The Comprehensive Aramaic Lexicon

28:01	ܘܝ ܠܟܠܝܠܐ ܓܐܝܐ ܕܪܘܝܐ ܐܦܪܝܡ܃ ܘܠܓܕܠܐ ܡܨܥܪܐ ܚܝܠܐ ܕܫܘܒܚܗ ܕܒܪܝܫ ܢܚܠܐ ܕܫܡ̈ܝܢܐ܃ ܕܬܘܝܪܝܢ ܒܚܡܪܐ܂
28:02	ܗܐ ܚܝܠܐ ܘܥܘܫܢܐ ܕܡܪܝܐ܃ ܐܝܟ ܙܪܝܦܬܐ ܕܒܪܕܐ ܘܐܝܟ ܥܠܥܠܐ ܕܬܒܪܐ܂ ܘܐܝܟ ܙܪܝܦܬܐ ܕܡ̈ܝܐ ܣ̈ܓܝܐܐ ܕܓܪܦܝܢ܂ ܐܢܝܚ ܠܐܪܥܐ ܒܐܝܕܟ܂
28:03	ܘܒܪܓܠܐ ܢܬܕܝܫ ܟܠܝܠܐ ܓܐܝܐ ܕܪܘܝܐ ܐܦܪܝܡ܂
28:04	ܘܢܗܘܐ ܓܕܠܐ ܡܨܥܪܐ ܚܝܠܐ ܕܫܘܒܚܗ ܕܒܪܝܫ ܢܚܠܐ ܕܫܡܝ̈ܢܐ܃ ܐܝܟ ܒܟܪܬܐ ܕܩܕܡ ܩܝܛܐ܂ ܕܡܐ ܕܚܙܗ݀ ܡ݁ܢ ܕܚ݁ܙܐ ܠܗ݀܃ ܥܕ ܗܝ ܒܐܝܕܗ ܒ݁ܠܥ ܠܗ݀܀
28:05	ܒܝܘܡܐ ܗ݀ܘ܃ ܢܗܘܐ ܡܪܝܐ ܚܝܠܬܢܐ ܠܟܠܝܠܐ ܕܚܝܠܐ܃ ܘܠܓܕܠܐ ܡܫܒܚܐ ܠܫܪܟܐ ܕܥܡܗ܂
28:06	ܠܪܘܚܐ ܕܕܝܢܐ܂ ܠܡ݁ܢ ܕܝܬ݁ܒ ܥܠ ܕܝܢܐ ܘܓܢܒܪܘܬܐ܂ ܕܡܗܦܟܝܢ ܩܪܒܐ ܡܢ ܬܪܥܐ܂
28:07	ܘܐܦ ܗܠܝܢ ܒܚܡܪܐ ܛܥܘ ܘܒܫܟܪܐ ܛܥܘ܂ ܟܗ̈ܢܐ ܘܢܒ̈ܝܐ ܛܥܘ ܒܫܟܪܐ܂ ܐܬܒܠܥܘ ܡܢ ܚܡܪܐ܂ ܙܥܘ ܡܢ ܫܟܪܐ܂ ܛܥܘ ܒܪܘܝܘܬܐ܂ ܐܟܠܘ ܐܣܘܛܐܝܬ܂
28:08	ܡܛܠ ܕܟܠܗܘܢ ܦܬܘܪ̈ܐ܃ ܐܬܡܠܝܘ ܬܝܘܒܐ ܘܬܒܬܐ ܡܢ ܒܠܝ ܐܬܪܐ܂
28:09	ܠܡ݁ܢ ܢܠܦ ܐܝܕܥܬܐ܂ ܘܠܡ݁ܢ ܢܣܟܠ ܫܡܥܐ܂ ܠܕܚܣܝܠܝܢ ܡܢ ܚܠܒܐ ܘܢܓܝܕܝܢ ܡܢ ܬ̈ܕܝܐ܂
28:10	ܡܛܠ ܕܬܒܬܐ ܥܠ ܬܒܬܐ ܘܬܒܬܐ ܥܠ ܬܒܬܐ܂ ܘܬܝܘܒܐ ܥܠ ܬܝܘܒܐ ܘܬܝܘܒܐ ܥܠ ܬܝܘܒܐ܂ ܩܠܝܠ ܠܬܡܢ ܘܩܠܝܠ ܠܬܡܢ܂
