The Comprehensive Aramaic Lexicon

0700	ܒܛܘܡܣܐ ܕܬܪ̈ܝܢ ܕܠܘܩܒܠ ܓܘ̈ܕܦܘܗܝ ܕܢܣܛܘܪܝܘܣ ܐܡ݁ܪ܂ ܕܟܕ ܡܝܬܐ ܠܢ ܠܡܨܥܬܐ ܪܐܙܐ ܗ݀ܘ ܕܡܫܝܚܐ܆
0701	ܡܠܬܐ ܗ݀ܝ ܕܚܕܝܘܬܐ ܝܕܥܐ ܡ݁ܢ ܫܘܚܠܦܐ܆
0702	ܕܚ݁ܩܐ ܕܝܢ ܦܘܠܓܐ܆
0703	ܟܕ ܠܐ ܡܒܠܒܠܐ ܐܘ ܡܡܙܓܐ ܠܟܝ̈ܢܐ ܒܚ̈ܕܕܐ܀
0704	ܐܡ݁ܪ ܐܢܬ ܐܢܬ܆
0705	ܕܠܝܬ ܠܟ ܐܚܪܢܝܐܝܬ ܕܬܣܬܟ݁ܠ ܠܠܐ ܦܣܩܐ ܕܚܕܝܘܬܐ܆
0706	ܐܢ ܡܘܙܓܐ ܡܕܡ ܘܚܘܠܛܢܐ ܠܐ ܡܬܡܠܠܢܐ ܕܟܝ̈ܢܐ ܢܬܐܡܪ܂ ܘܐܢ ܗܕܐ ܠܐ ܬܬܝܗܒ ܠܟ܆
0707	ܣܝܡܐ ܕܩܪܝܒܘܬܐ ܡܫܡܗ ܐܢܬ ܠܚܕܝܘܬܐ܂ ܗ݀ܝ ܕܐܦ ܓܚܟ ܐܢܬ ܥܠܝܗ݀܂
0708	ܡܢܐ ܗܟܝܠ ܠܘܬ ܗܕܐ ܐܡܪܝܢܢ܂ ܐܠܐ ܟܕ ܬܘܒ ܠܒ̈ܢܬ ܩ̈ܠܐ ܕܐܒܗ̈ܬܐ ܡܢ ܕܪܝܫ ܫܩܠܝܢܢ܂ ܘܟܬܒܐܝܬ ܢܐܡܪ ܠܟ܆

0709	ܕܠܡ̈ܠܐ ܕܚܟ̈ܝܡܐ ܩ݁ܪܒ ܐܕܢܟ܆

0710	ܘܫܡ݂ܥ ܡ̈ܠܝ܂ ܠܒܟ ܕܝܢ ܐܩܝܡ܂ ܐܝܟܢܐ ܕܬܕܥ ܕܫܦܝܪ̈ܬܐ ܐܝܬܝܗܝܢ܂ ܘܐܢ ܬܪܡܐ ܐܢܝ̈ܢ ܒܠܒܟ܂ ܡܚܕܝܢ ܠܟ ܐܟܚܕܐ ‍[‍105‍]‍ ܒܣ̈ܦܘܬܟ܆
0711	ܐܝܟܢܐ ܕܢܗܘܐ ܣܒܪܟ ܥܠ ܡܪܝܐ܆
0712	ܘܢܘܕܥܟ ܐܘܪܚܗ܂ ܠܡܢܐ ܓܝܪ ܟܕ ܡܠܦܢܐ ܠܘ ܥܕܡܐ ܠܗܕܐ ܐܩܝܡ ܡܠܬܗ܇
0713	ܕܠܘ ܕܡܒܠܒܠ ܐܘ ܡܡܙܓ ܠܟܝ̈ܢܐ ܒܚ̈ܕܕܐ܇
