The Comprehensive Aramaic Lexicon

0100	ܐܡ݁ܪ ܟܬܒܐ ܐܘܢܓܠܝܐ܂ ܠܘ ܕܫ݁ܢܝ ܡܢ ܟܝܢܐ ܠܐ ܡܬܚܙܝܢܐ ܘܠܐ ܒܣܪܢܝܐ܂ ܐܠܐ ܕܐܬܚܝܕ ܠܗ݀ܘ ܕܡܬܚܙܐ܇
0101	ܘܓܘܫܡܐ ܩܫܝܐ ܘܕܠܐ ܟ݁ܦܪ ܒܓܫܬܐ܂ ‍[‍76‍]‍ ܠܐ ܗܟܝܠ ܥܠ ܗܕܐ ܬܘܕܝܬܐ ܚܬܝܬܬܐ ܕܗܝܡܢܘܬܐ܇
0102	ܫܛܝܘܬܐ ܕܣܘ̈ܢܣܝ‍{‍ܣ‍}‍‍<‍ܩ‍>‍ܛܐ ܬܟܬܘܒ܂ ܠܘ ܓܝܪ ܐܝܟ ܠܐ ܗܘܢܐ ܕܗ݀ܢܘܢ܇
0103	ܐܦ ܚܕ ܐܟܚܕܐ ܠܐ ܝ̈ܠܝܦܐ ܗ݀ܘܝܢܢ܇
0104	ܘܒܒܝܫܬܐ ܠܒܝܫܬܐ ܡܐܣܝܢ ܚܢܢ܇
0105	ܘܒܣܟܬܐ ܠܣܟܬܐ ܕܚ݁ܩܝܢܢ܇
0106	ܗ݀ܝ ܕܡܬܐܡܪܐ܂ ܐܠܐ ܓܠܝܐܝܬ ܗ݂ܘܝܬ ܝ݁ܕܥ ܐܢܬ܆
0107	ܕܗܕܐ ܒܥܝܐ ܚܬܝܬܘܬܐ ܘܒܚܝܪܘܬܐ ܕܫܪܪܐ܂ ܡܛܠ ܕܐܦ ܒܪܢܫܐ ܕܐܟܘܬܢ ܐܡܪܝܢܢ ܕܐܝܬܘܗܝ܆
0108	ܚܝܘܬܐ ܡܠܝܠܬܐ ܡܝܘܬܬܐ܂ ܡܩܒܠܢܝܬܐ ܕܗܘܢܐ ܘܕܝܕܥܬܐ܂ ܡܛܠ ܕܡܢ ܬܪ̈ܝܢ ܚܕ ܗܘ ܟܝܢܐ ܘܩܢܘܡܐ܂ ܟܘܠܗ݀ ܚܝܘܬܐ ܡܬܐܡܪܐ ܡܝܘܬܬܐ ܘܟܠܗ݀ ܡܫܬܡܗܐ ܡܠܝܠܬܐ܆
0109	ܘܠܐ ܐܡܪܝܢܢ ܕܠܐ ܝܕܥܝܢ ܚܢܢ ܡܢܐ ܡ݁ܢ ܡܝܘܬܐ܇
0110	ܡܢܐ ܕܝܢ ܡܠܝܠܐ܂ ܐܠܐ ܠܘ ܗ݀ܝ ܕܗܕܐ ܢܕܥ܇
0111	ܡܦܠܓܐ ܠܪܘܟܒܐ ܕܡܢܗ ܡܬܩܝܡܐ ܚܕܐ ܚܝܘܬܐ܂ ܗܟܢܐ ܓܝܪ ܐܡ݁ܪ ܩܕܝܫܐ ܩܘܪܝܠܘܣ܇
0112	ܐܦ ܥܠ ܬܐܘܪܝܐ ܕܥܡܢܘܐܝܠ܇
0113	ܟܕ ܢܦ݁ܩ ܒܪܘܚܐ ܠܘܬ ܐܢܕܪܐܘܣ ܕܐܬܥ݁ܕܠ ܥܢܬܐܝܬ ܒܩܦܠܐܘܢ ܕܬܠܬܐ܂ ܀
