← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62050: Phil

Click on a word for lexical analysis
Click on a red-colored coordinate for comments and/or translations of the line

previous chapter


02:01 ܐܸܢ ܐܝܼܬ݂ ܠܟ݂ܘ݂ܢ ܗܵܟ݂ܝܼܠ܂ ܒܘ݂ܝܵܐܵܐ ܒܲܡܫܝܼܚܵܐ܂ ܘܸܐܢ ܡܲܡܠܸܐ ܒܠܸܒ̇ܵܐ ܒܚܘ݂ܒ̇ܵܐ܂ ܘܸܐܢ ܫܲܘܬ̇ܵܦ݂ܘ݂ܬ݂ܵܐ ܕܪܘ݂ܚܵܐ܂ ܘܸܐܢ ܪܘ݂ܚܵܦ݂ܵܐ ܘܪ̈ܲܚܡܸܐ܃
02:02 ܫܲܠܸܡܘ ܚܲܕ݂ܘܲܬ݂ܝ܃ ܕܚܲܕ݂ ܪܸܥܝܵܢܵܐ ܢܸܗܘܸܐ ܠܟ݂ܘ݂ܢ܂ ܘܚܲܕ݂ ܚܘ݂ܒ̇ܵܐ܂ ܘܲܚܕ݂ܵܐ ܢܦ݂ܸܫ܂ ܘܲܚܕ݂ܵܐ ܬܲܪܥܝܼܬ݂ܵܐ܂
02:03 ܘܡܸܕܸܡ ܒܚܸܪܝܵܢܵܐ ܐܲܘ ܒܬܸܫܒ݁ܘ݂ܚܬܵܐ ܣܪܝܼܩܬܵܐ܂ ܠܵܐ ܬܸܥܒ݁ܕ݂ܘ݂ܢ܃ ܐܸܠܵܐ ܒܡܲܟ݁ܝܼܟ݂ܘ݂ܬ݂ ܪܸܥܝܵܢܵܐ܃ ܟܽܠܢܵܫ ܠܚܲܒ݂ܪܸܗ ܐܲܝܟ݂ ܕܲܡܝܲܬ݁ܲܪ ܡܸܢܸܗ܂
02:04 ܘܠܵܐ ܐܼܢܵܫ ܕܢܲܦ݂ܫܸܗ ܢܼܐܨܲܦ݂܃ ܐܸܠܵܐ ܟܽܠܢܵܫ ܐܵܦ݂ ܕܚܲܒ݂ܪܸܗ܂
02:05 ܘܗܵܕ݂ܸܐ ܐܸܬ݂ܪܲܥܲܘ ܒܢܲܦ݂ܫܟ݂ܘ݂ܢ܃ ܗܵܝ ܕܵܐܦ݂ ܝܸܫܘ݂ܥ ܡܫܝܼܚܵܐ܂
02:06 ܗܲܘ ܕܟܲܕ݂ ܐܝܼܬ݂ܲܘܗܼܝ ܒܲܕ݂ܡܘ݂ܬ݂ܵܐ ܕܲܐܠܵܗܵܐ܃ ܠܵܐ ܗܼܘܵܐ ܚܛܘ݂ܦ݂ܝܵܐ ܚܲܫܒ̇ܵܗ ܗܵܕ݂ܸܐ܂ ܕܼܐܝܬ݂ܲܘܗܼܝ ܦܸܚܡܵܐ ܕܲܐܠܵܗܵܐ܂
02:07 ܐܸܠܵܐ ܢܲܦ݂ܫܸܗ ܣܲܪܸܩ܂ ܘܲܕ݂ܡܘ݂ܬ݂ܵܐ ܕܥܲܒ݂ܕ̇ܵܐ ܢܣܲܒ݂܂ ܘܲܗܘܵܐ ܒܲܕ݂ܡܘ݂ܬ݂ܵܐ ܕ݁ܲܒ݂ܢܲܝܢܵܫܵܐ܂ ܘܒ݂ܸܐܣܟܼ݁ܡܵܐ ܐܸܫܬ݁ܟ݂ܲܚ ܐܲܝܟ݂ ܒܲܪܢܵܫܵܐ܂
02:08 ܘܡܲܟܸ݁ܟ݂ ܢܲܦ݂ܫܸܗ܂ ܘܸܐܫܬ݁ܡܲܥ ܥܕ݂ܲܡܵܐ ܠܡܲܘܬܵܐ܂ ܡܲܘܬܵܐ ܕܸܝܢ܂ ܕܲܙܩܝܼܦ݂ܵܐ܂
02:09 ܡܸܛܽܠ ܗܵܢܵܐ ܐܵܦ݂ ܐܲܠܵܗܵܐ ܐܲܣܓ݁ܝܼ ܪܲܡܪܡܸܗ܂ ܘܝܲܗܼܒ݂ ܠܸܗ ܫܡܵܐ ