← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62037: P Neh

Click on a word for lexical analysis
Click on a red-colored coordinate for comments and/or translations of the line

previous chapter


02:01 ܘܗܝ݁ܕܝܢ ܒܝܪܚ ܢܝܣܢ ܒܫܢܬ ܥܣܪܝܢ ܠܐܪܛܚܫܫܬ ܡ݁ܠܟܐ ܚܡ݂ܪܐ ܡܫܩܐ ܗ݀ܘܝܬ ܩܕܡ ܡܠܟܐ܂ ܘܫ݁ܩܠܬ ܚܡܪܐ ܘܝܗ݀ܒܬ ܠܡ݁ܠܟܐ܂ ܘܠܐ ܗܘ݁ܝܬ ܒܝܫ ܩܕܡܘܗܝ܂
02:02 ܘܐ݂ܡܪ ܠܝ ܡ݁ܠܟܐ܂ ܡܛܠ ܡܢܐ ܐܦ̈ܝܟ ܒܝ̈ܫܢ܂ ܘܐܢܬ ܠܐ ܗ݂ܘܝܬ ܟܪܝܗ܂ ܠܝܬ ܗܢܐ܂ ܐܠܐ ܐܢ ܒܝܫܘܬ ܠܒܐ܂ ܘܕܚ݁ܠܬ ܣܓ݁ܝ ܛܒ܂
02:03 ܘܐܡ݁ܪܬ ܠܡ݁ܠܟܐ܂ ܡ݁ܠܟܐ ܠܥܠܡ ܚܝܝ܂ ܡܛܠ ܡܢܐ ܠܐ ܢܒܐ̈ܫܢ ܐܦ̈ܝ܂ ܕܡܕܝܢܬܐ ܕܒܝܬ ܡܠܟܘܬܐ ܕܐܒܗ̈ܝ ܚܪܒܐ ܘܬܪ̈ܥܝܗ݀ ܡܘܩܕܝܢ ܒܢܘܪܐ܂
02:04 ܘܐ݂ܡܪ ܠܝ ܡ݁ܠܟܐ܂ ܡܛܠ ܗܕܐ ܒܥܝܬ܂ ܘܨ݁ܠܝܬ ܩܕܡ ܐܠܗܐ ܕܫܡܝܐ܂
02:05 ܘܐܡ݁ܪܬ ܠܡܠܟܐ܂ ܐܢ ܥܠ ܡ݁ܠܟܐ \ܫܦܝܪ܂ ܐܢܐ ܐܢܐ /ܛܒ܂ ܘܐܢ ܫ݁ܦܪ ܐܢܐ#4#/ ܥܒܕܟ ܩܕܡܝܟ ܬܫܕܪܢܝ ܠܝܗܘܕ ܡܕܝܢܬܗ ܕܕܘܝܕ ܠܒܝܬ ܩܒܘܪܐ ܕܐܒ̈ܗܝ ܘܐܒܢܝܗ݀܂
02:06 ܘܐ݂ܡܪ ܠܝ ܡ݁ܠܟܐ܂ ܫܛܝܐ܂ ܥܕ ܐܡܬܝ ܐ݁ܙܠ ܐܢܬ ܘܐ݁ܬܐ܂ ܘܫܦ݂ܪ ܩܕܡ ܡ݁ܠܟܐ ܘܫܕܪܢܝ܂ ܘܝܗܒ ܠܝ ܙܒܢܐ܂
