The Comprehensive Aramaic Lexicon

0400	ܟܕ ܐܠܗܘܬܗ ܠܐ ܚܣܪܐ ܠܠܐ ܚܫܘܫܘܬܐ܂ ܕܗ݀ܘ ܓܝܪ ܕܒܣܪܐ ܕܝܠܗ ܐܡܪܝܢܢ܆
0401	ܕܝܠܗ ܕܗܢܐ ܡܢ ܟܠܦܪܘܣ ܘܚܫ̈ܐ ܕܒܣܪܐ ܚܫܒܝܢܢ܂ ܠܘ ܓܝܪ ܡܛܠ ܕܬܕܡܘܪܬܐ ܗܘ ܒܛܢܐ ܘܝܠܕܐ ܗ݀ܘ ܕܡܢ ܒܬܘܠܬܐ܇
0402	ܡܛܠ ܗܢܐ ܒܟܠܡܕܡ ܒܢܡ̈ܘܣܐ ܐܢܫ̈ܝܐ ܕܟܝܢܐ ܟ݁ܦܪ܂ ܗܕܐ ܓܝܪ ܘܓܪܝܓܘܪܝܘܣ ܡܡܠܠ ܐܠܗ̈ܝܬܐ ܒܐܓܪܬܐ ܕܠܘܬ ܩܠܐܕܘܢܝܘܣ ܐܡ݁ܪ܂ ܀
0403	ܓܪܝܓܘܪܝܘܣ܀
0404	ܐܢ ܐܢܫ ܐܝܟ ܕܒܝܕ ܣܝܠܘܢܐ ܐܡ݁ܪ ܕܪܗ݂ܛ ܒܒܬܘܠܬܐ܇
0405	ܐܠܐ ܠܘ ܕܒܗ݀ ܐܬܓܒ݂ܠ ܐܠܗܐܝܬ ܐܟܚܕܐ ܘܐܢܫܐܝܬ܇
0406	ܐܠܗܐܝܬ ܡ݁ܢ ܕܣܛܪ ܡܢ ܓܒܪܐ܇
0407	ܐܢܫܐܝܬ ܕܝܢ ܕܒܢܡܘܣܐ ܕܒܛܢܐ܆
0408	ܒܗ݀ ܒܕܡܘܬܐ ܕܠܐ ܐܠܗ ܐܝܬܘܗܝ܀
0409	ܘܩܕܝܫܐ ܕܝܢ ܩܘܪܝܠܘܣ܇
0410	ܒܡܐܡܪܐ ܕܫܘܐܠܐ ܘܦܘܢܝ ܦܬܓܡܐ ܕܚܕ ܗܘ ܡܫܝܚܐ ܐܡ݁ܪ܂ ܀
0411	ܩܘܪܝܠܘܣ܀
0412	ܐܦܠܐ ܗ݀ܘܐ ܗܘܐ ܠܘܛܬܐ ܟܕ ܨܠܝܒܐ ܚܫ܇
0413	ܗ݀ܘ ܕܡܛܠܬܢ܂ ܐܠܘ ܠܐ ܕܗ݂ܘܐ ܒܣܪܐ܂ ܗܢܘ ܕܝܢ ܕܐܬܒܣܪ ܘܐܬܒܪܢܫ܇
0414	ܘܝܠܝܕܘܬܐ ܕܐܟܘܬܢ ܡܛܠܬܢ ܦܐܝܘܬ ܐܢܫܐܝܬ ܣܒ݂ܠ܇
0415	ܗ݀ܝ ܕܒܝܕ ܒܬܘܠܬܐ ܩܕܝܫܬܐ ܐܡ݁ܪ ܐܢܐ܀
0416
0417	ܟܕ ܫܡ݁ܥ ܐܢܬ ܗܟܝܠ ܕܐܠܗܐܝܬ ܐܟܚܕܐ ܘܐܢܫܐܝܬ ܗ݂ܘܐ ܒܛܢܐ ܕܥܡܢܘܐܝܠ܂ ܐܝܟܢܐ ܡ݁ܦܩ ܐܢܬ ܠܗ ܒܟܠܡܕܡ ܡܢ ܕܝ̈ܠܝܬܐ ܐܢܫ̈ܝܬܐ܇
