The Comprehensive Aramaic Lexicon

32:01	ܘܚܙܘ ܥܡܐ ܕܐܘܚܪ ܡܘܫܐ ܕܢܚܘܬ ܡܢ ܛܘܪܐ܂ ܘܐܬܟܢܫܘ ܥܡܐ ܥܠ ܐܗܪܘܢ ܘܐܡܪܝܢ ܠܗ܂ ܩܘܡ ܥܒ݁ܕ ܠܢ ܐ̈ܠܗܐ ܕܢܐܙܠܘܢ ܩܕܡܝܢ܂ ܡܛܠ ܕܗܢܐ ܓܒܪܐ ܡܘܫܐ ܕܐܣܩܢ ܡܢ ܐܪܥܐ ܕܡܨܪܝܢ܂ ܠܐ ܝܕܥܝܢܢ ܡܢܐ ܗܘܝܗܝ܂
32:02	ܐܡ݁ܪ ܠܗܘܢ ܐܗܪܘܢ܂ ܦܪܩ݂ܘ ܩ̈ܕܫܐ ܕܕܗܒܐ ܕܐܝܬ ܒܐ̈ܕܢܐ ܕܢܝܫ̈ܝܟܘܢ ܘܕܒܢܝܟܘܢ ܘܕܒܢ̈ܬܟܘܢ ܘܐܝܬܘ ܠܝ܂
32:03	ܘܦܪܩܘ ܟܘܠܗ ܥܡܐ ܩ̈ܕܫܐ ‍<‍ܕܕܗܒܐ#3#‍>‍ ܕܐܝܬ ܒܐ̈ܕܢܝܗܘܢ܂ ܘܐܝܬܝܘ ܠܐܗܪܘܢ܂
32:04	ܘܢܣܒܗ ܡܢܗܘܢ ܘܨܪܗ ܒܛܘܦܣܐ܂ ܘܥܒܕܗ ܥܓܠܐ ܕܢܣܟܬܐ܂ ܘܐܡܪܘ ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ ܐܪܥܐ ܕܡܨܪܝܢ܂
32:05	ܘܕܚ݂ܠ ܐܗܪܘܢ ܘܒܢ݂ܐ ܡܕܒܚܐ ܩܕܡܘܗܝ܂ ܘܩ݂ܪܐ ܐܗܪܘܢ ܘܐܡ݂ܪ܂ ܚܓܐ ܗܘ ܠܡܪܝܐ ܡܚܪ/ܠܡܚܪ#3#/܂
32:06	ܘܩ݁ܕܡܘ ܠܝܘܡܐ ܕܒܬܪܗ܂ ܘܐܣܩܘ ܥ̈ܠܘܬܐ ܘܕܒ݁ܚܘ ܫ̈ܠܡܐ܂ ܘܩ݁ܪ̈ܒܘ ܩܘܪ̈ܒܢܐ܂ ܘܝܬܒܘ ܥܡܐ ܠܡܐܟܠ/ܠܡܠܥܣ#3#/ ܘܠܡܫܬܐ܂ ܘܩܡܘ ܠܡܓܚܟ ܘܠܡܫܬܥܝܘ܂
32:07	ܘܐܡ݂ܪ ܡܪܝܐ ܠܡܘܫܐ܂ ܚܘܬ ܙܠ ܠܟ ܡܟܐ܂ ܡܛܠ ܕܚ݁ܒܠ ܥܡܟ ܕܐܦܩ݂ܬ ܡܢ ܡܨܪܝܢ܂
32:08	ܣܛܘ ܒܥܓܠ ܡܢ ܐܘܪܚܐ ܕܦܩ݁ܕܬ ܐܢܘܢ܂ ܘܥܒ݂ܕܘ ܠܗܘܢ ܥܓܠܐ ܕܢܣܟܬܐ܂ ܘܣܓܕܘ ܠܗ ܘܕܒܚܘ ܠܗ ܘܐܡܪܘ܂ ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ \ܐܪܥܐ ܕܡܨܪܝܢ /ܡܨܪܝܢ#3#/܂
