The Comprehensive Aramaic Lexicon


10:01	ܘܢܣܒ ܫܡܘܐܝܠ ܩܪܢܐ ܕܡܫܚܐ ܘܢܣܟ ܒܪܝܫܗ܂ ܘܢܫܩܗ ܘܐܡܪ ܠܗ܂ ܗܐ ܡܫܚܟ ܡܪܝܐ ܥܠ ܝܪܬܘܬܗ ܠܡܕܒܪܢܐ܂

10:02	ܘܡܐ ܕܐܙܠܬ ܝܘܡܢܐ ܡܢ ܠܘܬܝ܂ ܗܐ ܡܫܟܚ ܐܢܬ ܬܪ̈ܝܢ ܓܒܪ̈ܝܢ ܥܠ ܩܒܪܗ݀ ܕܪܚܝܠ܂ ܒܬܚܘܡܐ ܕܒܢܝܡܝܢ܂ ܒܨܠܨܚ܂ ܘܢܐܡܪܘܢ ܠܟ܂ ܐܫܬܟܚ ܐܬ̈ܢܐ ܕܐܙܠܬ ܠܡܒܥܐ܂ ܘܗܐ ܫܒܩ ܐܒܘܟ ܪܢܝܐ ܕܐܬ̈ܢܐ ܘܕܚܠ ܥܠܝܟܘܢ܂ ܘܐܡܪ ܡܢܐ ܐܥܒܕ ܠܒܪܝ܂
10:03	ܘܡܐ ܕܥܒܪܬ ܬܘܒ ܠܗܠ܂ ܘܡܛܝܬ ܒܛܡܬܐ/ܠܒܛܡܬܐ#3#/ ܕܬܒܘܪ܂ ܗܐ ܡܫܟܚ ܐܢܬ ܬܡܢ ܬܠܬܐ ܓܒܪ̈ܝܢ ܣܠܩܝܢ ܠܘܬ ܐܠܗܐ ܠܒܝܬ ܐܝܠ܂ ܚܕ ܫܩܝܠ ܬܠܬܐ ܓܕ̈ܝܢ ܘܚܕ ܫܩܝܠ ܬܠܬ ܓܪ̈ܝܨܢ ܕܠܚܡܐ܂ ܘܚܕ ܫܩܝܠ ܓܪܒܐ ܕܚܡܪܐ܂
10:04	ܘܢܫܐܠܘܢ ܒܫܠܡܟ܂ ܘܢܬܠܘܢ ܠܟ ܬܪ̈ܬܝܢ ܕܠܚܡܐ܂ ܘܬܣܒ ܡܢ ܐ̈ܝܕܝܗܘܢ܂
10:05	ܘܒܬܪܟܢ ܬܐܬܐ ܠܪܡܬܐ ܕܐܠܗܐ܂ ܕܬܡܢ ܩܝܡܬܐ ܕܦܠܫ̈ܬܝܐ܂ ܘܡܐ ܕܡܛܝܬ ܠܬܡܢ ܠܩܪܝܬܐ ܗܐ ܦܓܥ ܐܢܬ ܒܚܒܠܐ ܕܢܒ̈ܝܐ ܕܢܚܬܝܢ ܡܢ ܒܝܡ܂ ܘܩܕܡܝܗܘܢ ܩܝܬܪ̈ܐ ܘܟܢܪ̈ܐ ܘ̈ܦܠܓܐ ܘܪ̈ܒܝܥܐ܂ ܘܗܢܘܢ ܡܬܢܒܝܢ܂
10:06	ܘܬܨܠܚ ܥܠܝܟ ܪܘܚܗ ܕܡܪܝܐ ܘܬܬܢܒܐ ܥܡܗܘܢ܂ ܘܬܫܬܓܢܐ ܐܝܟ ܓܒܪܐ ܐܚܪܢܐ܂
10:07	ܘܢܗܘܐ ܟܕ/ܕܟܕ#3#/ ܢܐܬܝܢ ܥܠܝܟ/ܠܟ#3#/ ܐ̈ܬܘܬܐ ܗܠܝܢ܂ ܥܒܕ ܠܟ ܡܕܡ ܕܣܦܩܐ ܒܐ̈ܝܕܝܟ܂ ܡܛܠ ܕܐܠܗܐ ܥܡܟ܂
