The Comprehensive Aramaic Lexicon

20:01	ܘܫܡ݂ܥ ܦܫܚܘܪ ܒܪ ܐܡ݂ܪܝܐ ܟܗܢܐ܃ ܘܗܘ݂ ܦܩܘܕܐ ܗܘܐ݂ ܘܫܠܝܛܐ ܒܒܝܬܗ ܕܡܪܝܐ܂ ܠܐܪܡܝܐ ܢܒܝܐ ܟܕ ܡܬܢ݁ܒܐ ܦܬ̈ܓܡܐ ܗܠܝܢ܂
20:02	ܘܡܚܝܗܝ ܦܫܚܘܪ ܠܐܪܡܝܐ ܢܒܝܐ܃ ܘܐܪܡܝܗ ܒܚܕܪܬܐ ܕܒܬܪܥܐ ܕܒܝܬ ܒܢܝܡܝܢ ܥܠܝܐ ܕܒܒܝܬܗ ܕܡܪܝܐ܀

20:03	ܘܗܘ݂ܐ ܠܒܬܪ ܝܘܡܐ܃ ܘܐܦܩܗ ܦܫܚܘܪ ܠܐܪܡܝܐ ܡܢ ܚܕܪܬܐ܂ ܘܐܡ݂ܪ ܠܗ ܐܪܡܝܐ܂ ܠܐ ܗܘܐ ܦܫܚܘܪ ܩ݂ܪܐ ܡܪܝܐ ܫܡܟ܂ ܐܠܐ ܬܘܬܒܐ݂ ܘܚܕܘܪܐ܂