0114	ܩܘܪܝܠܘܣ܀
0115	ܕܠܐ ܡܢܬܐ ܗܝ ܕܝܢ ܕܟܠ ܡܘܡܐ܇
0116	ܗ݀ܝ ܕܢܕܥ ܐܢ ܬܓܕܫ ܕܐܚܪܢܐ ܗܘ ܒܟܝܢܐ ܕܝܠܗ ܒܣܪܐ܇
0117	ܠܒܪ ܡܢ ܡܠܬܐ ܗ݀ܘ ܕܡܢ ܐܠܗܐ ܘܐܒܐ ܫܘ݂ܚ܇
0118	ܐܚܪܢܐ ܕܝܢ ܬܘܒ ܝܚܝܕܝܐ ܐܝܟ ܡܠܬܐ ܕܟܝܢܗ܂ ܐܠܐ ܠܘ ܗ݀ܝ ܕܢܕܥ ܗܠܝܢ܇
0119	ܕܢܦܠܓ ܟܝ̈ܢܐ ܒܬܪ ܚܕܝܘܬܐ ܐܝܬܝܗ݀܀
0120
0121	ܘܕܗ݀ܝ ܕܝܢ ܬܕܥ ܢܟܦܘܬܟ܇
0122	ܡܢ ܗܠܝܢ ܕܐܠܝ̈ܨܢ ܐܝܬܝܗ݀܆
0123	ܕܟܝܢܐ ܡܠܝܠܐ܆
0124	ܫܘܚܠܦܐ ܐܝܬ ܒܗ ܒܟܠ ܠܘܬ ܟܘܠ ܡܬܪܓܫܢܐ܂ ܘܠܘ ܫܘܚܠܦܐ ܒܠܚܘܕ܆
0125	ܐܠܐ ܘܦܘܪܫܢܐ܂ ܪܚܝܩܝܢ ܓܝܪ ܗܠܝܢ ܡܢ ܚ̈ܕܕܐ ܐܦ ܒܡܫܘܕܥܘܬܐ ܕܟܝܢܐ܂ ܘܒܗ݀ ܒܗ݀ܝ ܕܡܩܝܡܝܢ ܒܪܘܚܩܐ ‍[‍77‍]‍ ܒܕܘܟ܂ ܘܡܦܪܫܐܝܬ ܒܪܘܚܩܐ ܡܢ ܚ̈ܕܕܐ ܪܚܝܩܝܢ ܘܥܡ ܫܘܚܠܦܐ ܟܕܝܢ ܐܦ ܦܘܪܫܐ ܕܒܟܠ ܘܪܚܝܩܘܬܐ܂ ܐܡܬܝ ܕܝܢ ܕܡܢ ܟܝܢܐ ܡܠܝܠܐ ܘܡܢ ܗ݀ܘ ܡܬܪܓܫܢܐ܇
0126	ܚܕ ܩܢܘܡܐ ܡܕܡ ܡܫܬܡܠܐ܇
0127	ܒܡܐܬܝܐ ܕܐܝܟ ܚܕܐ ܕܒܚܕܝܘܬܐ ܟܝܢܝܬܐ܂ ܫܘܚܠܦܐ ܡ݁ܢ ܕܗܠܝܢ ܕܐܟܚܕܐ ܐܬܘ ܠܚܕ܇
0128	ܗ݀ܘ ܕܐܝܟ ܕܒܫܘܕܥܘܬܐ ܟܝܢܝܬܐ܇
0129	ܡܛܠ ܠܐ ܒܘܠܒܠܐ ܕܚܕܝܘܬܐ܇
0130	ܚ݁ܙܝܢܢ ܕܠܐ ܕܥܟ܂ ܐܬܬܪܝܡ ܕܝܢ ܦܘܠܓܐ܆
0131	ܡܛܠ ܕܠܘ ܡܢܗܘܢ ܘܠܗܘܢ ܘܒܡ̈ܢܘܬܐ ܡܩܝܡܝܢ܇