0714	ܐܘܣܦ ܕܝܢ ܚܟܝܡܐܝܬ܇
0715	ܐܠܐ ܕܟܕ ܒܒܣܪܐ ܘܕܡܐ ܐܫܬܘܬܦ ܡܠܬܐ ܕܐܠܗܐ܇
0716	ܚܕ ܬܘܒ ܘܗܟܢܐ ܒܪܐ ܡܣ݂ܬܟܠ ܘܡܫܬܡܗ܇
0717	ܠܐ ܡܬܪܕܐ ܐܢܬ ܡܢ ܬܘܣܦܬܐ ܠܐ ܡܬܡܠܠܢܘܬܗ݀ ܕܚܕܝܘܬܐ܂ ܗ݀ܝ ܓܝܪ ܕܐܫܬܘܬܦ ܒܕܡܐ ܘܒܒܣܪܐ ܐܟܘܬܢ ܡܠܬܐ ܐܠܗܐ܆
0718	ܡܢ ܫܠܝܚܐ ܝܠܦܢܢ ܕܟܬ݂ܒ܂ ܡܛܠ ܗܟܝܠ ܕܛܠܝ̈ܐ ܐܫܬܘܬܦܘ ܒܕܡܐ ܘܒܒܣܪܐ܂ ܐܦ ܗ݂ܘ ܒܗ݀ ܒܕܡܘܬܐ ܐܫܬܘܬܦ ܒܗܘܢ ܟܕ ܒܗܘܢ܂
0719	ܐܢ ܗܟܝܠ ܪܘܟܒܐ ܕܝܠܢ܇
0720	ܗ݀ܘ ܕܡܢ ܢܦܫܐ ܐܡ݁ܪ ܐܢܐ ܘܦܓܪܐ܇
0721	ܕܐܝܬܘܗܝ ܠܐ ܡܬܡܠܠܢܐ ܫܠܝܚܐ ܐܠܗܝܐ ܠܬܚܘܝܬܐ ܕܬܐܘܪܝܐ ܗ݀ܝ ܕܥܠ ܥܡܢܘܐܝܠ܇
0722	ܕܝܬܝܪ ܠܐ ܡܬܡܠܠܢܝܬܐ ܐܝܬܝܗ݀ ܐܝܬܝ܇
0723	ܕܠܐ ܡܘܙܓܐ ܘܠܐ ܣܝܡܐ ܕܩܪܝܒܘܬܐ ܐܝܬܘܗܝ܆
0724	ܡܛܠ ܡܢܐ ܚܢܢ ܗܠܝܢ ܕܠܐ ܠܚ̈ܡܢ ܠܪܐܙܐ ܡܩܪܒܝܢܢ܂ ܐܪܐ ܓܝܪ ܢܦܫܐ ܕܒܪܢܫܐ ܐܬܗܦܟܬ ܕܬܗܘܐ ܒܣܪܐ܆
0725	ܐܘ ܒܗܦܟܐ ܒܣܪܐ ܠܗ݀ܝ ܕܢܗܘܐ ܢܦܫܐ܆
0726	ܗܕܐ ܗܝ ܓܝܪ ܕܝܠܝܬܐ ܕܡܘܙܓܐ܂ ܐܘ ܐܟܙܢܐ ܕܠܘܬ ܓܘ̈ܫܡܐ ܕܕܒܝܩܝܢ ܠܚ̈ܕܕܐ ܐܘ ܡܬܢܩܦܝܢ ܡܣܬ݂ܟܠܐ ܫܘܝܚܘܬܐ ܕܐܟܚܕܐ ܘܚܕܝܘܬܐ ܕܢܦܫܐ ܡܠܝܠܬܐ ܠܘܬ ܦܓܪܐ ܕܝܠܗ݀܆
