The Comprehensive Aramaic Lexicon

51:01	ܗܟܢܐ ܐܡ݁ܪ ܡܪܝܐ ܐܠܗܐ ܚܝܠܬܢܐ܂ ܗܐ ܡܕܝܠ ܐܢܐ ܥܠ ܒܒܠ ܘܥܠ ܥܡܘܪ̈ܝܗ݀܂ ܠܒܐ ܩܫܝܐ݂ ܘܪܘܚܐ ܡܚܒܠܢܐ܂
51:02	ܘܐܫ݁ܕܪ ܥܠ ܒܒܠ ܒܙܘ̈ܙܐ܃ ܘܢܒܙܘܢܗ݀ ܘܢܕܘܫܘܢ ܐܪܥܗ݀܂ ܘܢܬܟܢܫܘܢ ܥܠܝܗ݀ ܡܢ ܚܕܪ̈ܝܗ݀ ܒܝܘܡܐ ܕܒܝܫ݂ܬܐ܂
51:03	ܠܐ݁ ܢܫܠܐ ܡ݁ܢ ܕܫ݁ܕܐ ܒܩܫܬܐ܂ ܘܠܐ ܢܫܠ݂ܚ ܫܪܝܢܗ ܩܪܒܬܢܐ܂ ܘܠܐ݁ ܬܚܘ݂ܣܘܢ ܥܠ ܓܕܘ̈ܕܝܗ݀܂ ܚܪܘܒܘ ܟܠܗ ܚܝܠܗ݀܂
51:04	ܘܢ݂ܦܠܘܢ ܩ̈ܛܝܠ݂ܐ ܒܐܪܥܐ ܕܟ̈ܠܕܝܐ܃ ܘܕܡ݁ܡܚܝܢ ܒܫ̈ܘܩܝܗ݀
51:05	ܡܛܠ ܕܠܐ ܐܪܡܠ ܐܝܣܪܝܠ ܘܝܗܘܕܐ ܡܢ ܐܠܗܗܘܢ܃ ܡܢ ܡܪܝܐ ܚܝܠܬܢܐ ܐܠܗܗܘܢ܂ ܡܛܠ ܕܐܪܥܗܘܢ ܐܬܡ݂ܠܝܬ݁ ܥܘ݂ܠܐ ܩܕܡ ܩܕܝܫܐ ܕܐܝܣܪܐܝܠ܂
51:06	ܥܪܘܩܘ݁ ܡܢ ܓܘ ܒܒܠ܂ ܘܦܨ݁ܘ ܓܒܪ ܢܦܫܗ܂ ܠܐ ܬܒܠ݂ܥܘܢ ܒܚ̈ܛܗܝܗ݀܂ ܡܛܠ ܕܙܒܢܐ ܗܘ ܕܦܘܪܥܢܗ݀ ܡܢ ܡܪܝܐ܂ ܐܝܟ ܥ݁ܒ̈ܕܝܗ݀ ܗܘ ܦܪܥ ܠܗ݀܂
51:07	ܟܣܐ ܕܕܗܒܐ ܒܒܠ ܒܐܝ݂ܕܗ ܕܡܪܝܐ܂ ܕܡܪܘܐ݂ ܠܟܠܗ݀ ܐܪܥܐ ܡܢ ܚܡܪܗ܂ ܐܫܬܝܘ ܟܠܗܘܢ ܥܡ̈ܡܐ݂ ܘܐܬܛ݁ܪܦܘ܂
51:08	ܡܢ ܫܠܝܐ ܢܦܠ݂ܬ ܒܒܠ݂ ܘܐܬܬܒ݂ܙܙܬ܂ ܐܝܠܠܘ݁ ܥܠܝܗ݀܂ ܣܒܘ ܣ̈ܡܡܢܐ ܠܟܐ̈ܒܝܗ݀܂ ܛܟ݂ ܬܬܐܣܐ܂
51:09	ܐܣܝ݂ܢܗ݀ ܠܒܒܠ݂ ܘܠܐ ܐܬܐܣܝܬ݁܂ ܢܫܒܩܝܗ݀ ܘ݁ܢܐܙܠ ܓܒܪ ܠܐܪܥܗ܂ ܡܛܠ ܕܩܪܒ݂ ܥܕܡܐ ܠܫܡܝܐ ܕܝܢ݂ܗ݀܂ ܘܐ݁ܬܬܪܝܡ݂ ܥܕܡܐ ܠܥܢ̈ܢܐ܂