28:11	ܡܛܠ ܕܒܡܡܠܠܐ ܥܛܠܐ ܘܒܠܫܢܐ ܐܚܪܢܐ ܐܡܠܠ ܥܡܗ ܥܡ ܥܡܐ ܗܢܐ܂
28:12	ܕܐܡ݁ܪܬ ܠܗܘܢ܃ ܗܕܐ ܗܝ ܢܝܚܬܝ ܐܢܝܚܘ ܠܡܛܪ̈ܦܐ܂ ܘܗܢܘ ܫܠܝܐ ܘܠܐ ܨܒܘ ܠܡܫܡܥ܂
28:13	ܘܗܘܬ ܠܗܘܢ ܡܠܬܗ ܕܡܪܝܐ܃ ܬܒܬܐ ܥܠ ܬܒܬܐ ܘܬܒܬܐ ܥܠ ܬܒܬܐ܂ ܘܬܝܘܒܐ ܥܠ ܬܝܘܒܐ ܘܬܝܘܒܐ ܥܠ ܬܝܘܒܐ܂ ܩܠܝܠ ܠܬܡܢ ܘܩܠܝܠ ܠܬܡܢ܂ ܕܢܗܦܟܘܢ ܘܢܣܬܚܦܘܢ ܠܒܣܬܪܗܘܢ܂ ܘܢܬܬܒܪܘܢ ܘܢܬܬܨܝܕܘܢ ܘܢܬܬܚܕܘܢ܂
28:14	ܡܛܠ ܗܢܐ ܫܡܥܘ ܦܬܓܡܗ ܕܡܪܝܐ ܓܒܪ̈ܐ ܡܡܝ̈ܩܢܐ܃ ܫ̈ܠܝܛܘܗܝ ܕܥܡܐ ܗܢܐ ܕܒܐܪܫܠܡ܂
28:15	ܡܛܠ ܕܐܡܪܬܘܢ ܕܐܩܝܡܢ ܩܝܡܐ ܥܡ ܡܘܬܐ܃ ܘܥܡ ܫܝܘܠ ܥܒܕܢ ܚܙܘܐ܂ ܫܘܛܐ ܕܓܪܘܦܝܐ ܟܕ ܢܥܒܪ ܠܐ ܢܐܬܐ ܥܠܝܢ܂ ܡܛܠ ܕܣܡܢ ܒܕܓܠܘܬܐ ܬܘܟܠܢܢ܃ ܘܒܫܘܩܪܐ ܐܣܬܬܪܢ܂
28:16	ܡܛܠ ܗܢܐ ܗܟܢܐ ܐܡ݁ܪ ܡܪܝܐ ܐܠܗܐ/ܚܝܠܬܢܐ#3#/܂ ܗܐ ܐܢܐ ܡܬܩܢ ܐܢܐ ܒܨܗܝܘܢ ܟܐܦܐ܂ ܟܐܦܐ ܒܚܝܪܬܐ ܒܙܘܝܬܐ ܝܩܝܪܬܐ/ܢܩܝܪܬܐ#3#/܂ ܪܝܫ ܐܣܬܐ ܕܫܬܐܣܬܐ܂ ܕܡܗܝܡܢ ‍<‍ܒܗ#3#‍>‍ ܠܐ ܢܕܚܠ܂
28:17	ܘܐܣܝܡ ܕܝܢܐ ܠܡܫܘܚܬܐ ܘܙܕܝܩܘܬܐ ܠܡܬܩܠܐ܂ ܘܢܚܒܘܛ ܒܪܕܐ ܠܣܒܪܐ ܕܓܠܐ܂ ܘܠܣܬܪܐ/ܘܠܐܣܬܐ#3#/ ܡ̈ܝܐ ܢܓܪܦܘܢ܂
28:18	ܘܢܬܟܦܪ ܩܝܡܟܘܢ ܕܥܡ ܡܘܬܐ܂ ܘܚܙܘܟܘܢ ܕܥܡ ܫܝܘܠ ܠܐ ܢܩܘܡ܂ ܫܘܛܐ ܕܓܪܘܦܝܐ/ܕܓܪܘܦܐ#3#/ ܟܕ ܢܥܒܪ܂ ܬܗܘܘܢ ܠܗ ܠܕܝܫܐ܂
