The Comprehensive Aramaic Lexicon

01:01	ܘܗ݂ܘܐ ܒܝܘ̈ܡܘܗܝ ܕܐܚܫܝܪܫ ܗ݀ܘ ܒܪܗ ܕܐܚܫܝܪܫ ܕܐܡܠܟ ܡܢ ܗܘܕ܂ ܘܥܕܡܐ ܠܟܘܫ܂ ܥܠ ܡ̈ܐܐ ܘܥܣܪ̈ܝܢ ܡܕ̈ܝܢܢ܂
01:02	ܒܝܘ̈ܡܬ݂ܐ ܗ݀ܢܘܢ܂ ܟܕ ܝ݁ܬ݂ܒ ܗܘܐ ܡܠܟܐ ܐܚܫܝܪܫ ܥܠ ܟ݁ܘܪܣܝܐ ܕܡܠܟܘܬܗ܃ ܕܒܫܘܫܢ ܒܝܪ݁ܬܐ܂

01:03	ܒܫܢܬ݂ ܬܠܬ ܕܡܠܟܘܬܗ܃ ܥܒ݁ܕ ܡܫܬܝܐ ܪܒܐ ܠܟܠܗܘܢ ܪܒܪ̈ܒܢܘܗܝ ܘܥܒܕ̈ܘܗܝ܂ ܚܝܠܐ ܦܪܣܝ̈ܐ ܘܡܕ̈ܝܐ ܘܦܪ̈ܬܘܝܐ ܘܪܒܪ̈ܒܢܐ ܕܡܠܟܐ ܩܕܡܘܗܝ܂ ܘܪܒܪ̈ܒܢܐ ܕܡܕ̈ܝܢܬܐ܂

01:04	ܟܕ ܚܘܝ ܥܘܬܪܐ ܘܐܝܩܪܐ ܕܡܠܟܘܬܗ ܘܐܝܩܪܐ ܕܬܫܒܘܚܬܐ ܕܪܒܘܬܗ ܝܘܡ̈ܬܐ ܣܓܝ̈ܐܐ܂ ܡ̈ܐܐ ܘܬܡ̈ܢܝܢ ܝܘܡ̈ܝܢ܂
01:05	ܘܟ݂ܕ ܫ݂ܠܡܘ ܝܘܡ̈ܬ݂ܐ ܗ݀ܢܘܢ ܥܒ݂ܕ ܡܠܟܐ ܠܟ݂ܠ ܥܡܐ ܕܐܫܬܟܚ ܒܫܘܫܢ ܒܝܪܬܐ܂ ܡ݂ܢ ܙܥܘܪܐ ܘܥܕܡܐ ܠܪܒܐ܂ ܡ݂ܫܬܝܐ ܫܒܥܐ ܝܘܡ̈ܝܢ ܒܕܪܬ ܓܢܬ ܒܝܬܘܢܐ ܕܡܠܟܐ܂
01:06	ܘܢܓܝܕ̈ܢ܂ ܘܐ̈ܠܐ ܕܥܡܪ ܟܘܒܐ܂ ܘܬ݂ܟ݂ܠܬ݂ܐ܂ ܘܡܬܝ̈ܚܢ ܒܚܒ̈ܠܐ ܕܒܘܨܐ ܘܕܐܪܓܘܢܐ ܥܠ ܓ݁ܝܓ̈ܠܐ ܕܟ݁ܣܦܐ܂ ܘܥܠ ܥܡܘܕܐ ܕܐܫܟܪܥܐ܂ ܘܥܪ̈ܣܬܐ ܕܕܗܒܐ ܘܕܣܐܡܐ܂ ܪ̈ܡܝܢ ܥܠ ܪ̈ܨܝܦܬܐ ܕܫܝܫܐ ܘܬܫܘ̈ܝܬܐ ܕܒܘܨܐ ܘܕܫܪܝܐ܂
01:07	ܘܡܫܘܝܢ ܒܡܐܢ̈ܐ ܕܕܗܒܐ܂ ܘܡܐܢ̈ܐ ܡ݂ܢ ܡܐܢ̈ܐ ܦܪܝܫܝܢ܂ ܘܚܡܪܐ ܕܡܠܟܘܬܐ ܣܓܝ܂ ܐܝܟ݁ ܐܝ݂ܕܐ ܕܡܠܟܐ܂