0418	ܗܠܝܢ ܕܟܕ ܨܒ݁ܐ ܗ݂ܘ ܡܠܬܐ ܗ݀ܘ ܕܐܬܒܣܪ ܩܒ݁ܠ܂ ܐܠܐ ܓܝܪ ܢܐܡܪ ܕܡܩܒܠܢܐ ܗܘ ܒܣܪܐ ܕܗܠܝܢ ܕܝܠܗ ܣܛܪ ܡܢ ܚܛܝܬܐ܇
0419	ܗܕܐ ܓܝܪ ܠܘ ܡܢܬܐ ܗܝ ܕܐܘܣܝܐ܇
0420	ܐܠܐ ܗ݀ܝ ܕܐܡ݁ܪܬ ܟܘܪܗܢܐ ܕܓܕܫ ܡܢ ܠܐ ܚܙܝܘܬܐ܆
0421	ܐܦܠܐ ܕܢܚܫ ܨܠܝܒܐ ܕܚܠܦܝܢ ܡܫܟܚ ܗܘܐ܂ ܘܠܐ ܕܡܘܬܐ ܢܣܒܘܠ܂ ܐܠܐ ܫܦܝܪ ܝܕܝܥܐ܆
0422	ܕܒܗ݀ܘ ܕܡܟܢ ܠܡܚܫ ܡܩܒ݁ܠ ܗܘܐ ܗܠܝܢ܂ ܘܗ݀ܘ ܕܐܬܒܣܪ ܗ݂ܘ ܐܝܬܘܗܝ ܗ݀ܘ ܕܐܦ ܚܫ ‍[‍91‍]‍ ܒܒܣܪ ܟܕ ܩܘܝ ܒܗ݀ܝ ܕܐܝܬܘܗܝ ܐܠܗܐ ܠܐ ܚܫܘܫܐ܂ ܘܐܢ ܗ݂ܘ ܕܡܢ ܗ݀ܝ ܕܢܐܡܪ ܕܚܫ ܢܢܟܪܝܘܗܝ܆
0423	ܩܕܡܝܢ ܚܢܢ ܡܢܟܪܝܢܢ ܠܗ݂ ܘܡܢ ܒܣܪܐ ܕܒܗ ܟܕ ܨܒ݂ܐ ܩܒ݂ܠ ܚܫܐ܂ ܡܛܠ ܗܕܐ ܓܝܪ ܘܩܒܘܬܐ ܡܢ ܩܝ̈ܣܐ ܠܐ ܡܒ̈ܠܛܐ ܡܬܥܬܕܐ ܗܘܬ܂ ܘܡܢ ܠܒܪ ܘܡܢ ܠܓܘ ܡܫܝܚܐ ܗܘܬ ܒܕܗܒܐ܂ ܕܕܗܒܐ ܡ݁ܢ ܛܘܦܣܢܐܝܬ ܪܫ݁ܡ ܗܘܐ ܐܠܗܘܬܐ܂ ܩ̈ܝܣܐ ܕܝܢ ܐܢܫܘܬܐ܂ ܐܝܟܢܐ ܕܡܢ ܬܪ̈ܬܝܗܝܢ ܕܚܕ ܡܫܝܚܐ ܩ݁ܕܡ ܡܬܪܫܡ ܢܚܙܐ܂ ܘܐܝܟܢܐ ܘܐܟܙܢܐ ܕܩܝܣܐ ܠܐ ܡܒܠܛܐ܆
0424	ܚܒܠܐ ܡ݁ܢ ܕܡܢ ܬܘܠܥܐ ܘܡܢ ܣܣܐ ܐܢ ܬܓܕܫ ܠܐ ܣܒ݁ܠ܇
0425	ܠܦܣܩܐ ܕܝܢ ܗ݀ܘ ܕܡܢ ܦܪܙܠܐ ܡ݁ܫܦ܇
0426	ܘܠܝܩܕܢܐ ܕܡܢ ܢܘܪܐ܆
0427	ܗܟܢܐ ܘܐܢܫܘܬܐ ܗ݀ܝ ܕܚܝܕ ܠܗ ܩܢܘܡܐܝܬ ܡܠܬܐ ܕܐܠܗܐ܆