32:09	ܘܐܡ݂ܪ ܡܪܝܐ ܠܡܘܫܐ܂ ܚܙܝܬܗ ܠܥܡܐ ܗܢܐ܂ ܘܗܐ ܥܡܐ ܩܫ݂ܐ ܩܕܠܐ ܗܘ܂
32:10	ܗܫܐ ܫܒܘܩܝܢܝ܂ ܘܢܬܩ݂ܦ ܪܘܓܙܝ ܒܗܘܢ ܘܐܚܪܘܒ ܐܢܘܢ܂ ܘܐܥܒ݁ܕܟ ܠܥܡܐ ܪܒܐ܂
32:11	ܘܨܠܝ ܡܘܫܐ ܩܕܡ ܡܪܝܐ ܐܠܗܗ ܘܐܡ݂ܪ܂ ܠܐ ܡܪܝܐ܂ ܠܐ ܢܬܩ݂ܦ ܪܘܓܙܟ ܒܥܡܟ ܕܐܦܩ݂ܬ ܡܢ ܡܨܪܝܢ܂ ܒܚܝܠܟ ܪܒܐ ܘܒܕܪܥܟ ܪܡܐ܂
32:12	ܘܠܐ ܢܐܡܪ̈ܘܢ ܡܨܪ̈ܝܐ ܕܠܒܝܫܬܗܘܢ ܐܦܩ ܐܢܘܢ܂ ܕܢܩ݁ܛܠ ܐܢܘܢ ܒܝܢ̈ܝ ܛܘܪ̈ܐ܂ ܘܕܢܚܪܘܒ ܐܢܘܢ ܡܢ ܐ̈ܦܝ ܐܪܥܐ܂ ܐܬܬܢܝܚ ܡܢ ܚܡܬܐ ܕܪܘܓܙܟ܂ ܘܐܬܪܥܐ ܥܠ ܒܝܫܬܗ ܕܥܡܟ܂
32:13	ܐܬܕܟܪ ܠܐܒܪܗܡ ܘܠܐܝܣܚܩ ܘܠܐܝܣܪܝܠ/ܘܠܝܥܩܘܒ#3#/ ܥܒ݂̈ܕܝܟ܂ ܕܝܡ݂ܝܬ ܠܗܘܢ ܒܟ ܘܐܡ݂ܪܬ ܠܗܘܢ܂ ܕܐܣܓܐ/ܐܣܓܐ#3#/ ܙܪܥܟܘܢ ܐܝܟ \ܟܘܟ̈ܒܐ ܕܒܫܡܝܐ /ܟܘܟ̈ܒܝ ܫܡܝܐ#3#/܂ ܘܟܠܗ݀ ܐܪܥܐ ܕܐܡ݂ܪܬ܂ ܐܬܠ ܠܙܪܥܟܘܢ܂ ܘܢܐܪܬܘܢܗ݀ ܠܥܠܡ܂
32:14	ܘܐܬܪܥܝ ܡܪܝܐ ܥܠ ܒܝܫܬܐ ܕܐܡ݂ܪ ܠܡܥ݂ܒܕ ܠܥܡܗ܂
32:15	ܘܐܬܦܢܝ ܡܘܫܐ ܘܢܚ݂ܬ ܡܢ ܛܘܪܐ݁܂ ܘܬܪ̈ܬܝܢ ܠܘܚ̈ܐ ܕܣܗܕܘܬܐ ܒܐܝܕܗ܂ ܠܘܚ̈ܐ ܕܟܬܝܒ̈ܢ ܡܢ ܬܪ̈ܝܗܘܢ ܣܛܪ̈ܝܗܝܢ܂ ܡܟܐ ܘܡܟܐ ܟܬ̈ܝܒܢ܂
32:16	ܘܠܘܚ̈ܐ ܥܒ݁ܕܗ ܐ̈ܢܝܢ ܕܐܠܗܐ܂ ܘܟܬܒܐ ܟܬܒܗ ܗܘ ܕܐܠܗܐ܂ ܪܫܝܡ ܗܘܐ ܥܠ ܠܘܚ̈ܐ܂
32:17	ܘܫܡ݂ܥ ܝܫܘܥ ܩܠܗ ܕܥܡܐ ܟܕ ܡܬܟܬܫ܂ ܘܐܡ݂ܪ ܠܡܘܫܐ܂ ܩܠܐ ܕܩܪܒܐ ܒܡܫܪܝܬܐ܂
