The Comprehensive Aramaic Lexicon

08:01	ܘܐܬܟܢܫܘ ܥܡܐ ܟܠܗ ܐܝܟ ܓܒܪܐ ܚܕ ܠܫܘܩܐ ܕܐܝܬ ܩܕܡ ܬܪܥܐ ܕܡܝ̈ܐ܂ ܘܐܡ݁ܪܝܢ ܠܥܙܪܐ ܣ݁ܦܪܐ܂ ܠܡܝܬܝܘ ܣ݂ܦܪܐ ܕܢܡܘܣܐ ܕܡܘܫܐ ܕܦܩܕ ܡܪܝܐ ܥܠ ܐܝܣܪܝܠ܀
08:02	ܘܐܝܬܝ ܥܙܪܐ ܟܗܢܐ ܣ݂ܦܪܐ ܕܢܡܘܣܐ ܩܕܡ ܥܡܐ ܡܢ ܓܒܪ̈ܐ ܘܥܕܡܐ ܠܢܫ̈ܐ܂ ܘܟܠ ܡ݁ܢ ܕܐܬܛܝܒ ܠܡܫܡܥ ܒܚܕ ܒܝܪܚܐ ܫܒܝܥܝܐ܂
08:03	ܘܩ݂ܪܐ ܣ݂ܦܪܐ ܒܫܘܩܐ ܕܬܪܥܐ ܕܡܝ̈ܐ܂ ܡܢ ܨܦܪܐ ܘܥܕܡܐ ܠܦܠܓܗ ܕܝܘܡܐ ܩܕܡ ܓܒܪ̈ܐ ܘܢܫ̈ܐ܂ ܘܩܕܡ ܐܝܠܝܢ ܕܫ݁ܡܥܝܢ܂ ܘܐܕܢ̈ܝܗܘܢ ܕܥܡܐ ܨ̈ܠܝܢ ܗ̈ܘܝ ܘܨܝ݁ܬܝܢ ܠܦ̈ܘܩܕܢܐ ܕܢܡܘܣܐ܂
08:04	ܘܩܡ ܥܙܪܐ ܣ݁ܦܪܐ܃ ܥܠ ܡܓܕܠܐ ܕܩܝܣܐ ܕܥܒ݂ܕ܂ ܕܢܗܘܐ ܡܡܠܠ ܥܠܘܗܝ܂ ܘܩܡ ܡܬܝܬܐ ܠܘܬܗ ܘܫܡܘܥ ܘܥܢܢܝܐ܂ ܘܐܘܪܝܐ ܘܚܠܩܝܐ܂ ܘܡܥܣܝܐ ܩܡ݁ܘ ܡܢ ܝܡܝܢܗ܂ ܘܡܢ ܣܡܠܗ ܩܡ݁ܘ ܦܪܝܐ ܘܡܫܐܝܠ ܘܡܠܟܝܐ ܘܚܫܘܡ܂ ܘܚܫܒܝܐ ܘܙܟܪܝܐ ܘܡܫܠܘܡ܂
08:05	ܘܦܬ݂ܚ ܥܙܪܐ ܣ݁ܦܪܐ ܟܬܒܐ ܕܢܡܘܣܐ ܠܥܝܢ ܟܠܗ ܥܡܐ܂ ܡܛܠ ܕܪܡ ܗܘܐ ܡܢ ܟܠܗ ܥܡܐ܂ ܘܟܕ ܦܬ݂ܚ ܩܡ ܟܠܗ ܥܡܐ܂
08:06	ܘܒܪܟ ܥܙܪܐ ܠܡܪܝܐ ܐܠܗܐ ܪܒܐ܂ ܘܥ݂ܢܘ ܟܠܗ ܥܡܐ ܘܐܡ݁ܪܝܢ܂ ܐܡܝܢ ܘܐܡܝܢ܂ ܘܟܕ ܐܪܝܡܘ ܐܝܕܝ̈ܗܘܢ ܩܥ݂ܕܘ ܘܣܓܕܘ ܩܕܡ ܡܪܝܐ ܥܠ ܐܦܝ̈ܗܘܢ ܥܕܡܐ ܠܐܪܥܐ܂
