The Comprehensive Aramaic Lexicon

0001	‍[‍70‍]‍ ܐܓܪ̈ܬܐ ܕܠܚ̈ܕܕܐ ܕܣܪܓܝܣ ܓܪܡܛܝܩܘܣ ܘܕܣܐܘܪܐ ܦܛܪܝܪܟܐ ܕܐܢܛܝܟܝܐ܂
0002	ܐܓܪܬܐ ܩܕܡܝܬܐ ܕܣܪܓܝܣ ܓܪܡܛܝܩܘܣ ܠܘܬ ܚܣܝܐ ܣܐܘܪܐ ܦܛܪܝܪܟܐ ܕܐܢܛܝܟܝܐ܂ ܕܒܗ݀ ܫ݁ܐܠ ܕܐܝܟܢ ܙܕܩ݁ ܕܢܬܪܥܘܢ ܗܠܝܢ ܕܡܢ ܬܪ̈ܝܢ ܟܝ̈ܢܝܢ ܡܫܒܚܝܢ ܕܐܝܬܘܗܝ ܡܫܝܚܐ܇
0003	ܟܕ ܐܬܚܫܚܘ ܒܫܡܐ ܕܐܢܛܘܢܝܢܐ ܐܦܣܩܦܐ ܕܚܠܒ܂ ܘܫܠܚ ܗܟܢܐ܀
0004
0005	ܠܡܪܐ ܕܝܠܝ ܩܕܝܫ ܒܟܘܠ܇
0006	ܘܚܣܝܐ ܐܒܐ ܪܘܚܢܐ܇
0007	ܐܢܛܘܢܝܢܐ ܐܦܝܣܩܦܐ ܣܪܓܝܣ ܒܨܝܪܐ ܓܪܡܛܝܩܘܣ܆
0008	ܒܡܪܢ ܚܕܝ܂
0009	ܟܕ ܗܫܐ ܠܘܬ ܗܠܝܢ ܐܠܗ̈ܝܬܐ ܐܕ݁ܝܩܬ܇
0010	ܘܐܝܟ ܡܐ ܕܒ̈ܙܠܝܩܐ ܫܡ̈ܫܢܝܐ ܣܩܘܒܠܐܝܬ ܚ݁ܐܪ ܐܢܐ܆
0011	ܡܬܩ̈ܦܣܢ ܗܠܝܢ ܕܚܙܬܐ܆
0012	ܘܠܘܬ ܦܘܫܟܐ ܚܝܪܝܢ ܠܝ ܫܘ̈ܘܕܝܐ ܕܣܦܝܢܬܐ܇
0013	ܡ݁ܢ ܕܬܪܥܝܬܐ ܚܬܝܬܬܐ ܠܝܬ ܠܝ܂ ܚ݁ܙܐ ܐܢܐ ܕܝܢ ܥܘܡܩܐ ܕܛܘܦܐ܂ ܗ݀ܘ ܕܚܟܡܬܐ ܘܝܕܥܬܐ ܕܐܠܗܐ܂ ܘܟܕ ܡܢ ܗܕܐ ܒܡ̈ܚܫܒܬܐ ܦܪ̈ܘܫܝܬܐ ܡܬܕܚܩ ܐܢܐ܆
0014	ܢܡܘܣܐ ܩ݂ܪܝܬ ܕܗ݀ܘ ܕܡ݁ܙܡܪ܇
0015	ܕܐܡ݁ܪ ܕܫ݁ܐܠ ܠܐܒ̈ܗܝܟ ܘܡܘܕܥܝܢ ܠܟ܂ ܙܒܢܐ ܗܘ ܗܟܝܠ ܕܦܘܫܟܐ܂ ܐܬܢܐ ܗܫܐ ܥܡ ܡܕܝܢܬܐ܇
0016
0017	ܡܢ ܟܢܫܘܝܐ ܕܝܠܟܘܢ ܟܗܢܝܐ ܒ݁ܥܝܬ܆
0018	ܕܠܗܠܝܢ ܕܢܦܠܝܢ ܘܠܘܬܗܘܢ ܗܦܟܝܢ܇