0132	ܗܠܝܢ ܕܒܡܫܘܕܥܘܬܐ ܟܝܢܝܬܐ ܡܫܚܠܦܝܢ܂ ܚܕ ܕܝܢ ܩܢܘܡܐ ܡܢ ܬܪ̈ܝܢ ܡܫܡܠܝܢ܂
0133	ܡܕܝܢ ܢܥܒܪ ܗܕܐ܂ ܘܠܘܬ ܬܐܘܪܝܐ ܕܥܡܢܘܐܝܠ܆
0134	ܘܢܬܒܩܐ ܕܐܠܗܘܬܐ ܘܐܢܫܘܬܐ܆
0135	ܠܘ ܒܠܚܘܕ ܒܟܠ ܡܫܚܠܦܐ܆
0136	ܐܠܐ ܘܪܚܝܩܝܢ ܗܠܝܢ ܡܢ ܚ̈ܕܕܐ ܘܡܦܪܫܝܢ܂ ܟܕ ܕܝܢ ܚܕܝܘܬܐ ܕܡܢ ܬܪ̈ܬܝܗܝܢ ܡܬܬܘܕܝܐ܆
0137	ܬܘܒ ܫܘܚܠܦܐ ܕܒܡܫܘܕܥܘܬܐ ܕܟܝ̈ܢܐ ܕܡܢܗܘܢ ܚܕ ܡܫܝܚܐ܆
0138	ܠܐ ܕܥܝܟ܇
0139	ܒܟܢܝܫܘܬܐ ܕܝܢ ܗ݀ܝ ܕܒܩܢܘܡܐ ܛܪܝܕ ܦܘܠܓܐ܂ ܘܚܙܝ ܠܝ ܕܗܕܐ ܢܗܝܪܐܝܬ ܡ݁ܠܦ ܚܟܝܡܐ ܩܘܪܝܠܘܣ܆
0140	ܒܛܘܡܣܐ ܕܬܪ̈ܝܢ ܕܠܘܩܒܠ ܓܘ̈ܕܦܐ ܕܢܣܛܘܪܝܘܣ܂ ܀
0141	ܩܘܪܝܠܘܣ܀
0142	ܕܐܢܫܘܬܐ ܓܝܪ ܘܕܐܠܗܘܬܐ ܝܗ݀ܒ ܐܢܐ ܐܦ ܐܢܐ܆
0143	ܕܫܘܚܠܦܐ ܣܓܝܐܐ ܐܝܬܘܗܝ ܐܘ ܦܘܪܫܐ܂ ܐܚܪ̈ܢܝܬܐ ܓܝܪ ܡ̈ܬܚܙܝܢ ܗܠܝܢ ܕܐܫܬܡܗ܇
0144	ܐܝܟ ܡܠܬܐ ܗ݀ܝ ܕܐܝܟܢ ܐܝܬܝܗܝܢ܂ ܘܕܐܦܠܐ ܒܡܕܡ ܕܡ̈ܝܢ ܠܚ̈ܕܕܐ܂ ܟܕ ܐܬܐ ܠܢ ܕܝܢ ܠܡܨܥܬܐ ܪܐܙܐ ܕܒܡܫܝܚܐ܆
0145	ܡܠܬܐ ܕܚܕܝܘܬܐ ܠܐ ܛܥܝܐ ܡ݁ܢ ܠܫܘܚܠܦܐ܂ ܡܦܩܐ ܕܝܢ ܠܦܘܠܓܐ܂ ܠܘ ܟܕ ܚܒܟܐ ܥܡ ܚ̈ܕܕܐ ܐܘ ܡܡܙܓܐ ܟܝ̈ܢܐ܂ ܐܠܐ ܟܕ ܠܒܣܪܐ ܘܕܡܐ ܐܫܬܘܬܦ ܡܠܬܐ ܕܐܠܗܐ܆
0146	ܚܕ ܬܘܒ ܐܦ ܗܟܢܐ ܒܪܐ ܡܣ݂ܬܟܠ ܘܡܫܬܡܗ܀