0727	ܘܠܐ ܠܓܡܪ܂ ܕܡܐܬܝܐ ܡ݁ܢ ܓܝܪ ܟܝܢܝܐ ܕܐܟܚܕܐ ܐܝܬܝܗ݀܆
0728	ܟܕ ܬܟܝܠܝܢܢ ܐܡܪܝܢܢ܂ ܕܢܐܡܪ ܓܝܪ ܙܢܐ ܕܐܟܘܬܗ ܢܦܫܐ ܐܢܫܝܬܐ ܠܘܬ ܦܓܪܐ ܕܝܠܗ݀ ܡܪܟܒܐ܆
0729	ܥܒܪܐ ܠܡܕܪܟܢܘܬܢ܂ ܘܫܡ݂ܥ ܠܩܘܪܝܠܘܣ ܡܡܠܠ ܐܠܗ̈ܝܬܐ܇
0730	ܕܒܣ̈ܟܘܠܝܐ ܕܝܠܗ ܓܠܝܐܝܬ ܗܕܐ ܡ݁ܠܦ ܠܢ܂ ܀
0731	ܩܘܪܝܠܘܣ܀
0732	ܕܣܘܥܪܢܐ ܕܚܕܝܘܬܐ ܒ̈ܙܢܝܐ ܣ̈ܓܝܐܐ ܡܫܬܡܠܝܐ܂ ܟܕ ܡܦܠܓܝܢ ܓܝܪ ܐܢܫ̈ܝܢ ܒܚܘܒܐ ܘܒܬܪܥܝܬܐ܇
0733	ܘܡܦܠܓܐܝܬ ܠܘܬ ܚ̈ܕܕܐ ܡܬܪܥܝܢ܆
0734	ܕܡܬܚ݁ܝܕܝܢ ܡܬܐܡܪܝܢ ܒܬܪܥܘܬܐ ܕܚܘܒܐ܂ ܟܕ ܡܪܝܡܝܢ ‍[‍106‍]‍ ܡܢ ܡܨܥܬܐ ܫܘܚ̈ܠܦܐ܇
0735	ܡܬܚܝܕܝܢ ܓܝܪ ܐܡܪܝܢܢ܆
0736	ܘܗܠܝܢ ܕܕܒܝܩܝܢ ܠܚ̈ܕܕܐ܇
0737	ܐܘ ܐܬܝܢ ܥܡ ܚ̈ܕܕܐ ܒ̈ܙܢܝܐ ܐܚܪ̈ܢܐ ܐܘ ܒܣܝܡܐ ܕܩܪܝܒ܂ ܐܘ ܒܚܘܠܛܢܐ ܐܘ ܒܡܘܙܓܐ܂ ܐܡܬܝ ܗܟܝܠ ܕܐܬܚܝܕ ܐܡܪܝܢܢ ܠܟܝܢܐ ܕܝܠܢ ܡܠܬܐ ܕܐܠܗܐ ܕܡܥܠܝ ܡܢ ܬܪܥܝܬܐ ܕܒܪܢܫܐ ܡܬܚܙܐ ܙܢܐ ܕܚܕܝܘܬܐ܂ ܠܘ ܓܝܪ ܐܝܟ ܚܕܐ ܡܢ ܗܠܝܢ ܕܐܬܐܡܪܘ ܐܝܬܘܗܝ܇
0738	ܠܐ ܡܬܡܠܠܢܐ ܗܘ ܕܝܢ ܟܠ ܟܠܗ܂ ܐܘ ܐܦ ܠܐ ܠܐܢܫ ܟܒܪ ܡܢ ܗܠܝܢ ܕܐܝܬܝܗܘܢ ܝܕܝܥ܂ ܒܪܡ ܠܐܠܗܐ ܗ݀ܘ ܕܒܠܚܘܕܘܗܝ ܟܠܡܕܡ ܝ݁ܕܥ܂ ܘܬܡܝܗܐ ܘܠܐ ܒܡܕܡ܇
