The Comprehensive Aramaic Lexicon

13:01	ܗܟܢܐ ܐܡ݂ܪ ܠܝ ܡܪܝܐ܂ ܙܠ ܙܒ݂ܢ ܠܟ ܣܘܕܪܐ ܕܟܬܢܐ ܘܐܣܘܪܝܗܝ ܒܚ̈ܨܝܟ܂ ܘܒܡ̈ܝܐ ܠܐ ܬܨܒܥܝܘܗܝ܂
13:02	ܘܙ݁ܒܢܬ ܣܘܕܪܐ ܐܝܟ ܦܬܓܡܗ ܕܡܪܝܐ݂ ܘܐ݁ܣܪܬ ܒܚ̈ܨܝ܂܀
13:03	ܘܗܘ݂ܐ ܥܠܝ ܦܬܓܡܗ ܕܡܪܝܐ ܕܬܪ̈ܬܝܢ ܙܒ̈ܢܝ݂ܢ ܘܐܡ݂ܪ܂
13:04	ܣܒ ܣܘܕܪܐ ܕܙܒܢ݂ܬ ܕܒܚ̈ܨܝܟ܃ ܘܩܘܡ ܙܠ ܠܦܪܬ܂ ܘܛܡܘܪܝܗܝ ܬܡ݁ܢ ܒܨܪܝܐ ܕܟܐܦܐ܂
13:05	ܘܐ݁ܙܠܬ ܘܛܡܪܬܗ ܒܦܪܬ܃ ܐܝܟ ܕܦܩ݁ܕܢܝ ܡܪܝܐ܂
13:06	ܘܡܢ ܒܬܪ ܝܘܡ̈ܬܐ ܣ̈ܓܝܐܐ݂ ܐܡ݂ܪ ܠܝ ܡܪܝܐ܂ ܩܘܡ ܙܠ ܠܦܪܬ܃ ܘܣܒ ܡܢ ܬܡ݁ܢ ܣܘܕܪܐ ܕܦܩܕܬܟ ܕܬܛܡܪܝܘܗܝ ܬܡ݁ܢ܂
13:07	ܘܐ݁ܙܠܬ ܠܦܪܬ܂ ܘܚ݁ܦܪܬ݂ ܘܢܣܒܬܗ ܠܣܘܕܪܐ ܡܢ ܟܪ ܕܛܡܪܬܗ܂ ܘܗܐ ܐܬܚ݁ܒܠ ܣܘܕܪܐ݁ ܘܠܡܕܡ ܠܐ ܟܫ݁ܪ܀
13:08	ܘܗܘ݂ܐ ܦܬܓܡܗ ܕܡܪܝܐ ܥܠܝ ܘܐܡ݂ܪ܂
13:09	ܗܟܢܐ ܐܡ݁ܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܟܢܐ ܐܚ݁ܒܠ ܠܓܐ̈ܝܐ ܕܝܗܘܕܐ ܘܠܓܐ̈ܝܐ ܕܐܘܪܫܠܡ ܣܓ̈ܝܐܐ܃
13:10	ܥܡܐ ܗܢܐ ܒܝܫ݂ܐ ܕܠܐ ܨܒ݂ܘ ܠܡܫܡܥ ܦܬ̈ܓܡܝ݁܂ ܕܡܗܠܟܝܢ ܒܨܒܝܢܐ ܕܠܒܗܘܢ܂ ܘܐܙܠܘ ܒܬܪ ܐ̈ܠܗܐ ܐܚܪ̈ܢܐ܃ ܠܡܦ݂ܠܚ ܐܢܘܢ ܘܠܡ݂ܣܓܕ ܠܗܘܢ܂ ܢܗܘ݂ܘܢ݂ ܐܝܟ ܣܘܕܪܐ ܗܢܐ ܕܠܡܕܡ ܠܐ ܟܫ݁ܪ܂