0428	ܠܚܒܠܐ ܡ݁ܢ ܕܡܢ ܚܛܝܬܐ ܕܐܝܟ ܕܡܢ ܣܣܐ ܘܬܘܠܥܐ ܡܚܒܠ ܠܐ ܩܒ݂ܠܬ܂ ܐܝܬܝܗ݀ ܗܘܬ ܓܝܪ ܠܐ ܡܬܕܝܫܢܝܬܐ ܠܗ݀ܝ ܕܬܚܛܐ܂ ܕܦܣܩܐ ܕܝܢ ܕܡܢ ܦܪܙܠܐ ܘܡܢ ܫ̈ܢܕܐ ܐܚܪ̈ܢܐ ܡܩܒܠܢܝܬܐ ܐܝܬܝܗ݀ ܗܘܬ܂ ܟܕ ܡܠܬܐ ܕܐܬܒܣܪ ܘܗܕܐ ܕܬܚܫ ܫܒ݁ܩ ܗܘܐ ܐܡܬܝ ܕܨܒ݁ܐ ܗܘܐ܂ ܒܗܕܐ ܘܕܐܬܢܓܕ ܡܬܐܡܪ ܘܕܐܬܒܙܥ ܒܨ̈ܨܐ܆
0429	ܘܕܡܝܬ ܒܒܣܪ܆
0430	ܘܕܓܕܫܬ ܠܗ ܩܒܘܪܬܐ܂ ܐܦܢ ܗ݂ܘ ܕܡܢܗܝܢ ܕܗܠܝܢ ܐܬܚܙܝ ܕܡܥܠܝ ܒܝܕ ܩܝܡܬܐ܇
0431	ܘܠܐ ܐܫܬܒܩ ܒܫܝܘܠ ܘܠܐ ܒܣܪܗ ܚܙܐ ܚܒܠܐ܂
0432	ܕܫ̈ܠܡܢ ܕܝܢ ܠܗܠܝܢ܆
0433	ܐܦ ܡ̈ܠܦܢܘܬܐ ܕܐܒܗ̈ܬܐ ܠܒܝ̈ܫܝ ܐܠܗܐ܂ ܫܡ݂ܥ ܬܘܒ ܠܒܪܬ ܩܠܐ ܢܦܝܚܬ ܡܢ ܐܠܗܐ ܕܩܘܪܝܠܘܣ܂ ܕܒܡܐܡܪܐ ܦܪܘܣܦܢܛܝܩܘܢ ܗ݀ܘ ܕܠܘܬ ܕܚܠ ܠܐܠܗܐ ܡ݁ܠܟܐ ܬܐܕܘܣܝܣ ܐܡ݁ܪ ܗܟܢܐ܀
0434	ܐܪܐ ܗܟܝܠ ܠܐ ܩܕܡܬ ܐܬܝܕܥܬ܇
0435	ܕܠܐ ܐܝܬܝܗ݀ ܠܐܢܫ ܡܢ ܗܠܝܢ ܕܐܝܬܝܗܘܢ ܠܐ ܝܕܝܥܬܐ܇
0436	ܕܐܟܘܬܢ ܗ݂ܘܐ ܐܝܚܝܕܝܐ܇
0437	ܗܢܘ ܕܝܢ ܡܫܡܠܝܐܝܬ ܒܪܢܫܐ܇
0438	ܐܝܟܢܐ ܕܡܢ ܚܒܠܐ ܡ݁ܢ ܥܠܘܠܐ܇
0439	ܢܓܗܐ ܠܓܘܫܡܢ ܐܪܥܢܝܐ ܒܡܕܒܪܢܘܬܐ ܕܒܚܕܝܘܬܐ܇
0440	ܟܕ ܚܝ̈ܐ ܕܝܠܗ ܡܪܡܐ ‍[‍92‍]‍ ܒܗ܆
0441	ܠܢܦܫܐ ܕܝܢ ܗ݀ܝ ܐܢܫܝܬܐ ܕܝܠܗ ܥܒ݂ܕ܇
0442	ܕܢܚܘܝܗ݀ ܕܡܥܠܝܐ ܡܢ ܚܛܝܬܐ܆
0443	ܘܗ݀ܝ ܩܒܝܥܘܬܐ ܘܠܐ ܡܫܬܚܠܦܢܘܬܐ ܕܟܝܢܗ܆