0739	ܐܢ ܡܢ ܣ̈ܘܟܠܐ ܕܐܝܟ ܗܟܢܐ ܡܙܕܟܝܢܢ܆
0740	ܐܡܬܝ ܕܗܠܝܢ ܕܝܠܢ ܕܐܝܟܢܐ ܐܝܬ ܠܗܠܝܢ ܟܕ ܒܨܝܢܢ܇
0741	ܠܗܠ ܡܢ ܬܪܥܝܬܐ ܕܐܝܬ ܒܢ ܡܘܕܝܢܢ ܕܐܝܬܝܗ݀ ܡܕܪܟܢܘܬܐ܂ ܒܐܝܢܐ ܕܝܢ ܙܢܐ ܣܒܪܝܢܢ ܕܡܚܝܕܐ ܢܦܫܐ ܕܒܪܢܫܐ ܠܦܓܪܗ܂ ܡܢ݂ܘ ܗ݀ܘ ܕܡܫܟܚ ܕܢܐܡܪ܂ ܐܢ ܕܝܢ ܟܕ ܙܥܘܪ̈ܝܬܐ ܘܠܡܚܣܢ ܡܥܕܝܢܢ ܕܢܣܬܟ݁ܠ ܘܢܐܡܪ܇
0742	ܡܫܟܚܝܢܢ ܐܢ ܙܕܩ ܕܣܘܥܪ̈ܢܐ ܕܗܟܢܐ ܩܛܝܢܝܢ ܘܠܥܠ ܡܢ ܗܘܢܐ ܢܕܡܐ܆
0743	ܐܡܪܝܢܢ ܕܦܐܝܐ ܕܢܣܬܟܠ܂ ܒܨܝܪܐ ܕܝܢ ܡܢ ܟܠܦܪܘܣ ܡܢ ܫܪܪܐ ܡܠܬܐ܂ ܕܕܐܝܟ ܗܟܢܐ ܐܝܬܝܗ݀ ܚܕܝܘܬܐ ܕܥܡܢܘܐܝܠ܆
0744	ܐܝܟ ܗ݀ܝ ܕܢܣ݁ܬܟܠ ܐܢܫ ܕܐܝܬ ܠܗ݀ ܘܠܢܦܫܐ ܕܒܪܢܫܐ ܠܘܬ ܦܓܪܐ ܕܝܠܗ݀܀
0745
0746	ܠܘܬ ܗܕܐ ܗܟܝܠ ܚܕܝܘܬܐ ܠܐ ܡܬܡܠܠܢܝܬܐ ܘܐܠܗܝܬܐ ܕܒܫܪܪܐ܇
0747	ܗ݀ܝ ܕܡܠܬܐ ܕܐܠܗܐ ܒܬܕܡܪܘܬܐ ܥܒ݂ܕ܇
0748	ܘܗܕܐ ܟܕ ܐܬܢܚܬ ܨܐܕܝܢ܆
0749	ܐܝܟܢܐ ܗ݀ܝ ܕܡܢ ܢܣܛܘܪܝܘܣ ܡܬܟܪܙܐ ܡܝܬܐ ܐܢܬ܇
0750	ܕܐܝܬܝܗ݀ ܢܩܝܦܘܬܐ ܐܚܝܢܝܬܐ܇
0751	ܘܡܣܒܪ ܐܢܬ ܕܬܪ̈ܝܢ ܟܝ̈ܢܝܢ ܡܬܐܠܨܝܢ ܚܢܢ ܕܢܐܡܪ܇
0752	ܐܠܐ ܡܘܕܝܢܢ ܠܡܫܝܚܐ ܐܝܟܢܐ ܕܐܡ݁ܪ ܐܢܬ܇
0753	ܕܚܕܐ ܗ݂ܘܬ ܐܘܣܝܐ ܚܕܐ ܙܒܢ܂ ܐܘ ܡܫܘܕܥܘܬܐ܂ ܗܕܐ ܕܝܢ ܘܠܐ ܡܕܡ ܐܚܪܝܢ ܐܝܬܝܗ݀܆