0147	ܐܢ ܕܝܢ ܢܦܠܓ ܐܢܫ ܠܥܡܢܘܐܝܠ ܥܘܠܐܝܬ ܒܬܪܝܢܘܬܐ ‍[‍78‍]‍ ܕܟܝ̈ܢܐ ܒܬܪ ܚܕܝܘܬܐ܆
0148	ܥܡ ܫܘܚܠܦܐ ܕܟܝ̈ܢܐ ܡܢ ܟܠܦܪܘܣ ܪܗ݀ܛ ܐܟܚܕܐ ܐܦ ܦܘܠܓܐ܂ ܘܒܟܠ ܡܕܡ ܡ̈ܬܦܠܓܢ ܕܝ̈ܠܝܬܐ ܠܚܡܐܝܬ ܠܟܝ̈ܢܐ܂ ܘܗܕܐ ܬܘܒ ܒܗ ܒܛܘܡܣܐ ܢܦܩ ܝܕܘܥܬܢܐܝܬ ܚܟܝܡܐ ܩܘܪܝܠܘܣ܆
0149	ܕܒܬܪ ܐܚܪ̈ܢܝܬܐ ܐܡ݂ܪ ܐܦ ܗܠܝܢ܂ ܀
0150	ܩܘܪܝܠܘܣ܀
0151	ܘܗܐ ܐܠܗܐ ܕܠܐ ܓܫܬܐ ܐܝܬܘܗܝ܂ ܐܠܐ ܘܡܬܓܫܫܢܐ ܗ݂ܘܐ ܡܠܬܐ ܐܝܟ ܕܒܝܕ ܒܣܪܗ܂ ܠܐ ܡܬܚܙܝܢܐ ܒܟܝܢܐ܂ ܐܠܐ ܐܝܬܘܗܝ ܗܘܐ ܘܡܬܚܙܝܢܐ ܒܝܕ ܦܓܪܐ܂ ܐܢܬ ܕܝܢ ܬܘܒ ܟܕ ܡ݁ܦܪܫ ܐܢܬ ܠܢ ܒܟܘܠ ܙܢܐ܆
0152	ܡܨܛܢܥ ܐܢܬ ܠܫܪܪܐ܂ ܕܠܟܝ̈ܢܐ ܡ݁ܢ ܡ݁ܦܪܫ ܐܢܬ܆
0153	ܡܚܝܕ ܐܢܬ ܕܝܢ ܐܝܟ ܕܐܡ݁ܪ ܐܢܬ ܣܓܕܬܐ܂ ܐܠܐ ܐܢ ܡ݁ܦܪܫ ܐܢܬ ܠܟܝ̈ܢܐ܆
0154	ܐܙ̈ܠܢ ܥܡܗܘܢ ܐܦ ܕܝ̈ܠܝܬܐ ܕܟܠ ܚܕ ܡܢܗܘܢ ܟܝܢܐܝܬ܂ ܪܗܛܐ ܕܝܢ ܡܠܬܐ ܕܫܘܚܠܦܐ ܒܟܠ܂ ܬܪ̈ܝܢ ܗܟܝܠ ܡܬܬܘܕܝܢ܂
0155	ܡܢ ܗܠܝܢ ܗܟܝܠ ܕܐܬܬܣܝܡ ܐܬܩܝܡܬ ܓܠܝܐܝܬ܆
0156	ܕܡܫܘܕܥܘܬܐ ܟܝܢܝܬܐ ܐܝܬܝܗ݀ ܡܠܬܐ ܕܐܝܟܢ ܐܝܬܘܗܝ܂ ܐܡ݂ܪ ܓܝܪ ܡܠܦܢܐ܆
0157	ܕܐܝܟ ܡܠܬܐ ܗ݀ܝ ܕܐܝܟܢ ܐܝܬܝܗܝܢ܆
0158	ܐܚܪ̈ܢܝܬܐ ܡ̈ܬܚܙܝܢ ܗܠܝܢ ܕܐܫ݁ܬܡܗ܂ ܘܕܠܐ ܕܡ̈ܝܢ ܠܚ̈ܕܕܐ ܒܡܕܡ܂ ܡܘܕܝܢܢ ܗܟܝܠ ܘܫܘܚܠܦܐ ܘܕܝܠܝܘܬܐ ܘܐܚܪܢܝܘܬܐ ܕܟܝ̈ܢܐ ܕܡܢܗܘܢ ܡܫܝܚܐ܂ ܡܛܠ ܓܝܪ ܫܡܗ̈ܐ ܠܐ ܡܬܚܪܝܢܢ܂ ܕܝܠܝܬܐ ܕܝܢ ܗ݀ܝ ܕܐܝܟ ܕܒܡܫܘܕܥܘܬܐ ܟܝܢܝܬܐ܆
