The Comprehensive Aramaic Lexicon

13:01	ܒܗ ܒܝܘܡܐ ܗ݀ܘ܃ ܐܬܩܪܝ ܟܬܒܐ ܕܢܡܘܣܐ ܕܡܘܫܐ ܒܐܕܢܝ̈ ܥܡܐ܂ ܘܐܫܬܟܚ ܕܟܬܝܒ ܒܗ܂ ܕܠܐ ܢܥܠܘܢ ܥܡܘܢܝ̈ܐ ܘܡܘܐܒܝ̈ܐ ܠܟܢܘܫܬܗ ܕܡܪܝܐ܂ ܥܕܡܐ ܠܥܠܡ܂
13:02	ܡܛܠ ܕܠܐ ܐܪܥܘ ܠܒܢ̈ܝ ܐܝܣܪܝܠ ܒܠܚܡܐ ܘܒܡܝ̈ܐ܂ ܘܐܓܪܘ ܠܗܘܢ ܠܒܠܥܡ ܠܡܠܛ ܐܢܘܢ܂ ܘܐܗܦܟ ܐܠܗܢ ܠܘ̈ܛܬܗ ܠܒܘܪ̈ܟܬܐ܀
13:03	ܗܝ݁ܕܝܢ ܟܕ ܫܡ݂ܥܘ ܡ̈ܠܐ ܕܢܡܘܣܐ ܐܬܦܪܫܘ ܟܠܗܘܢ ܥܪ̈ܘܒܐ ܡܢ ܐܝܣܪܐܝܠ܂
13:04	ܘܐ݂ܬܐ ܐܠܝܫܒ ܟܘܡܪܐ܂
13:05	ܘܒ݂ܢܐ ܠܗ ܬܡܢ ܕܪܬܐ ܚܕܐ ܪܒܬܐ܂ ܘܬܡܢ ܡܢ ܠܩܘܕܡܝܢ ܣܝܡ݁ܝܢ ܗܘܘ ܩܘܪ̈ܒܢܐ܂ ܘܠܒܘܢܬܐ ܘܡܐ̈ܢܐ ܕܡܥܣܪ̈ܐ ܕܥܒܘܪܐ ܘܕܚܡ݂ܪܐ ܘܕܡܫܚܐ܂ ܒܩܘܪ̈ܝܐ ܕܠܘ̈ܝܐ ܘܕܡܫܡ̈ܫܢܐ ܘܕܬܪ̈ܥܐ ܘܪ̈ܝܫܝܬܐ ܕܟܗ̈ܢܐ܂
13:06	ܘܒܟܠܗܝܢ ܗܠܝܢ ܠܐ ܗܘܝܬ ܒܐܘܪܫܠܡ܂ ܡܛܠ ܕܒܫܢܬ ܬܠܬܝܢ ܘܬܪ̈ܬܝܢ ܠܐܪܛܚܫܫܬ ܡ݁ܠܟܐ ܕܒܒܠ ܐ݁ܬܝܬ ܠܘܬ ܡ݁ܠܟܐ܂ ܘܒܚܪܬܐ ܕܝܘܡ̈ܬܐ ܐܫܬܐܠܬ ܡܢ ܡ݁ܠܟܐ܂
13:07	ܘܐܬ݁ܝܬ ܠܐܘܪܫܠܡ܂ ܘܐܣ݁ܬܟܠܬ ܒܝܫܬܐ ܕܥ݂ܒܕ ܐܠܝܫܒ ܠܛܘܒܝܐ܂ ܕܥ݂ܒܕ ܠܗ ܒܝܬܐ ܒܕܪܬܐ ܕܡܪܝܐ܂
13:08	ܘܐܬܐܒܫ ܠܝ ܛܒ܂ ܘܫ݁ܕܝܬ ܟܠܗܘܢ ܡܐܢ̈ܐ ܕܒܝܬܗ ܕܛܘܒܝܐ ܒܫܘܩܐ܃ ܠܒܪ ܡܢ ܕܪܬܐ܂