0019	ܫܐܠܝܢ ܚܢܢ ܥܩܪܐ ܕܬܘܕܝܬܐ ܕܡܢ ܗܠܝܢ܂ ܟܕ ܐܢܬܘܢ ܪ̈ܘܪܒܐ ܡܦܣܝܢ ܐܢܬܘܢ܂ ܕܟܡܐ ܕܚܝܠܐ ܠܝ ܡܠܓܠܓ ܗ݀ܘܝܬ ܒܐܝܠܝܢ ܕܛܘܦܣܐ ܕܗܝܡܢܘܬܐ ܟܡܐ ܕܡܕܪܟ ܗ݀ܘܝܬ ܒܐܝܠܝܢ ܟ݁ܬܒ ܗ݀ܘܝܬ܂ ‍[‍71‍]‍ ܩܐܦܠܐܘܢ ܕܝܢ ܕܟܠܗܘܢ ܐܝܬܘܗܝ ܗܘܐ ܕܠܘ ܬܪ̈ܝܢ ܟܝ̈ܢܝܢ ܐܡܪܝܢ ܚܢܢ ܒܬܪ ܚܕܝܘܬܐ ܠܐ ܡܬܐܡܪܢܝܬܐ܂ ܘܠܐ ܕܝ̈ܠܝܬܐ܂ ܐܠܐ ܗܕܐ ܕܐܣܬܒܪܬ ܕܠܘ ܒܡܠܬܐ ܐܬܥܒܕܬ܆

0020	ܐܬܬܪܨܬ ܗܘܬ ܡܢܟܘܢ܂ ܐܝܟ ܡ݁ܢ ܕܠܘ ܕܝ̈ܠܝܬܐ ܡ̈ܦܠܓܬܐ ܐܡܪܝܢܢ܂ ܘܡܢ ܗܕܐ ܡܫ̈ܬܓܫܢ ܠܝ ܗܠܝܢ ܕܢܦܫܐ܂ ܘܟܕ ܠܥܠ ܘܠܬܚܬ ܡܗܦܟ ܗ݀ܘܝܬ ܗܘܢܐ܆
0021	ܠܐ ܥܕܟܝܠ ܗܫܐ ܡܫܟܚ ܐܢܐ ܕܐܣ݁ܩ ܠܘܬ ܝܕܥܬܐ ܕܩܕܝܡܐ ܣܝܡܐ܂
0022	ܡܢܐ ܓܝܪ܂ ܬܪ̈ܬܝܢ ܕܝ̈ܠܝܬܐ ܐܡܪܝܢ ܚܢܢ܇
0023	ܐܝܟܢܐ ܕܠܫܒܪܘܬܐ ܕܗ̈ܦܟܝ ܐܘ̈ܣܝܣ ܢܪܝܡ܇
0024	ܟܕ ܒܣܪܐ ܡܣ݂ܬܟܠ ܒܣܪܐ ܘܐܠܗܘܬܐ ܠܐ ܢܚܬܐ ܠܚܒܘܟܝܐ܂ ܐܠܐ ܗܕܐ ܕܢܛܪ ܐܘ̈ܣܝܣ ܐܝܬܝܗ݀ ܘܠܘ ܣܟ ܕܝ̈ܠܝܬܐ܂ ܐܠܗܐ ܓܝܪ ܘܒܣܪܐ ܐܘ̈ܣܝܣ ܐܝܬܝܗܘܢ܂ ܕܝ̈ܠܝܬܐ ܕܝܢ ܠܐܠܗܐ܆
0025	ܗ݀ܝ ܕܡܬܘܡܐܝܬ ܐܝܬܘܗܝ܂ ܕܒܣܪܐ ܕܝܢ ܗ݀ܝ ܕܗ݀ܘܐ ܘܡܬܚ݁ܒܠ܂ ܐܢ ܕܝܢ ܢܐܡܪ ܕܡ̈ܩܘܝܢ ܕܝ̈ܠܝܬܐ܂ ܐܝܟܢܐ ܟܕ ܠܘܬ ܣܘܥܪ̈ܢܐ ܒ݁ܥܝܢܢ ܡܫܟܚܝܢܢ ܗܠܝܢ܂ ܠܐܠܗܐ ܓܝܪ ܡܢ ܟܠܦܪܘܣ ܕܝܠܝܬܐ܆