0159	ܘܠܘ ܗ݀ܝ ܕܒܡ̈ܢܘܬܐ ܬܬܩܝܡ܇
0160	ܘܡܢܗ݀ ܘܠܗ݀ ܟܠ ܚܕܐ ܡܢܗܝܢ ܬܗܘܐ ܐܝܬܝܗ݀܂ ܟ݁ܬܒ ܓܝܪ ܩܕܝܫܐ ܩܘܪܝܠܘܣ ܒܡܐܡܪܐ ܕܫܘܐܠܐ ܘܦܘܢܝ ܦܬܓܡܐ܆
0161	ܒܗ݀ܘ ܕܚܕ ܗܘ ܡܫܝܚܐ ܐܦ ܗܠܝܢ܂ ܀
0162	ܩܘܪܝܠܘܣ܀
0163	ܠܐ ܙܕ݁ܩ ܗܟܝܠ ܕܢܦܠܓ ܐܝܟ ܕܐܡܪܬ܇
0164	ܠܐܚܪܢܝܘܬ ܕܝܠܝܘܬܐ ܕܗ݀ܝ ܕܢܗܘܘܢ ܪܚܝܩܝܢ ܡܢ ܚ̈ܕܕܐ ܘܒܡܢܬܐ܂ ܘ݁ܠܐ ܕܝܢ ܕܢܝܬܐ ܝܬܝܪܐܝܬ ܐܟܚܕܐ ܠܚܕܝܘܬܐ ܕܠܐ ܡܬܦܫܩܐ܂ ܗ݂ܘܐ ܓܝܪ ܡܠܬܐ ܒܣܪܐ܆
0165	ܐܝܟ ܒܪܬ ܩܠܗ ܕܝܘܚܢܢ܀
0166
0167	‍[‍79‍]‍ ܠܐ ܟܦܪܝܢܢ ܓܝܪ ܕܢܘܕܐ ܫܘܚܠܦܐ܂ ܠܐ ܡܬܘܡ ܬܗܘܐ܂ ܡܢ ܗ݀ܝ ܕܝܢ ܕܢܦܠܓ ܒܬܪܝܢܘܬܐ ܕܟܝ̈ܢܐ ܠܚܕ ܡܫܝܚܐ ܒܬܪ ܚܕܝܘܬܐ ܥܪܩܝܢܢ܂ ܐܢܗ݂ܘ ܓܝܪ ܕܡܬܦܠܓ܆
0168	ܐܟܚܕܐ ܡ̈ܬܦܠܓܢ ܥܡܗ ܐܦ ܕܝ̈ܠܝܬܐ ܕܟܠܚܕ ܡܢ ܟܝ̈ܢܐ܂ ܘܢܩܦܐ ܠܟܠܚܕ ܡܢܗܘܢ ܗ݀ܝ ܕܝܠܗ܂ ܟܕ ܕܝܢ ܚܕܝܘܬܐ ܩܢܘܡܝܬܐ ܡܬܬܘܕܝܐ܇
0169	ܕܐܝܬܘܗܝ ܫܘܡܠܝܗ݀ ܗ݀ܝ ܕܡܢ ܬܪ̈ܝܢ ܠܐ ܚܒܝܟܐܝܬ ܐܝܬܘܗܝ ܚܕ ܡܫܝܚܐ܂ ܚܕ ܦܪܨܘܦܐ܇
0170	ܚܕ ܩܢܘܡܐ܇