13:09	ܘܐܡ݁ܪܬ ܘܕܟܝܘ ܕܪܬܐ܂ ܘܐܗ݀ܦܟܬ ܠܬܡܢ ܡܐ̈ܢܝ ܒܝܬܗ ܕܡܪܝܐ܂ ܘܩܘܪ̈ܒܢܐ ܘܠܒܘܢܬܐ܂
13:10	ܘܝ݁ܕܥܬ ܕܡܢ݁ܬܐ ܕܠܘ̈ܝܐ ܠܐ ܡܬܝܗܒܐ܂ ܘܥܪܩܘ ܓܒܪ ܠܚܩܠܗ܂ ܠܘ̈ܝܐ ܘܡܫܡ̈ܫܢܐ܂ ܘܥ݁ܒ̈ܕܝ ܥܒܝ̈ܕܬܐ܂
13:11	ܘܐܢܐ ܕܢܬ܂ ܥܡ ܪ̈ܫܐ ܘܐܡ݁ܪܬ ܠܗܘܢ܂ ܡܛܠ ܡܢܐ ܫܒܝܩ ܒܝܬܗ ܕܡܪܝܐ܂ ܘܟܢ݁ܫܬ ܐܢܘܢ ܘܐܩ݁ܝܡܬ ܐܢܘܢ ܥܠ ܩܝܡܗܘܢ܂
13:12	ܘܟܠܗܘܢ ܝܗܘ̈ܕܝܐ ܐܝܬܝܘ ܡܥܣܪ̈ܐ܂ ܕܥܒܘܪܐ ܘܕܚܡ݂ܪܐ ܘܕܡܫܚܐ ܠܐܘܨܪ̈ܐ܂
13:13	ܘܐܫ݁ܠܛܬ ܥܠ ܐܘܨܪ̈ܐ ܠܫܠܡܝܐ ܟܘܡܪܐ܂ ܘܠܨܕܘܩ ܣ݁ܦܪܐ܂ ܘܠܦܪܝܐ ܒܪ ܠܘ̈ܝܐ܂ ܘܥܡܗܘܢ ܚܢܢ ܒܪ ܙܟܘܪ ܒܪ ܡܬܢܝܐ ܡܛܠ ܕܫܪ̈ܝܪܐ ܐܬܚܫܒܘ܂ ܘܦܨܬܗܘܢ ܣܠܩܬ ܠܡܗܘܐ ܪܝܫܐ ܠܐܚ̈ܝܗܘܢ܂
13:14	ܐܬܕܟܪ ܠܝ ܐܠܗܝ ܡܛܠ ܗܕܐ ܘܠܐ ܬܥܒܪ ܛܝܒܘܬܝ ܕܥܒܕܬ ܒܒܝܬ ܐܠܗܝ ܘܒܢܛܘܪ̈ܬܗ܀

13:15	ܒܝܘܡ̈ܬܐ ܗ݀ܢܘܢ ܚܙ݁ܝܬ ܒܝܗܘܕ ܐܘܪ̈ܚܬܐ ܕܪ̈ܕܝܢ ܒܫܒܬܐ܂ ܘܡܝ̈ܬܝܢ ܛܥ̈ܢܐ ܫܩܝܠܝܢ ܥܠ ܚܡ݁ܪ̈ܐ܂ ܘܐܦ ܚܡܪܐ ܘܥܢ̈ܒܐ ܘܬܐܢ̈ܐ ܘܛܥ̈ܢܐ ܡܥܠܝܢ ܠܐܘܪܫܠܡ ܒܝܘܡܐ ܕܫܒܬܐ܂ ܘܐܣܗܕܬ ܒܗܘܢ܂ ܕܠܐ ܬܙܒܢܘܢ ܨܝ݂ܕܐ܂

13:16	ܘܠܐ ܬܝܬܘܢ ܢܘ̈ܢܐ܂ ܘܠܐ ܬܙܒܢܘܢ ܘܠܐ ܬܙܒܢܘܢ ܒܫܒܬܐ ܠܒܢ̈ܝ ܝܗܘܕܐ ܒܐܘܪܫܠܡ܂
