The Comprehensive Aramaic Lexicon

09:01	ܘܒܝܪܚܐ ܕܬܪ̈ܥܣܪ ܕܗ݂ܘ ܐܕܪ܂ ܒܬܠ̈ܬܥܣܪ̈ܐ ܟܕ ܡܛܝ ܙܒܢܐ ܕܦܬܓܡܐ ܕܡܠܟܐ ܘܦܘܩܕܢܗ ܠܡܬܥܒܕܘ ܠܒܥܠܕ̈ܒܒܝܗܘܢ ܐܫܬܚܠܦܬ݂ ܥܒܝܕܬ݂ܐ܃ ܕܢܫܬ݁ܠܛܘܢ ܝܘܕ̈ܝܐ ܒܣ̈ܢܐܝܗܘܢ܂
09:02	ܘܐܬܟܢܫܘ ܝܘܕ̈ܝܐ ܒܩܘܪ̈ܝܗܘܢ܂ ܘܒܟܠܗܝܢ ܡܕ̈ܝܢܬܐ ܕܡܠܟܐ ܐܚܫܝܪܫ܂ ܕܢܘܫܛܘܢ ܐܝܕܐ ܒܥܒ݁ܕ̈ܝ ܒܝ̈ܫܬܗܘܢ܂ ܘܐܢܫ ܠܐ ܩ݂ܡ ܩܕܡܝܗܘܢ܂ ܡܛܠ ܕܢܦܠܬ ܕܚܠܬܗܘܢ ܥܠ ܟܠܗܘܢ ܥܡܡ̈ܐ܂
09:03	ܘܟܠܗܘܢ ܪܘܪ̈ܒܢܐ ܕܡܕ̈ܝܢܬܐ ܘܪܒܝ ܚܝ̈ܠܐ܂ ܘܡܪ̈ܘܬܐ܃ ܘܥ݁ܒܕ̈ܝ ܥܒ݁ܕܐ ܕܡܠܟܐ܂ ܡܝܩܪܝܢ ܠܝܘܕ̈ܝܐ܂ ܡܛܠ ܕܢܦܠܬ ܕܚܠܬܐ ܕܡܠܟܐ ܥܠܝܗܘܢ܂
09:04	ܡܛܠ ܕܝܪܒ ܡܘܪܕܟܝ ܠܘܬ ܡܠܟܐ܂ ܘܫܡܗ ܐܙ݁ܠ ܗܘܐ ܒܟܠܗܝܢ ܡܠܟ̈ܘܬܐ ܡܛܠ ܕܓ݁ܒܪܐ ܡܘܪܕܟ݂ܝ ܐܙܠ ܗܘܐ ܘܝ݁ܪܒ܂
09:05	ܘܡܚ݂ܘ ܝܘܕ̈ܝܐ ܒܟ݂ܠܗܘܢ ܒܥܠܕ̈ܒܒܝܗܘܢ ܡܚܘܬ݂ܐ ܕܚܪܒܐ܂ ܘܕܩܛܠܐ ܘܕܐܒܕܢܐ܂ ܘܥ݂ܒܕܘ ܒܣ̈ܢܐܝܗܘܢ ܐܝܟ ܨܒܝܢܗܘܢ܂
09:06	ܒܫܘܫܢ ܒܝܪܬܐ܂ ܩܛܠܘ ܝܘܕ̈ܝܐ ܚܡ̈ܫܡܐܐ ܓ݁ܒܪ̈ܝܢ܂
09:07	ܘܠܫܦ݁ܝܪܘܬ݂ ܘܠܕܠܟ݂ܘܢ ܘܠܐܣܦܩܬ܂
09:08	ܘܠܦܪܛܠܛ܂ ܘܠܕܠܝܐ ܘܠܕܝܪܐ܂
09:09	ܘܠܦܝܣܘܬ܂ ܘܠܕܝܣܝ܂ ܘܠܐܕܪܝ܂ ܘܠܙܘܬ܂