51:10	ܐܦܩ ܡܪܝܐ ܙܟܘܬܢ܂ ܬܘ ܢܫܬܥܐ ܒܨܗܝܘܢ ܥ݁ܒ̈ܕܘܗܝ ܕܡܪܝܐ ܐܠܗܢ܂

51:11	ܟܢܫ݁ܘ ܫ̈ܠܛܐ݁ ܡܠ݂ܘ ܓܐܪ̈ܐ܂ ܐܕܝܠ ܡܪܝܐ ܪܘܚܐ ܕܡ݁ܠܟܐ ܕܡ݁ܕܝ܂ ܡܛܠ ܕܥܠ ܒܒܠ ܬܪܥܝܬܗ ܠܡܚܒܠܘܬܗ݀܂ ܡܛܠ ܕܦܘܪܥܢܗ ܗܘ ܕܡܪܝܐ݂ ܘܬܒܥܬܐ ܕܗܝܟܠܗ܂
51:12	ܥܠ ܫܘܪ̈ܐ ܕܒܒܠ݂ ܫܩܘܠܘ ܐܬܐ܂ ܐܩܝܡܘ ܡܛܪܬܐ݂ ܘܛܒ݁ܥܘܗ݀ ܒܡ̈ܝܐ܂ ܡܛܠ ܕܥܒ݂ܕ ܡܪܝܐ ܡܕܡ ܕܐܬܪܥܝ ܒܒܒܠ܃
51:13	ܕܫ݂ܪܝܐ ܗܘܬ ܒܡ̈ܝܐ ܣ̈ܓܝܐܐ܂ ܣ̈ܓܝܐܝܢ ܓܙܝ̈ܟܝ܂ ܡ݂ܛܐ ܩܨܟܝ݁ ܘܥܫ݂ܢܬ݁ ܡܚܘܬܟܝ܂
51:14	ܐܝܡ݂ܐ ܡܪܝܐ ܚܝܠܬܢܐ ܒܢܦܫܗ݂܂ ܕܐܡܠܝܟܝ ܐܢܫܐ݂ ܐܝܟ ܩܡܨܐ܂܂ ܘܢܥ݁ܢܘܢ ܥܠܝܟܝ ܘܢܐܡܪܘܢ܃ ܗ݀ܘܝ ܗ݀ܘܝ܂
51:15	ܡܪܝܐ ܥܒ݂ܕ ܐܪܥܐ݂ ܒܚܝܠܗ܂ ܘܐܬܩܢ ܬܒܝܠ݂ ܒܚܟܡܬܗ܂ ܘܒܣܘܟܠܗ݂ ܡܬ݂ܚ ܫܡܝܐ܂
51:16	ܝܗ݀ܒ ܩܠܐ ܕܪܓܘܫܝܐ ܕܡ̈ܝܐ ܒܫܡܝܐ܂ ܡܣ݁ܩ ܥܢ̈ܢܐ ܡܢ ܣܘ̈ܦܝܗ݀ ܕܐܪܥܐ܂ ܘܒܪ̈ܩܐ ܠܡܛܪܐ݂ ܥܒܕ܂ ܡ݁ܦܩ ܪ̈ܘܚܐ ܡܢ ܐܘܨܪ̈ܘܗܝ܂
51:17	ܫ݂ܛܐ ܟܠ ܒܪܢܫ ܡܢ ܝܕܥܬܐ܂ ܒܗܬܘ ܟܠ ܩܝܢ̈ܝܐ ܡܢ ܓ̈ܠܝܦܐ ܕܥܒ݂ܕܘ܂ ܡܛܠ ܕܕܓܠܘܬܐ ܢܣ݂ܟܘ݂ ܘܠܝܬ ܒܗܘܢ ܪܘܚܐ܂
51:18	ܠܐ݁ ܡܕܡ ܐܢܘܢ܂ ܘܥ݁ܒ̈ܕܐ ܐܢܘܢ݂ ܫ̈ܛܝܐ܂ ܒܙܒܢܐ ܕܡܬ݁ܦܩܕܝ݂ܢ ܢܐܒܕܘܢ܂
51:19	ܠܐ ܐܝܟ ܕܗܠܝܢ ܡܢ݁ܬܗ ܕܝܥܩܘܒ܂ ܐܠܐ ܡ݁ܢ ܕܒ݂ܪܐ ܟܠ݂ ܗܘ݂ܝܘ ܡܢܬ݁ܗܘܢ܂ ܘܫܒܛܐ ܕܝܪܬܘܬܗܘܢ݂ ܡܪܝܐ ܚܝܠܬܢܐ ܫܡܗ܀
51:20	ܛܝ݁ܒܘ ܠܝ ܡܐ̈ܢܐ ܕܩܪܒܐ܂ ܐܒ݁ܕܪ ܒܟܝ ܥܡ̈ܡܐ݂ ܘܐܚ݁ܒܠ ܒܟܝ ܡ̈ܠܟܘܬܐ܂
51:21	ܘܐܒ݁ܕܪ ܒܟܝ݁ ܪ̈ܟܫܐ݂ ܘܪ̈ܟܒܝܗܘܢ܂ ܘܐܒ݁ܕܪ ܒܟܝ݁ ܡܪ̈ܟܒܬܐ݂ ܘܪ̈ܟܒܝܗܝܢ܂
51:22	ܘܐܒ݁ܕܪ ܒܟܝ݁ ܓܒܪ̈ܐ݂ ܘܢܫ̈ܐ܂ ܘܐܒ݁ܕܪ ܒܟܝ݁ ܣܒ̈ܐ݂ ܘܥ̈ܠܝܡܐ܂ ܘܐܒ݁ܕܪ ܒܟܝ݁ ܓܕܘ̈ܕܐ݂ ܘܒܬ̈ܘܠܬܐ܂
51:23	ܘܐܒ݁ܕܪ ܒܟܝ݁ ܪܥܝܐ݂ ܘܓܙܪܗ܂ ܘܐܒ݁ܕܪ ܒܟܝ݁ ܐܟܪܐ݂ ܘܦܕܢܗ܂ ܘܐܒ݁ܕܪ ܒܟܝ݁ ܛܪ̈ܘܢܐ݂ ܘܫ̈ܠܝܛܢܐ܂
51:24	ܘܐܦܪܘܥ ܠܒܒܠ ܘܠܟܠܗܘܢ ܥܡܘܪ̈ܐ ܕܟ̈ܠܕܝܐ܃ ܟܠܗ݀ ܒܝܫܬܐ ܕܥܒ݂ܕܘ ܒܨܗܝܘܢ ܠܥܢ̈ܝܟܘܢ ܐܡ݁ܪ ܡܪܝܐ܀܂
51:25	ܗܐ ܐܢܐ ܥܠܝܟ ܛܘܪܐ ܡܚܒܠܢܐ ܐܡ݁ܪ ܡܪܝܐ܃ ܕܚܒܠ ܠܟܠܗ݀ ܐܪܥܐ܂ ܘܐܪܝܡ ܐܝ݂ܕܝ ܥܠܝܟ܃ ܘܐܩ݂ܠܟ ܡܢ ܟܐܦܐ܂ ܘܐܥܒܕܟ݂ ܠܛܘܪܐ ܝܩܝܕܐ܂
51:26	ܘܠܐ ܢܣܒܘܢ ܡܢܟ ܟܐܦܐ ܠܙܘܝܬܐ ܘܟܐܦܐ ܠܫܬܐܣܬܐ܂ ܐܠܐ ܠܚܘܪܒܐ ܠܥܠܡ ܬܗܘܐ ܐܡ݁ܪ ܡܪܝܐ܂
51:27	ܫܩܘܠܘ ܐܬܐ ܒܐܪܥܐ܂ ܩܪܘ ܫܝܦܘܪܐ ܒܥܡ̈ܡܐ܂ ܛܝ݁ܒܘ ܥܠܝܗ݀ ܥܡ̈ܡܐ܂ ܐܫܡ݁ܥܘ ܥܠܝܗ݀ ܡ̈ܠܟܘܬܐ ܕܐܪܕܛ܂ ܘܕܐܪܡ݂ܢܝ݂ ܘܕܐܫܟܢܙ܂ ܦܩܘܕܘ ܥܠܝܗ ܐܒܕܢܐ܂ ܐܣܩܘ ܪ̈ܟܫܐ݂ ܐܝܟ ܙܚܠܐ ܛܝܒܘ
51:28	ܥܠܝܗ݀ ܥܡ̈ܡܐ܂ ܠܡ݁ܠܟܐ ܕܡ݁ܕܝ݁ ܘܠܚܐܪ̈ܘܗܝ݂ ܘܠܟܠܗܘܢ ܫ̈ܠܝܛܢܘܗܝ܂
51:29	ܘܬܙܘܥ ܐܪܥܐ ܘܬ݂ܬܘܪ܂ ܡܛܠ ܕܩܡ݂ܬ݁ ܥܠ ܒܒܠ ܡܚܫܒܬܗ ܕܡܪܝܐ܃ ܠܡܚܪܒܘ ܐܪܥܐ ܕܒܒܠ ܡܢ ܒܠܝ ܕܝܬ݁ܒ܂
51:30	ܣܦܘ ܓܒܪ̈ܐ ܕܒܒܠ ܠܡܬܟܬ݁ܫܘ ܥܡ ܝܬ̈ܒܝ ܡܨܪܘܬ܂ ܐܬܬ݂ܒܪܬ݁ ܓܢܒܪܘܬܗܘܢ݁ ܘܗܘ݂ܘ݂ ܐܝܟ ܢܫ̈ܐ܂ ܥܩܘܪܘ ܡܫ̈ܟܢܝܗ݀ ܬܒܪܘ ܬܪ̈ܥܝܗ݀܂
51:31	ܕܪܗ݀ܛ݂ ܠܘܩܒܠ ܕܪܗ݀ܛ݂ ܢ݁ܪܗܛ܂ ܘܕܡܚ݁ܘܐ݂ ܠܘܩܒܠ ܕܡܚ݁ܘܐ܂ ܠܡܚ݁ܘܝܘ ܠܡ݁ܠܟܐ ܕܒܒܠ܃ ܕܐܬܬܚܕܬ ܡܕܝܢܬܗ ܡܢ ܚܕܪ̈ܝܗ݀܂
51:32	ܘܡܥܒܪ̈ܬܗ݀ ܐܬܬܚܕ܂ ܘܐ̈ܓܡܝܗ݀ ܐܝܩܕܘ ܒܢܘܪܐ܂ ܘܟܠܗܘܢ ܓܒܪ̈ܝܗ݀ ܩܪ̈ܒܬܢܐ݂ ܐܬ݁ܕܠܚܘ܀܂
51:33	ܡܛܠ ܕܗܟܢܐ ܐܡ݁ܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܒܪܬ݁ ܒܒܠ܃ ܐܝܟ ܐܕܪܐ ܕܡ݂ܛܐ ܙܒܢ ܕܪܟܬܗ܂ ܥܕ ܩܠܝܠ݂ ܘܡ݂ܛܐ ܩܛܦܗ݀܂
51:34	ܐܡ݂ܪܬ݁ ܐܘܪܫܠܡ܃ ܐܟܠܢܝ݁ ܘܒܙܢܝ ܢܒܘ݁ܟܕܢܨܪ ܡ݁ܠܟܐ ܕܒܒܠ܂ ܐܩܝܡܢܝ݂ ܐܝܟ ܡܐܢܐ ܣܪܝܩܐ܂ ܒܠܥܢܝ݂ ܐܝܟ ܬܢܝܢܐ܂ ܡܠ݂ܐ ܟܪܣܗ ܡܢ ܥܘܕܢܝ݂ ܘܐܛܥܝܢܝ܂
51:35	ܒܙܬܝ ܘܩܢܝܢܝ݂܂ ܠܒܒܠ ܐܫܬܒܝ܂ ܘܕܡܝ݂ ܥܠ ܥܡܘܪ̈ܐ ܕܟ̈ܠܕܝܐ ܬܐܡܪ ܐܘܪܫܠܡ܂
51:36	ܡܛܠ ܗܢܐ݂ ܗܟܢܐ ܐܡ݁ܪ ܡܪܝܐ܂ ܗܐ ܕܐ݁ܢ ܐܢܐ ܕܝܢ݂ܟܝ݂ ܘܡܬܢ݁ܩܡ ܐܢܐ ܢܩܡܬܟܝ܂ ܘܐܚܪܒ ܝܡܐ ܕܒܒܠ݂ ܘܐܘܒܫ ܡܒ̈ܘܥܘܗܝ܂
