← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62005: P Dt

Click on a word for lexical analysis
Click on a red-colored coordinate for comments and/or translations of the line

previous chapter


10:01 ܒܗ ܒܙܒܢܐ ܗ݀ܘ܂ ܐܡܪ ܠܝ ܡܪܝܐ܂ ܦܣܘܠ ܠܟ ܬܪ̈ܬܝܢ ܠܘܚ̈ܐ ܕܟܐܦܐ ܐܝܟ ܩ̈ܕܡܝܬܐ܂ ܘܣܩ ܠܘܬܝ/ܩܕܡܝ#3#/ ܠܛܘܪܐ܂ ܘܥܒܕ ܠܟ ܩܒܘܬܐ ܕܩܝܣܐ܂
10:02 ܘܐܟܬܘܒ ܥܠ ܠܘܚ̈ܐ ܦ̈ܬܓܡܐ ܕܐܝܬ ܗܘܘ ܥܠ ܠܘܚ̈ܐ ܩܕܡ̈ܝܬܐ ܕܬܒܪܬ܂ ܘܣܝܡ ܐ̈ܢܝܢ ܒܩܒܘܬܐ܂
10:03 ܘܥܒ݁ܕܬ ܩܒܘܬܐ ܕܩܝܣܐ ܕܐܫܟܪܥܐ ܘܦܣ݁ܠܬ ܬܪ̈ܬܝܢ ܠܘܚ̈ܐ ܕܟܐܦܐ ܐܝܟ ܩܕܡ̈ܝܬܐ܂ ܘܣ݁ܠܩܬ ܠܛܘܪܐ܂ ܘܬܪ̈ܬܝܗܝܢ ܠܘܚ̈ܐ ܒܐܝ̈ܕܝ܂
10:04 ܘܟܬܒ ܥܠ ܠܘܚ̈ܐ ܐܝܟ ܟܬܒܐ ܩܕܡܝܐ܂ ܥܣܪܐ ܦ̈ܬܓܡܝܢ ܕܡܠܠ ܡܪܝܐ ܥܡܟܘܢ ܒܛܘܪܐ ܡܢ ܓܘ ܢܘܪܐ܂ ܒܝܘܡܐ ܕܟܢܘܫܝܐ܂ ܘܝܗܒ ܐ̈ܢܝܢ ܠܝ ܡܪܝܐ܂
10:05 ܘܐܬܦܢܝܬ ܘܢܚ݁ܬܬ ܡܢ ܛܘܪܐ܂ ܘܣ݁ܡܬ ܐ̈ܢܝܢ ܠܘܚ̈ܐ ܒܩܒܘܬܐ ܕܥܒ݁ܕܬ܂ ܘܫܒ݁ܩܬ ܐ̈ܢܝܢ ܒܗ݀܂ ܐܝܟ ܕܦܩܕܢܝ ܡܪܝܐ܀܂
10:06 ܘܒܢ̈ܝ ܐܝܣܪܝܠ ܫܩܠܘ ܡܢ ܒܪܐܘܬ ܕܒܢ̈ܝ ܝܥܩܢ ܠܡܘܣܪܐ܂ ܬܡܢ ܡܝܬ ܐܗܪܘܢ ܘܐܬܩܒܪ ܬܡܢ܂ ܘܟܗܢ ܐܠܝܥܙܪ ܒܪܗ ܒܬܪܗ܂
10:07 ܘܡܢ ܬܡܢ ܫܩܠܘ ܠܓܕܓܕ ܘܡܢ ܓܕܓܕ ܠܝܛܒܬ܂ ܠܐܪܥܐ ܕܪ̈ܓܠܬܐ ܕܡ̈ܝܐ܂
10:08 ܒܗ ܒܙܒܢܐ ܗ݀ܘ ܦܪܫ ܡܪܝܐ ܠܫܒܛܐ ܕܠܘܝ ܕܢܫܩܘܠ ܩܒܘܬܐ ܕܩܝܡܗ ܕܡܪܝܐ܂ ܘܕܢܩܘܡ ܩܕܡ ܡܪܝܐ ܘܢܫܡܫܝܘܗܝ܂ ܘܢܒܪܟ ܫܡܗ ܕܡܪܝܐ ܥܕܡܐ ܠܝܘܡܢܐ܂
10:09 ܡܛܠ ܗܢܐ ܠܝܬ ܗܘܬ ܠܠܘܝ܂ ܦܠܓܘܬܐ ܘܝܪܬܘܬܐ ܥܡ ܐܚ̈ܘܗܝ܂ ܡܪܝܐ ܗܘ ܓܝܪ ܝܪܬܘܬܗ܂ ܐܝܟ ܕܐܡܪ ܠܗ ܡܪܝܐ ܐܠܗܟ܂