0444	ܐܝܟ ܨܘܒܥܐ ܒܥܡܪܐ ܛܫ ܒܗ݀܂ ܣ̈ܢܝܩܢ ܓܝܪ ܣ݁ܒܪ ܐܢܐ ܡ̈ܠܐ ܕܡܛܠ ܗܠܝܢ܆
0445	ܥܠ ܬܚܘ̈ܝܬܐ ܕܣܓܝ ܥܒܪ̈ܢ ܠܗ݀ܝ ܕܠܐ ܡܬܚܙܝܐ܂ ܠܡܚܣܢ ܓܝܪ ܚ݁ܙܝܢ ܚܢܢ ܒܡܚܙܝܬܐ ܘܒܪ̈ܡܙܐ܇
0446	ܪ̈ܐܙܐ ܐܠܗ̈ܝܐ ܘܕܠܥܠ ܡܢ ܗܘܢܐ܂ ܗ݂ܘܐ ܕܝܢ ܗ݂ܘ ܣܘܥܪܢܐ܆
0447	ܠܘ ܠܐ ܡܬܚܙܝܢܐ ܐܝܟ ܕܣ݁ܒܪ ܐܢܐ܂ ܡܝܬܐ ܒܗ ܓܝܪ ܡܚܫܒܬܐ ܕܕܡܝܐ܂ ܝܬܝܪܐܝܬ ܕܝܢ ܫܪܝܪܬܐ܂ ܐܟܙܢܐ ܓܝܪ ܕܡܛܠ ܕܗ݂ܘܐ ܒܣܪܐ ܕܡܠܬܐ ܡܚܐ ܟܠ܇
0448	ܡܥܠܝ ܡܢ ܐܘܚܕܢܐ ܕܡܘܬܐ ܘܕܚܒܠܐ܆
0449	ܒܗ ܒܙܢܐ ܣ݁ܒܪ ܐܢܐ܇
0450	ܕܡܛܠ ܕܗ݂ܘܬ ܢܦܫܐ ܕܗ݀ܘ ܕܠܐ ܝ݁ܕܥ ܕܢܚܛܐ܇
0451	ܩܘܝܡܐ ܡܟܝܠ ܡܣܬܬܐ ܕܒܟܠܗܝܢ ܛܒ̈ܬܐ ܠܐ ܡܫܬܚܠܦ ܐܝܬ ܠܗ݀܂ ܘܡܢ ܚܛܝ݂ܬܐ ܗ݀ܝ ܕܒܙܒܢ ܡܪܕܬ ܥܠܝܢ܇
0452	ܕܠܐ ܦܚܡܐ ܝܬܝܪ ܚܝܠܬܢܝܐ܂ ܒܪܢܫܐ ܓܝܪ ܩܕܡܝܐ ܥܠ ܐܪܥܐ ܗ݀ܘ ܕܠܐ ܥܒ݂ܕ ܚܛܝ݂ܬܐ܇
0453	ܘܠܐ ܐܫܬܟܚ ܢܟܠܐ ܒܦܘܡܗ݂ ܡܫܝܚܐ܀
0454	܂ ܀
0455	ܘܒܬܪ ܙܥܘܪ̈ܝܬܐ ܬܘܒ܀
0456	ܫܒܝܚܐ ܕܝܢ ܘܠܐ ܠܐܢܫ ܡܢ ܗܠܝܢ ܕܐܝܬܝܗܘܢ ܐܝܬܝܗ݀ ܠܐ ܬܡܝܗܬܐ܇
0457	ܕܦܓܪܐ ܡ݁ܢ ܚܝܐ ܗ݀ܘ ܕܒܟܝܢܐ ܡܬܚܒܠܢܐ ܗܘ܂ ܐܝܬܘܗܝ ܗܘܐ ܓܝܪ ܕܝܠܗ ܕܡܠܬܐ ܠܐ ܡܬܚܒܠܢܐ܂ ܢܦܫܐ ܕܝܢ ܬܘܒ ܕܡܛܗ݀ ܡܐܬܝܐ ܕܐܝܟ ܗܕܐ ܕܠܘܬܗ݀ ܘܚܕܝܘܬܐ܆