20:04	ܡܛܠ ܗܢܐ ܗܟܢܐ ܐܡ݁ܪ ܡܪܝܐ܂ ܗܐ ܥܒ݁ܕ ܐܢܐ ܠܟ ܬܘܬܒܐ ܠܟ݂ ܘܠܟܠܗܘܢ ܪ̈ܚ݁ܡܝܟ܂ ܘܢܦܠܘܢ ܒܚܪܒܐ ܕܒ̈ܥܠܕܒܒܝܗܘܢ݂ ܘܥܝܢ̈ܝܟ ܢܚ̈ܙܝܢ܂ ܘܠܟܠܗ ܝܗܘܕܐ݂ ܐܫܠܡ ܒܐܝ݂ܕܐ ܕܡ݁ܠܟܐ ܕܒܒܠ܂ ܘܢܫܒ݂ܐ ܐܢܘܢ݂ ܠܒܒܠ܂ ܘܢ݁ܩܛܠ ܐܢܘܢ ܒܚܪܒܐ܂
20:05	ܘܐܫܠܡ ܟܠܗܘܢ ܚܣ̈ܢܝ ܩܪܝܬܐ ܗܕܐ܂ ܘܟܠܗ݀ ܠܐܘܬܗ݀܂ ܘܟܠܗ ܐܝܩܪܗ݀܂ ܘܟܠܗܘܢ ܓܢ̈ܐ ܕܡ݁ܠܟܐ ܕܝܗܘܕܐ܃ ܐܫܠܡ ܒܐܝ݂ܕܐ ܕܒ̈ܥܠܕܒܒܝܗܘܢ܂ ܘܢܫ݂ܒܘܢ ܐܢܘܢ݂ ܘܢܒܙܘܢ ܐܢܘܢ܂ ܘܢܘ݁ܒܠܘܢ ܐܢܘܢ݂ ܠܒܒܠ܂
20:06	ܘܐܢܬ ܦܫܚܘܪ ܘܟܠܗܘܢ ܝܬܒ̈ܝ ܒܝܬܟ݁ ܬܐ݂ܙܠܘܢ ܒܫܒܝܐ܂ ܘܠܒܒܠ ܬܐܙܠ܂ ܘܬܡ݁ܢ ܬܡܘܬ݂ ܘܬܡ݁ܢ ܬܬܩܒܪ܂ ܐܢܬ݂ ܘܟܠܗܘܢ ܪ̈ܚܡ݁ܝܟ ܕܐܬܢ݁ܒܝܬ ܠܗܘܢ ܒܫܘܩܪܐ܀
20:07	ܫܕܠܬܢܝ ܡܪܝܐ ܘܐ݁ܫܬܕܠܬ܂ ܚܣ݂ܢܬܢܝ ܘܙܟܝܬܢܝ܂ ܗ݀ܘܝܬ ܓܘܚܟܐ݂ ܟܠܝܘܡ܂ ܘܟܘܠܗܘܢ ܡܡܝܩܝܢ ܒܝ܂
20:08	ܘܒܙܒܢ ܕܡܡ݁ܠܠ ܗܘܝܬ ܘܡ݁ܙܥܩ܃ ܥܠ ܚ̈ܛܘܦܐ݁ ܘܥܠ ܒܙܘ̈ܙܐ ܩ݁ܪܐ ܗܘܝܬ܂ ܡܛܠ ܕܗܘ݂ܐ ܠܝ ܦܬܓܡܗ ܕܡܪܝܐ ܠܚܣܕܐ ܘܠܡܘܝܩܐ ܒܟܠ ܝܘܡ܂
20:09	ܘܐܡ݂ܪܬ ܕܠܐ ܐܬܕܟܪܝܘܗ݀ܝ ܘܠܐ ܐܡܠܠ ܬܘܒ ܒܫܡܗ܃ ܘܗܘ݂ܐ ܒܠܒܝ݂ ܐܝܟ ܢܘܪܐ ܕܝܩ݁ܕܐ ܘܚܒܐ ܒܓܪ̈ܡܝ܂ ܘܒܥ݁ܝܬ ܠܡܣܝܒܪܘ݂ ܘܠܐ ܐܫܟ݁ܚܬ܂
20:10	ܡܛܠ ܕܫ݁ܡܥܬ ܪܢܝܐ ܕܣ̈ܓܝܐܐ ܕܡܬܟܢ݁ܫܝܢ ܡܢ ܚܕܪ̈ܝ܂ ܘܐܡ݁ܪܝܢ ܟܠܗܘܢ ܕܫܐ݁ܠܝܢ ܒܫܠܡܝ ܒܦܘܡܗܘܢ ܘܣ݁ܢܝܢ ܠܝ ܒܠܒܗܘܢ܂ ܚܘܐܘܗܝ ܠܢ ܢܩܘܡ ܥܠܘܗܝ܂ ܟܒܪ ܢܫܬ݂ܕܠ ܠܢ ܘܢܬܒܥ ܥܝܪܬܢ ܡܢܗ܂
20:11	ܘܡܪܝܐ ܥܡܝ݂ ܐܝܟ ܓܢܒܪܐ ܥܫܝܢܐ܂ ܡܛܠ ܗܢܐ ܟܠܗܘܢ ܪ̈ܕܘܦܝ ܢܒܗܬܘܢ݂ ܘܠܐ ܢܫܬܟܚܘܢ܂ ܒܗܬܘ݂ ܛܒ܂ ܡܛܠ ܕܠܐ ܐܣܬ݁ܟܠܘ܂ ܒܗܬܬܐ ܕܥܠ݁ܡ ܕܠܐ ܡܬܛܥܝܐ܂
20:12	ܘܡܪܝܐ ܚܝܠܬܢܐ ܒܚ݁ܪ ܙܕܩܐ܂ ܚ݁ܙܐ ܟܘ̈ܠܝܬܐ ܘܠܒܐ܃ ܐܚܙܐ ܦܘܪܥܢܟ ܡܢܗܘܢ܃ ܡܛܠ ܕܠܟ ܓܠܝܬ ܕܝܢ݂̈ܝ܀
20:13	ܫܒܚܘ ܠܡܪܝܐ݁ ܫܒܚܘ ܠܡܪܝܐ܂ ܕܦܨ݁ܝ ܢܦܫܗ ܕܡܣܟܢܐ ܡܢ ܐܝ݂ܕܐ ܕܡܒ̈ܐܫܢܐ܂
20:14	ܠܝܛ ܗܘ ܝܘܡܐ ܕܐܬ݁ܝܠܕܬ ܒܗ܂ ܝܘܡܐ ܕܐܝܠܕܬܢܝ ܐܡܝ݂ ܠܐ ܢܗܘܐ ܒܪܝܟ܂
20:15	ܠܝܛ ܗܘ ܓܒܪܐ ܕܣܒܪ ܠܐܒܝ܃ ܘܐܡ݂ܪ ܠܗ ܕܐܬܝܠܕ ܠܟ ܒܪܐ ܕܟܪܐ܂ ܘܣܒ݂ܪ݂ ܕܡܚܕܝܘ ܚܕܝܗ܂
20:16	ܢܗܘܐ ܓܒܪܐ ܗ݀ܘ܃ ܐܝܟ ܩܘܪ̈ܝܐ ܕܗܦܟ ܡܪܝܐ ܘܠܐ ܐܬܪܥܝ ܠܗܝܢ܂ ܢܫܡܥ ܝܠܠܬܐ ܒܨܦܪܐ ܘܝܘܒܒܐ ܒܛܗܪܐ܂
20:17	ܕܠܐ ܐܡܝܬ݁ܢܝ ܒܡܪܒܥܐ܂ ܘܗܘ݂ܬ ܠܝ ܕܝܢ ܐܡܝ݂ ܩܒܪܐ܂ ܘܒܡܪܒܥܐ݁ ܒܛܢܘܬܝ݂ ܠܥܠܡ܂
20:18	ܠܡܢܐ ܢܦ݁ܩܬ ܡܢ ܡܪܒܥܐ܃ ܠܡܚܙܐ ܥܡܠܐ ܘܕܐܘܘܐܢܐ܃ ܘܓܡ݂ܪܘ ܒܒܗܬܬܐ ܝܘܡ̈ܝ܀