0754	ܐܠܐ ܚܒܘܟܝܐ ܚܬܝܬܐ ܕܐܘܣܝܐ܂ ܡܛܥܝܢܘܬܐ ܗܟܝܠ ܣܪܝܟܬܐ ܐܝܬܝܗ݀܆
0755	ܘܗ݀ܝ ܕܐܚܪܢܝܐܝܬ ܡܫܬܥܐ ܐܢܬ ܒܗܠܝܢ ܕܫܡܥܝܢ܇
0756	ܗ݀ܝ ܕܐܡ݁ܪ ܐܢܬ ܕܫܠܡܬ ܠܢ ܕܬܘܕܐ ܫܘܚܠܦܐ ܘܕܝܠܝܘܬܐ ܗ݀ܝ ܕܐܝܟ ‍[‍107‍]‍ ܕܒܡܫܘܕܥܘܬܐ ܟܝܢܝܬܐ ܕܟܝ̈ܢܐ ܕܡܢܗܘܢ ܥܡܢܘܐܝܠ܂ ܣܒ݁ܪ ܐܢܬ ܓܝܪ ܕܐܚܪܢܝܐܝܬ ܠܝܬ ܠܡܫܟܚܘ ܠܡܐܡܪ܇
0757	ܕܚܕ ܐܝܬܘܗܝ܇
0758	ܐܠܐ ܗ݀ܘ ܕܠܚܕܐ ܐܘܣܝܐ ܥ݁ܒܪ܂ ܘܐܦܢ ܡܢ ܬܪ̈ܝܢ ܡܕܡ ܡ̈ܫܚܠܦܝ ܐܕ̈ܫܐ ܡܟܢܫ܂ ܘܡܣܪܚ ܐܢܬ ܠܢ ܗ݀ܝ ܬܡܝܗܬܐ ܘܐܡ݁ܪ ܐܢܬ ܀
0759	ܣܪܓܝܣ ܓܪܡܛܝܩܘܣ܀
0760	ܐܢ ܗܟܝܠ ܟܝ̈ܢܐ ܕܡܢܗܘܢ ܡܫܝܚܐ ܠܐ ܡܒܠܒܠܐܝܬ ܠܐ ܐܬܡܙܓܘ ܐܟܚܕܐ܆
0761	ܐܝܟܢܐ ܕܝܢ ܩܘܝܘ ܠܐ ܡܡ̈ܙܓܐ܇
0762	ܕܐܬܚܝܕܘ ܠܚ̈ܕܕܐ ܩܢܘܡܐܝܬ ܐܡ݁ܪ܃ ܐܝܟܢܐ ܕܝܢ ܬܚܘܡܐ ܕܡܪܟܒܘܬܐ ܐܛܪ܇
0763	ܟܕ ܢܛܝܪܝܢ ܐܝܟܢܐ ܕܐܡ݂ܪܬ ܠܐ ܡܡ̈ܙܓܐ ܟܝ̈ܢܐ܀
0764	ܡܢ݂ܘ ܓܝܪ ܚܕܐ ܒܙܒܢ ܐܝܟ ܡ̈ܠܐ ܕܝܠܟ ܡܘܙܓܐ ܕܠܐ ܒܘܠܒܠܐ܂ ܟܕ ܡܫܐܠ ܐܢܬ ܓܝܪ ܕܐܝܟܢ܇
0765	ܘܐܚܪܢܝܐܝܬ ܠܐ ܡܬܟܠܐ ܐܢܬ ܡܢ ܦܘܫܟܐ܆
0766	ܬܘܒ ܡܦܢܐ ܦܬܓܡܐ ܩܘܪܝܠܘܣ ܚܟܝܡܐ܆