13:17	ܘܕܢ݁ܬ ܥܡ ܪ̈ܫܐ ܕܝܗܘܕܐ܂ ܘܐܡ݁ܪܬ ܠܗܘܢ܂ ܡܛܘܠ ܡܢܐ ܦܬܓܡܐ ܗܢܐ ܒܝ݂ܫܐ ܥܒ݁ܕܝܢ ܐܢܬܘܢ܂ ܘܡܚܠܝܢ ܐܢܬܘܢ ܝܘܡܐ ܕܫܒܬܐ܃
13:18	ܗܟܢܐ ܥܒܕܘ ܐܒ̈ܗܝܟܘܢ܂ ܘܐܝܬܝ ܐܠܗܐ ܥܠܝܢ ܟܠܗ݀ ܒܝ݂ܫܬܐ ܗܕܐ܂ ܥܠ ܩܪܝܬܐ ܗܕܐ܂ ܘܐܢܬܘܢ ܡܘܣܦܝܢ ܚܡܬܐ ܘܪܘܓܙܐ ܥܠ ܐܝܣܪܐܝܠ ܕܐܢܬܘܢ ܡܚܠܝܢ ܝܘܡܐ ܕܫܒܬܐ܂
13:19	ܗܝ݁ܕܝܢ ܟܕ ܐܬܦܬܚܘ ܬܪ̈ܥܐ ܕܐܘܪܫܠܡ ܩܕܡ ܫܒܬܐ ܐܡ݁ܪܬ ܕܢܬܬܚܕܘܢ ܬܪ̈ܥܐ܂ ܘܐܡ݁ܪܬ ܕܠܐ ܢܬܦܬܚܘܢ ܬܪ̈ܥܐ ܥܕܡܐ ܠܒܬܪ ܫܒܬܐ܂ ܘܡܢ ܛܠܝ̈ܝ ܐܩܝ݁ܡܬ ܥܠ ܬܪ̈ܥܐ܂ ܕܠܐ ܢܥܘܠ ܛܥܢܐ ܒܝܘܡܐ ܕܫܒܬܐ܂
13:20	ܘܒܬܘ ܬܓܪ̈ܐ ܘܙܒ̈ܢܝ ܙܒܢܐ ܠܒܪ ܡܢ ܐܘܪܫܠܡ ܝܘܡܐ ܘܬܪܝܢ܂
13:21	ܘܣܗ݀ܕܬ ܒܗܘܢ ܘܐܡ݁ܪܬ ܠܗܘܢ܂ ܡܛܠ ܡܢܐ ܐܢܬܘܢ ܠܐ ܥܐ݁ܠܝܢ ܐܢܬܘܢ ܥܕ ܩ݁ܝܡ ܝܘܡܐ ܒܬܪܥܐ ܕܫܘ݂ܪܐ܂ ܐܢ ܬܣܠܘܢ ܡܠܬܐ ܗܕܐ܂ ܐܘܫܛ ܐܝ݂ܕܐ ܥܠܝܟܘܢ܂ ܘܡܢܗ ܡܢ ܙܒܢܐ ܗ݀ܘ ܠܐ ܥܠܘ ܒܫܒܬܐ܂
13:22	ܘܐܡ݁ܪܬ ܠܠܘ̈ܝܐ ܕܢܗܘܘܢ ܡܕܟܝܢ ܘܥܐ݁ܠܝܢ ܢ݁ܛܘܪ̈ܐ ܘܬܪ̈ܥܐ ܠܡܩܕܫܘ ܠܝܘܡܐ ܕܫܒܬܐ܂ ܐܦ ܗܕܐ ܐܬܕܟܪ ܠܝ ܐܠܗܝ܂ ܘܚܘܣ ܥܠܝ ܐܝܟ ܣܘܓܐܬ ܪ̈ܚܡܝܟ܂
13:23	ܐܦ ܒܝܘܡ̈ܬܐ ܗ݀ܢܘܢ ܚܙ݁ܝܬ ܝܗܘܕܝ̈ܐ ܕܐܘܬܒܘ ܢܫ̈ܐ ܢܘܟܪ̈ܝܬܐ܂ ܐܫܕܘ̈ܕܝܬܐ ܐܦ ܥܡܘ̈ܢܝܬܐ ܘܡܘ̈ܐܒܝܬܐ܂