10:10 ܘܐܢܐ ܩܡ݁ܬ ܩܕܡ ܡܪܝܐ ܒܛܘܪܐ܂ ܐܝܟ ܝܘܡ̈ܬܐ ܩܕܡ̈ܝܐ܂ ܐܪ̈ܒܥܝܢ ܐܝܡ̈ܡܝܢ ܘܐܪ̈ܒܥܝܢ ܠܝ̈ܠܘܢ܂ ܘܫܡܥܢܝ ܡܪܝܐ ܐܦ ܒܙܒܢܐ ܗ݀ܘ܂ ܘܠܐ ܨܒܐ ܡܪܝܐ ‍<‍ܐܠܗܟ#3#‍>‍ ܕܢܚܒܠܟ܂
10:11 ܘܐܡܪ ܠܝ ܡܪܝܐ܂ ܩܘܡ ܫܩܘܠ ܘܙܠ ܩܕܡ ܥܡܐ܂ ܘܢܥܠܘܢ ܘܢܐܪܬܘܢ ܐܪܥܐ ܕܝܡ݁ܝܬ ܠܐ̈ܒܗܝܗܘܢ܂ ܠܡܬܠ ܠܗܘܢ܀܀܂
10:12 ܡܟܝܠ ܐܝܣܪܝܠ ܡܢܐ ܫ݁ܐܠ ܠܟ ܡܪܝܐ ܐܠܗܟ܂ ܐܠܐ ܕܬܕܚܠ ܡܢ ܡܪܝܐ ܐܠܗܟ ܘܬܗܠܟ ܒܐܘܪ̈ܚܬܗ܂ ܘܬܪܚܡܝܘܗܝ ܘܬܦܠܘܚ ܠܡܪܝܐ ܐܠܗܟ ܡܢ ܟܠܗ ܠܒܟ ܘܡܢ ܟܠܗ݀ ܢܦܫܟ܂
10:13 ܘܬܛܪ ܦܘܩ̈ܕܢܘܗܝ ܕܡܪܝܐ ܐܠܗܟ܂ ܘܢܡ̈ܘܣܘܗܝ ܕܡܦܩܕ ܐܢܐ ܠܟ ܝܘܡܢܐ܂ ܘܢܛܐܒ ܠܟ܂
10:14 ܕܡܪܝܐ ܐܢܘܢ ܐܠܗܟ ܫܡܝܐ ܘܫ̈ܡܝ ܫܡܝܐ܂ ܘܐܪܥܐ ܘܟܠ ܕܐܝܬ ܒܗ݀܂
10:15 ܘܒܐ̈ܒܗܝܟܘܢ ܒܠܚܘܕ ܨܒܐ ܡܪܝܐ ܘܪܚܡ ܐܢܘܢ܂ ܘܓܒܐ ܠܙܪܥܗܘܢ ܒܬܪܗܘܢ܂ ܡܢ ܟܠܗܘܢ ܥܡ̈ܡܐ ܐܝܟ ܕܝܘܡܢܐ܂܀
10:16 ܓܙܘܪܘ ܥܘܪܠܘܬܐ ܕܠܒܟܘܢ܂ ܘܩܕܠܟܘܢ ܬܘܒ ܠܐ ܬܩܫܘܢ܂
10:17 ܡܛܠ ܕܡܪܝܐ ܐܠܗܟܘܢ܂ ܗܘܝܘ ܐܠܗ ܐ̈ܠܗܝܢ ܘܡܪܐ ܡܪ̈ܘܬܐ܂ ܐܠܗܐ ܪܒܐ ܘܓܢܒܪܐ ܘܕܚܝܠܐ܂ ܕܠܐ ܢ݁ܣܒ ܒܐ̈ܦܐ܂ ܘܠܐ ܡܩܒܠ ܫܘܚܕܐ܂
10:18 ܘܥ݁ܒܕ ܕܝܢܐ ܕܝ̈ܬܡܐ ܘܕܐܪ̈ܡܠܬܐ܂ ܘܪܚ݁ܡ ܠܐܝܢܐ ܕܡܬܦܢܐ ܠܘܬܗ܂ ܘܝ݁ܗܒ ܠܗ ܠܚܡܐ ܘܬܟܣܝܬܐ܂
10:19 ܪܚܡܘ ܠܐܝܠܝܢ ܕܡܬܦܢܝܢ ܠܘܬܗ܂ ܡܛܠ ܕܬܘ̈ܬܒܐ/ܕܥܡܘܪ̈ܐ#2#/ ܗܘܝܬܘܢ ܒܐܪܥܐ ܕܡܨܪܝܢ܂
10:20 ܡܢ ܡܪܝܐ ܐܠܗܟ ܕܚܠ܂ ܘܠܗ ܦܠܘܚ ܘܠܗ ܐܬܢܩܦ܂ ܘܒܫܡܗ/ܘܒܗ#3#/ ܝܡܝ܂
10:21 ܕܗܘܝܘ ܬܫܒܘܚܬܟ ܘܗܘܝܘ ܐܠܗܟ܂ ܕܥܒܕ ܥܡܟ ܪ̈ܘܪܒܬܐ ܘܕܚ̈ܝܠܬܐ ܕܚ̈ܙܝ ܥܝܢܝ̈ܟ܂
10:22 ܒܫܒܥܝܢ ܢܦܫܢ ܢܚܬܘ ܐ̈ܒܗܝܟ ܠܡܨܪܝܢ܂ ܘܗܫܐ ܗܐ ܐܣܓܝܟ ܡܪܝܐ ܐܠܗܟ ܐܝܟ ܟ̈ܘܟܒܐ ܕܒܫܡܝܐ܂

next chapter