← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62020: P Mi

Click on a word for lexical analysis
Click on a red-colored coordinate for comments and/or translations of the line

previous chapter


01:01 ܦܬܓܡܐ ܕܡܪܝܐ ܕܗܘܐ ܥܠ ܡܝܟܐ ܡܐܪܫܝܐ܂ ܒܝ̈ܘܡܘܗܝ ܕܝܘܬܡ ܘܕܐܚܙ ܘܕܚܙܩܝܐ ܡ̈ܠܟܐ ܕܝܗܘܕܐ܂ ܕܚܙܐ ܥܠ ܫܡܪܝܢ ܘܥܠ ܐܘܪܫܠܡ܂
01:02 ܫܡܥܘ ܟܠܟܘܢ ܥܡ̈ܡܐ܂ ܘܨܘܬܝ ܐܪܥܐ ܒܡܠܐܗ݀܂ ܘܢܗܘܐ ܒܟܘܢ ܡܪܐ ܡܪ̈ܘܬܐ ܣܗܕܐ܂ ܡܪܝܐ ܡܢ ܗܝܟܠܐ ܕܩܘܕܫܗ܂
01:03 ܡܛܠ ܕܗܐ ܡܪܝܐ ܢܦܩ ܡܢ ܐܬܪܗ܂ ܘܢܚܬ ܘܕܪܟ ܥܠ ܪܘܡܗ݀ ܕܐܪܥܐ܂
01:04 ܘܢܬܦܫܪܘܢ ܛܘܪ̈ܐ ܬܚܘܬܘܗܝ܂ ܘܥܘܡ̈ܩܐ ܢܬܬܠܚܘܢ܂ ܐܝܟ ܫܥܘܬܐ ‍<‍ܕܡܬܦܫܪܐ#3#‍>‍ ܡܢ ܩܕܡ ܢܘܪܐ܂ ܘܐܝܟ ܡܝ̈ܐ ܕܢܕܪܝܢ ܒܡܚܬܬܐ܂
01:05 ܗܠܝܢ ܟܠܗܝܢ ܡܛܠ ܥܘܠܗ ܕܝܥܩܘܒ܂ ܘܡܛܠ ܚ̈ܛܗܐ ܕܒܝܬ ܐܝܣܪܝܠ܂ ܡܢܐ ܗܘ ܥܘܠܗ ܕܝܥܩܘܒ ܐܠܐ ܐܢ ܫܡܪܝܢ܂ ܘܡܢܐ/ܘܡܢ#3#/ ܗܝ ܚܛܝܬܗ ܕܝܗܘܕܐ ܐܠܐ ܐܢ ܐܘܪܫܠܡ܂
01:06 ܘܐܥܒܕܝܗ݀ ܠܫܡܪܝܢ ܒܝܬ/ܐܝܟ ܕܒܝܬ#3#/ ܕܒܪܐ ܕܚܩܠܐ ܘܢܨܒܬܐ ܕܟܪܡܐ܂ ܘܐܟܫܐ ܟܐ̈ܦܝܗ݀ ܒܝܓܪܐ܂ ܘܐܓܠܐ ܫܬܐ̈ܣܝܗ݀܂
01:07 ܘܟܠܗܘܢ ܓܠܝ̈ܦܝܗ݀ ܡܬܬܒܪܘ ܢܬܬܒܪܘܢ܂ ܘܟܠܗܝܢ ܕܚ̈ܠܬܗ݀ ܢܐܩ̈ܕܢ ܒܢܘܪܐ܂ ܘܟܠܗܘܢ ܦܬܟܪ̈ܝܗ݀ ܐܥܒܕ ܠܚܒܠܐ܂ ܡܛܠ ܕܡܢ ܐܓܪܐ ܕܙܢܝܬܐ ܐܬܟܢܫܘ܂ ܘܠܐܓܪܐ ܕܙܢܝܬܐ ܢܗܦܟܘܢ܂
01:08 ܥܠ ܗܠܝܢ ܐܪܩܕܝ ܘܐܝܠܠܝ ܘܗܠܟܝ ܚܦܝܝ ܘܥܪܛܠ܂ ܘܥܒܕܝ ܡܪܩܘܕܬܐ ܐܝܟ ܕܝܪܘܪܐ܂ ܘܐܒܠܐ ܐܝܟ ܕܒܪܬ ܝܪܘܪܐ܂
01:09 ܡܛܠ ܕܟܝܒܐ ܗܝ ܡܚܘܬܗ݀ ܘܡܛܬ ܠܝܗܘܕܐ܂ ܘܩܪܒܬ ܥܕܡܐ ܠܬܪܥܗ ܕܥܡܝ ܠܐܘܪܫܠܡ܂
01:10 ܒܓܬ ܠܐ ܬܚܕܘܢ ܘܡܒܟܐ ܠܐ ܬܒܟܘܢ܂ ܒ̈ܒܬܐ ܕܥܘܦܪܐ ܐܬܦܠܦܠܘ ܒܥܦܪܐ܂
01:11 ܥܒܕܝ ܠܟܝ ܥܡܘܪܬܐ ܕܫܦܝܪ܂ ܥܪܛܠ ܢܦܩܬ ܘܠܐ ܒܗܬܬ ܥܡܘܪܬܐ ܕܨܥܢ܂ ܡܪܩܘܕܬܐ ܕܒܝܬ ܐܘܨܝܠ ܬܣܒ ܡܢܟܘܢ ܡܚܘܬܗ݀܂
01:12 ܡܛܠ ܕܐܬܟܪܗܬ ܠܛܒܬܐ ܥܡܘܪܬܐ ܕܡܪܕܬ܂ ܥܠ ܕܢܚܬܬ ܒܝܫܬܗ݀ ܡܢ ܩܕܡ ܡܪܝܐ܂ ܥܠ ܬܪ̈ܥܝܗ݀ ܕܐܘܪܫܠܡ܂
01:13 ܦܓܕܬ ܡܪ̈ܟܒܬܐ ܕܪ̈ܟܫܐ ܥܡܘܪܬܐ ܕܠܟܝܫ܂ ܪܝܫ ܚܛܝܬܐ ܗܝ ܠܒܪܬ ܨܗܝܘܢ܂ ܡܛܠ ܕܒܟܝ ܐܫܬܟܚܘ ܚ̈ܛܗܘܗܝ ܕܐܝܣܪܝܠ܂
01:14 ܡܛܠ ܗܢܐ/ܗܕܐ#3#/ ܬܬܠܝܢ ܫܘܒܩܢܐ ܠܝܪܬܘܬܐ ܕܓܬ܂ ܒܬ̈ܐ ܕܣܪܝܩܘܬܐ ܗܘܘ ܠܣܪܝܩܘܬܐ ܠܡ̈ܠܟܐ ܕܐܝܣܪܝܠ܂
01:15 ܐܝܬܐ ܠܟܝ ܬܘܒ ܝܪ̈ܘܬܐ ܥܡܘܪܬܐ ܕܡܐܪܫܐ ܥܕܡܐ ܠܥܠܡ ܢܥܠܐ ܐܝܩܪܗ ܕܐܝܣܪܝܠ܂
01:16 ܡܪܘܛܝ ܘܓܘܙܝ ܥܠ ܒܢ̈ܝ ܡܦܢܩܘܬܟܝ܂ ܐܣܓܝ ܡܪܛܟܝ ܐܝܟ ܕܢܫܪܐ܂ ܡܛܠ ܕܐܫܬܒܝܘ ܡܢܟܝ܀

next chapter