The Comprehensive Aramaic Lexicon

05:01	ܣܵܟ݂ܵܐ ܡܸܫܬ݁ܲܡܥܵܐ ܒܲܝܢܵܬ݂ܟ݂ܘ݂ܢ ܙܵܢܝܘ݂ܬ݂ܵܐ܂ ܘܕ݂ܲܐܝܟ݂ ܗܵܕ݂ܸܐ ܙܵܢܝܘ݂ܬ݂ܵܐ܂ ܐܲܝܕ݂ܵܐ ܕܵܐܦ݂ܠܵܐ ܒܸܝܬ݂ ܚܲܢܦ݂ܸܐ̈ ܡܸܫܬ݁ܲܡܗܵܐ܂ ܥܕ݂ܲܡܵܐ ܕܢܸܣܲܒ݂ ܒܪܵܐ ܐܲܢܼܬ݁ܲܬ݂ ܐܲܒ݂ܘ݂ܗܼܝ܂
05:02	ܘܲܐܢܼܬ݁ܘ݂ܢ ܚܬ݂ܝܼܪܝܼܢ ܐܢܼܬ݁ܘ݂ܢ܃ ܘܠܵܐ ܕܸܝܢ ܝܲܬ݁ܝܼܪܵܐܝܼܬ݂ ܝܼܬ݂ܸܒ݂ܬ݁ܘ݂ܢ ܒܸܐܒ݂ܠܵܐ܃ ܕܢܸܫܬ݁ܩܸܠ ܡܸܢ ܒܲܝܢܵܬ݂ܟ݂ܘ݂ܢ ܗܲܘ ܡܲܢ ܕܗܵܢܵܐ ܣܘ݂ܥܪܵܢܵܐ ܣܥܲܪ܂
05:03	ܐܸܢܵܐ ܓܸܝܪ ܟܲܕ݂ ܪܲܚܝܼܩ ܐܼܢܵܐ ܡܸܢܟ݂ܘ݂ܢ ܒܲܦ݂ܓ݂ܲܪ܂ ܘܩܲܪܝܼܒ݂ ܐܼܢܵܐ ܠܟ݂ܘ݂ܢ ܒܪܘ݂ܚ܃ ܡܸܢ ܟܲܕ݁ܘ݂ ܕܵܢܸܬ݂ ܐܲܝܟ݂ ܩܲܪܝܼܒ݂ܵܐ ܠܗܲܘ ܡܲܢ ܕܗܵܕ݂ܸܐ ܣܵܥܲܪ܃
05:04	ܕܒܲܫܡܸܗ ܕܡܵܪܲܢ ܝܸܫܘ݂ܥ ܡܫܝܼܚܵܐ ܬܸܬ݂ܟ݁ܲܢܫܘ݂ܢ ܟܽܠܟ݂ܘ݂ܢ܃ ܘܸܐܢܵܐ ܥܲܡܟ݂ܘ݂ܢ ܒܪܘ݂ܚ܃ ܥܲܡ ܚܲܝܠܸܗ ܕܡܵܪܲܢ ܝܸܫܘ݂ܥ ܡܫܝܼܚܵܐ܃
05:05	ܘܬ݂ܲܫܠܡܘ݂ܢܸܗ ܠܗܵܢܵܐ ܠܣܵܛܵܢܵܐ ܠܲܐܒ݂ܕ݂ܵܢܵܐ ܕܦܲܓ݂ܪܸܗ܃ ܕܲܒ݂ܪܘ݂ܚ ܢܼܚܸܐ ܒܝܲܘܡܸܗ ܕܡܵܪܲܢ ܝܸܫܘ݂ܥ ܡܫܝܼܚܵܐ܀

05:06	ܠܵܐ ܫܲܦ݁ܝܼܪ ܫܘ݂ܒ݂ܗܵܪܟ݂ܘ݂ܢ܂ ܠܵܐ ܝܵܕ݂ܥܝܼܢ ܐܢܼܬ݁ܘ݂ܢ ܕܲܚܡܝܼܪܵܐ ܩܲܠܝܼܠ ܟܽܠܵܗ ܓܒ݂ܝܼܠܬܵܐ ܡܲܚܡܲܥ܃