09:10	ܥܣܪܐ ܒܢ̈ܘܗܝ ܕܗܡܢ ܐܓ݁ܓ݁ܝܐ܂ ܒܥܠܕܒܒܐ ܕܝܘܕ̈ܝܐ ܩܛܠܘ܂ ܘܠܒܙܬܐ ܠܐ ܐܘܫܛܘ ܐܝܕ̈ܝܗܘܢ܂
09:11	ܒܗ݀ܘ ܝܘܡܐ ܘܥܠ ܡܢܝܢܐ ܕܩܛܝ̈ܠܐ ܒܫܘܫܢ ܒܝܪܬܐ ܩܕܡ ܡܠܟܐ܂
09:12	ܘܐܡܪ ܠܐܣܬܝܪ ܡܠܟܬܐ ܒܫܘܫܢ ܒܝܪܬܐ ܩ݂ܛܠܘ ܝܘܕ̈ܝܐ ܘܐܘܒܕܘ ܚܡܫ̈ܡܐܐ ܓܒܪ̈ܝܢ܂ ܘܠܥܣܪ ܒܢ̈ܘܗܝ ܕܗܡܢ܂ ܘܒܫܪܟܐ ܕܡܕ̈ܝܢܬܐ ܡܢܐ ܥܒ݂ܕܘ܂ ܡܢܐܗܝ ܫܐܠܬ݂ܟ݂ܝ ܢܬܥ݂ܒܕ ܠܟܝ܂ ܘܡܢܐܗܝ ܒܥܘܬ݂ܟ݂ܝ ܢܬܝܗܒ ܠܟܝ܂
09:13	ܘܐܡܪܬ ܐܣܬܝܪ܂ ܢܬܝܗܒ ܡܚܪ ܠܝܘܕ̈ܝܐ ܕܢܥ݂ܒܕܘܢ ܐܝܟ݂ ܕܝܘܡܢܐ ܘܠܥܣܪܐ ܒܢ̈ܘܗܝ ܕܗܡܢ ܢܬܠܘܢ ܐܢܘܢ ܥܠ ܩܝܣܐ܂

09:14	ܘܐܡ݂ܪ ܡܠܟܐ ܢܥܒ݂ܕܘܢ ܗܟ݂ܢܐ܂ ܘܐܬܦ݂ܩܕ ܦܘܩܕܢܐ ܒܫܘܫܢ܂ ܘܠܥܣܪ̈ܐ ܒܢܘ̈ܗܝ ܕܗܡܢ ܬܠ݂ܘ ܥܠ ܩܝܣܐ܂

09:15	ܘܐܬ݂ܟܢܫܘ ܝܘܕ̈ܝܐ ܕܒܫܘܫܢ ܐܦ ܒܐܪܒܥܣܪ̈ܐ ܒܗ ܒܝܪܚܐ܂ ܘܩܛܠܘ ܒܫܘܫܢ ܬܠ̈ܬܡܐܐ ܓܒܪ̈ܝܢ܂ ܘܠܒܙܬܐ ܠܐ ܐܘܫܛܘ ܐܝܕ̈ܝܗܘܢ܂
09:16	ܘܫܪܟ݁ܐ ܕܝܘܕ̈ܝܐ ܕܒܡܕܝܢܬܐ ܕܡܠܟܐ ܐܬ݂ܟܢܫܘ ܘܩܡܘ ܠܢܦܫܗܘܢ ܘܐܬܬܢܝܚܘ ܡ݂ܢ ܒܥܠܕܒܒܝ̈ܗܘܢ ܘܩܛܠܘ ܡܢ ܣܢ̈ܐܝܗܘܢ ܫܒܥ̈ܝܢ ܘܚܡ̈ܫܐ ܐܠܦ̈ܝܢ܂ ܘܠܒܙܬܐ ܠܐ ܐܘܫܛܘ ܐܝܕ̈ܝܗܘܢ
09:17	ܒܬܠܬ ܥܣܪ̈ܐ ܒܝܪܚܐ ܐܕܪ ܘܐܬܬܢܝܚ݂ܘ ܒܐܪܒܥܣܪ̈ܐ ܒܗ ܒܝܪܚܐ܂
09:18	ܘܥ݂ܒܕܘܗܝ ܝܘܡܐ ܕܡܫܬܝܐ ܘܕܚܕܘܬܐ܂