0458	ܢܚ݂ܬܬ ܡ݁ܢ ܠܫܝܘܠ܂ ܟܕ ܒܚܝܠܐ ܕܝܢ ܘܒܫܘܠܛܢܐ ܦܐܐ ܠܐܠܗܐ ܡܬܚܫܚܐ܆
0459	ܐܦ ܠܪ̈ܘܚܬܐ ܕܬܡܢ ܡܬܚ݂ܙܝܐ ܗܘܬ܀
0460	ܡܚ݁ܬܡ ܕܝܢ ܬܘܒ ܗܠܝܢ ܕܐܡܝܪ̈ܢ ܒܗ ܒܡܐܡܪܐ ܟܕ ܐܘܣܦ ܗܠܝܢ܂ ܀
0461	ܘܬܘܒ܀
0462	ܚܕ ܡܪܝܐ ܝܫܘܥ ܡܫܝܚܐ ܘܒܐܝ̈ܕܘܗܝ ܟܠ ܡܕܡ ܒܪܐ ܐܒܐ܂ ܒܕܓܘܢ ܘܐܝܬܘܗܝ ܘܒܪܘܝܐ ܐܠܗܐܝܬ܂ ܘܡܥܒܕ ܚܝ̈ܐ ܐܝܟ ܚܝ̈ܐ܂ ܘܒܕܝ̈ܠܝܬܐ ܐܢܫ̈ܝܬܐ ܘܒܗܠܝܢ ܕܠܥܠ ܡܢ ܒܪܢܫܐ܆
0463	ܠܚܕ ܡܕܡ ܕܒܡܨܥܬܐ ܡܪܟܒ܂ ܡܨܥܝܐ ܓܝܪ ܐܝܬܘܗܝ ܕܐܠܗܐ ܘܕܒܢܝ̈ܢܫܐ ܐܝܟ ܟܬܒ̈ܐ܂ ܕܒܟܝܢܐ ܡ݁ܢ ܐܝܬܘܗܝ ܐܠܗܐ ‍[‍93‍]‍ ܘܠܘ ܣܛܪ ܡܢ ܒܣܪܐ܂ ܒܪܢܫܐ ܕܝܢ ܒܫܪܪܐ܆
0464	ܘܠܘ ܫܚܝܡܐ ܐܟܘܬܢ܂ ܐܠܐ ܐܝܬܘܗܝ ܗ݀ܘ ܡ݁ܢ ܕܐܝܬܘܗܝ ܗܘܐ܆
0465	ܐܦܢ ܗ݂ܘܐ ܒܣܪܐ܂ ܟܬܝܒ ܓܝܪ ܕܝܫܘܥ ܡܫܝܚܐ ܐܬܡܠܝ ܘܝܘܡܢ ܗ݂ܘ ܟܕ ܗ݂ܘ ܘܠܥܠܡ܀
0466	ܘܗ݀ܝ ܕܝܢ ܕܒܐܫܥܝܐ ܢܒܝܐ܇
0467	ܘܚܙܝܢܝܗܝ ܕܠܝܬ ܗܘܐ ܠܗ ܚܙܘܐ ܘܠܐ ܫܘܦܪܐ܂ ܐܠܐ ܚܙܘܗ ܠܐ ܡܝܩܪ ܕܒܨܝܪ ܡܢ ܒܢܝ̈ܢܫܐ܂ ܠܪܒܘܬܐ ܕܫܝܛܘܬܐ ܘܕܨܥܪܐ ܗ݀ܘ ܕܥܠ ܠܗ ܟܕ ܡܬܢܣܐ ܡܘܕܥܐ܂ ܘܒܠܥ ܥܠ ܦܟܘ̈ܗܝ ܡܚܘ̈ܬܐ ܕܝܬܝܪ ܡܢ ܟܠ ܫܝܛܝܢ܆
0468	ܘܠܐ ܐܗܦܟ ܐܦܘ̈ܗܝ ܡܢ ܒܗܬܬܐ ܕܪܘܩܐ܂ ܘܣܒ݂ܠ ܨܠܝܒܐ܆
0469	ܘܥܠ ܒܗܬܬܐ ܐܒܣܝ܂ ܗ݀ܝ ܕܐܡ݂ܪ ܫܠܝܚܐ܂ ܠܘ ܓܝܪ ܟܦܘܪܝܐ ܕܒܣܪܐ ܡܥ݂ܠ܇
