The Comprehensive Aramaic Lexicon

22:01	ܗܟܢܐ ܐܡ݁ܪ ܡܪܝܐ܂ ܚ݁ܘܬ ܠܒܝܬ ܡ݁ܠܟܐ ܕܝܗܘܕܐ܃ ܘܡܠܠ ܬܡ݁ܢ ܦܬܓܡܐ ܗܢܐ݂
22:02	ܘܐܡ݂ܪ܂ ܫܡܥ݂ܘ ܦܬܓܡܗ ܕܡܪܝܐ ܡ݁ܠܟܐ ܕܝܗܘܕܐ܃ ܕܝܬ݁ܒ ܥܠ ܟܘܪܣܝܗ ܕܕܘܝܕ܂ ܐܢܬ݁ ܘܥܒ݂̈ܕܝܟ݂ ܘܥܡܟ ܕܥܐ݁ܠܝܢ ܒܬܪ̈ܥܐ ܗܠܝܢ܂
22:03	ܗܟܢܐ ܐܡ݁ܪ ܡܪܝܐ܂ ܥܒ݂ܕܘ ܕܝܢ݂ܐ݂ ܘܙܕܝܩܘܬܐ܂ ܘܦܨܘ ܠܛܠܝܡܐ ܡܢ ܡ݁ܢ ܕܛܠܡ݁ ܠܗ܂ ܘܠܥܡܘܪ̈ܐ݁ ܘܠܝ̈ܬܡܐ ܘܠܐܪ̈ܡܠܬܐ܃ ܠܐ ܬܥܠܒܘܢ݂ ܘܠܐ ܬܛܠܡܘܢ܂ ܘܕܡܐ ܙܟܝܐ݂ ܠܐ ܬܐܫܕܘܢ ܒܐܬܪܐ ܗܢܐ܂
22:04	ܘܐܢ ܡܥܒܕ ܬܥ݂ܒܕܘܢ ܦܬܓܡܐ ܗܢܐ܃ ܢܥ݂ܠܘܢ ܒܬܪ̈ܥܘܗܝ ܕܒܝܬܐ ܗܢܐ܃ ܡ̈ܠܟܐ ܕܝܬ݁ܒܝܢ ܥܠ ܟܘܪܣܝܗ ܕܕܘܝܕ܂ ܟܕ ܪܟܝܒ݂ܝܢ ܒܡܪ̈ܟܒܬܐ݂ ܘܒܪ̈ܟܫܐ܂ ܗܘ݂ ܘܥܒ݂̈ܕܘܗܝ݂ ܘܥܡܗ܂
22:05	ܘܐܠܐ ܬܫܡ݂ܥܘܢ ܦܬܓܡܐ ܗܢܐ܃ ܒܝ ܐܝ݁ܡܝܬ ܐܡ݁ܪ ܡܪܝܐ܃ ܕܠܚܘܪܒܐ ܢܗ݀ܘܐ ܒܝܬܐ ܗܢܐ܂
22:06	ܡܛܠ ܕܗܟܢܐ ܐܡ݁ܪ ܡܪܝܐ ܥܠ ܒܝܬ ܡ݁ܠܟܐ ܕܝܗܘܕܐ܂ ܓܠܥܕ ܐܢܬ ܗܘ ܪܝܫ ܠܒܢܢ܂ ܐܠܐ ܐܥܒܕܟ ܡܕܒܪܐ݂ ܐܝܟ ܩܘܪ̈ܝܐ ܕܠܐ ܐܬܝܬ݁ܒ܂
22:07	ܘܐ݁ܛܝܒ ܥܠܝܟ ܡܚܒ̈ܠܢܐ܂ ܓܒܪܐ݂ ܘܢܪܓܗ ܒܐܝ݂ܕܗ܂ ܘܢܦ݂ܣܩܘܢ ܓܒ̈ܝܐ ܕܐܪ̈ܙܝܟ݂ ܘܢܪܡܘܢ ܒܢܘܪܐ܂
22:08	ܘܢܥܒܪܘܢ ܥܡ̈ܡܐ ܣ̈ܓܝܐܐ ܥܠ ܩܪܝܬܐ ܗܕܐ ܪܒܬܐ܃ ܢܐܡܪܘܢ ܓܒܪ ܠܚܒܪܗ܂ ܥܠ ܡܢܐ ܥܒ݂ܕ ܡܪܝܐ ܗܟܢܐ ܠܩܪܝܬܐ ܗܕܐ ܪܒܬܐ܂
22:09	ܘܢܐܡ݂ܪܘܢ܂ ܥܠ ܕܫܒ݂ܩܘ ܩܝܡܗ ܕܡܪܝܐ ܐܠܗܗܘܢ܃ ܘܣܓܕܘ ܠܐ̈ܠܗܐ ܐܚܪ̈ܢܐ ܘܦܠܚ݂ܘ݁ ܐܢܘܢ܀