10:08	ܘܚܘܬ ܩܕܡܝ ܠܓܠܓܠܐ܂ ܘܗܐ ܐܢܐ ܢܚܬ ܐܢܐ ܠܘܬܟ ܠܡܣܩܘ ܥ̈ܠܘܬܐ ܠܡܕܒܚ ܕܒܚ̈ܐ ܫ̈ܠܡܐ܂ ܫܒܥܐ ܝܘܡ̈ܝܢ ‍<‍ܘܬܡܢ#3#‍>‍ ܬܟܬܪ ܥܕܡܐ ܕܐܬܐ ܐܢܐ ܠܘܬܟ܂ ܘܐܘܕܥܟ ܡܕܡ ܕܬܥܒܕ܂
10:09	ܘܗܘܐ ܕܟܕ/ܟܕ#3#/ ܐܦܢܝ ܟܬܦܗ ܠܡܐܙܠ ܡܢ ܠܘܬ ܫܡܘܐܝܠ܂ ܫܚܠܦ ܠܗ ܐܠܗܐ ܠܒܐ ܐܚܪܢܐ܂ ܘܐܬ̈ܝ/ܘܐܝܬܝ#3#/ ܟܠܗܝܢ ܐ̈ܬܘܬܐ ܗܠܝܢ ܒܝܘܡܐ ܗ݀ܘ܂
10:10	ܘܐܬܐ ܥܕܡܐ ܠܪܡܬܐ܂ ܘܗܐ ܚܒܠܐ ܕܢܒ̈ܝܐ ܐܪܥܗ܂ ܘܐܨܠܚܬ ܥܠܘܗܝ ܪܘܚܗ ܕܐܠܗܐ/ܕܡܪܝܐ#3#/ ܘܐܬܢܒܝ ܒܝܢܬܗܘܢ܂
10:11	ܘܗܘܐ ܕܟܠ ܕܝܕܥ ܗܘܐ ܠܗ ܡܢ ܐܬܡܠܝ ܘܡܢ ܡܢܬܡܠܝ ܚܙܘ ܘܗܐ ܥܡ ܢܒ̈ܝܐ ܡܬܢܒܐ܂ ܘܐܡܪܘ ܥܡܐ ܓܒܪ ܠܚܒܪܗ܂ ܡܢܘ ܗܢܐ ܕܗܘܐ ܠܒܪ ܩܝܫ܂ ܕܗܐ ܐܦ ܫܐܘܠ ܒܢ̈ܒܝܐ܂
10:12	ܘܥܢܐ ܓܒܪܐ ܡܢ ܬܡܢ ܘܐܡܪ܂ ܡܢܘ ܐܒܘܗܝ܂ ܡܛܘܠ ܗܢܐ ܗܘܬ ܠܡܬܠܐ܂ ܕܗܐ ܐܦ ܫܐܘܠ ܒܢ̈ܒܝܐ܂
10:13	ܘܓܡܪ ܠܡܬܢܒܝܘ܂ ܘܐܬܐ ܫܐܘܠ ܡܢ ܒܝܡ܂
10:14	ܘܐܡܪ ܠܗ ܕܕܗ ܠܫܐܘܠ ܘܠܛܠܝܗ܂ ܠܐܝܟܐ ܐܙܠܬܘܢ܂ ܘܐܡܪ ‍<‍ܠܗ#3#‍>‍܂ ܠܡܒܥܐ ܐ̈ܬܢܐ܂ ܘܚܙܝܢ ܕܠܝܬ ܘܐܬܝܢ ܠܘܬ ܫܡܘܐܝܠ܂
10:15	ܘܐܡܪ ܠܗ ܕܕܗ ܠܫܐܘܠ܂ ܚܘܢܝ ܡܢܐ ܐܡܪ ܠܟܘܢ ܫܡܘܐܝܠ܂
10:16	ܘܐܡܪ ‍<‍ܠܗ#3#‍>‍ ܫܐܘܠ ܠܕܕܗ܂ ܡܚܘܝܘ ܚܘܝܢܝ ܕܐܫܬܟܚ ܐ̈ܬܢܐ܂ ܘܨܒܘܬܐ ܕܡܠܟܘܬܐ ܠܐ ܚܘܝܗ ܕܐܡܪ ܠܗ ܫܡܘܐܝܠ܀
10:17	ܘܟܢܫ ܫܡܘܐܝܠ ܠܥܡܐ ܩܕܡ ܡܪܝܐ ܠܡܨܦܝܐ/ܒܡܨܦܝܐ#3#/܂