0470	ܘܫܘܚܠܦܐ ܘܫܘܓܢܝܐ ܕܐܘܣܝܐ ܐܢܫܝܬܐ܂ ܐܝܬ ܠܗ ܓܝܪ ܘܒܗܕܐ ܠܡܫܝܚܐ ܗ݀ܝ ܕܢܙܟܐ܇
0471	ܝܬܝܪ ܡܢ ܒܢܝ̈ܢܫܐ܂ ܘܠܐ ܦܬ݂ܚ ܦܘܡܗ܂ ܐܠܐ ܠܘܬ ܢܟܣܬܐ܆
0472	ܕܠܐ ܒܪܬ ܩܠܐ ܐܬ݂ܐ ܐܝܟ ܐܡܪܐ܂ ܘܟܠܡܕܡ ܡܟܝܟܐܝܬ ܘܠܗܠ ܡܢ ܟܠܗ݀ ܡܓܪܬ ܪܘܚܐ ܣܝܒܪ܂ ܘܗܠܝܢ ܟܕ ܐܝܬܘܗܝ ܐܠܗܐ ܒܟܝܢܐ܇
0473	ܘܠܐ ܝ݁ܕܥ ܚܛܝܬܐ܇
0474	ܐܦܢ ܐܝܟ ܕܒܫܪܪܐ ܒܪ ܐܢܫܐ ܐܝܬܘܗܝ ܗܘܐ ܗ݂ܘ ܟܕ ܗ݂ܘ܂ ܗ݀ܝ ܓܝܪ ܕܪܒܐ ܕܬܫܒܘܚܬܗ ܥܒܕܐ ܐܦ ܪܒܘܬܐ ܕܨܥܪܐ܂ ܐܝܟܢܐ ܕܐܦ ܠܐ ܐܢܫ ܡܢ ܒܢܝ̈ܢܫܐ ܕܚܫ ܡܢ ܡܬܘܡ ܢܬܕܡܐ ܠܗ܀
0475
0476	ܟܕ ܗܠܝܢ ܗܟܝܠ ܝܕܥܐ ܢܟܦܘܬܟ܇
0477	ܘܒܝܘ̈ܠܦܢܐ ܬܘܒ ܡܬܗܕܝܐ ܕܗܠܝܢ ܡ̈ܠܦܝ ܪ̈ܐܙܐ ܕܒܙܒܢ ܕܥܕܬܐ܂ ܙܕܩ ܕܠܐ ܬܚܓܪ ܘܠܐ ܬܨܘܪ ܚܫܘܟܐܝܬ܂ ܬܘܕܝܘܗܝ ܕܝܢ ܠܥܡܢܘܐܝܠ ܡܢ ܬܪ̈ܝܢ ܟܝ̈ܢܝܢ ܐܠܗܘܬܐ ܡ݁ܢ ܘܐܢܫܘܬܐ܂ ܘܠܐ ܬܟܦܘܪ ܒܫܘܚܠܦܐ ܘܕܝܠܝܘܬܐ܇
0478	ܗ݀ܝ ܕܐܝܟ ܕܒܡܫܘܕܥܘܬܐ ܟܝܢܝܬܐ ܕܟܝ̈ܢܐ ܕܡܢܗܘܢ ܗ݀ܘ ܚܕ ܡܟ݂ܢܫ ܠܘܬ ܚܕܝܘܬܐ ܠܐ ܡܬܦܠܓܢܝܬܐ܂ ܘܥܘ݂ܠܐ ܬܚܫܘܒ ܠܗ݀ܝ ܕܬܦܣܩܝܘܗܝ ܠܡܫܝܚܐ ܠܬܪܝܢܘܬܐ ‍[‍94‍]‍ ܕܟܝ̈ܢܐ ܗ݀ܝ ܕܒܬܪ ܚܕܝܘܬܐ܇
0479	ܘܢܩܦܐܝܬ ܠܡܥܒ̈ܕܢܘܬܐ ܘܕܝ̈ܠܝܬܐ ܕܗܠܝܢ܂ ܒܬܪܝܢܘܬܐ ܓܝܪ ܟܠܡܕܡ ܐܟܚܕܐ ܡܬܦܣܩ܆
0480	ܘܫ݁ܪܟ ܠܐܚܪܢܝܘܬܐ ܡܦܠܓܬܐ ܘܦܣܝܩܬ ܒܟܠܡܕܡ܂ ܘܐܢ ܡܥܒ̈ܕܢܘܬܐ ܬܐܡܪ܇
