The Comprehensive Aramaic Lexicon

04:01	ܘܗܦܟ ܡܠܐܟܐ ܕܡܡܠܠ ܒܝ܂ ܘܐܥܝܪܢܝ ܐܝܟ ܓܒܪܐ ܕܡܬܬܥܝܪ ܡܢ ܫܢܬܗ܂
04:02	ܘܐܡܪ ܠܝ ܡܢܐ ܚܙܝܬ ܘܐܡܪܬ ܚܙܝܬ ܡܢܪܬܐ ܕܕܗܒܐ܂ ܘܟܦܬܐ ܥܠ ܪܝܫܗ݀܂ ܘܫܒܥܐ ܫܪ̈ܓܝܢ ܥܠܝܗ݀܂ ܘܫܒܥܐ ܫܒܥܐ ܦܘ̈ܡܝܢ ܠܫܪܓܐ ܕܐܝܬ ܒܪܝܫܗ݀܂
04:03	ܘܬܪ̈ܝܢ ܙܝ̈ܬܝܢ ܐܝܬ ܥܠܝܗ݀܂ ܚܕ ܡܢ ܝܡܝܢܗ݀ ܕܟܦܬܐ ܘܚܕ ܡܢ ܣܡܠܗ݀܂
04:04	ܘܥܢܝܬ ܘܐܡܪܬ ܠܡܠܐܟܐ ܕܡܡܠܠ ܒܝ܂ ܡܢܐ ܐܢܘܢ ܗܠܝܢ ܡܪܝ܂
04:05	ܥܢܐ ܡܠܐܟܐ ܕܡܡܠܠ ܒܝ ܘܐܡܪ ܠܝ܂ ܠܐ ܝܕܥ ܐܢܬ ܡܢܐ ܐܢܘܢ ܗܠܝܢ܂ ܘܐܡܪܬ ܠܐ ܝܕܥ ܐܢܐ ܡܪܝ܂
04:06	ܘܐܡܪ ܠܝ܂ ܗܢܘ ܦܬܓܡܗ ܕܡܪܝܐ ܥܠ ܙܘܪܒܒܠ܂ ܠܐ ܒܚܝܠܐ ܘܠܐ ܒܥܘܫܢܐ܂ ܐܠܐ ܐܢ ܒܪܘܚ ܐܡܪ ܡܪܝܐ ܚܝܠܬܢܐ܂
04:07	ܡܢܐ ܐܢܬ ܛܘܪܐ ܪܒܐ ܩܕܡ ܙܘܪܒܒܠ܂ ܐܠܐ ܐܝܟ ܦܩܥܬܐ܂ ܘܐܦܩ ܠܟܐܦܐ ܪܫܝܬܐ ܕܫܘܝܘܬܐ ܘܕܪ̈ܚܡܐ܂܀
04:08	ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ܂

04:09	ܐ̈ܝܕܘܗܝ ܕܙܘܪܒܒܠ ܣܡ ܫܬܐ̈ܣܘܗܝ ܕܒܝܬܐ ܗܢܐ܂ ܘܐ̈ܝܕܘܗܝ ܡܫ̈ܠܡܢ ܠܗ܂ ܘܬܕܥܘܢ ܕܡܪܝܐ ܚܝܠܬܢܐ ܫܕܪܢܝ ܠܘܬܟܘܢ/ܥܠܝܟܘܢ#3#/܂

04:10	ܡܛܠ ܕܡܢܘ ܫܐܛ ܠܝ̈ܘܡܬܐ ܙܥܘܪ̈ܐ܂ ܘܢܚܘܪܘܢ ܘܢܚܙܘܢ ܠܟܐܦܐ ܕܦܘܪܫܢܐ ܒܐ̈ܝܕܘܗܝ ܕܙܘܪܒܒܠ܂ ܗܠܝܢ ܐܢܝܢ ܫܒܥ ܥܝܢ̈ܘܗܝ ܕܡܪܝܐ ܕܚܝܪ̈ܢ ܒܟܠܗ݀ ܐܪܥܐ܂
04:11	ܥܢܝܬ ܘܐܡܪܬ ܠܗ܂ ܘܡܢܐ ܐܢܘܢ ܗܠܝܢ ܬܪ̈ܝܢ ܙܝ̈ܬܝܢ܂ ܕܡܢ ܝܡܝܢܗ݀ ܕܟܦܬܐ ܘܡܢ ܣܡܠܗ݀܂
04:12	ܥܢܝܬ ܕܬܪ̈ܬܝܢ ܙܒ̈ܢܝܢ ܘܐܡܪܬ ܠܗ܂ ܘܡܢܐ ܐܢܝܢ ܗܠܝܢ ܬܪ̈ܬܝܢ ܣܘ̈ܟܐ ܕܙܝܬܐ܂ ܕܒܝܢܬ ܬܪ̈ܝܢ ܢܚܝܪ̈ܝܢ ܕܕܗܒܐ܂ ܕܢܣܟܝܢ ܡܢܗܘܢ ܕܗܒܐ܂
04:13	ܘܐܡܪ ܠܝ ܠܐ ܝܕܥ ܐܢܬ ܡܢܐ ܐܢܘܢ ܗܠܝܢ܂ ܘܐܡܪܬ ܠܐ ܡܪܝ܂
04:14	ܘܐܡܪ ܠܝ܂ ܗܠܝܢ ܐܢܘܢ ܬܪ̈ܝܢ ܒܢ̈ܝ ܕܘܗܢܐ܂ ܕܩܝܡܝܢ ܩܕܡ ܡܪܐ ܕܟܠܗ݀ ܐܪܥܐ܂܀