0026	ܗ݀ܝ ܕܠܐ ܡܬܚܙܐ ܘܠܐ ܡܬܓܫܫ܂ ܐܠܐ ܐܠܗܐ ܡܬܚܙܝܢܐܝܬ ܐܬ݂ܐ ܘܥܠ ܐܪܥܐ ܐܬܚܙܝ ܘܥܡ ܒܢܝ̈ܢܫܐ ܐܬܗ݀ܦܟ܂ ܘܚ݁ܙܝܢܝܗܝ ܘܚܙܘܗ ܠܐ ܡܝܩܪ ܕܒܨܝܪ ܡܢ ܒ̈ܢܝ ܐܢܫܐ܂ ܗ݀ܘ ܕܐܝܬܘܗܝ ܡܢ ܒܪܫܝܬ܂ ܗ݀ܘ ܕܫܡܥܢ ܘܚܙܝܢ܂ ܘܐܝ̈ܕܝܢ ܓ̈ܫܝ ܡܛܠ ܡܠܬܐ ܕܚܝ̈ܐ܂ ܐܠܐ ܘܕܝܠܝܬܐ ܕܒܣܪܐ܆
0027	ܕܡܢ ܬܪ̈ܝܢ ܐܝܠܝܢ ܕܐܘܠܕܘ ܢܬܝܠܕ܂ ܘܟܕ ܚܕܐ ܙܒܢ ܐܬܝܠܕ ܐܦ ܢܬܚ݁ܒܠ܂ ܐܝܟܐ ܕܝܢ ܗܠܝܢ ܠܒܣܪܐ ܕܚܝ̈ܐ܂ ܐܒܐ ܓܝܪ ܕܡܫܝܚܐ ܘܠܐ ܚܕ ܒܪܢܫܐ܂ ܟܕ ܠܐ ܓܝܪ ܝܩܕ ܣܢܝܐ ܘܛܒܝܥ ܬܪܥܐ ܡܓܫܡܐ ܢܦ݂ܩ ܡܪܝܐ܂ ܡܢ ܗܪܟܐ܂ ܡܛܠ ܕܠܘ ܐܝܟ ܗ݀ܝ ܕܝܠܝܬܐ ܕܒܣܪܐ ܐܬܝܠܕ܇
0028	ܘܠܐ ܒܣܪܗ ܚܙܐ ܚܒܠܐ܂ ܟܠ ܕܝܢ ܕܝܠܝܬܐ ܕܟܝܢܐ ܕܣܝܡ ܐܝܬܝܗ݀܂ ܘܐܢ ܬܪ̈ܬܝܢ ܐܡܪܝܢ ܚܢܢ ܕܝ̈ܠܝܬܐ܆
0029	ܬܪ̈ܝܢ ‍[‍72‍]‍ ܘܟܝ̈ܢܐ ܡܬܐܠܨܝܢܢ ܕܢܐܡܪ܂ ܐܢ ܕܝܢ ܕܠܐ ܡ̈ܦܠܓܢ ܕܝ̈ܠܝܬܐ ܡܣܒܪܝܢܢ܆
0030	ܐܦܠܐ ܗ݀ܢܘܢ ܠܟܝ̈ܢܐ ܡܦܠܓܝܢ܂ ܐܠܐ ܠܐ ܡ̈ܦܠܓܐ ܠܥܠ ܘܠܬܚܬ ܡܙܥܩܝܢ ܠܢ܂ ܘܗ݀ܢܘ ܩܦܠܐܘܢ ܕܟܘܪܗܢܐ ܕܟܠܩܝܕܘܢܐ ܘܫܢܝܘܬܐ ܕܠܐܘܢ܂ ܕܟܕ ܡܦܠܓܐ ܠܡܥܒ̈ܕܢܘܬܐ ܥܡ ܟܝ̈ܢܐ܇
0031	ܥܡ ܫܘܬܦܘܬܐ ܕܗ݀ܝ ܐܚܪܬܐ܆
0032	ܠܐ ܡܦܠܓܐܝܬ ܐܡܪܐ܂ ܐܝܟܢܐ ܗܟܝܠ ܡܢ ܦܩܪܘܬܐ ܕܐܝܟ ܗ݂ܟܢܐ ܢܥܪܘܩ܇
0033	ܐܝܠܝܢ ܕܚܕ ܟܝܢܐ ܕܡܠܬܐ ܕܡܒܣܪ ܡܠܦܝܢܢ ܒܬܪ ܚܕܝܘܬܐ܂ ܐܢ ܗ݂ܘ ܕܠܐ ܐܝܟ ܡܐ ܕܡܢ ܬܪ̈ܝܢ ܟܝ̈ܢܝܢ ܚܕ ܠܡܫܝܚܐ ܫܒܚܢܢ܇
