← Back
The Comprehensive Aramaic Lexicon
← Return to the Text Browser
click on the file description for more information

62014: P Ez

Click on a word for lexical analysis
Click on a red-colored coordinate for comments and/or translations of the line

previous chapter


44:01 ܘܐܗܦܟܢܝ ܠܐܘܪܚܐ ܕܬܪܥܐ ܒܪܝܐ ܕܡܩܕܫܐ ܕܚܐ݁ܪ ܠܡܕܢܚܐ܂ ܘܚܙ݁ܝܬܗ ܕܐܚܝܕ܂
44:02 ܘܐܡܪ ܠܝ ܡܪܝܐ܂ ܬܪܥܐ ܗܢܐ ܢܗܘܐ ܐܚܝܕ ܘܠܐ ܢܬܦܬܚ܂ ܘܐܢܫ ܠܐ ܢܥܘܠ ܒܗ܂ ܡܛܠ ܕܡܪܝܐ ܐܠܗܐ ܕܐܝܣܪܝܠ ܥܐ݁ܠ ܒܗ ܢܗܘܐ ܐܚܝܕ܂
44:03 ܡܕܒܪܢܐ ܢܬܒ ܒܗ܂ ܘܢܐܟܘܠ ܠܚܡܐ ܩܕܡ ܡܪܝܐ܂ ܡܢ ܐܘܪܚܐ ܕܬܪܥܐ ܕܐܣܟܘܦܬܐ ܢܥܘܠ܂ ܘܡܢܗ݀ ܢܦܘܩ܂
44:04 ܘܐܥܠܢܝ ܠܐܘܪܚܐ ܕܬܪܥܐ ܓܪܒܝܝܐ ܕܩܕܡ ܒܝܬܐ ܘܚܙ݁ܝܬ ܕܐܬܡܠܝ ܒܝܬܐ ܫܘܒܚܗ ܕܡܪܝܐ܂ ܘܢܦܠ݁ܬ ܥܠ ܐ̈ܦܝ܂
44:05 ܘܐܡܪ ܠܝ ܡܪܝܐ܂ ܒܪܢܫܐ܂ ܣܝܡ ܒܠܒܟ ܘܚܙܝ ܒܥܝܢ̈ܝܟ܂ ܘܫܡܥ ܒܐ̈ܕܢܝܟ ܟܘܠ ܡܕܡ ܕܡܡܠܠ ܐܢܐ ܥܡܟ܂ ܘܟܠܗܘܢ ܢܡܘܣ̈ܘܗܝ ܕܒܝܬܐ ܘܟܠܗܝܢ ܨܘܪ̈ܬܗ܂ ܘܣܝܡ ܠܒܠܟ ܡ̈ܥܠܢܘܗܝ ܕܒܝܬܐ ܘܡܦܩ̈ܢܘܗܝ ܕܡܩܕܫܐ܂
44:06 ܘܐܡܪ ܠܒܝܬܐ ܕܐܝܣܪܝܠ ܡܡܪܡܪܢܐ܂ ܗܟܢܐ ܐܡ݁ܪ ܡܪܐ ܡܪ̈ܘܬܐ܂ ܠܐ ܟܕܘ ܠܟܘܢ ܟܠܗ݀ ܛܢܦܘܬܟܘܢ ܕܒܝܬ ܐܝܣܪܝܠ܂