22:10	ܠܐ ܬܒ݂ܟܘܢ ܥܠ ܡܝܬܐ݂ ܘܠܐ ܬܢܘܕܘܢ ܥܠܘܗܝ܂ ܒܟ݂ܘ ܡܒ݂ܟܐ݂ ܥܠ ܡ݁ܢ ܕܐܙܠ݂ ܘܬܘܒ ܠܐ ܗ݀ܦܟ܂ ܘܠܐ ܚ݁ܙܐ ܐܪܥܐ ܕܐܬܝܠܕ ܒܗ݀܂
22:11	ܡܛܠ ܕܗܟܢܐ ܐܡ݁ܪ ܡܪܝܐ܃ ܥܠ ܫܠܘܡ ܒܪ ܝܘܫܝܐ ܕܐܡܠܟ ܚܠܦ ܝܘܫܝܐ ܐܒܘܗܝ܃ ܕܢܦ݂ܩ ܡܢ ܐܬܪܐ ܗܢܐ܂ ܠܐ ܢܗܦܘܟ ܠܬܡ݁ܢ ܬܘܒ܂
22:12	ܐܠܐ ܒܐܬܪܐ ܕܐܫܬܒܝ݂ ܬܡ݁ܢ ܢܡܘܬ܂ ܘܐܪܥܐ ܗܕܐ ܬܘܒ ܠܐ ܢܚܙܐ܀
22:13	ܘ݁ܝ ܠܕܒ݁ܢܐ ܒܝܬܗ ܕܠܐ ܒܙܕܩܐ ܘܥ̈ܠܝܬܗ ܕܠܐ ܒܕܝܢ݂ܐ܂ ܚܒܪܗ ܦܠܚ݁ ܠܗ ܡܓܢ܃ ܘܐܓܪܗ݂ ܠܐ ܝܗ݀ܒ ܠܗ܂
22:14	ܕܐܡ݁ܪ ܐ݁ܒܢܐ ܠܝ ܒܝܬܐ ܕܡܘܫ̈ܚܬܐ݂ ܘܥ̈ܠܝܬܐ ܡܪ̈ܘܚܬܐ܂ ܘܦܬ݁ܚ ܠܗܝܢ ܟܘ̈ܐ݂ ܘܡ݁ܛܠܠ ܠܗܝܢ ܒܐܪ̈ܙܐ܂ ܘܨܐ݁ܪ ܠܗܝܢ ܨܘܪ̈ܬܐ܂
22:15	ܡܡܠܟ ܐܢܬ ܕܐܢܬ ܡܬܚ݁ܕܐ ܒܐܪ̈ܙܐ܃ ܐܒܘܟ ܐܟܠ݂ ܘܐܫܬܝ܂ ܘܥܒ݂ܕ ܕܝܢ݂ܐ ܘܙܕܝܩܘܬܐ܂ ܡܛܠ ܗܢܐ݂ ܐ݁ܛܐܒܬ ܠܗ܂
22:16	ܕܢ ܕܝܢ݂ܐ ܕܡܣ̈ܟܢܐ ܘܕܒ݁ܝ̈ܫܐ݂ ܘܥܒ݂ܕ ܕܫܦܝܪ܂ ܡ݁ܢ ܕܗܠܝܢ ܥܒ݁ܕ ܝܕܥ݁ ܠܝ ܐܡ݁ܪ ܡܪܝܐ܂
22:17	ܕܝܠܟ ܕܝܢ ܥܝܢ̈ܝܟ ܘܠܒܟ܃ ܠܝܬ ܥܠ ܡܕܡ ܐܚܪܢ܂ ܐܠܐ݂ ܥܠ ܩܢܝܢܟ܂ ܘܥܠ ܕܡܐ ܙܟܝܐ ܠܡܐ݂ܫܕ܂ ܘܥܠ ܥܫܘܩܝܐ݂ ܘܥܠ ܛܠܘܡܝܐ ܠܡܥܒܕ܂
22:18	ܡܛܠ ܕܗܟܢܐ ܐܡ݁ܪ ܡܪܝܐ܃ ܥܠ ܝܘܝܩܝܡ ܒܪ ܝܘܫܝܐ ܡ݁ܠܟܐ ܕܝܗܘܕܐ܂ ܠܐ݁ ܢܪ̈ܩܕܘܢ ܥܠܘܗܝ܂ ܘܠܐ݁ ܢܐ݂ܡܪܘܢ ܘ݁ܝ ܐܚܝ݁ ܘ݁ܝ ܐܚܝ܂ ܘܠܐ ܢ݁ܪ̈ܩܕܘܢ ܥܠܘܗܝ ܘ݁ܝ ܡܪܐ݁ ܘ݁ܝ ܡܪܐ܂

22:19	ܩܒܘܪܬ݂ ܚܡܪ ܢܬܩܒܪ܂ ܘܢܓܪܘܢ ܘܢܫܕܘܢܗ݂ ܠܗܠ ܡܢ ܬܪ̈ܥܝܗ݀ ܕܐܘܪܫܠܡ܀܂