13:11	ܡܛܠ ܕܐܝܟܢܐ ܕܢܩ݁ܦ ܣܘܕܪܐ ܠܚ̈ܨܘܗܝ ܕܓܒܪܐ܃ ܗܟܢܐ ܐܩ݁ܦܬ ܠܝ ܠܟܠܗ ܒܝܬ ܐܝܣܪܝܠ ܘܠܟܠܗ ܒܝܬ ܝܗܘܕܐ ܐܡ݁ܪ ܡܪܝܐ܃ ܕܢܗܘܘܢ ܠܝ ܠܥܡܐ ܘܠܫܡܐ ܘܠܐܝܩܪܐ ܘܠܬܫܒܘܚܬܐ܂ ܘܠܐ ܫܡܥ݂ܘ܂
13:12	ܘܐܡ݂ܪ ܠܗܘܢ ܦܬܓܡܐ ܗܢܐ܂ ܗܟܢܐ ܐܡ݁ܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܟܠ ܓܪܒ݂ ܢܬܡܠܐ ܚܡܪܐ܂ ܗܐ݂ ܐܡ݁ܪܝܢ ܠܟ܂ ܡܕܥ ܓܝܪ ܠܐ ܝܕܥ݁ܝܢ ܚܢܢ ܕܟܠܗܘܢ ܓܪ̈ܒܐ ܡܬ݂ܡܠܝܢ ܚܡܪܐ܃
13:13	ܐܡ݂ܪ ܠܗܘܢ܃ ܗܟܢܐ ܐܡ݁ܪ ܡܪܝܐ܂ ܗܐ ܡ݁ܠܐ ܐܢܐ ܠܟܠܗܘܢ ܥܡܘܪ̈ܝܗ݀ ܕܐܪܥܐ ܗܕܐ܃ ܘܠܡ̈ܠܟܐ ܕܝܬ݁ܒܝܢ ܥܠ ܟܘܪܣܝܗ ܕܕܘܝܕ܂ ܘܠܟܗ̈ܢܐ ܘܠܢܒ̈ܝܐ܃ ܘܠܟܠܗܘܢ ܥܡܘܪ̈ܝܗ݀ ܕܐܘܪܫܠܡ ܪܘܝ݂ܘܬܐ܂
13:14	ܘܐܒ݁ܕܪ ܐܢܘܢ ܓܒܪ ܡܢ ܠܘܬ ܐܚܘܗܝ܂ ܘܐ̈ܒܗܐ ܘܒ̈ܢܝܐ݂ ܐܟܚܕܐ ܐܡ݁ܪ ܡܪܝܐ܂ ܠܐ݁ ܐܪܚܡ ܘܠܐ ܐܪܚܦ܂ ܘܠܐ ܐܚܘܣ ܠܡܚ݁ܒܠܘ ܐܢܘܢ܀
13:15	ܫܡܥܘ݁ ܘܨܘܬܘ݂ ܘܠܐ ܬܬܪܝܡܘܢ܂ ܡܛܠ ܕܡܪܝܐ ܡܠܠ܂
13:16	ܗܒܘ ܠܡܪܝܐ ܐܠܗܟܘܢ ܐܝܩܪܐ ܥܕ ܠܐ ܢܚ݂ܫܟ܂ ܘܥܕܠܐ ܢܬܬܒܪ̈ܢ ܪ̈ܓܠܝܟܘܢ ܥܠ ܛܘܪ̈ܐ ܒܚܫܘܟܐ܃ ܘܬܣܟܘܢ ܠܢܘܗܪܐ ܘܢܥܒܕܝܘܗܝ ܚܫܘܟܐ ܘܛ̈ܠܠܝ ܡܘܬܐ܂
13:17	ܘܐܢ ܠܐ ܬܫܡܥܘܢܗ܃ ܡܛܫܝ݂ܐܝܬ ܬܒܟ݂ܐ ܢܦܫܝ ܡܢ ܩܕܡ ܥܩܬܐ܂ ܘܡܕܡ݁ܥܘ ܐܕܡ݁ܥ܂ ܘܢܫܚ̈ܠܢ ܥܝܢ̈ܝ ܕܡ̈ܥܐ܃ ܥܠ ܕܐܫܬܒ݂ܝ ܓܙܪܗ ܕܡܪܝܐ܂