08:07	ܘܝܫܘܥ ܘܒܢ̈ܘܗܝ܂ ܘܣܪܒܝܐ ܘܝܡܝܢ܂ ܘܥܩܘܦ ܘܫܒܬܝ܂ ܘܗܘܕܝܐ ܘܡܥܣܝܐ܂ ܘܩܠܛܝܐ ܘܥܙܪܝܐ ܘܝܘܙܒܪ܂ ܘܚܢܢܝ ܘܦܢܝܐ ܘܠܘܝ̈ܐ ܕܡܫܡܫܝܢ ܠܥܡܐ ܒܢܡܘܣܐ܂ ܘܥܡܐ ܩܝܡ݁ܝܢ ܥܠ ܕܘܟܬܗܘܢ܂
08:08	ܘܩܪܘ ܒܟܬܒܐ ܕܢܡܘܣܐ ܕܡܪܝܐ ܟܕ ܦܪܝܣ܂ ܘܐܬܛܦܝܣܘ ܒܗ ܘܐܣܬܟܠܘ ܒܩܪܝܢܗ܂
08:09	ܘܐܡ݂ܪ ܢܚܡܝܐ ܪܝܫܐ ܕܟܘܡܪ̈ܐ܂ ܘܥܙܪܐ ܟܘܡܪܐ ܣ݁ܦܪܐ܂ ܘܠܘܝ̈ܐ ܐܝܠܝܢ ܕܡܫܡܫܝܢ ܗܘܘ ܠܥܡܐ܂ ܘܐܡ݁ܪܝܢ ܠܟܘܠܗ ܥܡܐ܂ ܝܘܡܢܐ ܩܕܝܫ ܗܘ ܩܕܡ ܡܪܝܐ ܐܠܗܟܘܢ܂ ܠܐ ܬܟܪܐ ܠܟܘܢ ܘܠܐ ܬܒܟܘܢ܂ ܡܛܠ ܕܒܟ݁ܝܢ ܗܘܘ ܟܘܠܗ ܥܡܐ ܟܕ ܫܡ݁ܥܝܢ ܗܘܘ ܟܬܒܐ ܕܢܡܘܣܐ܂
08:10	ܘܐܡ݂ܪ ܠܗܘܢ ܙܠܘ ܐ݁ܟܘܠܘ ܘܐܫ݁ܬܘ܂ ܘܫܕܪܘ ܡܐܟܘܠܬܐ ܠܡ݁ܢ ܕܠܐ ܡܛܝܒ ܠܗ܂ ܡܛܘܠ ܕܩܕܝܫ ܗܘ ܝܘܡܢܐ ܩܕܡ ܡܪܝܐ܂ ܠܐ ܬܟܪܐ ܠܟܘܢ܂ ܡܛܠ ܕܝܘܡܐ ܗܘ ܕܚܕܘܬܐ ܕܡܪܝܐ܂ ܘܗܘ ܢܗܘܐ ܥܕܘܪܟܘܢ܂
08:11	ܘܠܘܝ̈ܐ ܡܫܬܩܝܢ ܠܟܠܗ ܥܡܐ ܘܐܡ݁ܪܝܢ܂ ܫܬܘܩܘ ܡܛܠ ܕܝܘܡܢܐ ܡܩܕܫ ܗܘ ܘܠܐ ܬܒܟܘܢ܂
08:12	ܘܐܙܠܘ ܟܘܠܗ ܥܡܐ ܠܡܐܟܠ ܘܠܡܫܬܐ ܘܠܡܫܕܪܘ ܡܐܟܘܠܬܐ܂ ܘܠܡܥܒܕ ܚܕܘܬܐ ܪܒܬܐ܂ ܘܐܬܛܦܝܣܘ ܒܡ̈ܠܐ ܐܝܠܝܢ ܕܐܘܕܥܘ ܐܢܘܢ܂