0481	ܘܐܢ ܕܝ̈ܠܝܬܐ܂ ܟܕ ܦܘܠܓܐ ܓܝܪ ܡܩܛܪܓܝܢܢ ܕܬܪܝܢܘܬܐ ܕܟܝ̈ܢܐ ܒܬܪ ܚܕܝܘܬܐ܆
0482	ܠܐ ܡܥܠܝܢܢ ܣܩܘܒܠܐܝܬ ܐܝܟ ܕܐܣܒܪܬ܇
0483	ܐܝܟ ܡܦܝܣܢܘܬ ܡܠܬܐ ܕܥܘ̈ܠܐ܇
0484	ܗ݀ܝ ܕܬܪ̈ܝܢ ܟܝ̈ܢܐ ܡܚ̈ܝܕܐ ܢܘܕܐ܂ ܐܠܐ ܗ݂ܝ ܗ݀ܝ ܕܐܝܬܝܗ݀ ܐܡ݁ܪܝܢܢ ܕܠܐ ܚܪܝܢ܂ ܕܬܪܝܢܘܬܐ ܦܣܩܐ ܘܦܘܠܓܐ ܐܝܬܝܗ݀܂ ܐܢ ܓܝܪ ܫܪܝܪܐ ܚܕܝܘܬܐ܂ ܠܘ ܬܪ̈ܝܢ ܒܕܘܟ ܡܢ ܟܠ ܦܪܘܣ ܐܝܬܝܗܘܢ܂ ܐܠܐ ܚܕ ܡܢ ܬܪ̈ܝܢ ܡܣܬܟܠ ܡܫܝܚܐ܆
0485	ܐܝܟ ܡܐ ܕܐܡ݂ܪ ܩܕܝܫܐ ܩܘܪܝܠܘܣ܇
0486	ܟܕ ܟ݁ܬܒ ܠܘܬ ܥܘ̈ܕܠܐ ܕܬܕܘܪܝܛܐ ܥܘ݁ܠܐ܇
0487	ܗ݀ܢܘܢ ܕܠܘܩܒܠ ܩ̈ܦܠܐܐ܆
0488	ܘܗ݂ܝ ܟܕ ܗ݂ܝ ܠܘܬ ܣܘܩܢܣܘܣ ܫܠ݂ܚ ܗܟܢܐ܂ ܀
0489	ܩܘܪܝܠܘܣ܀
0490	ܐܝܟܢܐ ܕܬܪ̈ܝܢ ܠܐ ܡܟܝܠ ܡ݁ܢ ܢܗܘܘܢ ܐܝܬܝܗܘܢ ܬܪ̈ܝܢ܂ ܒܝܕ ܬܪ̈ܝܢ ܕܝܢ ܚܕܐ ܚܝܘܬܐ ܐܫܬܡܠܝܬ܀
0491

0492	ܡܫܘܕܥܘܬܐ ܕܝܢ ܟܝܢܝܬܐ ܠܐ ܐܢܫ ܠܐ ܪܕܝܐܝܬ ܢܣܒܪ ܕܥܠ ܓܘܫܡܐ ܒܠܚܘܕ ܡܬܐܡܪܐ܇

0493	ܐܝܟ ܡܐ ܕܡܫܘܕܥܘܬܐ ܕܒܓܘܫܡܐ܇
0494	ܐܘ ܒܛܥܡܬܐ܇
0495	ܐܘ ܒܥܒܝܘܬܐ܇
0496	ܐܘ ܒܝܩܝܪܘܬܐ܇
0497	ܐܘ ܒܣܒܝܣܘܬܐ܇
0498	ܐܘ ܣܚܝܚܘܬܐ܂ ܒܡ̈ܠܐ ܓܝܪ ܕܐܝܬ ܠܗܝܢ ܫܘܘܕܥܐ ܓܘܫܡܢܝܐ ܡܛܠ ܡܣܟܢܘܬܐ ܕܣܘ̈ܟܠܐ ܐܢܫ̈ܝܐ܆
0499	ܡܬܐܠܨܝܢ ܚܢܢ ܘܥܠ ܗܠܝܢ ܐܠܗ̈ܝܬܐ ܐܟܚܕܐ ܢܬܚ݁ܫܚ܇