The Comprehensive Aramaic Lexicon

31:01	ܘܝ ܠܕܢܚܬܝܢ ܠܡܨܪܝܢ ܠܡܬܥܕܪܘ܃ ܘܥܠ ܪ̈ܟܫܐ ܡܬܬܟܠܝܢ܃ ܘܡܬܬܟܠܝܢ ܥܠ ܡܪ̈ܟܒܬܐ ܣܓܝܐ̈ܬܐ܃ ܘܥܠ ܦܪ̈ܫܐ ܕܛܒ ܥܫܝܢܝܢ܂ ܘܠܐ ܐܬܬܟܠܘ ܥܠ ܩܕܝܫܐ ܕܐܝܣܪܝܠ܂ ܘܠܡܪܝܐ ܠܐ ܒܥܘ܂
31:02	ܘܒܚܟܡܬܗ ܐܝܬܝ ܒܝܫܬܐ ܘܡ̈ܠܘܗܝ ܠܐ ܐܥܒܪ܂ ܘܩܡ ܥܠ ܒܝܬܐ ܕܒܝܫ̈ܐ܃ ܘܥܠ ܥܘܕܪܢܐ ܕܥ̈ܒ݁ܕܝ ܥܘܠܐ܂

31:03	ܘܡܨܪ̈ܝܐ ܐܢܫܐ ܐܢܘܢ ܘܠܐ ܗܘܘ ܐ̈ܠܗܐ܂ ܘܪܟܫܗܘܢ ܕܒܣܪܐ ܐܢܘܢ ܘܠܐ ܗܘܘ ܕܪܘܚܐ܂ ܘܡܪܝܐ/ܡܛܠ ܡܪܝܐ#3#/ ܢܪܟܢ ܐܝܕܗ ܘܢܣܬܚܦ ܡܥܕܪܢܐ܂ ܘܢܦܠ ܐܦ ܗ݀ܘ ܕܡܬܥܕܪ ܘܟܠܗܘܢ ܐܟܚܕܐ ܢܣܘܦܘܢ܃

31:04	ܡܛܠ ܕܗܟܢܐ ܐܡܪ ܠܝ ܡܪܝܐ܂ ܐܝܟ ܕܢܗ݀ܡ ܐܪܝܐ ܘܓܘܪܝܐ ܕܐܪܝܐ ܥܠ ܡܕܡ ܕܬܒ݁ܪ܃ ܘܩ݁ܥܝܢ ܒܗ ܣܘܓܐܐ ܕܪ̈ܥܘܬܐ܃ ܘܡܢ ܩܠܗܘܢ ܠܐ ܕܚ݁ܠ܃ ܘܡܢ ܣܘܓܐܗܘܢ ܠܐ ܡܬܬܙܝܥ܃ ܗܟܢܐ ܢܚܘܬ ܡܪܝܐ ܚܝܠܬܢܐ܃ ܠܡܬܚܝܠܘ ܥܠ ܛܘܪܐ ܕܨܗܝܘܢ ܘܥܠ ܪ̈ܡܬܗ݀܂
31:05	ܐܝܟ ܨܦܪ̈ܐ ܕܦܪ̈ܚܢ܃ ܗܟܢܐ ܢܓܢ ܡܪܝܐ ܚܝܠܬܢܐ ܥܠ ܐܘܪܫܠܡ܂ ܢܓܢ ܘܢܦܨܐ ܘܢܣܝܥ ܘܢܥܕܪ܀
31:06	ܬܘܒܘ ܒܢ̈ܝ ܐܝܣܪ̈ܝܠ ܕܐܥܫܢܬܘܢ ܡܪܕܘܬܐ܂
31:07	ܡܛܠ ܕܒܝܘܡܐ ܗ݀ܘ܃ ܢܣܠܘܢ ܐܢܫܐ ܦܬܟܪ̈ܐ ܕܣܐܡܐ ܘܕܕܗܒܐ܃ ܕܥܒܕ ܠܟܘܢ ܐ̈ܝܕܝܟܘܢ ܚܛܝܬܐ܂
31:08	ܘܢ݁ܦܠ ܐܬܘܪܝܐ ܒܚܪܒܐ܂ ܚܪܒܐ ܠܐ ܕܓܒܪ̈ܐ܂ ܘܚܪܒܐ ܠܐ ܕܓܢܒܪ̈ܐ ܬܐܟܠܝܘܗܝ܂ ܘܢܥܪܘܩ ܠܗ ܡܢ ܩܕܡ ܚܪܒܐ܂ ܘܥ̈ܠܝܡܘܗܝ ܠܐܬܐ ܢܗܘܘܢ܂
31:09	ܘܫܩܝܦܐ/ܘܒܫܩܝܦܐ#3#/ ܕܡܥܡܪܗ ܢܥܒܪ/ܢܥܡܪ#3#/܂ ܘܢܬܬܒܪܘܢ ܡܢ ܐܬܐ ܪ̈ܘܪܒܢܘܗܝ܃ ܐܡ݁ܪ ܡܪܝܐ ܕܢܘܗܪܗ ܒܨܗܝܘܢ ܘܬܢܘܪܗ ܒܐܘܪܫܠܡ܂