01:08	ܘܡܫܬܝܐ ܒܢܡܘܣܐ ܘܠܝܬ ܕܐ݁ܠܨ܂ ܡܛܠܕܗܟܢܐ ܦܩܕ ܡܠܟܐ܂ ܠܟܠ ܕܪܒ ܒܒܝܬܗ܂ ܕܢܥܒܕܘܢ ܨܒܝܢܐ ܕܟܠܢܫ܂
01:09	ܘܫܬܝ ܡܠܟܬܐ ܐܒܕܬ ܡܫܬܝܐ ܪܒܐ ܠܟ݂ܠܗܝܢ ܢܫ̈ܐ ܒܝܬ ܡܠܟܘܬܗ ܕܡܠܟܐ ܐܚܫܝܪܫ܂
01:10	ܘܒܝܘܡܐ ܫܒܝܥܝܐ ܟܕ ܫܦܪ ܠܒܗ ܕܡܠܟܐ ܒܚܡܪܐ܂ ܐܡ݂ܪ ܠܡܗܝ̈ܡܢܐ ܠܒܙܬܐ ܘܠܪܚܒܘܢܐ ܘܠܒܓܬܐ܂ ܘܠܐܓܒܘܬܐ ܘܠܬܪܫ ܘܠܙܬܪ ܘܠܒܪܟܫ ܫܒ̈ܥܐ ܡܗ̈ܝܡܢܐ ܕܡܫܡܫܝܢ ܩܕܡ ܡܠܟܐ ܐܚܫܝܪܫ܂
01:11	ܠܡ݁ܥܠܘ ܠܘܫܬܝ ܡܠܟܬܐ ܩܕܡ ܡܠܟܐ ܒܬܓܐ ܕܡܠܟܘܬܗ݀ ܠܡܚܘܝܘ ܠܥܡ̈ܡܐ ܘܠܪܒܪ̈ܒ݁ܢܐ ܫܘܦܪܗ݀ ܡܛܠܕܫܦܝܪ ܗܘܐ ܚܙܘܗ݀܂
01:12	ܘܠܐ ܨܒܬ ܘܫܬܝ ܡܠܟܬܐ ܠܡܥܠ ܒܦܬܓܡܐ ܕܫܕܪ ܥܠܝܗ݀ ܡܠܟܐ ܒܐܝܕܐ ܕܡܗܝ̈ܡܢܐ܂ ܘܪܓܙ ܡܠܟܐ ܛܒ܂ ܘܚܡܬܗ ܡܬܓܘܙܠܐ ܗܘܬ܂
01:13	ܘܐܡ݂ܪ ܡܠܟܐ ܠܚܟܝ̈ܡܐ ܒܢ̈ܝ ܝܕ̈ܥܝ ܙܒ̈ܢܐ܂ ܡܛܠܕܗܟܢܐ ܗܘܐ ܢܡܘ݂ܣܗ ܕܡܠܟܐ܂ ܐܡ݁ܪ ܗܘܐ ܩܕܡ ܟܠ ܕܝܕ̈ܥܝܢ ܗܘܘ ܢܡܘ̈ܣܐ ܘܕ̈ܝܢܐ܂
01:14	ܘܠܕܩܪܝܒܝܢ ܠܗ܂ ܒܪܢܫܝ܂ ܘܐܫܬܪ܂ ܘܐܪܡܘܬ܂ ܘܪܡܘܣ܂ ܘܬܪܫܝܫ܂ ܘܡܣܪܝܐ܂ ܘܡܥܘܟܢ ܪܘܪ̈ܒܢܐ ܕܦܪܣ ܘܕܡܕܝ܂ ܕܝ݁ܬܒܝܢ ܩܕܡ ܡܠܟܐ܂ ܘܡܬܚܙܝܢ ܩܕܡܘܗܝ ܒܬܪܥܐ ܕܡܠܟܘܬܐ܂
01:15	ܐܡܪܘ܂ ܡܢܐ ܘ݁ܠܐ ܠܡܥ݂ܒܕ ܠܗ݀ ܠܡܠܟܬܐ ܘܫܬܝ ܥܠ ܕܠܐ ܥܒܕܬ ܡܠܬܗ ܕܡܠܟܐ ܐܚܫܝܪܫ܂ ܕܫܠ݂ܚ ܒܐܝܕܐ ܕܡܗܝܡ̈ܢܐ܂