09:19	ܡܛܠܗܢܐ ܝܘܕ̈ܝܐ ܡܒܕܪ̈ܐ ܝܬܒ̈ܝ ܩܘܪ̈ܝܐ ܡܒܕܪ̈ܬܐ܂ ܥ݁ܒܕܝܢ ܒܐܪ̈ܒܥܣܝܐ ܒܐܕܪ ܚܕܘܬܐ܂ ܘܡܫܬܝܐ ܘܝܘܡܐ ܛܒ݁ܐ܂ ܘܡܫܕܪܝܢ ܡ݂ܢ̈ܘܬܐ ܓ݁ܒܪ ܠܚܒܪܗ܂
09:20	ܘܟ݁ܬ݂ܒ ܡܘܪܕܟܝ ܡ̈ܠܐ ܗܠܝܢ܂ ܘܫܕܪ ܐܓ݁ܪ̈ܬ݂ܐ ܠܟܠܗܘܢ ܝܘܕ̈ܝܐ ܕܒܟ݂ܠܗ̈ܝܢ ܡܕ̈ܝܢܬܐ ܕܡܠܟܐ ܐܚܫܝܪܫ܂ ܕܩܪ̈ܝܒܢ ܘܕܪ̈ܚܝܩܢ
09:21	ܕܢܩܒܠܘܢ ܥܠܝܗܘܢ ܕܢܗ݂ܘܘܢ ܥ̈ܒܕܝܢ ܒܐܪܒܥܣܪ̈ܐ ܘܒ݁ܟ݂ܣܐܐ ܒܐܕܪ ܟܠ ܫܢܐ ܒܫܢܐ܂
09:22	ܐܝܟ ܝܘܡ̈ܬܐ ܕܐܬܬܢܝ݂ܚܘ ܒܗܘܢ ܝܘܕ̈ܝܐ ܡ݂ܢ ܒܥܠܕ̈ܒܒܝܗܘܢ܂ ܝܪܚܐ ܕܐܫܬܚܠܦ ܡ݂ܢ ܕܘܘܢܐ ܠܚܕܘܬܐ܂ ܘ݁ܡ݂ܢ ܐܒܠܐ ܠܝܘܡܐ ܛܒ݁ܐ܂ ܕܢܥ݂ܒܕܘܢ ܐܢܘܢ ܠܝܘܡ̈ܬܐ ܕܡܫܬܝܐ ܘܕܚܕܘܬ݂ܐ܂ ܘܕܢܫܕܪܘܢ ܡܢܘ̈ܬ݂ܐ ܐܢܫ ܠܚܒܪܗ܂ ܘܡܘܗ̈ܒܬܐ ܠܒܝ̈ܫܐ܂
09:23	ܘܩܒܠܘ ܝܘܕ̈ܝܐ ܥܠܝܗܘܢ ܡܕܡ ܕܫܪܝܘ ܠܡܥ݂ܒܕ܂ ܘܡܕܡ ܕܟܬ݂ܒ ܡܘܪܕܟ݂ܝ܂
09:24	ܡܛܠ ܗܡܢ ܒܪ ܗܡܕܢ ܐܓ݁ܓ݁ܝܐ ܒܥܠܕܒܒܐ ܕܟ݂ܠܗܘܢ ܝܘܕ̈ܝܐ܂ ܕܐܬܚ݂ܫܒ ܥܠ ܝܘܕ̈ܝܐ ܕܢܘܒܕ ܐܢܘܢ܂ ܘܐܪܡܝ ܦ̈ܨܐ ܕܢܚܪܘܒ ܐܢܘܢ܂
09:25	ܘܡܐ ܕܥ݁ܐܠܐ ܗܘܬ ܐܣܬܝܪ ܩܕܡ ܡܠܟܐ ܐܡ݁ܪ ܗܘܐ ܣ݁ܦܪܐ ܢܗܦܟ̈ܢ ܡܚܫ̈ܒܬܐ ܒܝ̈ܫܬܐ ܥܠ ܪܝܫܗ ܕܡ݁ܢ ܐܬܚܫܒ܂ ܥܠ ܝܘܕ̈ܝܐ܂ ܘܢܬܠܘܢܝܗܝ ܘܠܒܢܘ̈ܗܝ ܥܠ ܩܝܣܐ܂