51:37	ܘܬܗܘܐ ܒܒܠ ܚܪܒܬܐ݂ ܡܥܡܪܐ ܠܝܪ̈ܘܪܐ܂ ܘܠܬܡܗܐ݁ ܘܠܡܫܪܘܩܝܬܐ ܡܢ ܒܠܝ ܕܝܬ݁ܒ ܒܗ݀܂
51:38	ܐܝܟ ܐܪ̈ܝܘܬܐ ܢܢܗ݂ܡܘܢ܂ ܘܢܥܪܘܢ݂ ܐܝܟ ‍{‍ܓܕ̈ܝܐ‍}‍‍<‍ܓܘܪ̈ܝܐ‍>‍ ܕܐܪ̈ܝܘܬܐ܂
51:39	ܒܚܡܬܐ݁ ܐܥܒܕ ܡܫܬܝܗܘܢ܂ ܘܐܪܘܐ ܐܢܘܢ݂ ܘܢܬ݂ܬܒܪܘܢ܂ ܘܢܕܡ݂ܟܘܢ ܫܢܬܐ ܠܥܠܡ݂ ܘܠܐ ܢܬ݂ܬܥܝ݂ܪܘܢ ܐܡ݁ܪ ܡܪܝܐ܂
51:40	ܘܐܫܠܡ ܐܢܘܢ݂ ܐܝܟ ܡ̈ܦܛܡܐ ܠܩܛܠܐ܂ ܘܐܝܟ ܕܟܪ̈ܐ ܘܓܕ̈ܝܐ ܠܢܟܣܬܐ܂
51:41	ܐܝܟܢܐ ܐܬܬ݂ܚܕܬ݁ ܐܪܫܟܝܬܐ ܬܫܒܘܚܬܐ ܕܟܘܠܗ݀ ܐܪܥܐ܂ ܐܝܟܢܐ ܗܘܬ݁ ܠܬܡܗܐ ܒܒܠ ܒܥܡ̈ܡܐ܂
51:42	ܣ݁ܠ݂ܩ ܥܠ ܒܒܠ ܝܡܐ܃ ܘܒܣܘܓܐܐ ܕܓ̈ܠܠܘܗܝ݂ ܐܬܟܣ݂ܝܬ݁܂
51:43	ܗ̈ܘܝ ܩܘܪ̈ܝܗ݀ ܠܬܡܗܐ܃ ܐܝܟ ܐܪܥܐ ܚܪܒܬܐ ܘܨܕܝܬܐ܂ ܠܐ݁ ܢܬܒ ܒܗܝܢ ܓܒܪ܂ ܘܠܐ݁ ܢܥܡܪ ܒܗܝܢ ܒܪܢܫ܂
51:44	ܘܐܦܩܘܕ ܥܠ ܒܝܠ ܒܒܒܠ݂ ܘܐܦܩ ܙܘܬܪ̈ܘܗܝ ܡܢ ܦܘܡܗ܂ ܘܠܐ ܢܕܚܠܘܢ ܠܗ ܬܘܒ ܥܡ̈ܡܐ܂ ܘܐܦ ܫܘܪ̈ܝܗ݀ ܕܒܒܠ ܐܪ̈ܘܝܚܐ݂ ܢܦܠܘܢ܂
51:45	ܦܘܩܘ ܡܢ ܓܘܗ݀ ܥܡܝ܂܂ ܘܦܠܛ݁ܘ ܓܒܪ ܢܦܫܗ܂ ܡܢ ܚܡܬܐ ܕܪܘܓܙܗ ܕܡܪܝܐ܂
51:46	ܕܠܡܐ ܢܬ݂ܬܒܪ ܠܒܟܘ݁ܢ܂ ܘܬܕܚܠܘܢ ܡܢ ܛܒ݂ܐ ܕܡܫ݂ܬܡܥ ܒܐܪܥܐ܂ ܘܢܐܬܐ ܒܗ݀ ܒܫܢܬܐ ܗ݀ܝ݂ ܛܒ݂ܐ܂ ܘܒܬܪܗ݀ ܕܫ݁ܢܬܐ݂ ܛܒ݂ܐ ܐܚܪܢܐ܂ ܘܢܗܘܐ ܚܛܘܦܝܐ ܒܐܪܥܐ܂ ܢܩܘܡ ܫܠܝܛܐ ܥܠ ܫܠܝܛܐ܂