0034	ܗܟܢܐ ܘܚܕܐ ܕܝܠܝܬܐ ܡܢ ܬܪ̈ܬܝܢ ܕܐܠܗܐ ܕܡܒܣܪ ܢܩ݂ܒܠ܂ ܕܗ݀ܘ ܕܢܬܚܙܐ ܡ݁ܢ ܩܒ݁ܠ ܡܛܠ ܒܣܝܡܘܬܐ܂ ܥܒܪ ܕܝܢ ܠܕܝܠܝܬܐ ܐܢܫܝܬܐ ܒܝܕ ܚܕܝܘܬܐ ܪܝܫܝܬܐ܂ ܡܗܠܟ ܗܘܐ ܗܟܝܠ ܥܠ ܡܝ̈ܐ܂ ܟܕ ܠܐ ܡܬ݂ܢܓܕ ܗܘܐ ܡܢ ܝܘܩܕܐ ܕܒܣܪܐ ܠܥܘܡܩܐ ܕܝܡܐ܂ ܘܟܕ ܛܒܥܝܢ ܗܘܘ ܩܒܪܐ܂ ܠܐ ܡܬܠܒܟ ܗܘܐ܂ ܘܬܪ̈ܥܐ ܕܐܚܝܕܝܢ ܕܢܟܠܘܢ ܡܥܠܬܐ ܠܝܬ ܗܘܐ ܠܗܘܢ܂
0035	ܠܐ ܗܟܝܠ ܡܟܝܠ ܘܠܐ ܕܐܠܗܐ ܕܝܠܝܬܐ ܡܕܡ ܒܡܠܬܐ ܕܝܠܗ݀ ܡܬܝܕܥܐ܆
0036	ܘܠܐ ܕܒܣܪܐ ܡܬܚܙܝܐ܂ ܟܠܗ ܕܝܢ ܙܢܐ ܕܡܕܒܪܢܘܬܐ ܠܘܬ ܚܕܐ ܕܝܠܝܬܐ ܚ݁ܐܪ܂ ܗ݀ܝ ܕܥܡܗ ܕܐܠܗܐ ܡܒܣܪܐ ܐܝܬܝܗ݀܂ ܐܝܟ ܡܐ ܓܝܪ ܕܠܒܪܢܫܐ ܕܝܠܝܬܐ ܓܚܘܟܘܬܐ܇
0037	ܘܠܐ ܡܕܡ ܡܢ ܗܠܝܢ ܚܝ̈ܘܬܐ ܐܚܪ̈ܢܝܬܐ ܒܗܕܐ ܕܡ݁ܐ ܠܗ܆
0038	ܗܟܢܐ ܘܕܝܠܝܬܐ ܚܕܐ ܕܡܫܝܚܐ܂ ܕܒܗ݀ ܐܦ ܠܐ ܐܢܫ ܡܢ ܠܐ ܡ̈ܬܚܙܝܢܐ ܘܡ̈ܬܚܙܝܢܐ ܡܫܘܬܦ܂ ܒܠܚܘܕܘܗܝ ܓܝܪ ܐܠܗܐ ܕܐܬܒܣܪ ܡܢ ܒܬܘܠܬܐ ܝܠܝܕ܂ ܘܟܠܡܕܡ ܥܒܕ ܘܚ݂ܫ ܚܠܦܝܢ܂ ܘܡܢ ܐܝܟܐ ܕܢܚ݂ܬ܆
0039	ܬܘܒ ܣܠܩ݂ ܒܣܪܢܝܐ܂
0040	ܡܢ ܗܢܐ ܦܘܫܟܐ ܩܫܝܐ܂ ܕܐܦܘܩ ܐܒܗ̈ܐ ܛܒ̈ܐ ܢܗܘܐ ܠܟܘܢ ܫܩܠܛܥܢܐ܂ ܘܡܢܟܘܢ ܘܠܟܘܢ ܡܚ̈ܫܒܬܝ ܫ̈ܝܛܬܐ ܒܩ݂ܘ܆
0041	ܘܠܘܬ ܗܠܝܢ ܕܥܡܟܘܢ ܬܪܨܘ ܐܣܩܘ܂ ܘܠܐ ܬܕܚܩܘܢ ܙܥܘܪܘܬܝ ܘܫܒܪܘܬܝ܂ ܟܕ ܡܬܕܡܝܢ ܐܢܬܘܢ ܒܡܫܝܚܐ ܪܝܫ ܪ̈ܥܘܬܐ܇