09:26	ܡܛܠܗܢܐ ܩܪܐ ܐܢܘܢ ܠܝܘܡ̈ܬܐ ܗ݀ܢܘܢ ܦܘܪ̈ܝܐ܂ ܥܡ ܫܡ ܦܨܚܐ܂ ܡܛܠ ܡ̈ܠܐ ܕܐܓܪܬܐ ܗܕܐ܂ ܘܥܠ ܡܕܡ ܕܚܙܘ܂ ܘܥܠ ܡܕܡ ܕܓ݂ܕܫ ܠܗܘܢ܂
09:27	ܘܩܒܠܘ ܝܘܕ̈ܝܐ ܥܠܝܗܘܢ ܘܥܠ ܙܪܥܗܘܢ ܘܥܠ ܟܠ ܕܡܬܠܘܐ ܠܗܘܢ܂ ܕܠܐ ܢܒܛܠ܂ ܕܢܗܘ݂ܘܢ ܥ݁ܒܕܝܢ ܗܠܝܢ ܬܪ̈ܝܢ ܝܘܡ̈ܝܢ ܐܝܟ ܕܟܬܝܒܝܢ ܒܙܒܢܗܘܢ ܒܟܠ ܫܢܐ܂
09:28	ܘܝܘ̈ܡܬܐ ܗܠܝܢ ܡܬܕܟ݂ܪܝܢ ܘܡܬܥܒܕܝܢ ܒܟܠ ܫܪ̈ܒܬܐ ܘܡܕ̈ܝܢܬܐ܂ ܘܩܘܪ̈ܝܐ܂ ܘܝܘ̈ܡܬܐ ܕܦܘܪ̈ܝܐ ܗܠܝܢ ܠܐ ܢܥ݂ܒܪܘܢ ܡ݂ܢ ܓܘ ܝܘܕ̈ܝܐ܂ ܘܕܘܟ݂ܪܢܗܘܢ ܠܐ ܢܥ݂ܒܪ ܡ݂ܢ ܙܪܥܗܘܢ܂
09:29	ܘܟܬܒܬ ܐܣܬܝܪ ܡܠܟܬܐ ܒܪܬ ܐܒܝܚܠ ܘܡܘܪܕܟܝ ܝܘܕ̈ܝܐ ܟܠܗ̈ܝܢ ܫܪܝܪ̈ܬܐ ܕܢܫܪܘܢ ܐܓ݁ܪܬܐ ܗܕܐ ܕܦܘܪ̈ܝܐ܂
09:30	ܘܫܕܪܘ ܐܓ݁ܪ̈ܬܐ ܠܟܠܗܘܢ ܝܘܕ̈ܝܐ܂ ܠܡ̈ܐܐ ܘܥܣܪ̈ܝܢ ܘܫܒ̈ܥ ܡܕ̈ܝܢܢ ܕܒܡܠܟܘܬܗ ܕܐܚܫܝܪܫ ܡܠܟܐ܂ ܡ̈ܠܐ ܕܫܪܪܐ ܘܕܫܠܡܐ܂
09:31	ܕܢܫ݂ܪܘܢ ܝܘܡ̈ܬܐ ܕܦܘܪ̈ܝܐ ܗܠܝܢ ܒܙܒܢܗܘܢ ܐܝܟ݂ ܕܐܫܪܘ ܥܠܝܗܘܢ ܡܘܪܕܟܝ ܝܘܕܝܐ܂ ܘܐܣܬܝܪ ܡܠܟܬܐ܂ ܐܝܟ݂ ܕܐܫ݂ܪܘܢ ܗܢ݂ܘܢ ܥܠܝܗܘܢ ܘܥܠ ܒܢܝܗܘܢ܂ ܦܘܩܕܢܐ܂ ܘܨܘܡܗܘܢ܂ ܘܨܠܘܬܗܘܢ
09:32	ܘܡܐܡܪܗ݀ ܕܐܣܬܝܪ ܐܫ݂ܪ ܥܠ ܡ̈ܠܐ ܗܠܝܢ ܕܦܘܪ̈ܝܐ܂ ܘܐܬܟ݂ܬܒ ܒܣ݂ܦܪܐ܀