10:18	ܘܐܡܪ ܠܒ̈ܢܝ ܐܝܣܪܝܠ܂ ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ܂ ܐܢܐ ܐܣܩܬ ܠܐܝܣܪܝܠ ܡܢ ܐܪܥܐ ܕܡܨܪܝܢ܂ ܘܦܨܝܬܟܘܢ ܡܢ ܐܝܕܐ ܕܦܠܫ̈ܬܝܐ܂ ܘܡܢ ܐܝܕܐ ܕܟܠܗܝܢ ܡ̈ܠܟܘܬܐ ܕܐ̈ܠܨܢ ܠܟܘܢ܂
10:19	ܘܐܢܬܘܢ ܝܘܡܢܐ ܐܣܠܝܬܘܢ ܠܐܠܗܟܘܢ܂ ܕܗܘ ܦܪܩ ܠܟܘܢ ܡܢ ܟܠܗܝܢ ܒܝܫ̈ܬܟܘܢ ܘܥܩ̈ܬܟܘܢ܂ ܘܐܡܪܬܘܢ ܠܐ ܗܟܢܐ܂ ܐܠܐ ܡܠܟܐ ܐܩܝܡ ܥܠܝܢ܂ ܗܫܐ ܢܩܘܡܘܢ ܩܕܡ ܡܪܝܐ ܫܒ̈ܛܝܟܘܢ ܘܐ̈ܠܦܝܟܘܢ܂
10:20	ܘܩܪܒ ܫܡܘܐܝܠ ܠܟܠܗܘܢ ܫܒ̈ܛܐ ܕܐܝܣܪܝܠ܂ ܘܐܬܬܚܕ ܫܒܛܐ ܕܒܢܝܡܝܢ܂
10:21	ܘܩܪܒ ܫܒܛܐ ܕܒܢܝܡܝܢ ܠܫܪ̈ܒܬܐ܂ ܘܐܬܬܚܕܬ ܫܪܒܬܐ ܕܡܛܪܝ܂ ܘܐܬܬܚܕ ܫܐܘܠ ܒܪ ܩܝܫ܂ ܘܒܥܐܘܗܝ ܘܠܐ ܐܫܬܟܚ܂
10:22	ܘܫܐܠ ܬܘܒ ܫܡܘܐܝܠ ܒܡܪܝܐ܂ ܘܐܡܪ ܐܝܟܘ ܓܒܪܐ ܗܢܐ܂ ܘܐܡܪ ܡܪܝܐ ܠܫܡܘܐܝܠ܂ ܗܐ ܗܘ ܡܬܛܫܐ ܒܝܬ ܡܐ̈ܢܐ܂
10:23	ܘܪܗܛܘ ܘܕܒܪܘܗܝ ܡܢ ܬܡܢ܂ ܘܩܡ ܒܓܘ ܥܡܐ ܘܪܡ ܗܘܐ ܡܢ ܟܠܗ ܥܡܐ ܡܢ ܟܬܦܗ ܘܠܥܠ܂
10:24	ܘܐܡܪ ܫܡܘܐܝܠ ܠܟܠܗ ܥܡܐ܂ ܚܙܝܬܘܢ ܕܨܒܐ ܒܗ/ܒܗܢܐ#3#/ ܐܠܗܐ܂ ܡܛܠ ܕܠܝܬ ܐܟܘܬܗ ܒܟܠܗ ܥܡܐ܂ ܘܝܒܒܘ ܟܠܗ ܥܡܐ ܘܐܡܪܘ ܢܚܐ ܡܠܟܐ܂
10:25	ܘܐܡܪ ܫܡܘܐܝܠ ܠܥܡܐ ܢܡܘܣܗ ܕܡܠܟܐ܂ ܘܟܬܒ ܒܣܦܪܐ ܘܣܡ ܩܕܡ ܡܪܝܐ܂ ܘܫܕܪ ܫܡܘܐܝܠ ܠܟܠܗ ܥܡܐ܂ ܘܐܙܠܘ ܐܢܫ ܠܒܝܬܗ܂
10:26	ܘܐܦ ܫܐܘܠ ܐܙܠ ܠܒܝܬܗ ܠܪܡܬܐ܂ ܘܐܙܠ ܥܡܗ ܚܝܠܐ ܕܐܬܩܪܒ ܐܠܗܐ ܒܠܒܗܘܢ܂
10:27	ܘܒܢ̈ܝ ܚܛܐ ܐܡܪܝܢ܂ ܒܡܢܐ ܢܦܪܩܢ ܗܢܐ܂ ܘܫܛܘܗܝ ܘܠܐ ܐܝܬܝܘ ܠܗ ܩܘܪ̈ܒܢܐ܂ ܘܗܘ ܐܝܟ ܫܬܝܩ܀