The Comprehensive Aramaic Lexicon

10:01	ܫܐܠܘ ܡܛܪܐ ܡܢ ܡܪܝܐ ܒܙܒܢܐ ܠܩܝܫܝܐ܂ ܘܡܪܝܐ ܥܒܕ ܪ̈ܣܝܣܐ܂ ܘܡܛܪܐ ܒܟܝܪܝܐ ܢܬܠ ܠܟܘܢ܂ ܕܢܪܒܐ ܥܣܒܐ ܒܕܒܪܐ܂
10:02	ܡܛܠ ܕܝܕܘ̈ܥܐ ܡܠܠܘ ܥܘܠܐ܂ ܘܩܨ̈ܘܡܐ ܚܙܘ ܕܓܠܘܬܐ܂ ܘܚ̈ܠܡܐ ܕܓ̈ܠܐ ܡܠܠܘ܂ ܘܒܝܐܘ ܒܣܪܝܩܘܬܐ܂ ܡܛܠ ܗܢܐ ܫܩܠܘ ܐܝܟ ܥܢܐ܂ ܘܐܬܡܟܟܘ ܕܠܝܬ ܠܗܘܢ ܪܥܝܐ܂

10:03	ܥܠ ܪ̈ܥܘܬܐ ܐܬܚܡܬ ܪܘܓܙܝ܂ ܘܠܓܙܪ̈ܐ ܐܦܩܘܕ ܡܛܠ ܕܦܩܕ ܡܪܝܐ ܚܝܠܬܢܐ ܠܓܙܪܗ ܠܕܒܝܬ ܝܗܘܕܐ܂ ܘܥܒܕ ܐܢܘܢ ܐܝܟ ܣܘܣܝܐ ܕܙܗܐ ܒܩܪܒܐ܂

10:04	ܡܢܗܘܢ ܙܘܝܬܐ ܘܡܢܗܘܢ ܣܟܬܐ܂ ܘܡܢܗܘܢ ܩܫܬܐ ܒܩܪܒܐ܂ ܘܡܢܗܘܢ ܢܦܩܘܢ ܟܠܗܘܢ ܫ̈ܠܝܛܢܝܗܘܢ ܐܝܟ ܚܕܐ܂
10:05	ܘܢܗܘܘܢ ܐܝܟ ܓܒܪ̈ܐ ܕܕܝܫܝܢ ܣܝܢܐ ܒܫ̈ܘܩܐ܂ ܒܩܪܒܐ ܢܬܟܬܫܘܢ܂ ܡܛܠ ܕܡܪܝܐ ܥܡܗܘܢ܂ ܘܢܒܗܬܘܢ ܪ̈ܟܒܝ ܪ̈ܟܫܐ܂
10:06	ܘܐܚܝܠ ܠܕܒܝܬ ܝܗܘܕܐ܂ ܘܐܦܪܘܩ ܠܕܒܝܬ ܝܘܣܦ ܘܐܦܢܐ ܐܢܘܢ܂ ܡܛܠ ܕܡܪܚܡ ܐܢܐ ܥܠܝܗܘܢ܂ ܘܢܗܘܘܢ ܐܝܟ ܕܠܐ ܛܥܝܬ ܐܢܘܢ܂ ܡܛܠ ܕܐܢܐ ܡܪܝܐ ܐܠܗܐ ܐܥܢܐ ܐܢܘܢ܂
10:07	ܘܢܗܘܘܢ ܐܝܟ ܓܢܒܪ̈ܐ ܕܐܦܪܝܡ܂ ܘܢܚܕܐ ܠܒܗܘܢ ܐܝܟ ܕܡܢ ܚܡܪܐ܂ ܘܒ̈ܢܝܗܘܢ ܢܚܙܘܢ ܘܢܚܕܘܢ܂ ܘܢܪܘܙ ܠܒܗܘܢ ܒܡܪܝܐ܂
10:08	ܐܫܪܩ ܠܗܘܢ ܘܐܟܢܫ ܐܢܘܢ܂ ܡܛܠ ܕܦܪܩ ܐܢܐ ܠܗܘܢ܂ ܘܢܣܓܘܢ ܐܝܟ ܕܣ̈ܓܝܐܝܢ ܗܘܘ܂
10:09	ܘܐܙܪܘܥ ܐܢܘܢ ܒܥܡ̈ܡܐ܂ ܘܒܐܬܪ̈ܘܬܐ ܪ̈ܚܝܩܐ ܢܫܒܚܘܢܢܝ܂ ܘܢܬܪܣܘܢ ܠܒ̈ܢܝܗܘܢ ܘܢܗܦܟܘܢ܂
10:10	ܘܐܗܦܟ ܐܢܘܢ ܡܢ ܐܪܥܐ ܕܡܨܪܝܢ܂ ܘܡܢ ܐܬܘܪ ܐܟܢܫ ܐܢܘܢ܂ ܘܠܐܪܥܐ ܕܓܠܥܕ ܘܠܠܒܢܢ/ܘܕܠܒܢܢ#3#/ ܐܝܬܐ ܐܢܘܢ܂ ܘܠܐ ܢܡ̈ܠܝܢ ܠܗܘܢ܂
10:11	ܘܢܥܒܪ ܒܝܡܐ ܐܘܠܨܢܐ܂ ܘܢܗܦܟ ܒܝܡܐ ܓ̈ܠܠܐ܂ ܘܢܒܗܬܘܢ ܟܠܗܘܢ ܥܘܡܩ̈ܘܗܝ/ܥܡܘܪ̈ܘܗܝ#3#/ ܕܢܗܪܐ܂ ܘܬܒܛܠ ܓܐܝܘܬܗ ܕܐܬܘܪܝܐ ܘܫܘܠܛܢܗ ܕܡܨܪܝܐ ܢܥܒܪ܂
10:12	ܘܐܚܝܠ ܐܢܘܢ ܒܡܪܝܐ܂ ܘܠܫܡܗ ܢܣܒܪܘܢ ܐܡܪ ܡܪܝܐ܂܀