The Comprehensive Aramaic Lexicon

08:01	ܒܝܘܡܐ ܗܘ܂ ܘܝܗܒ ܡܠܟܐ ܐܚܫܝܪܫ ܠܐܣܬܝܪ ܡܠܟܬ݂ܐ ܒܝܬܗ ܕܗܡܢ ܒܥܠܕܒܒܐ ܕܝܘܕ̈ܝܐ܂ ܘܡܘܪܕܟ݂ܝ ܥ݂ܠ ܩܕܡ ܡܠܟܐ܂ ܡܛܠ ܕܓܠܬ݂ ܐܣܬܝܪ ܡܢܐ ܗܘ݂ܐ ܠܗ݀܂
08:02	ܘܫ݂ܩܠ ܡܠܟܐ ܥܙܩܬܐ ܕܫܩ݂ܠ ܡ݂ܢ ܗܡܢ ܘܝܗܒܗ ܠܡܘܪܕܟ݂ܝ ܘܐܩܝܡܬ݁ܗ ܐܣܬܝܪ ܠܡܘܪܕܟ݂ܝ ܥܠ ܒܝܬܗ ܕܗܡܢ܂
08:03	ܘܗܦܟܬ ܐܣܬܝܪ ܘܡܠܠܬ ܩܕܡ ܡܠܟܐ ܘܢܦܠܬ ܥܠ ܪ̈ܓܠܘܗܝ ܘܒܥܝܐ ܘܡܬܟܫܦܐ ܠܗ ܕܢܥܒܕ ܒܝ݂ܫܬܐ ܕܗܡ݁ܢ ܐܓ݁ܓ݁ܝܐ ܘܡܚܫܒܬܐ ܕܐܬܚ݂ܫܒ ܥܠ ܝܘܕ̈ܝܐ
08:04	ܘܐܘܫܛ ܡܠܟܐ ܠܐܣܬܝܪ ܫܒܛܐ ܕܕܗܒܐ܂ ܘܩܪܒܬ ܠܗ ܐܣܬܝܪ܂
08:05	ܘܩܡܬ ܩܕܡ ܡܠܟܐ܂ ܘܐܡ݂ܪܬ݂ ܐܢ ܥܠ ܡܠܟܐ ܫܦܝܪ܂ ܘܫ݁ܦܪ ܦܬܓܡܐ ܩܕܡ ܡܠܟܐ܂ ܘܐܢ ܐܫ݁ܟܚܬ ܪ̈ܚܡܐ ܒܥܝܢ̈ܘܗܝ܂ ܢܟ݁ܬܘܒ ܘܢܗܦܟ ܐܓ݁ܪ̈ܬ݂ܐ ܘܡܚ̈ܫܒܬܐ ܕܗܡܢ ܐܓ݁ܓ݁ܝܐ ܕܟ݂ܬܒ ܠܡܘܒܕܘ ܠܟ݂ܠܗܘܢ ܝܘܕ̈ܝܐ ܒܟ݂ܠܗܝܢ ܡܕ̈ܝܢܬ݂ܗ ܕܡܠܟܐ܂
08:06	ܐܝܟ݁ܢܐ ܓ݁ܝܪ ܡܨܝܐ ܐܢܐ ܕܐܚ݁ܙܐ ܒܒܝܫܬܐ ܕܬܓܕܫ ܠܥܡܝ܂ ܘܐܝܟ݁ܢܐ ܡܫܟ݁ܚܐ ܐܢܐ ܕܐܚ݂ܙܐ ܒܐܒܕܢܐ ܕܫܪܒܬ݂ܝ܂
08:07	ܘܐܡ݂ܪ ܡܠܟܐ ܐܚܫܝܪܫ ܠܐܣܬܝܪ ܡܠܟܬܐ܂ ܗܐ ܒܝܬ݁ܗ ܕܗܡܢ ܝܗ݀ܒܬ ܠܟ݂ܝ܂ ܘܠܗ ܬܠ݂ܘ ܥܠ ܩܝܣܐ܂ ܥܠ ܕܐܘ݂ܫܛ ܐܝܕܐ ܒܝܘܕ̈ܝܐ܂
08:08	ܘܐܢܬ݁ܘܢ ܥܠ ܝܘܕ̈ܝܐ ܐܝܟ ܕܫܦܝܪ ܒܥܝ̈ܢܝܟ݂ܘܢ ܒܫܡܐ ܕܡܠܟܐ ܚܬ݁ܘܡܘ ܒܥܙܩܬܐ ܕܡܠܟܐ܂ ܒܟܬܒܐ ܕܡܬ݂ܟ݁ܬ݂ܒ ܒܫܡ ܡܠܟܐ ܘܡܬܚ݂ܬܡ ܒܥܙܩܬ݂ܗ ܕܡܠܟܐ ܕܠܐ ܗ݀ܦܟ܂
08:09	ܘܐܬܩܪܝܘ ܣܦܪ̈ܐ ܕܡܠܟܐ ܒܙܒܢܐ ܗܘ݁ ܒܝܪܚܐ ܬܠܝܬܝܐ ܕܗ݂ܘ ܚܙܝܪܢ܂ ܒܬܠ̈ܬܐ ܘܥܣܪ̈ܝܢ ܒܗ ܒܝܪܚܐ ܘܟܬ݂ܒܘ ܟܠ ܡܕܡ ܕܟܬ݂ܒ ܡܘܪܕܟܝ ܥܠ ܝܘܕ̈ܝܐ܂ ܠܪ̈ܒܝ ܚ̈ܝܠܐ ܘܠܡܪ̈ܘܬܐ ܘܠܪܒ݂ܪ̈ܒܢܐ ܕܡܕ̈ܝܢܬܐ܂ ܡ݂ܢ ܗܘܕ ܘܥܕܡܐ ܠܟܘܫ܂ ܡ̈ܐܐ ܘܥܣܪ̈ܝܢ ܘܫܒ̈ܥ ܡܕ̈ܝܢܢ܂ ܡܕܝܢܬܐ ܐܝܟ ܟ݁ܬ݂ܒܗ݀ ܘܠܥܡܐ ܐܝܟ ܠܫܢܗ܂ ܘܠܝܘܕ̈ܝܐ ܐܝܟ݂ ܟ݁ܬ݂ܒܗܘܢ܂ ܘܐܝܟ ܠܫܢܗܘܢ܂

08:10	ܘܐܬܟܬܒܘ ܒܫܡ ܡܠܟܐ ܐܚܫܝܪܫ܂ ܘܐܬܚܬܡ ܒܥܙܩܬܐ ܕܡܠܟܐ܂ ܘܫܕܪ ܐܓ݁ܪ̈ܬ݂ܐ ܒܝܕ ܪ̈ܗܛܐ܂ ܘܒܝܕ ܐܣܦܘ̈ܟ݂ܐ܂ ܪܟ݂̈ܒܝ ܪܟ݂̈ܫܐ ܒܢ̈ܝ ܪ̈ܡܟܐ܂

08:11	ܐܓ݁ܪ̈ܬ݂ܐ ܕܟ݂ܬ݂ܒ ܡܠܟܐ ܥܠ ܝܘܕ̈ܝܐ܂ ܕܒ݂ܟ݂ܠ ܡܕ̈ܝܢܬܐ܂ ܠܡܬܟܢܫܘ܂ ܘܠܡܩ݂ܡ ܠܢܦܫܗܘܢ܂ ܘܠܡܚܪܒ ܘܠܡܩ݂ܛܠ܂ ܘܠܡܘܒܕܘ ܠܟܠܢܫ ܕܡܥܝ݂ܩ ܠܗܘܢ܂ ܘܛܠ̈ܝܐ ܘܢܫ̈ܐ܂ ܘܩܢܝܢܗܘܢ ܠܒ݂ܙܬܐ܂
08:12	ܒܚܕ ܝܘܡ ܕܒ݂ܟ݂ܠܗܝܢ ܡܕ̈ܝܢܬܗ ܕܡܠܟܐ ܐܚܫܝܪܫ܂ ܒܬܠ̈ܬ ܥܣܪ̈ܐ ܒܝܪܚܐ ܕܬܪ̈ܥܣܪ ܕܗܘ݂ ܐܕܪ܂
08:13	ܘܦܪܫܓ݂ܢܗ ܕܟܬ݂ܒܐ ܐܬܝ݂ܗܒ ܒܟ݂ܠ ܡܕܝܢܐ܂ ܘܦܩܕ ܠܟܠܗܘܢ ܥܡ̈ܡܐ ܕܢܗܘ݂ܘܢ ܝܘܕ̈ܝܐ ܡܛܝܒܝܢ܂ ܠܝܘܡܐ ܗܢܐ ܕܢܬ݂ܦܪܥܘܢ ܡ݂ܢ ܒܥܠܕܒܒܝ̈ܗܘܢ܂
08:14	ܘܐܬܘ ܪ̈ܗܛܐ܂ ܘܐܣ̈ܦܘܟܐ ܪ̈ܟܒܝ ܪ̈ܟܫܐ ܘܢܦ݂ܩܘ ܡܣܪܗܒܐܝܬ ܒܦܬܓܡܐ ܘܒܦܘܩܕܢܐ ܕܐܬܦܩܕ ܒܫܘܫܢ ܒܝܪܬܐ܂
08:15	ܘܡܘܪܕܟ݂ܝ ܢܦ݂ܩ ܡ݂ܢ ܩܕܡ ܡܠܟܐ܂ ܒܠܒܘܫܐ ܕܡܠܟܘܬ݂ܐ܂ ܕܬ݂ܟ݂ܠܬܐ ܘܕܒܘܨܐ܂ ܘܒܟܠܝܠܐ ܕܕܗܒܐ܂ ܘܟ݁ܪܝܟ݂ ܒܒܘܨܐ ܘܒܐܪܓܘܢܐ܂ ܘܡܕܝܢܬܐ ܫܘܫܢ ܕܨܬ ܘܚܕܬ܂
08:16	ܘܥܠ ܝܘܕ̈ܝܐ ܗܘ݂ܐ ܢܘܗܪܐ ܘܚܕܘܬܐ܂ ܘܐܝܩܪܐ ܘܕܝܨܐ܂
08:17	ܒܟ݂ܠ ܡܕܝܢܬܐ܂ ܘܒܟ݂ܠ ܘܩܘܪ̈ܝܐ܂ ܐܬܪ ܕܡܛܝ ܦܬܓ݂ܡܐ ܕܡܠܟܐ ܘܦܘܩܕܢܗ܂ ܚܕܘܬܐ ܪܒܬܐ ܗ݂ܘܬ ܠܝܘܕ̈ܝܐ܂ ܘܡܫܬܝܐ ܘܝܘܡܐ ܛܒܐ܂ ܘܣܘܓܐܐ ܡ݂ܢ ܥܡܡ̈ܐ ܕܐܪܥܐ ܡܬܬܘܗܝܢ/ܡܬܝܗ‍{‍ܬ‍}‍‍<‍ܕ‍>‍ܝܢ/ ܡܛܠ ܕܢܦܠܬ݁ ܕܚܠܬܐ ܕܝܘܕ̈ܝܐ ܥܠܝܗܘܢ܀