28:19	ܘܒܙܒܢܐ ܕܥܒ݁ܪ ܢܕܒܪܟܘܢ܂ ܡܛܠ ܕܒܨܦܪܐ ܒܨܦܪܐ ܢܥܒܪ ܒܐܝܡܡܐ܂ ܘܒܠܠܝܐ ܗܘ݁ܝܐ ܙܘܥܬܐ܂ ܒܠܚܘܕ ܐܣܬܟܠ ܫܡܘܥܐ܂
28:20	ܡܛܠ ܕܟܪܝ ܡܐܢܐ ܠܡܣܬܪܗ܂ ܘܡܫܬܝܬܐ ܩܛܢܬ ܘܠܐ ܡܡܠܝܐ/ܡܡܠܠܝܐ#2#/܂
28:21	ܡܛܠ ܕܒܛܘܪܐ ܒܬܘܪܥܬܐ ܢܩܘܡ ܡܪܝܐ܂ ܐܝܟ ܥܘܡܩܐ ܕܓܒܥܘܢ ܢܪܓܙ܂ ܠܡܥܒܕ ܥ݁ܒ̈ܕܘܗܝ ܢܘܟܪ̈ܝܝܢ ܥ݁ܒ̈ܕܘܗܝ܂ ܘܠܡܥܒܕ ܥܒܝ̈ܕܬܗ ܢܘܟܪ̈ܝܢ ܥܒܝ̈ܕܬܗ܂
28:22	ܘܗܫܐ ܠܐ ܬܡܝܩܘܢ ܕܠܐ ܢܥܫ̈ܢܢ ܡܪ̈ܕܘܬܟܘܢ܂ ܡܛܠ ܕܓܡܘܪܝܐ ܘܦܣ̈ܝܩܬܐ/ܕܦܣܝ̈ܩܬܐ#3#/ \ܫܡ݁ܥܬ ܡܢ /ܥܒ݁ܕ#1##2#/ ܡܪܝܐ ܚܝܠܬܢܐ ܥܠ ܟܠܗ݀ ܐܪܥܐ܂
28:23	ܨܘܬܘ ܘܫܡܥܘ ܩܠܝ܂ ܨܘܬܘ ܘܫܡܥܘ ܡܐܡܪܝ܂
28:24	ܕܠܡܐ ܝܘܡܐ ܟܠܗ ܕܒ݁ܪ ܐܟܪܐ ܠܡܙܪܥ܃ ܘܙܩ݁ܦ ܘܫ݁ܦܢ ܐܪܥܗ܃
28:25	ܠܐ ܗܘܐ ܡܐ ܕܐܫܘܝ ܐ̈ܦܝܗ݀܃ ܒ݁ܕܪ ܫܒܘܒܢܐ/ܫܒܒܘܢܐ#3#/ ܘܟܡܘܢܐ ܙ݁ܪܥ܃ ܘܪܡ݁ܐ ܚ̈ܛܐ ܘܣܥܪ̈ܐ ܘܟܘܢ̈ܬܐ ܒܬ̈ܚܘܡܝܗ݀܃
28:26	ܢܪܕܝܘܗܝ ܒܕܝܢܐ ܕܐܠܗܐ ܘܢܫܒܚܘܢ܂
28:27	ܡܛܠ ܕܠܐ ܗܘܐ ܒܕܪܫܐ ܡܬܕܪܟ ܫܒܘܒܢܐ/ܫܒܒܘܢܐ#3#/܂ ܐܦ ܠܐ ܡܬܟܪܟ ܓܪܓܪܐ ܥܠ ܟܡܘܢܐ܂ ܡܛܘܠ ܕܒܚܘܛܪܐ ܡܬܚܒܛ ܫܒܘܒܢܐ/ܫܒܒܘܢܐ#3#/ ܘܟܡܘܢܐ ܒܙܩ̈ܬܐ܂
28:28	ܥܒܘܪܐ ܡܬܕܪܟ ܡܛܠܬܢ܂ ܡܛܠ ܕܠܐ ܗܘܐ ܠܙܟܘ ܡܕܪܟܘ ܐܕܪܟܢܝܗܝ܂ ܘܒܣܘܓܐܐ ܕܓܝ̈ܓܠܐ ܕܓܪ̈ܓܪܘܗܝ ܘܒܦܪ̈ܣܘܗܝ ܢܕܩܘܢܗ܂
28:29	ܐܦ ܗܕܐ ܡܢ ܩܕܡ ܡܪܝܐ ܚܝܠܬܢܐ ܢܦܩܬ܂ ܕܘܡܪܐ ܕܬܪܥܝܬܐ ܐܘܪܒ ܬܪܒܝܬܐ܂