32:18	ܐܡ݁ܪ ܠܗ ܡܘܫܐ܂ ܠܐ ܩܠܐ ܕܡܡܠܠܐ ܕܓܢܒܪ̈ܐ ܐܦ ܠܐ ܩܠܐ ܕܚ̈ܠܫܐ܂ ܩܠܐ ܕܝܢ ܕܚܛܝܬܐ ܫܡ݁ܥ ܐܢܐ/ܐܢܬ#3#/܂
32:19	ܘܟܕ ܩܪ݂ܒ ܠܡܫܪܝܬܐ܂ ܚܙܝܗܝ ܠܥܓܠܐ ܘܠܨܨ̈ܠܐ܂ ܘܐܬܦܝܪ ܡܘܫܐ܂ ܘܫ݂ܕܐ ܡܢ ܐܝܕܗ ܠܘܚ̈ܐ/ܠܠܘܚ̈ܐ#3#/܂ ܘܬܒ݁ܪ ܐܢܝ̈ܢ ܒܫ̈ܦܘܠܘܗܝ ܕܛܘܪܐ܂
32:20	ܘܢܣܒܗ ܠܥܓܠܐ ܕܥܒܕܘ ܘܐܘܩܕܗ ܒܢܘܪܐ܂ ܘܫܦܗ ܒܫܘܦܝܢܐ ܥܕܡܐ ܕܐܬܕܩܩ ܐܝܟ ܥܦܪܐ܂ ܘܒܙܩܗ݀ ܕܩܬܗ \ܥܠ ܐ̈ܦܝ /ܠܦ̈ܝ#3#/ ܡ̈ܝܐ܂ ܘܐܫܩܝ ܠܕܒܝܬ ܐܝܣܪܝܠ܂
32:21	ܘܐܡ݂ܪ ܡܘܫܐ ܠܐܗܪܘܢ ܡܢܐ ܥܒ݂ܕ ܠܟ ܥܡܐ ܗܢܐ ܕܐܝܬܝܬ ܥܠܘܗܝ ܚܛܝܬܐ ‍<‍ܗܕܐ#3#‍>‍ ܪܒܬܐ܂
32:22	ܘܐܡ݂ܪ ܐܗܪܘܢ܂ ܠܐ ܢܬܚܡܬ ܪܘܓܙܗ ܕܡܪܝ܂ ܐܢܬ ܝܕܥ݁ ܐܢܬ ܠܗ ܠܥܡܐ ܗܢܐ ܕܒܝܫ ܗܘ܂
32:23	ܘܐܡܪܘ ܠܝ܂ ܥܒ݁ܕ ܠܢ ܐ̈ܠܗܐ ܕܢܐܙܠܘܢ ܩܕܡܝܢ܂ ܡܛܠ ܕܗܢܐ ܡܘܫܐ ܕܐܣܩܢ ܡܢ \ܐܪܥܐ ܕܡܨܪܝܢ /ܡܨܪܝܢ#3#/܂ ܠܐ ܝܕܥ݁ܝܢܢ ܡܢܐ ܗܘܝܗܝ܂
32:24	ܘܐܡ݁ܪܬ ܠܗܘܢ܂ ܡ݁ܢ ܕܐܝܬ ܠܗ ܕܗܒܐ ܐܝܬܘ ܠܝ܂ ܘܐܝܬܝܘ ܠܝ܂ ܘܐܪܡܝܬܗ ܒܢܘܪܐ ܘܗܘ݂ܐ ܥܓܠܐ ܗܢܐ܂
32:25	ܘܚ݂ܙܐ ܡܘܫܐ ܠܥܡܐ ܕܚܛܘ ܠܗܘܢ܂ ܕܐܚܛܝ ܐܢܘܢ ܐܗܪܘܢ܂ ܕܢܗܘܘܢ ܫܡܐ ܣܪܝܐ ܒܐܚܪܝܬܗܘܢ܂
32:26	ܘܩܡ ܠܗ ܡܘܫܐ ܒܬܪܥܐ ܕܡܫܟܢܐ/ܕܡܫܪܝܬܐ#3#/ ܘܐܡ݂ܪ܂ ܡܢܘ ܡܢ ܡܪܝܐ ܢܐܬܐ ܠܘܬܝ܂ ܘܐܬ݁ܟܢܫܘ ܠܘܬܗ ܟܠܗܘܢ ܒܢ̈ܘܗܝ ܕܠܘܝ܂