02:07 ܘܐܡ݁ܪܬ ܠܡ݁ܠܟܐ܂ ܐܢ ܥܠ ܡ݁ܠܟܐ ܫܦܝܪ ܢܟ̈ܬܒܢ ܠܝ ܐܓܪ̈ܬܐ ܠܘܬ ܫܠܝ̈ܛܐ ܕܒܥܒܪ ܢܗܪܐ ܕܢܥܕܪܘܢܢܝ ܥܕܡܐ ܕܐ݁ܙܠ ܠܝܗܘܕ܂
02:08 ܘܐܓܪܬܐ ܠܘܬ ܐܣܦ ܢܛ݁ܪ ܦܪܕܝܣܐ ܕܡ݁ܠܟܐ܂ ܕܢܬܠ ܠܝ ܩܝ̈ܣܐ ܠܡܥܒܕ ܬܪ̈ܥܝ ܒܝܬܐ܂ ܘܕܒ̈ܬܐ ܘܕܫܘܪܐ ܕܡܕܝܢܬܐ܂ ܘܠܒܝܬܐ ܕܥܐ݁ܠ ܐܢܐ ܠܗ܂ ܘܝܗ݂ܒ ܠܝ ܡ݁ܠܟܐ ܐܝܟ ܐܝ݂ܕܗ ܕܐܠܗܝ ܕܐܛܐܒܬ ܠܝ܂
02:09 ܘܐ݁ܬܝܬ ܠܘܬ ܫܠܝܛܐ ܕܒܥܒܪ ܢܗܪܐ ܘܝܗ݀ܒܬ ܠܗ ܐܓܪܬܐ ܕܡ݁ܠܟܐ܂ ܘܫܕܪ ܥܡܝ ܡ݁ܠܟܐ ܪ̈ܒܝ ܚܝ̈ܠܐ ܘܦܪ̈ܫܐ܂
02:10 ܘܫ݂ܡܥ ܣܡܒܠܝܛ ܚܘܪܢܝܐ ܘܛܘܒܝܐ ܓܒܪ̈ܐ ܥܡܘ̈ܢܝܐ܂ ܘܐܬܐܒܫܬ ܠܗܘܢ ܒܝܫܐܝܬ ܥܠ ܕܐ݂ܬܐ ܒܪܢܫܐ ܠܡܒܥܐ ܛ݁ܒܬܐ ܥܠ ܒܢ̈ܝ ܐܝܣܪܝܠ܂
02:11 ܘܐ݁ܬܝܬ ܠܐܘܪܫܠܡ ܘܗܘ݁ܝܬ ܬܡܢ ܝܘܡ̈ܬܐ ܬܠܬܐ܂
02:12 ܘܩܡ݁ܬ ܒܠܠܝܐ ܐܢܐ ܘܓܒܪ̈ܐ ܗ݀ܢܘܢ ܕܐܝܬ ܗܘܘ ܥܡܝ܂ ܘܠܐ ܚܘܝ݁ܬ ܠܐܢܫ ܡܕܡ ܕܐܪܡܝ ܐܠܗܝ ܒܠܒܝ ܠܡܥܒܕ ܠܐܘܪܫܠܡ܂ ܘܒܥܝܪܐ ܠܝܬ ܗܘܐ ܥܡܝ܂ ܐܠܐ ܐܢ ܒܥܝܪܐ ܕܪܟܝܒ ܗ݀ܘܝܬ ܥܠܝܗ݀܂
02:13 ܘܢܦ݁ܩܬ ܒܬܪܥܐ ܕܢܚܠܐ ܒܠܠܝܐ܂ ܠܐ̈ܦܝ ܥܝܢ ܬܢܝܢ ܘܠܬܪܥܐ ܕܐܣܦܘܬ܂ ܘܗ݀ܘܝܬ ܣ݁ܟܪ ܒܫܘܪ̈ܝܗ݀ ܕܐܘܪܫܠܡ ܕܡܬܪܥܝܢ ܗܘܘ܂ ܘܬܪ̈ܥܐ ܝܩܝܕܝܢ ܗܘܘ ܒܢܘܪܐ܂
