܲܕ݂ ܟܡܵܐ܂ ܘܡܸܢܫܹܠܝ ܫܵܒܹ݁ܩ
18:140:06 ܗܼܘ݂ܵܐ ܠܵܗ݀ ܠܬܸܫܡܸܫܬ݂ܵܐ܃ ܘܢܵܦܹ݁ܠ ܗܼܘ݂ ܥܲܠ ܐܲܦܵܘ̈ܗܝ܂ ܘܲܒ݂ܨܝ݂ܪ
18:140:07 ܩܲܠܝ݂ܠ ܡܵܐܐ ܙܲܒ݂ܢ̈ܝ݂ܢ ܐܲܝܟ݂ ܐܼܢܵܫ ܢܹܐܡܲܪ܃ ܢܵܩܹ݁ܫ ܗܼܘ݂ܵܐ ܪܹܫܹܗ ܒܐܲܪܥܵܐ
18:140:08 ܬܟܝ݂ܒ݂ܵܐܝ݂ܬ݂ ܘܚܲܪܝ݂ܦܵܐܝ݂ܬ݂܃ ܒܪܸܬ݂ܚܵܐ ܗܵܘ݁ ܕܡܸܫܬ݁ܓܲܪ ܗܼܘ݂ܵܐ ܒܠܸܒܹܗ
18:140:09 ܡ݂ܢ ܛܲܝܒ݁ܘ݂ܬ݂ܵܐ܂ ܘܩܵܐܹ݁ܡ ܗܼܘ݂ܵܐ܃ ܘܲܡܫܲܠܸܡ ܠܲܨܠܝ݂ܒ݂ܵܐ܂ ܘܬܘ݂ܒ݂ ܣܵܓܹ݁ܕ݂
18:140:10 ܘܩܵܐܹ݁ܡ ܘܲܡܫܲܠܸܡ܃ ܘܬ݂ܘ݂ܒ݂ ܢܵܦܹ݁ܠ ܥܲܠ ܐܲܦܵܘ̈ܗܝ܂ ܘܲܒ݂ܗܵܢܵܐ ܙܢܵܐ
18:140:11 ܥܵܒܹ݁ܕ݂ ܗܼܘ݂ܵܐ ܣܲܓ݂ܝ݂ ܙܲܒ݂̈ܢܝ݂ܢ܃ ܐܲܝܟ݂ ܕܠܵܐ ܡܸܫܟܲܚ ܗܼܘܹ݁ܝܬ݂ ܠܡܸܡܢܵܐ܂
18:140:12 ܡܲܢܘ݂ ܕܲܡܨܸܐ ܗܼܘ݂ܵܐ ܠܡܸܡܢܵܐ܃ ܣܝܵܡ ܒܘ݂ܪ̈ܟܹܐ ܣܲܓܝ݂̈ܐܹܐ ܕܥܵܒܹ݁ܕ݂
18:140:13 ܗܼܘ݂ܵܐ ܐܲܚܵܐ ܗܵܘ݁ ܒܠܲܝ̈ܠܵܘܵܬ݂ܵܐ! ܘܩܵܪܹܒ݂ ܗܼܘ݂ܵܐ ܠܘܵܬ݂ ܨܠܝ݂ܒ݂ܵܐ ܘܢܵܫܹ݁ܩ
18:140:14 ܗܼܘ݂ܵܐ ܠܹܗ ܥܸܣܪܝ݂ܢ ܢܘ݂̈ܫܩܵܬ݂ܵܐ܃ ܪܗܝ݂ܒ݂ܵܐܝ݂ܬ݂ ܘܚܲܡܝ݂ܡܵܐܝ݂ܬ݂܃ ܒܪܸܚ̄ܡܬ݂ܵܐ
18:140:15 ܕܲܡܙܝ݂ܓ݂ܵܐ ܒܕܸܚܠܬ݂ܵܐ܃ ܘܡܲܩܸܦ ܗܼܘ݂ܵܐ ܬܘ݂ܒ݂ ܒܡܲܙܡܘ݁ܪܹ̈ܐ܂ ܘܒܲܙܒܲܢ
18:140:16 ܙܒܲܢ ܡ݂ܢ ܚܹܐܦܹ̈ܐ ܣܲܓܝ݂̈ܐܹܐ ܕܚܘ݂̈ܫܵܒܹܐ܃ ܕܲܡܫܲܠܗܒ݂ܝ݂ܢ ܗܼܘ݂ܵܘ ܠܹܗ
18:140:17 ܒܚܲܡܝ݂ܡܘ݂ܬ݂ܗܘ݁ܢ܃ ܡܵܐ ܕܠܵܐ ܡܸܫܟܲܚ ܗܼܘ݂ܵܐ ܡܸܟܹܝܠ ܕܲܢܣܲܝܒܲܪ
18:140:18 ܠܫܘ݂ܠܗܵܒ݂ܵܐ ܗܵܘ݁ ܡ݂ܢ ܚܲܕ݂ܘ݂ܬܹܗ܃ ܡܸܢܫܹܠܝ ܡܸܙܕܟܸܐ ܗܼܘ݂ܵܐ܃ ܘܲܡܪܝ݂ܡ
18:140:19 ܗܼܘ݂ܵܐ ܩܵܠܹܗ܃ ܒܗܵܝ݁ ܕܠܵܐ ܡܨܸܐ ܗܼܘ݂ܵܐ ܕܢܹܐܚܘ݁ܕ݂ ܢܲܦܫܹܗ܀ ܘܡܸܬ݁ܕܲܡܲܪ
18:140:20 ܗܼܘܹ݁ܝܬ݂ ܒܛܲܝܒ݁ܘ݂ܬ݂ܵܐ ܕܐܝ݂ܬ݂ ܗܼܘ݂ܵܐ ܠܘܵܬܹܗ ܕܐܲܚܵܐ ܗܵܘ݁܃ ܘܬ݂ܵܡܲܗ
18:140:21 ܗܼܘܹ݁ܝܬ݂܃ ܕܲܟ݂ܡܵܐ ܚܦܝ݂ܛ ܗܼܘ݂ܵܐ ܘܥܝ݂ܪ ܒܲܥܒ݂ܵܕ݂ܵܘ̈݁ܗܝ ܕܐܲܠܵܗܵܐ܀