0042	ܗ݀ܘ ܕܠܛܠܝ̈ܐ ܟܕ ‍[‍73‍]‍ ܡܬܩܪܒܝܢ ܠܐ ܕܚ݁ܩ ܗܘܐ܂ ܟܕ ܕܝܢ ܪ̈ܝܫܝ ܟܗ̈ܢܐ ܕܗܢܐ ܐܝܬܝܟܘܢ܂ ܡܢ ܟܠ ܦܪܘܣ ܘܕܬܩܪܒܘܢ ܕܒ̈ܚܐ ܕܟܝ̈ܐ ܡܬܗܓܝܢ ܐܢܬܘܢ܂ ܗܢܐ ܕܝܢ ܐܝܬܘܗܝ ܕܒܚܐ ܕܗ݀ܘ ܕܡܛܠܬܢ ܐܬܒܪܢܫ܆
0043	ܢܦܫܐ ܕܟܝܬܐ ܕܒܝܕܥܬܐ ܕܪܘܚܐ ܡܫܬܡܠܝܐ܂
0044	܀
0045	ܫܠܡܬ ܐܓܪܬܐ ܩܕܡܝܬܐ ܕܣܪܓܝܣ ܓܪܡܛܝܩܘܣ܂ ܠܘܬ ܩܕܝܫܐ ܣܐܘܪܐ ܦܛܪܝܪܟܐ܀
0046
0047	܀
0048	ܦܚܡܐ ܕܐܓܪܬܐ ܕܩܕܝܫܐ ܘܛܘܒܬܢܐ ܣܐܘܪܐ ܪܝܫܐ ܕܐܦܝ̈ܣܩܘܦܐ ܘܦܛܪܝܪܟܐ ܕܐܢܛܝܟܝܐ܆
0049	ܠܘܬ ܢܟܦܐ ܣܪܓܝܣ ܓܪܡܛܝܩܘܣ܇
0050	ܕܫ݁ܐܠ ܡܛܠ ܕܝ̈ܠܝܬܐ ܘܡܥܒ̈ܕܢܘܬܐ ܘܡܛܠ ܚܫ̈ܐ ܦܪ̈ܘܩܝܐ܀
0051
0052	ܫܒܚܬ ܠܢܟܦܘܬܟ ܕܨܒܬ ܕܬܢܦܩ ܐܘܚܕܬܐ ܕܐܬܬܣܝܡܝܬ ܒܐܓܪܬܐ ܡܠܝܠܐܝܬ ܐܝܟ ܚܕܐ ܘܒܕܚܠܬ ܐܠܗܐ܂ ܡܛܘܠ ܕܐܦ ܡܠܬܐ ܢܒܝܝܬܐ܆
0053	ܗ݀ܝ ܕܢܒܥܐ ܡܦܣܐ܆
0054	ܥܡ ܗ݀ܝ ܕܬܗܘܐ ܐܣܝܪܐ ܒܥܬܐ ܒܐܘܩܝܢܐ ܕܕܚܠܬ ܐܠܗܐ܂ ܟܕ ܐܡܪܐ ܗܟܢܐ܂ ܕܐܢ ܒ݁ܥܐ ܐܢܬ ܒܥ݂ܝ ܘܠܘܬܝ ܥܡ݂ܪ܂ ܘܡ̈ܬܠܐ ܕܝܢ ܠܘܬ ܗܕܐ ܡܝ݁ܬܐ ܡܠܦܢܐܝܬ܆
0055	ܟܕ ܡܛܦܣ ܘܐܡ݁ܪ܂ ܡܪܕܘܬܐ ܕܝܢ ܕܠܐ ܡܬܟܣܣܐ ܛܥܝܐ܂ ܘܐܬܕܡܪ ܒܟ ܐܬܝܐ ܠܝ܇
0056	ܒܡܟܝܟܘܬܐ ܗ݀ܝ ܕܡܣܗܕܐ ܠܟ ܚܟܡܬܐ܂ ܐܝܬ ܓܝܪ ܠܡܫܡܥ ܠܗ ܟܕ ܠܗ ܠܡ̈ܬܠܐ ܕܐܡ݁ܪ܆