51:47	ܡܛܠ ܗܢܐ ܗܐ ܝܘܡ̈ܬܐ ܐܬ݁ܝܢ ܐܡ݁ܪ ܡܪܝܐ܃ ܘܐܦܩܘܕ ܥܠ ܓܠܝ̈ܦܝܗ݀ ܕܒܒܠ܂ ܘܟܠܗ݀ ܐܪܥܐ݂ ܬܐܒܕ܂ ܘܟܠܗܘܢ ܩ̈ܛܝܠܝܗ݀ ܢܦܠ݂ܘܢ ܒܓܘܗ݀܂
51:48	ܘܢܚ݂ܕܘܢ ܥܠ ܒܒܠ܃ ܫܡܝܐ݁ ܘܐܪܥܐ݂ ܘܟܠ ܕܒܗܘܢ܀܂ ܡܛܠ ܕܡܢ ܓܪܒܝܐ ܢܐܬܘܢ ܥܠܝܗ݀ ܒܙܘ̈ܙܐ ܐܡ݁ܪ ܡܪܝܐ܂
51:49	ܘܐܦ ܒܒܒܠ݂ ܢܦܠܘܢ ܩ̈ܛܝܠܐ ܕܐܝܣܪܝܠ܂ ܘܐܦ ܡܢ ܒܒܠ݂ ܢܦ݂ܠܘܢ ܩ̈ܛܝܠܐ ܒܟܠܗ݀ ܐܪܥܐ܂
51:50	ܐܝܠܝܢ ܕܐܬ݁ܦܠܛܘ ܡܢ ܚܪܒܐ܃ ܙܠܘ݂ ܘܠܐ ܬܩܘ݂ܡܘܢ܂ ܐܬܕܟ݂ܪܘ ܡܢ ܪܘܚܩܐ ܠܡܪܝܐ܂ ܘܐܘܪܫܠܡ ܬ݁ܣ݂ܩ ܥܠ ܠܒܟܘܢ܂ ܘܢܐܡܪܘܢ ܕܒܝܬ ܐܝܣܪܝܠ݁
51:51	ܒܗܬܢ݂ ܛܒ܂ ܡܛܠ ܕܫܡ݂ܥܢ ܚܣܕܐ܃ ܘܟܣ݂ܝܬ݁ ܒܗܬܬܐ ܠܐ̈ܦܝܢ܂ ܡܛܠ ܕܥܠܘ ܢܘܟܪ̈ܝܐ ܠܡܩܕܫܗ ܕܡܪܝܐ܀
51:52	ܡܛܠ ܗܢܐ ܗܐ ܝܘܡ̈ܬܐ ܐܬ݁ܝܢ ܐܡ݁ܪ ܡܪܝܐ܂ ܘܐܦܩܘܕ ܥܠ ܒܒܠ݂ ܘܥܠ ܓܠܝܦ̈ܝܗ݀܂ ܘܒܟܘܠܗ݀ ܐܪܥܐ݂ ܢܦܠܘܢ ܩ̈ܛܝܠܝܗ݀܂
51:53	ܐܢ ܬܣ݂ܩ ܒܒܠ ܠܫܡܝܐ܃ ܘܐܢ ܬܣܝܡ ܒܪܘܡܐ ܥܘܫܢܗ݀܃ ܡܢ ܩܕܡܝ ܢܐܬܘܢ ܥܠܝܗ݀ ܒܙܘ̈ܙܐ ܐܡ݁ܪ ܡܪܝܐ܂
51:54	ܩܠܐ ܕܝܠܠܬܐ ܡܢ ܒܒܠ܂ ܘܬܒܪܐ ܪܒܐ ܡܢ ܐܪܥܐ ܕܟ̈ܠܕܝܐ܂
51:55	ܡܛܠ ܕܒܙ ܡܪܝܐ ܠܒܒܠ܂ ܘܐܘܒܕ ܡܢܗ݀ ܒܢ̈ܝ ܐܢܫܐ݂ ܘܒܥܝܪܐ܂ ܩܠܐ ܪܒܐ݂ ܐܝܟ ܡ̈ܝܐ ܣ̈ܓܝܐܐ ܕܐ݁ܙܠ ܩܠܗܘܢ܂
51:56	ܡܛܠ ܕܐܬ݂ܘ ܥܠ ܒܒܠ ܒܙܘ̈ܙܐ܃ ܘܐܬܬܚܕܘ ܓܢܒܪ̈ܝܗ݀ ܘܐܬ݁ܬܒܪ ܩܫ̈ܬܬܗܘܢ܂ ܡܛܠ݂ ܕܐܠܗܐ ܦܪܘܥܐ ܡܪܝܐ܂ ܡܦܪܥ݂ ܢܦܪܘܥ ܐܢܘܢ܂