44:07 ܐܠܐ ܐܦ ܡܝܬܝܢ ܐܢܬܘܢ ܡܢ ܒܢ̈ܝ ܢܘܟܪ̈ܝܐ ܕܥܘܪ̈ܠܝܢ ܒܠܒܗܘܢ܂ ܘܥܘܪ̈ܠܝܢ ܒܒܣܪܗܘܢ܂ ܘܗ݀ܘܝܢ ܒܡܩܕܫܝ ܘܡܛܢܦܝܢ ܒܝܬܝ܂ ܘܡܩܪܒܝܢ ܐܢܬܘܢ ܥܠ ܠܚܡܝ ܬܪܒܐ ܘܕܡܐ܂ ܘܡܒܛܠܝܢ ܐܢܬܘܢ ܩܝܡܝ ܒܟܠܗ݀ ܛܢܦܘܬܟܘܢ܂
44:08 ܘܠܐ ܢ݁ܛܪܝܢ ܐܢܬܘܢ ܢܛܘܪ̈ܬܐ ܕܡܩܕܫܝ܂ ܐܠܐ ܥܒܕܬܘܢ ܢܛܪ̈ܝ ܡܛܪܬܐ ܕܡܩܕܫܝ ܢܛܘܪ̈ܝܟܘܢ ܕܝܠܟܘܢ܂
44:09 ܗܟܢܐ ܐܡ݁ܪ ܡܪܐ ܡܪ̈ܘܬܐ܂ ܟܠ ܒܪ ܢܘܟܪ̈ܝܐ ܕܥܪܘܠ ܒܠܒܗ ܘܥܪܘܠ ܒܒܣܪܗ܂ ܠܐ ܢܥܘܠ ܠܡܩܕܫܝ܂ ܘܠܐ ܒܪ ܢܘܟܪ̈ܝܐ ܕܐܝܬ ܒܝܢܬ ܒܢ̈ܝ ܐܝܣܪܝܠ܂
44:10 ܘܐܦܠܐ ܠܘܝ̈ܐ ܕܦܪܩܘ ܡܢܝ܂ ܟܕ ܛܥܘ ܒܢ̈ܝ ܐܝܣܪܝܠ ܡܢܝ ܒܬܪ ܦܬܟܪ̈ܝܗܘܢ܂ ܘܩܒܠܘ ܥܘ݂ܠܗܘܢ܂
44:11 ܘܗܘܘ ܒܡܩܕܫܝ܂ ܘܡܫܡܫܝܢ ܗܘܘ ܒܬܪܥܐ ܕܒܝܬܐ܂ ܗܢܘܢ ܢܟܣܘܢ ܝܩ̈ܕܐ ܫܠܡܐ ܘܕܒܚ̈ܐ ܕܥܡܐ܂ ܘܗܢܘܢ ܢܩܘܡܘܢ ܩܕܡܝܗܘܢ ܘܢܫܡܫܘܢ ܐܢܘܢ܂
44:12 ܥܠ ܕܫܡܫܘ ܐܢܘܢ ܩܕܡ ܦܬܟܪ̈ܝܗܘܢ܂ ܘܗܘܘ ܠܬܘܩܠܬܐ ܕܥܘ݂ܠܐ ܠܒܢ̈ܝ ܐܝܣܪܝܠ܂ ܡܛܠ ܗܢܐ ܐܪܝܡ݁ܬ ܐܝܕܝ ܥܠܝܗܘܢ ܐܡ݁ܪ ܡܪܐ ܡܪ̈ܘܬܐ܂ ܘܩܒܠܘ ܥܘ݂ܠܗܘܢ܂
44:13 ܘܠܐ ܢܩܪܒܘܢ ܩܕܡܝ ܠܡܫܡܫܘܬܢܝ܂ ܘܠܐ ܢܬܩܪܒܘܢ ܠܟܠܗܘܢ ܩ̈ܘܕܫܝ ܒܝܬ ܩܕܘܫ ܩ̈ܘܕܫܐ܂ ܘܢܩܒܠܘܢ ܟܠܗ݀ ܒܗܬܬܗܘܢ ܘܟܘܠܗ݀ ܛܢܦܘܬܗܘܢ ܕܥܒܕܘ܂