13:18	ܐܡ݂ܪܘ ܠܡ̈ܠܟܐ ܘܠܪ̈ܘܪܒܢܐ܃ ܐܬܡ݁ܟܟܘ݂ ܘܬܘܒܘ܂ ܡܛܠ ܕܢܦ݂ܠ ܡܢ ܪܝܫܟܘܢ ܟܠܝܠܐ ܕܬܫܒܘܚܬܟܘܢ܂
13:19	ܩܘܪ̈ܝܐ ܕܬܝܡܢܐ݁ ܐܬܬܚ݂ܕ ܘܠܝܬ ܕܦܬ݁ܚ܂ ܐܫܬܒܝܬ݁ ܝܗܘܕܐ ܟܠܗ݀ ܫܒܝܬܐ ܫܠܡܬܐ܂
13:20	ܐܪܝܡܘ ܥܝܢ̈ܝܟܘܢ݂ ܘܚ݂ܙܘ ܠܕܐ݁ܬܝܢ ܡܢ ܓܪܒܝܐ܂ ܐܝ݁ܢܐ ܗܘ ܓܙܪܐ ܕܐܬܝܗܒ ܠܟܝ ܥܢܐ ܕܬܫܒܘܚܬܟܝ܂
13:21	ܡܢܐ ܬܐܡܪܝܢ ܟܕ ܢܦܩܘܕ ܥܠܝܟܝ܂ ܘܐܢܬܝ ܐܠܦܬܝ ܐܢܘܢ ܝܘܠܦܢܐ݂ ܕܢܗܘ݂ܘܢ ܠܕܝܫܐ܂ ܗܐ ܚܒ̈ܠ݂ܐ ܢܐܚܕܘܢܟܝ܃ ܐܝܟ ܐܢܬܬܐ ܕܡܚ݁ܒܠܐ ܠܡܐ݂ܠܕ܂

13:22	ܘܐܢ ܬܐ݂ܡܪܝܢ ܒܠܒܟܝ ܕܥܠ ܡܢܐ ܓܕ݂ܫ ܠܝ ܗܠܝܢ܃ ܒܣܘܓܐܬ ܚܘܒ̈ܝܟܝ ܐܬܓ݁ܠܓܠܘ ܫ̈ܦܘܠܝܟܝ ܘܐܬܓܠ݂ܝ ܥܩ̈ܒܝܟܝ܂

13:23	ܘܐܝܟ ܕܠܐ ܡܫ݁ܟܚ ܗܢܕܘܝܐ ܕܢܫ݁ܚܠܦ ܡܫ݁ܟܗ ܘܢܡܪܐ ܟܟ̈ܠܬܗ܃ ܐܦ ܐܢܬܘܢ ܠܐ ܡܫܟ݁ܚܝܢ ܐܢܬܘܢ ܠܡܛܐܒܘ܃ ܡܛܠ ܕܐܝܠܦܬܘܢ ܒܝܫ݂ܬܐ܂
13:24	ܘܐܒ݁ܕܪ ܐܢܘܢ݂ ܐܝܟ ܓ݂ܠܐ ܕܥܒ݁ܪ ܩܕܡ ܪܘܚܐ ܒܡܕܒܪܐ܂
13:25	ܗܕܐ ܗܝ ܦܨܬܟܝ ܘܡܢܬܐ ܕܝܪܬܘܬܟܝ ܡܢ ܩܕܡܝ ܐܡ݁ܪ ܡܪܝܐ܂ ܥܠ ܕܛܥܝܬܝܢܝ ܘܐܬܬܟܠܬܝ ܥܠ ܫܘܩܪܐ܃
13:26	ܘܐܦ ܐܢܐ ܐ݁ܓܠܓ ܫ̈ܦܘܠܝܟܝ݂ ܘܐܪܡܐ ܥܠ ܐ̈ܦܝܟܝ܂ ܘܢܬܚܙܐ ܨܥܪܟܝ݁
13:27	ܘܓܘܪܟܝ݂ ܘܨܗ݂ܠܟܝ܂ ܘܙܢܝܘܬܗ݀ ܕܙܢܝܘܬܟܝ܂ ܥܠ ܪ̈ܡܬܐ݁ ܒܡܕܒܪܐ ܚ݁ܙܝܬ ܛܢܦܘܬܟܝ܂ ܘ݁ܝ ܠܟܝ ܐܘܪܫܠܡ ܕܠܐ ܬܬܕܟܝܢ܂ ܥܕܡܐ ܠܐܡܬܝ݁ ܬܘܒܝ܀