08:13	ܘܒܝܘܡܐ ܕܬܪܝܢ ܐܬܟܢܫܘ ܪ̈ܝܫܝ ܐܒܗ̈ܬܐ ܕܟܘܠܗ ܥܡܐ ܘܟܘܡܪ̈ܐ ܘܠܘܝ̈ܐ ܠܘܬ ܥܙܪܐ ܣ݁ܦܪܐ ܠܡܬܛܦܣܘ ܡܢܗ ܟܠ ܟܬܒܐ ܕܢܡܘܣܐ܂
08:14	ܐܫܟܚܘ ܒܟܬܒܐ ܕܢܡܘܣܐ ܕܦܩܕ ܡܪܝܐ ܠܡܘܫܐ܂ ܕܢܬܒܘܢ ܒܢ̈ܝ ܐܝܣܪܐܝܠ ܒܡ̈ܛܠܐ ܒܥܐܕܐ ܒܝܪܚܐ ܕܬܫܪܝ܂

08:15	ܘܕܢܫܡܥܘܢ ܐܩܪܝܘ ܟܪ̈ܘܙܐ ܒܟܠܗܝܢ ܩܘܪ̈ܝܝܗܘܢ ܘܒܐܘܪܫܠܡ ܘܐܡ݁ܪܝܢ ܣܩܘ ܠܛܘܪܐ܂ ܐܝܬܘ ܩܝ̈ܣܐ ܕܙܝܬܐ ܘܩܝ̈ܣܐ ܕܓܘܙܐ܂ ܘܛܪ̈ܦܐ ܕܕܩ̈ܠܐ ܘܛܪ̈ܦܐ ܕܐܛܪܘܓܐ܂ ܘܣܘ̈ܟܐ ܕܥܪ̈ܒܐ܂ ܘܥܒ݂ܕܘ ܡ̈ܛܠܠܐ ܐܝ݁ܟܢܐ ܕܟܬܝܒ ܒܟܬܒܐ ܕܢܡܘܣܐ ܕܡܘܫܐ܂

08:16	ܘܢܦ݂ܩܘ ܥܡܐ ܘܐܝܬܝܘ ܘܥܒ݂ܕܘ ܠܗܘܢ ܡ̈ܛܠܐ܂ ܓܒܪ ܥܠ ܐܓܪܗ ܘܒܕܪ̈ܝܗܘܢ܂ ܘܒܕܪ̈ܬܐ ܕܒܝܬܐ ܕܡܪܝܐ܂ ܘܒܫܘܩܐ ܕܬܪܥܐ ܕܡܝ̈ܐ܂ ܘܒܫܘܩܐ ܕܬܪܥܐ ܕܐܦܪܝܡ܂
08:17	ܘܥ݂ܒܕ ܟܠܗ ܥܡܐ ܕܗ݂ܦܟ ܡܢ ܫܒܝܐ ܡ̈ܛܠܐ܂ ܘܝ݂ܬܒܘ ܒܡ̈ܛܠܐ܂ ܡܛܠ ܕܠܐ ܥ݂ܒܕܘ ܒܢ̈ܝ ܐܝܣܪܝܠ ܗܟܢܐ ܡܢ ܝܘܡ̈ܬܗ ܕܝܫܘܥ ܒܪܢܘܢ ܥܕܡܐ ܠܗ ܠܝܘܡܐ ܗܢܐ܂ ܘܗܘܬ ܚܕܘܬܐ ܪܒܬܐ ܕܛܒ܂
08:18	ܘܩ݁ܪܝܢ ܗܘܘ ܒܟܬܒܐ ܕܢܡܘܣܗ ܕܡܪܝܐ ܟܘܠ ܝܘܡ ܒܝܘܡ ܡܢ ܝܘܡܐ ܩܕܡܝܐ ܥܕܡܐ ܠܝܘܡܐ ܐܚܪܝܐ܂ ܘܥܒܕܘ ܥܐ̈ܕܐ ܫܒܥܐ ܝܘܡ̈ܝܢ܂ ܘܒܝܘܡܐ ܕܬܡܢܝܐ ܐܬܟܢܫܘ ܐܝܟ݁ܢܐ ܕܟܬܝܒ ܠܗܘܢ܂