The Comprehensive Aramaic Lexicon

07:01	ܘܐܥܠܝܘ ܒܢ̈ܝ ܐܝܣܪܝܠ ܥܘܠܐ ܒܚܪܡܐ܂ ܘܢܣܒ ܥܟܪ ܒܪ ܟܪܡܝ ܒܪ ܙܒܕܝ ܒܪ ܙܪܚ ܡܢ ܫܒܛܐ ܕܝܗܘܕܐ܂ ܘܢܣܒ ܡܢ ܚܪܡܐ ܘܛܫܝ܂ ܘܐܬܚܡܬ ܪܘܓܙܗ ܕܡܪܝܐ ܥܠ ܒܢ̈ܝ ܐܝܣܪܝܠ܀
07:02	ܘܫܕܪ ܝܫܘܥ ܓܒܪ̈ܐ ܡܢ ܐܝܪܝܚܘ܂ ܠܥܝ ܕܥܠ ܓܢܒ ܒܝܬ ܐܘܢ܂ ܡܢ ܡܕܢܚܐ ܕܒܝܬ ܐܝܠ/ܠܒܝܬ ܐܝܠ#2#/܂ ܘܐܡܪ ܠܗܘܢ܂ ܣܩܘ ܓܘܫܘ ܐܪܥܐ܂ ܘܣܠܩܘ ܓܒܪ̈ܐ ܘܓܫܘܗ݀ ܠܥܝ܂
07:03	ܘܗܦܟܘ ‍<‍ܐܬܘ#3#‍>‍ ܠܘܬ ܝܫܘܥ ܘܐ݁ܡܪܝܢ ܠܗ܂ ܠܐ ܢܣܩ ܟܠܗ ܥܡܐ܂ ܐܠܐ ܐܝܟ ܬܪ̈ܝܢ ܬܠܬܐ ܐ̈ܠܦܝܢ ܓܒܪ̈ܝܢ ܢܣܩܘܢ ܢܚܪܒܘܢܗ݀ ܠܥܝ܂ ܠܐ ܬܫܕܪ ܠܟܠܗ ܥܡܐ ܡܛܠ ܕܙܥܘܪܝܢ ܐܢܘܢ܂
07:04	ܘܣܠܩܘ ܡܢ ܥܡܐ ܠܬܡܢ܂ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ܂ ܘܥܪܩܘ ܠܗܘܢ ܡܢ ܩܕܡ ܐܢܫ̈ܝܗ݀ ܕܥܝ܂
07:05	ܘܚܪܒܘ ܐܢܫ̈ܝܗ݀ ܕܥܝ ܡܢ ܐܝܣܪܐܝܠ ܬܠܬܝܢ ܘܫܬܐ ܓܒܪ̈ܝܢ܂ ܘܪܕܦܘ ܐܢܘܢ ‍<‍ܡܢ#3#‍>‍ ܩܕܡ ܬܪܥܐ ܥܕܡܐ ܕܐܬܬܒܪܘ܂ ܘܡܚܘ ܒܗܘܢ ܡܚܘܬܐ܂ ܘܙܥ ܠܒܗ ܕܥܡܐ ܘܗܘܘ ܐܝܟ ܡ̈ܝܐ܂
07:06	ܘܨܪܝ ܝܫܘܥ ܠܒ̈ܘܫܘܗܝ܂ ܘܢܦܠ ܥܠ ܐ̈ܦܘܗܝ ܥܠ ܐܪܥܐ ܩܕܡ ܩܒܘܬܗ ܕܡܪܝܐ ܥܕܡܐ ܠܪܡܫܐ܂ ܗܘ ܘܩܫܝܫ̈ܐ ܕܐܝܣܪܝܠ܂ ܘܐܪܡܝܘ ܥܦܪܐ ܥܠ ܪ̈ܝܫܝܗܘܢ܂
07:07	ܘܐܡܪ ܝܫܘܥ܂ ܐܘܢ ܡܪܝܐ ܐܠܗܐ܂ ܠܡܢܐ ܐܥܒܪܬܝܗܝ ܠܥܡܐ ܗܢܐ ܝܘܪܕܢܢ܂ ܕܬܫܠܡܢ ܒܐܝܕܐ ܕܐܡܘܪ̈ܝܐ܂ ܐܠܘ ܐܝܬܒܢ ܗܘܝܢ ܠܢ ܟܝ ܒܥܒܪܐ ܕܝܘܪܕܢܢ܂
07:08	ܘܡܢܐ ܡܟܝܠ ܐܡܪ܂ ܕܐܦܢܝ ܐܝܣܪܝܠ ܩܕܠܗ ܩܕܡ ܒ̈ܥܠܕܒܒܘܗܝ܂