0767	ܕܠܘ ܡܘܙܓܐ ܕܟܝ̈ܢܐ ܐܠܐ ܪܘܟܒܐ ܗ݂ܘܐ܂ ܘܟܕ ܗ݂ܘܐ ܩܘܝ ܪܘܟܒܐ ܕܡܢܗ ܐܫܬܡܠܝ ܚܕ ܟܝܢܐ ܘܩܢܘܡܐ ܕܡܠܬܐ ܕܡܒܣܪ܂
0768	ܟܬ݂ܒ ܓܝܪ ܒܐܓܪܬܐ ܕܬܪ̈ܬܝܢ ܕܠܘܬ ܣܘܩܢܣܘܣ ܗܟܢܐ܂ ܀
0769	ܩܘܪܝܠܘܣ܀
0770	ܠܘ ܓܝܪ ܥܠ ܦܫ̈ܝܛܝ ܒܟܝܢܐ ܒܠܚܘܕ ܡܬܐܡܪ ܚܕ ܒܫܪܪܐ܆
0771	ܐܠܐ ܐܦ ܥܠ ܐܝܠܝܢ ܕܒܪܘܟܒܐ ܐܟܚܕܐ ܐܬܘ܂ ܕܐܝܟ ܐܝܟܢ܂ ܕܐܝܬܘܗܝ ܣܘܥܪܢܐ ܕܒܪ ܐܢܫܐ܇
0772	ܡܢ ܢܦܫܐ ܘܦܓܪܐ܂ ܡ̈ܫܚܠܦܝ ܓܝܪ ܐܕ̈ܫܐ ܗܠܝܢ ܕܕܐܝܟ ܗܟܢ܆
0773	ܘܠܘ ܫܘ̈ܝܝ ܟܝܢܐ ܕܚ̈ܕܕܐ܂ ܟܕ ܐܬܚܝܕܘ ܕܝܢ܆
0774	ܚܕ ܟܝܢܐ ܕܒܪܢܫܐ ܫܡܠܝܘ܇
0775	ܐܦܢ ܗ݂ܘ ܕܒܡ̈ܠܐ ܕܪܘܟܒܐ ܐܝܬ ܫܘܚܠܦܐ ܕܒܟܝܢܐ ܕܗܠܝܢ ܕܐܬܘ ܐܟܚܕܐ ܠܚܕܝܘܬܐ܂ ܝܬܝܪ̈ܬܐ ܗܟܝܠ ܡܡܠܠܝܢ ܗܠܝܢ ܕܐܡܪܝܢ܇
0776	ܕܐܢ ܗ݂ܘ ܕܚܕ ܟܝܢܐ ܐܝܬܘܗܝ ܕܡܠܬܐ ܕܡܒܣܪ܇
0777	ܒܟܠܡܕܡ ܡܢ ܟܠܦܪܘܣ ܢܩܦܐ ܕܒܘܠܒܠܐ ܢܗܘܐ ܘܡܘܙܓܐ ܐܝܟ ܡ݁ܢ ܕܚܣ݁ܪ ܘܡܬܓܢܒ ܟܝܢܐ ܕܒܪܢܫܐ܂ ܠܐ ܓܝܪ ܚ݁ܣܪ܆
0778	ܘܠܐ ܐܝܟܢܐ ܕܐܡܪܝܢ ‍[‍108‍]‍ ܡܬܓܢܒ܂ ܣܦܩܐ ܓܝܪ ܠܫܘܘܕܥܐ ܡܫܡܠܝܐ ܕܗ݀ܝ ܕܗ݂ܘܐ ܒܪܢܫܐ܆
0779	ܗ݀ܝ ܕܢܐܡܪ ܕܐܬܒܣܪ܂ ܐܠܘ ܓܝܪ ܗܕܐ ܐܫܬܬܩܬ ܗܘܬ ܡܢܢ܇
0780	ܗ݀ܘܐ ܗܘܐ ܐܬܪܐ ܡܕܡ ܠܛܠܘܡܝܗܘܢ܂ ܡܛܠ ܕܝܢ ܕܐܠܨܐܝܬ ܡܘܣܦܐ܆