0057	ܒܦܘܡܐ ܕܝܢ ܕܡ̈ܟܝܟܐ ܡܬܗܓܝܐ ܚܟܡܬܐ܂ ܘܠܟܗ̈ܢܐ ܕܝܢ ܕܢܫ݂ܪܘܢ ܦܘܫ̈ܟܐ܆
0058	ܘܢܦܪܫܘܢ ܐܝܠܝܢ ܕܐܚܪܢܝܐܝܬ ܒܕܘܟ ܠܐ ܓܠܝ̈ܬܐ܂ ܘܕܢܦܪܫܘܢ ܗ݀ܝ ܕܛܒܐ ܡܢ ܗ݀ܝ ܕܠܐ ܛܒܐ܆
0059	ܟܬܒܐ ܢܡܘܣܝܐ ܦܩ݁ܕ ܟܕ ܐܡ݁ܪ ܠܘܬܗܘܢ ܗܟܢܐ܂ ܢܡܘܣܐ ܕܠܥܠܡ ܠܫܪ̈ܒܬܟܘܢ܂ ܕܬܦܪܫܘܢ ܒܝܬ ܩܕ̈ܝܫܐ ܠܛܡ̈ܐܐ܇
0060	ܘܒܝܬ ܗܠܝܢ ܕܕܟܝܢ ‍[‍74‍]‍ ܠܒܝܬ ܗܠܝܢ ܕܠܐ ܕܟܝܢ܂ ܘܬܠܦܘܢ ܠܒܢ̈ܝ ܐܝܣܪܐܝܠ ܟܠܗܘܢ ܢܡܘ̈ܣܐ܇
0061	ܐܝܠܝܢ ܕܡܠܠ ܡܪܝܐ ܠܘܬܗܘܢ܂
0062	ܕܐܦ ܐܢܬ ܗܟܝܠ ܫܦܝܪ ܫܐܠܬ܇
0063	ܘܕܙܕܩ ܕܐܦ ܚܢܢ ܠܘܬ ܫܘܐܠܐ ܒܝܕ ܗܠܝܢ ܐܬܝܕܥܬ܂ ܡܛܠ ܕܝܢ ܕܥܣ̈ܩܝ ܠܬܐܘܪܝܐ ܘܥܣ̈ܩܝ ܠܡܬܡܠܠܘ ܡܣܬܒܪܝܢ ܣܘ̈ܟܠܐ ܕܕܘܓܡ̈ܛܐ܇
0064	ܟܕ ܚܐܪ ܐܢܐ ܠܘܬ ܗ݀ܘ ܕܝܗ݀ܒ ܡܠܬܐ ܕܝܕܥܬܐ ܘܡܠܬܐ ܕܚܟܡܬܐ܂ ܐܟܬܘܒ ܠܘܬ ܫܘܐܠܐ ܗ݀ܘ ܡܕܡ ܕܐܬ݁ܐ ܠܘܬ ܡܕܪܟܢܘܬܐ ܕܝܠܝ܂ ܬܘܒ ܓܝܪ ܡܠܬܐ ܕܡ̈ܬܠܐ ܐܡ݁ܪܐ܆
0065	ܠܒܪܢܫܐ ܨܒܝܢܐ ܕܠܒܐ܆
0066	ܘܡܢ ܡܪܝܐ ܦܘܢܝ ܦܬܓܡܐ ܕܠܫܢܐ܂
0067	ܕܥ ܗܟܝܠ ܕܗ݀ܝ ܕܕܝܠܝܬܐ ܟܝܢܝܬܐ ܕܟܝ̈ܢܐ ܕܡܢܗܘܢ ܚܕ ܡܫܝܚܐ ܢܘܕܐ܂ ܠܘ ܡܢܢ ܚܕܬܐܝܬ ܡܬܦܣܩܐ܂ ܠܐ ܬܗܘܐ܂ ܥܗܕܝܢܢ ܓܝܪ ܠܩܕܝܫܐ ܩܘܪܝܠܘܣ ܕܟܬ݂ܒ ܒܐܓܪܬܐ ܕܬܪ̈ܬܝܢ ܕܠܘܬ ܣܘܩܢܣܘܣ ܗܠܝܢ܂ ܀
0068	ܩܘܪܝܠܘܣ܀
0069	ܐܦܢ ܓܝܪ ܘܚܕ ܡܬܐܡܪ ܡܢܢ ܝܚܝܕܝܐ ܒܪܗ ܕܐܠܗܐ ܕܡܒܣܪ ܘܡܒܪܢܫ܂ ܠܐ ܚܒܝܟ ܡܛܠ ܗܕܐ܇