51:57	ܘܐܪܘܐ ܪ̈ܘܪܒܢܝܗ݀ ܘܚ̈ܟܝܡܝܗ݀܂ ܘܚܐܪ̈ܝܗ݀ ܘܫ̈ܠܝܛܢܝܗ݀ ܘܓܢܒܪ̈ܝܗ݀܂ ܘܢܕܡܟܘܢ ܫܢܬܐ ܠܥܠܡ ܘܠܐ ܢܬܬܥܝܪܘܢ܃ ܐܡ݁ܪ ܡ݁ܠܟܐ݂ ܡܪܝܐ ܚܝܠܬܢܐ ܫܡܗ܂
51:58	ܗܟܢܐ ܐܡ݁ܪ ܡܪܝܐ ܚܝܠܬܢܐ܂ ܫܘܪ̈ܝܗ݀ ܕܒܒܠ ܐܪ̈ܘܝܚܐ݂ ܡܬܥܩ݁ܪܘ ܢܬܥܩܪܘܢ܂ ܘܬܪ̈ܥܝܗ݀ ܪ̈ܡܐ݂ ܒܢܘܪܐ ܢܐ݂ܩܕܘܢ܂ ܘܢܠܐܘܢ ܥܡ̈ܡܐ݂ ܣܪܝܩܐܝܬ܂ ܘܐܡ̈ܘܬܐ݂ ܒܢܘܪܐ ܢܬܛܪ̈ܦܢ܀܂
51:59	ܦܬܓܡܐ ܕܦܩ݁ܕ ܐܪܡܝܐ ܢܒܝܐ ܠܫܪܝܐ ܒܪ ܢܪܝܐ ܒܪ ܡܥܣܝܐ܃ ܟܕ ܐܙܠ݂ ܥܡ ܨܕܩܝܐ ܡ݁ܠܟܐ ܕܝܗܘܕܐ ܠܒܒܠ܃ ܒܫܢܬ ܚܕܥܣܪܐ ܕܡܠܟܘܬܗ܂ ܘܫܪܝܐ݂ ܪܒ ܡܫܪܝܬܐ ܗܘܐ܂
51:60	ܘܟܬ݂ܒ ܐܪܡܝܐ ܟܠܗ݀ ܒܝܫܬܐ ܕܐܬܝܐ ܥܠ ܒܒܠ݂ ܒܣܦ݂ܪܐ ܚܕ܂ ܟܠܗܘܢ ܦܬ̈ܓܡܐ ܗܠܝܢ ܕܟܬܝܒܝܢ ܥܠ ܒܒܠ܂
51:61	ܘܐܡ݂ܪ ܐܪܡܝܐ ܠܫܪܝܐ܂ ܡܐ ܕܥܠ݂ܬ ܠܓܘ ܒܒܠ܃ ܩܪܝ ܘܚܙܝ ܟܘܠܗܘܢ ܦܬܓܡ̈ܐ ܗܠܝܢ܂
51:62	ܘܐܡ݂ܪ܂ ܡܪܝܐ݂ ܐܢܬ ܐܡ݂ܪܬ ܥܠ ܐܬܪܐ ܗܢܐ ܠܡܘܒܕܘܬܗ܂ ܕܠܐ ܢ݁ܗܘܐ ܒܗ ܕܝܬ݁ܒ ܡܢ ܒܢ̈ܝ ܐܢܫܐ ܘܥܕܡܐ ܠܒܥܝܪܐ܂ ܡܛܠ ܕܠܚܘܪܒܐ݂ ܠܥܠܡ ܢܗܘܐ܂
51:63	ܘܡܐ ܕܫܠ݂ܡܬ݁ ܠܡܩܪܐ ܒܣܦ݂ܪܐ ܗܢܐ܃ ܩܛܘܪ ܒܗ ܟܐܦܐ݂ ܘܫܕܝܘܗܝ ܒܦܪܬ܂
51:64	ܘܐܡ݂ܪ܂ ܗܟܢܐ ܬܦܠ ܒܒܠ ܘܠܐ ܬܩܘܡ܃ ܡܢ ܩܕܡ ܒܝܫܬܐ ܕܡܝ݁ܬܐ ܐܢܐ ܥܠܝܗܘܢ݂ ܘܢܬܛܪܦܘܢ܂܀܂