0781	ܐܝܟܘ ܙܢܐ ܕܒܘܨܪܐ ܐܘ ܕܓܢܘܒܬܐ܀
0782	ܘܒܡܐܡܪܐ ܕܝܢ ܕܫܘܐܠܐ ܘܦܘܢܝ ܦܬܓܡܐ܇
0783	ܒܗ݀ܘ ܕܚܕ ܗܘ ܡܫܝܚܐ܆
0784	ܟܕ ܐܬ݁ܐ ܒܗܘܢ ܟܕ ܒܗܘܢ ܒܣ̈ܘܟܠܐ܇
0785	ܘܡ̈ܬܩܠܐ ܚ̈ܬܝܬܐ ܕܝܘ̈ܠܦܢܐ܆
0786	ܗܟܢܐ ܐܡ݁ܪ܂ ܀
0787	ܩܘܪܝܠܘܣ܀
0788	ܘܠܘ ܒܟܠܡܕܡ ܘܡܢ ܟܠܦܪܘܣ ܗ݀ܘ ܦܫܝܛܐ ܘܕܚܕ ܐܕܫܐ ܡܬܐܡܪ ܒܠܚܘܕ ܚܕ܆
0789	ܐܠܐ ܘܗܠܝܢ ܕܡܢ ܬܪ̈ܝܢ ܐܘ ܡܢ ܣ̈ܓܝܐܐ ܬܘܒ ܡܫ̈ܚܠܦܝ ܐܕ̈ܫܐ ܡܪܟܒܝܢ܂ ܫܦܝܪܐ ܕܝܢ ܕܗܟܢܐ ܐܝܬܝܗ݀ ܠܗ݀ܢܘܢ ܕܚܟܝܡܝܢ ܒܗܠܝܢ܀
0790	ܘܒܦܪܓܡܛܝܐ ܕܝܢ ܕܝܠܗ ܕܡܛܠ ܬܠܝܬܝܘܬܐ ܩܕܝܫܬܐ ܗ݀ܝ ܕܐܡ݂ܪ ܠܘܬ ܐܢܫ ܐܪܡܝܐ ܟܬ݂ܒ ܗܠܝܢ܂ ܀
0791	ܩܘܪܝܠܘܣ܀
0792	ܗ݀ܘ ܓܝܪ ܕܐܝܬܘܗܝ ܫܘܦܪܐ ܠܐ ܡܝܘܬܐ ܕܐܠܗܐ ܐܒܐ܆
0793	ܘܕܡܘܬܐ ܘܚܙܬܐ܇
0794	ܗ݀ܘ ܕܡܢܗ ܘܒܗ ܡܠܬܐ ܐܠܗܐ ܢܚ݁ܬ ܢܦܫܗ ܠܣܘܪܩܐ܆
0795	ܠܘ ܟܕ ܡܢ ܐܢܫ ܠܘܬ ܗܕܐ ܐܬܐܠܨ܇
0796	ܐܠܐ ܒܨܒܝܢܐ ܕܐܒܐ܇
0797	ܒܨܒܝܢܐ ܕܝܠܗ ܗ݂ܘܐ ܒܪܢܫܐ܂ ܘܕܠܐ ܚܘܣܪܢܐ ܡ݁ܢ ܠܓܡܪ܆
0798	ܘܠܐ ܡܫܚܠܦܐ ܒܗ ܐܝܩܪܐ ܕܟܝܢܗ ܡܫܘܙܒ܂ ܫܩ݂ܠ ܕܝܢ ܐܢܫܘܬܐ ܡܕܒܪܢܐܝܬ܇
0799	ܘܚܕ ܡܢ ܬܪ̈ܝܢ ܡܣ݂ܬܟܠ ܒܪܐ܇