02:14 ܘܥ݁ܒܪܬ ܥܠ ܬܪܥܐ ܕܢܚܠܐ ܘܠܐܡܐ ܕܡ݁ܠܟܐ܂ ܘܠܝܬ ܗܘܐ ܐܬܪܐ ܠܒܥܝܪܐ ܠܡܥܒܪ ܬܡܢ܂
02:15 ܘܗ݀ܘܝܬ ܣ݁ܠܩ ܒܢܚܠܐ ܒܠܠܝܐ܂ ܘܗ݀ܘܝܬ ܣ݁ܟܪ ܒܫܘܪܐ ܘܐ݁ܬܐ ܘܥ݁ܠܬ ܒܬܪܥ ܢܚܠܐ ܘܗ݀ܦܟܬ܂
02:16 ܘܫ̈ܠܝܛܐ ܠܐ ܝܕܥܘ ܠܐܝ݁ܟܐ ܐܙ݁ܠܬ ܘܡܢܐ ܥ݁ܒܕ ܐܢܐ܂ ܘܠܝܗ̈ܘܕܝܐ ܘܠܟܗ̈ܢܐ ܘܠܫ̈ܠܝܛܢܐ ܘܠܣ݁ܦܪ̈ܐ ܘܠܫܪܟܐ ܕܥܒ̈ܕܝ ܥܒ̈ܝܕܬܐ ܥܕܡܐ ܠܗܫܐ ܠܐ ܚ݁ܘܝܬ܂
02:17 ܘܐܡ݁ܪܬ ܠܗܘܢ܂ ܐܢܬܘܢ ܚ݁ܙܝܢ ܒܝܫ݂̈ܬܐ ܕܚܢܢ ܒܗܝܢ܂ ܕܗܐ ܐܘܪܫܠܡ ܚܪܒܐ ܘܬܪ̈ܥܝܗ݀ ܝܩܝܕܝܢ ܒܢܘܪܐ܂ ܬܘ ܢܒܢܐ ܫܘ݂ܪܐ ܕܐܘܪܫܠܡ܂ ܘܠܐ ܢܗܘܐ ܡܟܝܠ ܚܣܕܐ܂
02:18 ܘܓܠܝܬ ܠܗܘܢ ܐܝ݂ܕܐ ܕܐܠܗܝ ܕܗܘܬ ܥܡܝ ܠܛܒ܂ ܐܦ ܡ̈ܠܝ ܡ݁ܠܟܐ ܕܐܬܐܡܪ ܠܝ܂ ܘܐܡܪܝܢ ܩܝܡܝܢܢ ܘܒܢܝܢ܂ ܘܥܫܢܘ ܐܝܕܝ̈ܗܘܢ ܠܡܥܒܕ ܕܛܒ܂
02:19 ܘܫ݂ܡܥ ܣܡܒܠܝܛ ܚܘܪܢܝܐ܂ ܘܛܘܒܝܐ ܓܒܪܐ ܥܡܘܢܝܐ܂ ܘܓܫܘܡ ܥܪܒܝܐ܂ ܘܓܚܟܘ ܥܠܝܢ܂ ܘܡܝܩܘ ܒܢ ܘܐܡ݁ܪܝܢ܂ ܡܢܐ ܗܝ ܡܠܬܐ ܗܕܐ ܕܥܒ݁ܕܝܢ ܐܢܬܘܢ܂ ܕܠܡܐ ܥܠ ܡ݁ܠܟܐ ܐܢܬܘܢ ܡ݁ܪܕܝܢ܂
02:20 ܘܐܬ݁ܝܒܬ ܐܢܘܢ ܦܬܓܡܐ ܘܐܡ݁ܪܬ ܠܗܘܢ܂ ܐܠܗܐ ܕܫܡܝܐ ܗ݂ܘ ܦܪܩܢ܂ ܘܚܢܢ ܥ݁ܒܕܝܢ ܘܩ݁ܝܡܝܢ ܘܒܢܝܢ܂ ܘܠܟܘܢ ܠܝܬ ܠܟܘܢ ܙܕܩܐ ܘܕܘܟܪܢܐ ܘܡ݁ܢܬܐ ܒܐܘܪܫܠܡ܂

next chapter