13:24	ܘܒ̈ܢܝܗܝܢ ܡܡܠܠܝܢ ܦܠܓܐ ܐܫܕܘܕܐܝܬ܂ ܘܦܠܓܐ ܠܐ ܚܟ݁ܡܝܢ ܠܡܡܠܠܘ ܝܗܘܕܐܝܬ܂ ܐܠܐ ܐܝܟ ܠܫܢܐ ܕܥܡܡ̈ܐ܂
13:25	ܘܕܢܬ ܥܡܗܘܢ ܘܠܛ݁ܬ ܐܢܘܢ܂ ܘܩ݁ܛܠܬ ܡܢܗܘܢ ܓܒܪ̈ܐ ܘܛܡ݁ܪܬ ܐܢܘܢ ܘܐܘܡ݁ܝܬ ܐܢܘܢ ܒܐܠܗܐ܂ ܕܠܐ ܬܬܠܘܢ ܒܢ̈ܬܟܘܢ ܠܒܢ̈ܝܗܘܢ܂ ܘܠܐ ܬܣܒܘܢ ܡܢ ܒܢ̈ܬܗܘܢ ܠܒܢܝܟܘܢ܂ ܘܝ ܠܟܘܢ܂
13:26	ܡܛܠ ܗܠܝܢ ܗܘ ܚܛ݂ܐ ܫܠܝܡܘܢ ܡ݁ܠܟܐ ܕܐܝܣܪܝܠ܂ ܗ݀ܘ ܕܒܥܡ̈ܡܐ ܣܓܝ̈ܐܐ ܠܐ ܗ݂ܘܐ ܡ݁ܠܟܐ ܐܟܘܬܗ܂ ܘܪܚܝܡ ܗܘܐ ܥܠ ܐܠܗܗ܂ ܘܝܗܒܗ ܐܠܗܐ ܡ݁ܠܟܐ ܥܠ ܟܘܠܗ ܐܝܣܪܐܝܠ܂ ܘܐܦ ܠܗ ܐܚܛܝ ܢܫ̈ܐ ܢܘܟܪ̈ܝܬܐ܂
13:27	ܘܠܟܘܢ ܐܫܬܡܥ ܥܡܐ/ܦܬܓܡܐ#4#/ ܘܥܒ݂ܕܬܘܢ ܗܕܐ ܒܝ݂ܫܬܐ ܪܒܬܐ ܠܡܟܕܒܘ ܒܐܠܗܢ܂ ܘܠܡܘܬܒܘ ܢܫ̈ܐ ܢܘܟܪ̈ܝܬܐ܂
13:28	ܘܡܢ ܒ̈ܢܝ ܝܘܝܕܥ ܒܪ ܐܠܝܫܒ ܟܘܡܪܐ ܪܒܐ ܗ݂ܘܐ ܚܬܢܐ ܠܣܡܒܠܝܛ ܚܘܪܢܝܐ܂ ܘܐܦܪܩܬܗ ܡܢ ܠܘܬܝ܂
13:29	ܐܬܕܟܪ ܠܗܘܢ ܐܠܗܝ ܥܠ ܫܪܟܐ ܕܟܘܡܪܘܬܐ ܘܥܠ ܫܪܟܐ ܕܟܘܡܪ̈ܐ ܘܕ̈ܠܘܝܐ܂
13:30	ܘܕܟܝ݂ܬ ܐܢܘܢ ܡܢ ܟܘܠܗܘܢ ܥܡܡ̈ܐ܂ ܘܐܩܝܡܬ ܐܢܘܢ ܒܢܛܘܪ̈ܬܗܘܢ ܠܟܘܡܪ̈ܐ ܘܠܠܘ̈ܝܐ ܐܢܫ ܒܥ݁ܒܕܗ܂
13:31	ܘܠܩܘܪ̈ܒܢܐ ܘܠܩܘ̈ܕܫܐ ܒܙܒܢܗܘܢ ܘܒܥܐ̈ܕܝܗܘܢ ܘܒܒܘܟܪ̈ܐ܂ ܐܬܕܟܪ ܠܝ ܐܠܗܝ ܗܕܐ ܛܝܒܘ܂