32:27	ܘܐܡ݂ܪ ܠܗܘܢ ܡܘܫܐ܂ ܗܟܢܐ ܐܡ݁ܪ ܡܪܝܐ ܐܠܗܐ ܕܐܝܣܪܝܠ܂ ܐܪܡܘ ܐܢܫ ܣܝܦܗ ܒܚ̈ܨܘܗܝ܂ ܘܥܒܪܘ ܘܬܘܒܘ ܡܢ ܬܪܥ ܠܬܪܥ ܒܡܫܪܝܬܐ܂ ܘܩܛܘܠܘ ܐܢܫ ܠܐܚܘܗܝ ܘܐܢܫ ܠܚܒܪܗ ܘܐܢܫ ܠܩܪܝܒܗ܂
32:28	ܘܥܒ݂ܕܘ ܒܢ̈ܝ ܠܘܝ ܐܝܟ ܡܠܬܗ ܕܡܘܫܐ܂ ܘܢܦܠܘ ܡܢ ܥܡܐ ‍<‍ܒܝ#3#‍>‍ \ܒܝܘܡܐ ܗ݀ܘ /ܒܗܘ ܝܘܡܐ#3#/܂ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ܂
32:29	ܐܡ݁ܪ ܠܗܘܢ ܡܘܫܐ܂ ܡܠ݂ܘ ܐ̈ܝܕܝܟܘܢ ܝܘܡ݂ܢܐ ܠܡܪܝܐ܂ ܐܢܫ ܒܒܪܗ ܘܒܐܚܘܗܝ܂ ܡܛܠ ܕܬܐܬܐ ܥܠܝܟܘܢ ܒܘܪܟܬܐ ܝܘܡܢܐ܂
32:30	ܘܗܘ݂ܐ ܠܝܘܡܐ ܕܒܬܪܗ܂ ܘܐܡ݂ܪ ܡܘܫܐ ܠܥܡܐ܂ ܐܢܬܘܢ ܚܛܝܬܘܢ ܚܛܝܬܐ ܗܕܐ ܪܒܬܐ܂ ܗܫܐ ܐܣܩ ܠܘܬ ܡܪܝܐ܂ ܛܟ ܢܫܒܘܩ ܠܚ̈ܘܒܝܟܘܢ/ܠܚܛܗ̈ܝܟܘܢ#3#/܂
32:31	ܘܗܦ݂ܟ ܡܘܫܐ ܠܘܬ ܡܪܝܐ ܘܐܡ݂ܪ܂ ܒܒܥܘ ܡܪܝܐ ܐܠܗܐ܂ ܫܪܝܪܐܝܬ ܚ݂ܛܐ ܥܡܐ ܗܢܐ ܚܛܝܬܐ ܪܒܬܐ܂ ܘܥܒ݂ܕܘ ܠܗܘܢ ܐ̈ܠܗܐ ܕܕܗܒܐ܂
32:32	ܗܫܐ ܐܢ ܫܒ݁ܩ ܐܢܬ ܠܚ̈ܛܗܝܗܘܢ ܘܐܢ ܠܐ ܥܛܝܢܝ ܡܢ ܣܦܪܟ ܕܟܬ݂ܒܬ܂
32:33	ܘܐܡ݂ܪ ܡܪܝܐ ܠܡܘܫܐ܂ ܡ݁ܢ ܕܚ݂ܛܐ ܠܝ ܐܥܛܝܘܗܝ ܡܢ ܣܦܪܝ܂

32:34	ܗܫܐ ܙܠ ܐܘܒܠܝܗܝ ܠܥܡܐ ܗܢܐ ܠܐܝܟܐ ܕܐܡ݁ܪ ܐܢܐ ܠܟ܂ ܘܗܐ ܡܠܐܟܝ ܢܐܙܠ ܩܕܡܝܟ܂ ܘܒܝܘܡܐ ܕܦܘܩܕܢܝ ܐܦܩܘܕ ܥܠܝܗܘܢ ܚ̈ܛܗܝܗܘܢ܂

32:35	ܘܡܚ݂ܐ ܡܪܝܐ ܠܥܡܐ ܥܠ ܕܦܠܚܘ ܠܥܓܠܐ ܕܥܒ݂ܕ ܐܗܪܘܢ܂