0171	ܚܕ ܟܝܢܐ ܗ݀ܘ ܕܝܠܗ ܕܡܠܬܐ ܕܡܒܣܪ܂ ܒܝܕ ܕܝ̈ܠܝܬܐ ܕܒܣܪܐ ܡܠܬܐ ܡܬܝܕܥ܂ ܘܕܝ̈ܠܝܬܐ ܕܐܢܫܘܬܐ ܕܝ̈ܠܝܬܐ ܢܗ̈ܘܝܢ ܕܐܠܗܘܬܐ ܕܡܠܬܐ܂ ܘܕܝ̈ܠܝܬܐ ܬܘܒ ܕܡܠܬܐ ܘܕܝ̈ܠܝܬܐ ܕܒܣܪܐ ܢܬܬܘ̈ܕܝܢ܆
0172	ܘܗ݂ܘ ܟܕ ܗ݂ܘ ܢܗܘܐ܇
0173	ܕܒܝܕ ܗܠܝܢ ܘܗܠܝܢ ܡܬܚܙܐ܂ ܘܡܬܓܫܫܢܐ ܘܠܐ ܡܬܓܫܫܢܐ܂ ܘܡܬܚܙܝܢܐ ܘܠܐ ܡܬܚܙܝܢܐ܂ ܘܕܒܙܒܢܐ ܗ݂ܘܐ ܘܕܡܢ ܩܕܡ ܙܒ̈ܢܐ܂ ܘܠܘ ܕܝ̈ܠܝܬܐ ܕܟܠ ܟܝܢܐ ܡܦܠܓܐܝܬ ܢܟܬܘܒ܂
0174	ܘܗܠܝܢ ܬܠܦܝܢ ܬܘܒ ܘܬܪܕܝܢ ܢܗܝܪܐܝܬ ܒܪܬ ܩܠܐ ܢܗܝܪܬܐ ܘܓܪܝܡܬܐ ܕܚܟܝܡܐ ܩܘܪܝܠܘܣ܂ ܟ݁ܬܒ ܓܝܪ ܒܛܘܡܣܐ ܕܬܠܬܐ ܕܠܘܩܒܠ ܓܘ̈ܕܦܐ ܕܢܣܛܘܪܝ݂ܣ ܗܟܢܐ܂ ܀
0175	ܩܘܪܝܠܘܣ܀
0176	ܡ݁ܕܓܠ ܗܟܝܠ ܒܡ̈ܠܐ܇
0177	ܕܐܡ݂ܪ ܕܢܚ݂ܬ ܡܢ ܫܡܝܐ ܒܪܗ ܕܐܢܫܐ܇
0178	ܗܢܘ ܕܝܢ ܗ݂ܘ܂ ܠܐ ܬܗܘܐ܂ ܗ݂ܘ ܓܝܪ ܐܝܬܘܗܝ ܫܪܪܐ܂ ܐܝܟܢܐ ܗܟܝܠ ܡܢ ܠܥܠ ܒܪܗ ܕܐܢܫܐ ܢܦܫܗ ܢܣ݂ܬܟܠ ܙܕܩܐܝܬ܂ ܕܟܕ ܐܝܬܘܗܝ ܐܠܗܐ ܡܠܬܐ ܘܡܢ ܐܘܣܝܐ ܕܠܥܠ ܡܢ ܟܘܠ܆
0179	ܡܬܐܡܪ ܕܢܚ݂ܬ ܘܫܩ݂ܠ ܕܡܘܬܐ ܕܥ݂ܒܕܐ܂ ܘܒܬܪܟܢ ܡܡܠܠ ܠܘܬܢ܆
0180	ܠܘ ܐܝܟ ܡܠܬܐ ܥܪܛܠܝܐ ܡܟܝ݂ܠ ܐܠܐ ܐܝܟ ܒܪ ܐܢܫܐ ܕܐܟܘܬܢ܂ ܘܐܝܟ ܡ݁ܢ ܕܚܕ ܡܢ ܟܕܘ ܡܬܝܕܥ܇
0181	ܥܡ ܒܣܪܐ ܕܐܬܚܝܕ ܠܗ܂ ܐܝܟ ‍[‍80‍]‍ ܡܐ ܕܝܢ ܕܡܛܠ ܗ݀ܝ ܕܦܐܝܐ ܠܣܘܪܩܐ܇
0182	ܕܝܠܗ ܥ݁ܒܕ ܟܠܗܝܢ ܗܠܝܢ ܕܦܓܪܗ܇
0183	ܟܕ ܛܒ ܟܝܢܐ ܕܠܐ ܓܫܘܡ ܐܝܬܘܗܝ܆