22:20	ܣܩܝ ܠܠܒܢܢ ܘܐܙܥܩܝ܂ ܘܒܡܬܢܝ݂ܢ ܐܪܝܡܝ ܩܠܟܝ܂ ܘܐܙܥܩܝ ܡܢ ܥܒܪ̈ܝ ܝܡܐ܂ ܕܐܬܬ݂ܒܪܘ݂ ܟܠܗܘܢ ܪ̈ܚܡ݁ܝܟܝ܂
22:21	ܘܐ݁ܡܪܬ ܠܟܝ ܒܟܗܝܢܘܬܟܝ܃ ܘܐܡ݂ܪܬܝ ܠܐ ܐܫ݂ܡܥ܂ ܗܕܐ ܗܝ ܐܘܪܚܟܝ ܡܢ ܛܠܝܘܬܟܝ܂ ܘܠܐ ܫܡܥ݂ܬܝ ܒܩܠܝ܂
22:22	ܠܟܠܗܘܢ ܪ̈ܥܘܬܟܝ݁ ܬܪܥ݂ܐ ܐܢܘܢ݂ ܪܘܚܐ܂ ܘܪ̈ܚܡ݁ܝܟܝ݂ ܒܫܒܝܐ ܢܐܙܠܘܢ܂ ܘܗ݀ܝ ܕܝܢ ܬܒܗ݂ܬܝܢ ܘܬܬܟܣܝܢ ܡܢ ܟܠܗܝܢ ܒܝܫܬ̈ܟܝ܀
22:23	ܝܬܒܬ݁ ܒܠܒܢܢ܃ ܡܩܢ݂ܬ ܒܐܪ̈ܙܐ܃ ܡܢܐ݁ ܡܬܬܢܚܬܝ܃ ܟܕ ܢܐ݂ܬܘܢ ܥܠܝܟܝ ܚܒ̈ܠ݂ܐ ܘܙܘܥܬܐ ܐܝܟ ܕܝܠܕܬܐ܂
22:24	ܚܝ ܐܢܐ ܐܡ݁ܪ ܡܪܝܐ ܐܠܗܐ܂ ܐܢ ܢܗܘܐ ܝܘܟܢܝܐ ܒܪ ܝܘܝܩܝܡ ܡ݁ܠܟܐ ܕܝܗܘܕܐ܃ ܚܬ݁ܡܐ ܥܠ ܐܝܕܝ ܕܝܡܝܢܐ܃ ܐܠܐ݂ ܡܢ ܬܡܢ ܐܥܩܪܟ܂
22:25	ܘܐܫܠܡܟ ܒܝܕ ܐܢܫܐ ܐܝܠܝܢ ܕܒܥ݁ܝܢ ܢܦܫܟ܂ ܘܒܝ݂ܕ ܐܝܠܝܢ ܕܕܚ݁ܠ ܐܢܬ ܡܢ ܩܕܡܝܗܘܢ܂ ܒܐܝ݂ܕܐ ܕܢܒܘܟܕܢܨܪ ܡ݁ܠܟܐ ܕܒܒܠ݂ ܘܒܐܝ݂ܕܐ ܕܟ̈ܠܕܝܐ܂
22:26	ܘܐܫܕܝܟ ܠܟ ܘܠܐܡܟ ܕܝܠܕܬܟ܃ ܠܐܪܥܐ ܐܚܪܬܐ ܕܠܐ ܐܬܝܠܕܬܘܢ݂ ܬܡܢ܂ ܘܬܡܢ݁ ܬܡܘܬܘܢ܂
22:27	ܘܠܐܪܥܐ ܕܣ݁ܒܪܢ ܢܦܫ̈ܬܟܘܢ ܠܡܗ݂ܦܟ ܠܬܡ݁ܢ ܠܐ ܬܗ݂ܦܟܘܢ܂
22:28	ܒܣܝܪܐ݁ ܘܫܝ݂ܛܐ ܓܒܪܐ ܗܢܐ ܝܘܟܢܝܐ܂ ܐܝܟ ܡܐܢܐ ܕܠܝܬ ܒܗ ܚܫܚܘ܂ ܡܛܠ ܗܢܐ ܐܫܬܩܠ ܗ݂ܘ ܘܙܪܥܗ܃ ܘܐܫܬܕܝܘ ܠܐܪܥܐ ܕܠܐ ܝܕܥܝܢ܂
22:29	ܐܪܥܐ݁ ܐܪܥܐ܃ ܐܪܥܐ݂ ܫܡܥܝ ܦܬܓܡܗ ܕܡܪܝܐ܂
22:30	ܗܟܢܐ ܐܡ݁ܪ ܡܪܝܐ܂ ܟܘܬܒܘܗܝ ܠܓܒܪܐ ܗܢܐ ܡܟܪܙܐ݂ ܕܠܐ ܒܢܝܢ܂ ܡܛܠ ܕܓܒܪ̈ܐ ܒܝ̈ܘܡܬܗ܃ ܠܐ ܢܨܠ݂ܚ ܡܢ ܙܪܥܗ ܓܒܪܐ ܕܝܬ݁ܒ ܥܠ ܟܘܪܣܝܗ ܕܕܘܝܕ܂ ܘܡܫ݁ܬܠܛ ܬܘܒ ܒܝܗܘܕܐ܀܂