The Comprehensive Aramaic Lexicon

03:01	ܘܒܬܪ ܡ̈ܠܐ ܗܠܝܢ ܐܘܪܒ ܡܠܟܐ ܐܚܫܝܪܫ ܠܗܡܢ ܒܪ ܗܡܕܬ ܐܓܓܝܐ ܘܐܪܝܡ ܟܘܪܣܝܗ ܠܥܠ ܡ݂ܢ ܟܠܗܘܢ ܪܘ̈ܪܒܢܐ ܕܥܡܗ܂
03:02	ܘܟ݂ܠܗܘܢ ܥܒ݁̈ܕܐ ܕܡܠܟܐ ܕܒܬܪܥܐ ܕܡܠܟܐ ܒܪܟ݂ܝܢ ܗܘܘ ܘܣܓܕܝܢ ܠܗܡܢ܂ ܡܛܠܕܗܟ݂ܢܐ ܦܩܕ ܥܠܘܗܝ ܡܠ݁ܟܐ܂ ܘܡܘܪܕܟ݂ܝ ܠܐ ܒܪܟ ܗܘܐ ܘܣ݁ܓ݂ܕ܂
03:03	ܘܐܡ݁ܪܝܢ ܥܒ݂ܕ̈ܐ ܕܡܠܟܐ ܒܬ݂ܪܥܐ ܕܡܠܟܐ ܠܡܘܪܕܟ݂ܝ܃ ܠܡܢܐ ܥ݁ܒܕ ܐܢܬ ܥܠ ܦܘܩܕܢܐ ܕܡܠܟܐ܂
03:04	ܘܟܕ ܐܡܪܝܢ ܗܘܘ ܒܟܠ ܝܘܡ ܘܠܐ ܫ݁ܡܥ ܗܘܐ ܠܗܘܢ܂ ܚܘܝܘ ܠܗܡܢ ܕܢܕܥܘܢ ܐܢ ܫܪܝܪ̈ܢ ܡ̈ܠܘܗܝ ܕܡܘܪܕܟ݂ܝ܂ ܡܛܠ ܕܚܘܝ ܐܢܘܢ ܕܝܘܕܝܐ ܗܘ܂
03:05	ܘܚ݂ܙܐ ܗܡܢ ܕܡܘܪܕܟ݂ܝ ܠܐ ܒܪܟ݂ ܗܘܐ ܘܣܓܕ ܠܗ܂ ܘܐܬ݂ܡܠܝ ܗܡܢ ܚܡܬܐ ܥܠ ܡܘܪܕܟ݂ܝ܂
03:06	ܘܒܨܝܪܐ ܗܘܬ ܥܒܝܕܬܐ ܕܢܘܫܛ ܐܝܕܗ ܥܠ ܡܘܪܕܟ݂ܝ ܒܠܚܘܕܘܗܝ܂ ܡܛܠܕܚܘܝܘܗܝ ܥܡܗ ܕܡܘܪܕܟ݂ܝ܂ ܘܒܥܐ ܗܡܢ ܠܟܠܗܘܢ ܝܘܕ̈ܝܐ ܕܒܟܠܗ݂ ܡܠܟܘܬܗ ܕܐܚܫܝܪܫ ܥܡܗ ܕܡܘܪܕܟܝ܂
03:07	ܒܝܪܚܐ ܩܕܡܝܐ ܕܗܘ ܢܝܣܢ ܒܫܢܬ ܬܪ̈ܬܥܣܪܐ ܕܡܠܟܐ ܐܚܫܝܪܫ܂ ܐܪܡܝ ܦ̈ܨܐ܂ ܘܗ̈ܘܝ ܦ̈ܨܐ ܩܕܡ ܗܡܢ܂ ܡ݂ܢ ܝܘܡ ܠܝܘܡ܂ ܘܡ݂ܢ ܝܪܚ ܠܝܪܚ܂ ܒܝܪܚܐ ܕܬܪ̈ܥܣܪ ܕܗ݂ܘ ܐܕܪ܂
03:08	ܐܡ݂ܪ ܗܡܢ ܠܡܠܟܐ ܐܚܫܝܪܫ܂ ܐܝ݂ܬ ܥܡܐ ܡܒܕܪ ܘܡܒܙܩ ܒܟܠܗܝܢ ܡܕ̈ܝܢܬܗ ܕܡܠܟܐ ܐܚܫܝܪܫ܂ ܢܡܘܣ̈ܝܗܘܢ ܦܪܝܫܝܢ ܡ݂ܢ ܟܠ ܥܡ܂ ܘܢܡܘܣܐ ܕܡܠܟܐ ܠܐ ܥ݁ܒܕܝܢ܂ ܘܠܡܠܟܐ ܠܐ ܘ݁ܠܐ ܕܢܫܒܘܩ ܐܢܘܢ܂
03:09	ܐܢ ܥܠ ܡܠܟܐ ܠܐ ܫܦܝܪ ܢܟܬܘܒ ܕܢ݂ܐܒܕܘܢ܂ ܘܥܣܪ̈ܐ ܐܠܦܝ̈ܢ ܟܟܪ̈ܐ ܕܟ݂ܣܦܐ ܐܬܩ݁ܘܠ܃ ܥܠ ܐܝ݂ܕܐ ܕܥܒܕ̈ܝ ܥܒ݁ܕܐ ܠܡܥܠܘ ܠܓܙܐ ܕܡܠܟܐ܂
03:10	ܫܩ݂ܠ ܡܠܟܐ ܥܙܩܬܐ ܡ݂ܢ ܥܝܕܗ ܘܝܗ݂ܒ ܠܗܡܢ ܒܪ ܗܡܕܬ ܐܓܓܝܐ ܒܥܠܕܒܒܐ ܕܝܘܕ̈ܝܐ܂
03:11	ܘܐܡ݂ܪ ܡܠܟܐ ܟ݁ܣܦܟ݂ ܝܗܝܒ ܠܟ܂ ܘܥܡܐ܂ ܠܡܥܒܕ ܠܗ ܟܠ ܡܕܡ ܕܫܦܝܪ ܒܥܝܢ̈ܝܟ܂