05:07	ܕܲܟ݁ܲܘ ܡܸܢܟ݂ܘ݂ܢ ܚܡܝܼܪܵܐ ܥܲܬ݁ܝܼܩܵܐ܃ ܕܬܸܗܘܘ݂ܢ ܓܒ݂ܝܼܠܬܵܐ ܚܲܕ݂ܼܬ݂ܵܐ܃ ܐܲܝܟ݁ܲܢܵܐ ܕܼܐܝܬ݂ܲܝܟ݁ܘ݂ܢ ܦܲܛܝܼܪܵܐ܂ ܦܸܨܚܵܐ ܓܸܝܪ ܕܝܼܠܲܢ܃ ܡܫܝܼܚܵܐ ܗܘ݂܂ ܕܸܐܬ݂ܢܟ݂ܸܣ ܚܠܵܦ݂ܲܝܢ܂
05:08	ܡܸܛܽܠ ܗܵܢܵܐ ܢܸܥܒܸ݁ܕ݂ ܥܲܕ݂ܥܼܕ݂ܵܐ܃ ܠܵܐ ܒܲܚܡܝܼܪܵܐ ܥܲܬ݁ܝܼܩܵܐ܂ ܘܠܵܐ ܒܲܚܡܝܼܪܵܐ ܕܒܝܼܫܘ݂ܬ݂ܵܐ ܘܲܕ݂ܡܲܪܝܼܪܘ݂ܬ݂ܵܐ܃ ܐܸܠܵܐ ܒܲܚܡܝܼܪܵܐ ܕܕ݂ܲܟ݂ܝܘ݂ܬ݂ܵܐ ܘܲܕ݂ܩܲܕ݁ܝܼܫܘ݂ܬ݂ܵܐ܀
05:09	ܟܸܬ݂ܒܸ݁ܬ݂ ܠܟ݂ܘ݂ܢ ܒܸܐܓ݁ܲܪܬܵܐ܃ ܕܠܵܐ ܬܸܬ݂ܚܲܠܛܘ݂ܢ ܥܲܡ ܙܲܢܵܝܸܐ̈܂
05:10	ܠܵܐ ܕܸܝܢ ܐܵܡܲܪ ܐܼܢܵܐ ܥܲܠ ܙܲܢܵܝܸܐ̈ ܕܲܒ݂ܥܵܠܡܵܐ ܗܵܢܵܐ܂ ܐܲܘ ܥܲܠ ܥܵܠܘ݂ܒ݂ܸܐ̈܂ ܐܲܘ ܥܲܠ ܚܵܛܘ݂ܦ݂ܸܐ̈܂ ܐܲܘ ܥܲܠ ܦܵܠܚܲܝ̈ ܦ݁ܬ݂ܲܟ݂ܪܸ̈ܐ܂ ܘܸܐܢ ܠܵܐ܃ ܚܲܝܵܒ݂ܝܼܢ ܗܼܘܲܝܬ݁ܘ݂ܢ ܐܵܦ݂ ܡܸܢ ܥܵܠܡܵܐ ܠܡܸܦ݁ܲܩ܂
05:11	ܗܵܕ݂ܸܐ ܕܸܝܢ ܕܟܸܬ݂ܒܸ݁ܬ݂ ܠܟ݂ܘ݂ܢ ܕܠܵܐ ܬܸܬ݂ܚܲܠܛܘ݂ܢ܃ ܐܸܢ ܐܝܼܬ݂ ܕܡܸܬ݂ܩܪܸܐ ܐܲܚܵܐ܂ ܘܼܐܝܬ݂ܲܘܗܼܝ ܙܲܢܵܝܵܐ܂ ܐܲܘ ܥܵܠܘ݂ܒ݂ܵܐ܂ ܐܲܘ ܦܵܠܲܚ ܦ݁ܬ݂ܲܟ݂ܪܸ̈ܐ܂ ܐܲܘ ܡܨܲܥܪܵܢ܂ ܐܲܘ ܪܲܘܵܝ܂ ܐܲܘ ܚܵܛܘ݂ܦ݂܂ ܥܲܡ ܐܲܝܢܵܐ ܕܗܵܟ݂ܲܢܵܐ ܗܘ݂܃ ܐܵܦ݂ܠܵܐ ܠܲܚܡܵܐ ܠܡܸܐܟ݂ܲܠ܂
05:12	ܡܵܐ ܠܝܼ ܓܸܝܪ ܠܲܡܕ݂ܵܢ ܠܒ݂ܲܪ̈ܵܝܸܐ܂ ܐܲܢܼܬ݁ܘ݂ܢ ܠܕ݂ܲܠܓ݂ܲܘ ܕܘ݂ܢܘ܃
05:13	ܠܒ݂ܲܪ̈ܵܝܸܐ ܕܸܝܢ ܐܲܠܵܗܵܐ ܕܵܐܸܢ܂ ܘܫܘ݂ܩܠܘ݂ܗܼܝ ܠܒ݂ܝܼܫܵܐ ܡܸܢ ܒܲܝܢܵܬ݂ܟ݂ܘ݂ܢ܀