01:16	ܘܐܡ݂ܪ ܡܥܘܟܢ ܩܕܡ ܡܠܟܐ ܘܩܕܡ ܪܘܪ̈ܒܢܐ܂ ܠܐ ܗܘܐ ܥܠ ܡܠܟܐ ܒܠܚܘܕ ܒܣܪܬ ܘܫܬܝ ܡܠܟܬܐ܂ ܐܠܐ ܥܠ ܟܠܗܘܢ ܪܒܪ̈ܒܢܐ܂ ܘܥܠ ܟܠܗܘܢ ܥܡܡ̈ܐ ܕܒܟܠܗܝܢ ܡܕ̈ܝܢܬܐ ܕܡܠܟܐ ܐܚܫܝܪܫ܂
01:17	ܘܟܕ ܢܦܘܩ ܛܐܒܐ ܡܠܬܐ ܗܕܐ ܥܠ ܟܠܗܝܢ ܢܫ̈ܐ܃ ܢܗ̈ܘܝܢ ܫܝ̈ܛܢ ܘܒܣܪ̈ܢ ܓܒܪ̈ܝܗܝܢ ܒܥܝܢ̈ܝܗܝܢ܂ ܘܢܗ̈ܘܝܢ ܐܡ݁ܪ̈ܢ ܕܡܠܟܐ ܐܚܫܝܪܫ ܦܩܕ ܠܡܥܠܘ ܠܘܫܬܝ ܡܠܟܬܐ ܩܕܡܘܗܝ܃ ܘܠܐ ܥ݂ܠܬ܂
01:18	ܝܘܡܢܐ ܢܐܡܪܘܢ ܪܘܪ̈ܒܢܐ ܕܦ݁ܪܣ ܘܕܡܕܝ ܕܫܡܥ݂ܘ ܦܬܓܡܗ݀ ܕܡܠܟܬܐ ܡ݂ܢ ܟܠܗܘܢ ܪܘܪ̈ܒܢܐ ܕܡܠܟܐ܂ ܘܟܠܗ݀ ܒܣܝܪܘܬܐ ܘܪܘܓܙܐ܂
01:19	ܐܢ ܥܠ ܡܠܟܐ ܫܦܝܪ ܢܦܘܩ ܦܬܓܡܐ ܕܡܠܟܘܬܐ܂ ܡ݂ܢ ܩܕܡܘܗܝ ܘܢܬ݂ܟܬܒ ܒܢܡܘܣ ܡܕܝ ܘܦܪܣ ܕܠܐ ܥ݁ܒܪ܂ ܘܬܘܒ ܠܐ ܬܥ݁ܘܠ ܘܫܬܝ ܡܠܟܬܐ ܠܘܬ ܡܠܟܐ ܐܚܫܝܪܫ܂ ܘܡܠܟܘܬܗ ܢܬܠ ܡܠܟܐ ܠܚܒܪܬܗ݀ ܕܛܒܐ ܡܢܗ݀
01:20	ܘܢܫܬ݁ܡܥ ܦܬܓܡܐ ܕܡܠܟܐ܂ ܘܢܥ݁ܒܕ ܒܟܠܗ݀ ܡܠܟܘܬܐ܂ ܡܛܠ ܕܪܒܐܗܝ܂ ܘܟܠܗ̈ܝܢ ܢܫ̈ܐ ܢܥܒܕ̈ܢ ܐܝܩܪܐ ܠܓܒܪ̈ܝܗܝܢ܂ ܡ݂ܢ ܪܒܐ ܘܥܕܡܐ ܠܙܥܘܪܐ܂
01:21	ܘܫܦܪ ܦܬܓܡܐ ܗܢܐ ܒܥܝ̈ܢܘܗܝ ܕܡܠܟܐ ܘܕܪܒܪ̈ܒܢܘܗܝ܂ ܘܥ݂ܒܕ ܡܠܟܐ ܐܝܟ ܦܬܓܡܗ ܕܡܥܘܟܢ܂
01:22	ܘܫܕܪ ܐܓܪ̈ܬܐ ܠܟܠܗܝܢ ܡܕ̈ܝܢܬܗ ܕܡܠܟܐ܂ ܠܡܕܝܢܬܐ ܐܝܟ ܟܬܒܗ݂܂ ܘܠܥܡܐ ܐܝܟ ܠܫܢܗ܂ ܠܡܗܘܐ ܟܠ ܓܒܪ ܫܠܝܛ ܒܒܝܬܗ܂ ܘܡܡܠܠ ܐܝܟ ܠܫܢ ܥܡܗ܃