44:14 ܘܐܥܒܕ ܐܢܘܢ ܢܛܪ̈ܝ ܡܛܪܬܐ ܕܒܝܬܐ܂ ܘܥ݁ܒ̈ܕܝ ܥܒ݁ܕܐ ܕܟܠ ܡܕܡ ܕܗ݀ܘܐ ܒܗ܂
44:15 ܘܟܗ̈ܢܐ ܘܠܘ̈ܝܐ ܒܢ̈ܝ ܨܕܘܩ܂ ܕܢܛܪܘ ܡܛܪܬܐ ܕܡܩܕܫܝ܂ ܟܕ ܛܥܘ ܒܢ̈ܝ ܐܝܣܪܝܠ ܡܢܝ܂ ܗܢܘܢ ܢܩ݂ܪܒܘܢ ܠܘܬܝ ܠܡܫܡܫܘܬܢܝ܂ ܘܗܢܘܢ ܢܩܘܡܘܢ ܩܕܡܝ܂ ܘܢܩܪܒܘܢ ܠܝ ܬܪܒܐ ܘܕܡܐ ܐܡ݁ܪ ܡܪܐ ܡܪ̈ܘܬܐ܂
44:16 ܗܢܘܢ ܢܥܠܘܢ ܠܡܩܕܫܝ܂ ܘܗܢܘܢ ܢܩܪܒܘܢ ܠܦܬܘܪܝ܂ ܕܢܫܡܫܘܢܢܝ ܘܢܛܪܘܢ ܢܛܘܪ̈ܬܝ܂
44:17 ܘܡܐ ܕܥܐ݁ܠܝܢ ܒܬܪܥܐ ܕܕܪܬܐ ܓܘܝܬܐ܂ ܡܐ̈ܢܐ ܕܟܬܢܐ ܢܠܒܫܘܢ܂ ܘܕܥܡܪܐ ܠܐ ܢܠܒܫܘܢ܂ ܘܡܐ ܕܡܫܡܫܝܢ ܒܬܪܥܐ ܕܕܪܬܐ ܓܘܝܬܐ܂ ܐܦ ܠܓܘ܂
44:18 ܡܨܢ̈ܦܬܐ ܕܟܬܢܐ ܢܣܝܡܘܢ ܒܪ̈ܝܫܝܗܘܢ܂ ܘܦܪ̈ܙܘܡܐ ܕܟܬܢܐ ܢܐܣܪܘܢ ܒܚ̈ܨܝܗܘܢ܂
44:19 ܘܡܐ ܕܢ݁ܦܩܝܢ ܠܕܪܬܐ ܒܪܝܬܐ ܠܘܬ ܥܡܐ܂ ܢܫܠܚܘܢ ܡܐ̈ܢܝܗܘܢ ܕܡܫܡܫܝܢ ܒܗܘܢ܂ ܘܢܫܒܩܘܢ ܐܢܘܢ ܒܐܟܣܕܪܐ ܕܩܘܕܫܐ܂ ܘܢܠܒܫܘܢ ܡܐ̈ܢܐ ܐ̈ܚܪܢܐ܂ ܕܠܐ ܢܩܕܫܘܢܗ ܠܥܡܐ ܒܡ̈ܐܢܝܗܘܢ܂
44:20 ܪ̈ܝܫܝܗܘܢ ܠܐ ܢܓܪܥܘܢ܂ ܘܩ̈ܘܨܬܗܘܢ ܠܐ ܢܪܒܘܢ܂ ܐܠܐ ܡܣܦܪܘ ܢܣܦܪܘܢ ܪ̈ܝܫܝܗܘܢ܂
44:21 ܘܚܡܪܐ ܠܐ ܢܫܬܘܢ ܟܗ̈ܢܐ ܡܐ ܕܥܐ݁ܠܝܢ ܠܕܪܬܐ ܓܘܝܬܐ܂
44:22 ܘܐܪܡܠܬܐ ܘܫܒܝܩܬܐ ܠܐ ܢܣܒܘܢ ܠܗܘܢ ܢܫ̈ܐ܂ ܐܠܐ ܐܢ ܒܬܘܠܬܐ ܡܢ ܙܪܥܐ ܕܐܝܣܪܝܠ ܐܘ ܐܪܡܠܬܐ ܕܡܪܡܠܐ ܡܢ ܟܗܢܐ ܢܣܒܘܢ܂