07:09	ܘܢܫܡܥܘܢ ܟܢ̈ܥܢܝܐ ܘܟܠܗܘܢ ܥܡܘܪ̈ܝܗ݀ ܕܐܪܥܐ܂ ܘܢܬܟܢܫܘܢ ܥܠܝܢ ܘܢܘܒܕܘܢ ܫܡܢ ܡܢ ܐ̈ܦܝ ܐܪܥܐ܂ ܘܡܢܐ ܥ݁ܒܕ ܐܢܬ ܕܝܢ ܠܫܡܟ ܪܒܐ܂
07:10	ܘܐܡܪ ܡܪܝܐ ܠܝܫܘܥ܂ ܩܘܡ ܠܟ܂ ܠܡܢܐ ܐܪܡܐ ܐܢܬ ܥܠ ܐ̈ܦܝܟ ܥܠ ܐܪܥܐ܂
07:11	ܚܛܐ ܐܝܣܪܝܠ܂ ܘܥܒܪܘ ܥܠ ܦܘܩܕܢܐ ܕܦܩ݁ܕܬ ܐܢܘܢ܂ ܘܢܣܒܘ/ܘܣܡܘ#3#/ ܡܢ ܚܪܡܐ܂ ܘܐܦ ܓܢܒܘ ܐܦ ܟܕܒܘ ܘܛܫܝܘ ܒܡܢܝ̈ܗܘܢ܂
07:12	ܘܠܐ ܢܫܟܚܘܢ ܬܘܒ ܒܢ̈ܝ ܐܝܣܪܝܠ ܠܡܩܡ ܩܕܡ ܒ̈ܥܠܕܒܒܝܗܘܢ܂ ܐܠܐ ܩܕܠܗܘܢ ܢܦܢܘܢ ܩܕܡ ܒ̈ܥܠܕܒܒܝܗܘܢ܂ ܡܛܠ ܕܗܘܘ ܠܚܪܡܐ܂ ܘܬܘܒ ܠܐ ܐܗܘܐ ܥܡܗܘܢ ܐܠܐ ܐܢ ܐܦܪܩܬܘܢ ܚܪܡܐ ܡܢ ܒܝܢܬܟܘܢ܂
07:13	ܩܘܡ ܙܡܢܝܗܝ ܠܥܡܐ ܗܢܐ ܘܐܡܪ܂ ܐܙܕܡܢܘ ܡܚܪ܂ ܡܛܠ ܕܗܟܢܐ ܐ݁ܡܪ ܡܪܝܐ ܐܠܗܐ ܕܐܝܣܪܝܠ܂ ܚܪܡܐ ܒܓܘܟ ܐܝܣܪܝܠ܂ ܬܘܒ ܠܐ ܡܫܟܚ ܐܢܬ ܠܡܩܡ ܩܕܡ ܒ̈ܥܠܕܒܒܝܟ܂ ܥܕܡܐ ܕܬܦܪܩܘܢ ܚܪܡܐ ܡܢ ܒܝܢܬܟܘܢ܀
07:14	ܘܒܨܦܪܐ ܩܪܒܘ ܫܒ̈ܛܝܟܘܢ܂ ܘܫܒܛܐ ܕܢܐܚܕܝܘܗܝ ܡܪܝܐ ܢܬܩܪܒ ܠܫܪ̈ܒܬܐ܂ ܘܫܪܒܬܐ ܕܢܐܚܕܝܗ݀ ܡܪܝܐ ܬܬܩܪܒ ܠܒ̈ܬܝܢ܂ ܘܒܝܬܐ ܕܢܐܚܕܝܘܗܝ ܡܪܝܐ ܢܬܩܪܒ ܠܓܒܪ̈ܝܢ܂
07:15	ܘܡ݁ܢ ܕܡܬܬܚܕ ܒܗ ܒܚܪܡܐ ܢܐܩܕ ܒܢܘܪܐ܂ ܗܘ ܘܟܠܡܕܡ ܕܐܝܬ ܠܗ܂ ܥܠ ܕܥܒܪ ܥܠ ܦܘܩܕܢܗ ܕܡܪܝܐ܂ ܘܥܠ ܕܥܒܕ ܥܘܠܐ ܒܐܝܣܪܝܠ܀܂
07:16	ܘܩܕܡ ܝܫܘܥ ܒܨܦܪܐ ܘܩܪܒܗ ܠܐܝܣܪܝܠ ܠܫܒ̈ܛܝܢ܂ ܘܐܬܬܚܕ ܫܒܛܐ ܕܝܗܘܕܐ܂
07:17	ܘܩܪܒ ܫܒܛܐ/ܠܫܒܛܐ#3#/ ܕܝܗܘܕܐ ܠܫܪ̈ܒܬܐ܂ ܘܐܬܬܚܕܬ ܫܪܒܬܐ ܕܙܪܚ܂ ܘܩܪܒ ܫܪܒܬܐ ܕܙܪܚ ܠܒ̈ܬܝܢ܂ ܘܐܬܬܚܕ ܙܒܕܝ܂