0184	ܗܟܢܐ ܘܟܕ ܡܢ ܠܥܠ ܐܝܬܘܗܝ ܗ݂ܘ ܘܡܢ ܫܡܝܐ܆
0185	ܗ݀ܝ ܕܡܢ ܠܥܠ ܐܬ݂ܐ܆
0186	ܠܗ ܬܘܒ ܝܗ݀ܒ ܘܟܕ ܗ݂ܘܐ ܒܪ ܐܢܫܐ܂ ܐܦܢ ܗ݂ܘܐ ܒܒܣܪ ܥܡܢ ܡܢ ܐܢܬܬܐ܂ ܗ̈ܘܝ ܗܟܝܠ ܕܝ̈ܠܝܬܐ ܡ݁ܢ ܕܡܠܬܐ܆
0187	ܗܠܝܢ ܕܐܢܫܘܬܐ܂ ܕܝ̈ܠܝܬܐ ܕܝܢ ܬܘܒ ܕܐܢܫܘܬܐ܆
0188	ܗܠܝܢ ܕܝܠܗ ܕܡܠܬܐ܂ ܚܕ ܓܝܪ ܗܟܢܐ ܡܣ݂ܬܟܠ ܡܫܝܚܐ ܘܒܪܐ ܘܡܪܝܐ܀
0189
0190	ܐܡܬܝ ܗܟܝܠ ܕܡܚܪܡܝܢܢ ܠܗ݀ܢܘܢ ܕܐܡܪܝܢ ܠܥܡܢܘܐܝܠ ܬܪ̈ܝܢ ܟܝ̈ܢܝܢ ܒܬܪ ܚܕܝܘܬܐ܇
0191	ܘܡܥܒ̈ܕܢܘܬܐ ܕܗܠܝܢ ܘܕܝ̈ܠܝܬܐ܇
0192	ܠܘ ܟܕ ܠܗ݀ ܠܗܕܐ ܕܢܐܡܪ ܐܘ ܢܫܡܗ ܟܝ̈ܢܐ ܐܘ ܡܥܒ̈ܕܢܘܬܐ ܐܘ ܕܝ̈ܠܝܬܐ܇
0193	ܣܝܡܝܢܢ ܬܚܝܬ ܚܪܡܐ܇
0194	ܐܡܪܝܢܢ ܗܕܐ܂ ܐܠܐ ܠܗ݀ܝ ܕܢܐܡܪ ܒܬܪ ܚܕܝܘܬܐ ܬܪ̈ܝܢ ܟܝ̈ܢܝܢ܇
0195	ܘܕܢܩܦܐܝܬ ܢܓܕܘܢ ܗܠܝܢ ܡܥܒ̈ܕܢܘܬܐ ܕܝܠܗܘܢ ܘܕܝ̈ܠܝܬܐ܇
0196	ܐܝܠܝܢ ܕܒܟܠ ܘܡܢ ܟܠܦܪܘܣ ܥܡ ܟܝ̈ܢܐ ܡ̈ܬܦܠܓܢ܂ ܘܟܕ ܢܐܡܪ ܚܢܢ ܘܟܕ ܠܐ ܢܐܡܪ܂ ܐܠܘ ܓܝܪ ܗܕܐ ܠܐ ܐܝܬܝܗ݀ ܗܘܬ܆
0197	ܙܕܩ ܗܘ݂ܐ ܕܐܦ ܠܐ ܡܢ ܬܪ̈ܝܢ ܟܝ̈ܢܝܢ ܢܘܕܐ ܠܥܡܢܘܐܝܠ܇
0198	ܐܢܗ݂ܘ ܕܛܡܐܐ ܗܘ ܫܡܐ ܕܟܝ̈ܢܐ܂ ܗܫܐ ܕܝܢ ܟܕ ܐܡܪܝܢܢ ܡܢ ܬܪ̈ܝܢ ܟܝ̈ܢܝܢ܇
0199	ܘܚܕ ܝܕܥܝܢܢ ܠܐܠܗܐ ܗ݀ܘ ܕܐܬܒܣܪ ܘܐܬܒܪܢܫ ܠܐ ܡܫܬܚܠܦܢܐܝܬ܇