03:12	ܘܐܬܩܪܝ ܣܦܪܐ ܕܡܠܟܐ ܒܝܘܡܐ ܗܘ݁܂ ܒܝܪܚܐ ܩܕܡܝܐ ܒܬܠܬܥܣܪ̈ܐ ܒܗ ܒܝܪܚܐ ܐܬܟܬܒ ܟܠܡܕܡ ܕܦܩܕ ܗܡܢ ܠܪ̈ܒܚܝܠܐ ܕܡܠܟܐ ܘܠܡܪ̈ܘܬܐ ܕܒܟܠ ܡܕܝܢܐ ܘܡܕܝܢܐ܂ ܘܠܪܒܪ̈ܒܢܝ ܥܡܡ̈ܐ܂ ܡܕܝܢܬܐ ܐܝܟ ܟܬܒܗ݀ ܘܠܥܡܐ ܐܝܟ ܠܫܢܗ܂ ܒܫܡ ܡܠܟܐ ܐܚܫܝܪܫ܂ ܐܬ݂ܟ݁ܬ݂ܒ ܘܐܬܚܬܡ ܒܥܙܩܬܐ ܕܡܠܟܐ݁

03:13	ܘܐܫܬܕܪ ܐܓܪ̈ܬܐ ܒܝܕ ܪ̈ܗܛܐ ܠܟܠܗܝܢ ܡܕ̈ܝܢܬܐ ܕܡܠܟܐ܂ ܠܡܚ݂ܪܒ ܘܠܡܩ݂ܛܠ ܘܠܡܘܒܕܘ ܠܟܠܗܘܢ ܝܘܕ̈ܝܐ ܡ݂ܢ ܥܠܝ̈ܡܐ ܘܥܕܡܐ ܠܣ̈ܒܐ܂ ܘܛܠ̈ܝܐ ܘܢܫ̈ܐ ܒܚܕ ܝܘܡ ܒܬܠ̈ܬ ܥܣܪ̈ܐ ܒܝܪܚܐ ܐܕܪ܂ ܘܢܟ݂ܣ̈ܝܗܘܢ ܠܒܙܬܐ܂ ܒܚܕ ܝܘܡ ܒܝܪܚ ܐܕܪ ܒܬܠܬ ܥܣܪ̈ܐ ܐܬܟܬܒ܂
03:14	ܘܦܪܫܓ݂ܢܗ ܕܟܬܒܐ ܐܬܝܗܒ ܒܟ݂ܠ ܡܕܝܢܐ ܘܡܕܝܢܐ܂ ܘܦܩ݂ܕ ܠܟܠܗܘܢ ܥܡ̈ܡܐ܂ ܕܢܗܘ݂ܘܢ ܡܛܝ̈ܒܐ ܠܝܘܡܐ ܗܢܐ܂
03:15	ܘܪܗ̈ܛܐ ܢܦܩܘ ܡܣܪܗܒܝܢ ܒܦܘܩܕܢܐ ܕܡܠܟܐ܂ ܘܦܬܓ݂ܡܐ ܐܬ݂ܦ݂ܩܕ ܒܫܘܫܢ ܒܝܪܬܐ܂ ܘܡܠܟܐ ܘܗܡܢ ܐܣܬܡܟ݂ܘ ܠܡܫܬܐ ܐܟܚܕܐ܂ ܘܡܕܝܢܬܐ ܫܘܫܢ ܐܫܬܓ݂ܫܬ܀