07:18	ܘܩܪܒ ܒܝܬܗ ܠܓܒܪ̈ܝܢ܂ ܘܐܬܬܚܕ ܥܟܪ ܒܪ ܟܪܡܝ ܒܪ ܙܒܕܝ ܒܪ ܙܪܚ ܡܢ ܫܒܛܐ ܕܝܗܘܕܐ܂
07:19	ܘܐܡܪ ܝܫܘܥ ܠܥܟܪ܂ ܗܒ ܪܒܘܬܐ ܠܡܪܝܐ ܐܠܗܐ ܕܐܝܣܪܝܠ܂ ܘܗܒ ܠܗ ܬܘܕܝܬܐ܂ ܘܚܘܐ ܡܕܡ ܕܥܒܕܬ ܘܠܐ ܬܛܫܐ ܡܢܝ܂
07:20	ܥܢܐ ܥܟܪ ܘܐܡܪ ܠܝܫܘܥ܂ ܫܪܝܪܐܝܬ ܐܢܐ ܚܛܝ݁ܬ ܠܡܪܝܐ ܐܠܗܐ ܕܐܝܣܪܝܠ܂ ܘܗܟܢܐ ܥܒ݁ܕܬ܂

07:21	ܚܙܝ݁ܬ ܒܒܙܬܐ ܐܡܠܐ ܚܕܐ ܒܒܠܝܬܐ ܘܫܦܝܪܐ ܗܘܬ܂ ܘܡܐܬܝܢ ܡܬܩ̈ܠܝܢ ܕܣܐܡܐ܂ ܘܠܫܢܐ ܚܕ ܕܕܗܒܐ ܕܬ݁ܩܠ ܚܡܫܝܢ ܡܬܩ̈ܠܝܢ܂ ܘܪܓ݁ܬ ܐܢܘܢ ܘܢܣ݁ܒܬ ܐܢܘܢ܂ ܘܗܐ ܛܡܝܪܝܢ ܠܝ ܒܐܪܥܐ ܒܡܫܟܢܝ܂ ܘܣܐܡܐ ܡܢ ܠܬܚܬ܂

07:22	ܘܫܕܪ ܝܫܘܥ ܓܒܪ̈ܐ ܘܪܗܛܘ ܠܡܫܟܢܗ܂ ܘܚܙܘ ܕܛܡܝܪܝܢ ܒܡܫܟܢܗ܂ ܘܣܐܡܐ ܡܢ ܠܬܚܬ܂
07:23	ܘܢܣܒܘ ܐܢܘܢ ܡܢ ܡܫܟܢܗ܂ ܘܐܝܬܝܘ ܐܢܘܢ ܠܘܬ ܝܫܘܥ ܘܠܘܬ ܟܠܗ ܐܝܣܪܝܠ܂ ܘܣܡ ܐܢܘܢ ܩܕܡ ܡܪܝܐ܂
07:24	ܘܕܒܪܗ ܝܫܘܥ ܠܥܟܪ ܒܪ ܙܪܚ܂ ܘܢܣܒ ܠܣܐܡܐ ܘܠܐܡܠܐ ܘܠܠܫܢܐ ܕܕܗܒܐ܂ ܘܕܒܪ ܠܒܢ̈ܘܗܝ ܘܠܒܢ̈ܬܗ܂ ܘܠܬܘܪ̈ܘܗܝ ܘܠܚܡܪܗ ܘܠܥܢܗ܂ ܘܠܡܫܟܢܗ ܘܠܟܠ ܡܕܡ ܕܐܝܬ ܠܗ܂ ܘܠܟܠܗ ܐܝܣܪܝܠ ܥܡܗ܂ ܘܐܣܩ ܐܢܘܢ ܠܥܘܡܩܐ ܕܥܟܪ܂
07:25	ܘܐܡܪ ܠܗ ܝܫܘܥ܂ ܠܡܢܐ ܕܠܚܬܢ܂ ܢܕܠܚܟ ܡܪܝܐ ܒܝܘܡܐ ܗܢܐ܂ ܘܪܓܡܘܗܝ ܒܟܐ̈ܦܐ ܟܠܗ ܐܝܣܪܝܠ ܠܗ ܘܠܟܠ ‍<‍ܡܕܡ#3#‍>‍ ܕܐܝܬ ܠܗ܂ ܘܐܘܩܕܘ ܐܢܘܢ ܒܢܘܪܐ܂
07:26	ܘܐܩܝܡܘ ܥܠܘܗܝ ܝܓܪܐ ܕܟܐ̈ܦܐ ܪ̈ܘܪܒܬܐ ܥܕܡܐ ܠܝܘܡܢܐ܂ ܘܐܬܬܢܝܚ ܡܪܝܐ ܡܢ ܚܡܬܐ ܕܪܘܓܙܗ܂ ܡܛܠ ܗܢܐ ܐܬܩܪܝ ܫܡܗ ܕܐܬܪܐ ܗ݀ܘ܂ ܥܘܡܩܐ ܕܥܟܪ ܥܕܡܐ ܠܝܘܡܢܐ܀