0070	ܐܝܟ ܕܡܣܬܒܪܐ ܠܗ݀ܢܘܢ܂ ܘܠܐ ܫ݁ܢܝ ܠܟܝܢܐ ܕܒܣܪܐ ܗ݀ܘ ܕܡܠܬܐ܂ ܐܠܐ ܘܠܐ ܗ݀ܘ ܕܒܣܪܐ ܠܗ݀ܘ ܕܝܠܗ܂ ܐܠܐ ܟܕ ܒܕܝܠܝܬܐ ܗ݀ܝ ܕܒܟܝܢܐ ܟܠ ܚܕ ܡܢܗܘܢ ܡܟܬܪ ܐܟܚܕܐ ܘܡܬܪܢܐ܇
0071	ܐܝܟ ܡܠܬܐ ܕܐܬܝܗܒܬ ܡܢܢ ܗܫܐ܂ ܚܕܝܘܬܐ ܠܐ ܡܬܡܠܠܢܝܬܐ ܘܠܐ ܡܬܐܡܪܢܝܬܐ܆
0072	ܚܕ ܟܝܢܐ ܚܘ݂ܝܬ ܠܢ ܕܒܪܐ܂ ܒܪܡ ܐܝܟ ܕܐܡ݁ܪܬ ܕܡܒܣܪ܀
0073	ܐܬܒܩܐ ܗܟܝܠ ܕܟܕ ܚܕ ܟܝܢܐ ܐܘܕܝ ܡܠܦܢܐ ܕܡܠܬܐ ܐܠܗܐ ܕܡܒܣܪ܇
0074	ܐܡ݁ܪ ܕܟܠ ܚܕ ܡܢܗܘܢ ܒܕܝܠܝܬܐ ܗ݀ܝ ܕܒܟܝܢܐ ܡܟܬܪ ܐܟܚܕܐ ܘܡܣ݂ܬܟܠ܂
0075	ܡܢܐ ܕܝܢ ܐܝܬܝܗ݀ ܕܝܠܝܬܐ ܗ݀ܝ ܕܒܟܝܢܐ܆
0076	ܗ݂ܘ ܟܕ ܗ݂ܘ ܬܘܒ ܒܡܐܡܪܐ ܕܠܘܬ ܕܝܕܘܪܘܣ ܡܢܗ݀ܪ ܟܕ ܟ݁ܬܒ ܗܟܢܐ܂ ܀
0077	ܩܘܪܝܠܘܣ܀
0078	ܢܕܥ ܗܟܝܠ ܕܦܓܪܐ ܕܐܬܝܠܕ ‍[‍75‍]‍ ܒܝܬ ܠܚܡ܆
0079	ܐܦܢ ܠܘ ܗܘܝܘ ܟܕ ܗ݂ܘ ܒܡܫܘܕܥܘܬܐ ܐܡ݁ܪ ܐܢܐ ܟܝܢܝܬܐ ܠܘܬ ܡܠܬܐ ܕܡܢ ܐܠܗܐ ܘܐܒܐ܆
0080	ܐܠܐ ܒܪܡ ܕܝܠܗ ܗ݂ܘܐ܂ ܘܠܐ ܕܐܢܫ ܐܚܪܝܢ ܣܛܪ ܡܢ ܕܒܪܐ܂ ܚܕ ܕܝܢ ܒܪܐ ܘܡܫܝܚܐ ܘܡܪܝܐ ܢܣ݂ܬܟܠ ܡܠܬܐ ܕܐܬܒܣܪ܀
0081	ܘܒܬܪ ܐܚܪ̈ܢܝܬܐ ܕܝܢ ܟܕ ܗ݂ܝ ܗܕܐ ܢܦ݁ܩ ܡܘܣܦ ܘܗܠܝܢ܂ ܀
0082	ܩܘܪܝܠܘܣ܀
0083	ܡܛܠ ܕܐܦ ܚܢܢ ܐܡܪܝܢܢ܆
0084	ܕܐܝܟ ܡܠܬܐ ܕܕܝܠܝܘܬܐ܆
0085	ܐܚܪܢܝ ܟܝܢܐ ܐܝܬܘܗܝ ܡܢ ܟܠܦܪܘܣ ܒܣܪܐ܇