44:23 ܘܢܠܦܘܢ ܠܥܡܝ ܒܝܬ ܩܘܕܫܐ ܠܚܘܠܐ܂ ܘܢܘܕܥܘܢܗ/ܘܢܕܥܘܢܗ#3#/ ܒܝܬ ܡܣܝܒܐ ܠܕܟܝܐ܂
44:24 ܘܥܠ ܕܝ̈ܢܐ ܗܢܘܢ ܢܩܘܡܘܢ ܠܡܕܢ܂ ܘܒܕܝܢ̈ܝ ܢܕܘܢܘܢ܂ ܘܢܡܘ̈ܣܝ ܘܦܘܩ̈ܕܢܝ ܢܛܪܘܢ܂ ܒܟܠܗܘܢ ܙܒ̈ܢܐ ܕܡܘ̈ܥܕܝ܂ ܘܫ̈ܒܝ ܢܩܕܫܘܢ܂
44:25 ܘܥܠ ܡܝܬܐ ܕܒܪܢܫܐ ܠܐ ܢܥܠܘܢ ܕܠܐ ܢܣܬܝܒܘܢ܂ ܐܠܐ ܐܢ ܒܐܒܘܗܝ ܐܘ ܒܐܡܗ܂ ܐܘ ܒܒܪܗ ܐܘ ܒܒܪܬܗ܂ ܐܘ ܒܐܚܘܗܝ ܐܘ ܒܚܬܗ ܒܬܘܠܬܐ ܕܠܐ ܗܘܬ ܠܓܒܪܐ ܢܣܬܝܒܘܢ܂
44:26 ܘܡܢ ܒܬܪ ܕܡܣܬܝܒ܂ ܢܡܢܐ ܠܗ ܫܒܥܐ ܝܘܡ̈ܝܢ ܘܗܝܕܝܢ ܢܬܕܟܐ܂
44:27 ܘܒܝܘܡܐ ܕܥܐ݁ܠ ܠܡܩܕܫܐ ܠܕܪܬܐ ܓܘܝܬܐ ܠܡܫܡܫܘ ܒܩܘܕܫܐ/ܒܡܩܕܫܐ#3#/܂ ܢܩܪܒ ܬܕܟܝܬܗ ܐܡ݁ܪ ܡܪܐ ܡܪ̈ܘܬܐ܂
44:28 ܘܬܗܘܐ ܠܗܘܢ ܝܘܪܬܢܐ/ܠܝܘܪܬܢܐ#3#/܂ ܐܢܐ ܐܢܐ ܝܘܪܬܢܗܘܢ܂ ܘܡܢܬܐ ܠܐ ܬܬܠܘܢ ܠܗܘܢ ܒܐܝܣܪܝܠ܂ ܐܢܐ ܐܢܐ ܡܢܬܗܘܢ܂
44:29 ܣܡܝܕܐ ܘܬܕܟܝܬܐ ܕܚ̈ܛܗܐ ܗܢܘܢ ܢܐܟܠܘܢ܂ ܘܟܘܠ ܚܪܡܐ ܕܒܐܝܣܪܝܠ ܕܝܠܗܘܢ ܢܗܘܐ܂

44:30 ܘܪܝܫ ܟܠ ܒܘܟܪ̈ܐ/ܒܟܪ̈ܐ#3#/ ܕܟܠܗ ܦܘܪܫܢܟܘܢ ܕܦܪܫ݁ܝܢ ܐܢܬܘܢ ܕܟܗ̈ܢܐ ܢܗܘܐ܂ ܘܪܝܫ ܐܨ̈ܘܬܟܘܢ ܗܒܘ ܠܟܗ̈ܢܐ܂ ܕܬܗܘܐ/ܘܬܗܘܐ#3#/ ܒܘܪܟܬܐ ܒܒܬ̈ܝܟܘܢ܂

44:31 ܘܟܠ ܕܡܫܢܩ/ܕܡܕܝܫ#3#/ ܘܬܒܝܪ/ܘܕܬܒܝܪ#1##2#/ ܡܢ ܦܪܚܬܐ ܘܡܢ ܚܝܘܬܐ ܠܐ ܢܐܟܠܘܢ ܟܗ̈ܢܐ܂

next chapter