0086	ܠܘܬ ܡܠܬܐ ܕܫܘܚ ܡܢ ܐܠܗܐ ܘܐܒܐ܂ ܒܪܡ ܕܝܠܗ ܗ݂ܘܐ ܒܚܕܝܘܬܐ ܕܠܐ ܡܣܬܕܩܐ܂ ܐܝܟܢܐ ܕܐܦ ܡܠܬܐ ܕܕܢ݂ܚ ܡܢ ܐܘܣܝܐ ܕܐܠܗܐ ܘܐܒܐ܆
0087	ܙܪܥܐ ܕܐܒܪܗܡ ܢܫܬܡܗ ܒܒܣܪ܂ ܟܕ ܩܪܝܐ ܠܗ ܠܗܕܐ ܡܕܒܪܢܘܬܐ܂ ܘܡܣܓܦܐ ܘܠܐ ܡܕܡ ܠܗ݀ܝ ܕܢܗܘܐ ܐܝܬܘܗܝ ܗ݀ܘ ܡܐ ܕܐܝܬܘܗܝ܂ ܟܕ ܐܠܗܐ ܓܝܪ ܐܝܬܘܗܝ ܒܟܝܢܐ܆
0088	ܗ݂ܘܐ ܒܫܪܪܐ ܐܦ ܒܪܗ ܕܐܢܫܐ܂ ܘܐܝܬܘܗܝ ܒܪܐ ܕܐܠܗܐ ܘܐܒܐ܆
0089	ܠܐ ܙܐܦܢܐ ܘܠܐ ܕܓܠ ܫܡܐ܂ ܐܠܐ ܗ݂ܘ ܗ݀ܘ ܕܠܐ ܡܬܡܠܠܢܐܝܬ ܘܠܐ ܡܬܦܫܩܢܐܝܬ ܝܠܝܕ ܡܢܗ܆
0090	ܐܦܢ ܗ݂ܘ ܕܠܘ ܕܠܐ ܒܣܪܐ ܡܬܪܢܐ ܒܬܪ ܚܕܝܘܬܐ܀
0091
0092	ܩ݁ܕܡܬ ܗܟܝܠ ܐܬܝܕܥܬ ܡܢ ܗܠܝܢ ܠܢܟܦܘܬܟ܆
0093	ܕܐܚܪܢܝܘܬ ܟܝ̈ܢܐ ܕܗܠܝܢ ܕܐܬܘ ܐܟܚܕܐ ܠܚܕܝܘܬܐ܆
0094	ܕܝܠܝܬܐ ܐܝܬܝܗ݀܆
0095	ܘܫܘܚܠܦܐ ܗ݀ܘ ܕܐܝܟ ܕܒܡܫܘܕܥܘܬܐ ܟܝܢܝܬܐ܂ ܗܢܐ ܓܝܪ ܐܝܬܘܗܝ ܠܐ ܥܒܝܕܐ܆
0096	ܗܢܐ ܕܝܢ ܥܒܝܕܐ܂ ܘܗܢܐ ܡ݁ܢ ܠܐ ܡܬܚܙܝܢܐ ܗܢܐ ܕܝܢ ܡܬܚܙܝܢܐ܂ ܘܗܢܐ ܡ݁ܢ ܕܠܐ ܓܫܬܐ܆
0097	ܗܢܐ ܕܝܢ ܢ݁ܦܠ ܒܓܫܬܐ܂ ܒܪܡ ܟܕ ܗܢܐ ܫܘܚܠܦܐ ܘܕܝܠܝܘܬܐ ܕܟܝ̈ܢܐ ܕܡܢܗܘܢ ܚܕ ܡܫܝܚܐ܇
0098	ܕܠܐ ܒܘܠܒܠܐ ܡܩܘܐ܆
0099	ܡܠܬܐ ܕܚܝ̈ܐ ܡܬܐܡܪ ܘܕܐܬܚܙܝ ܘܐܬܓܫܫ܂ ܘܕܗ݂ܢܘܢ ܬܠܡ̈ܝܕܐ ܡܡ̈ܠܠܝ ܐܠܗ̈ܝܬܐ ܗ݂ܘܘ ܚ̈ܙܝܐ ܘܡ̈ܫܡܫܢܐ ܕܡܠܬܐ܇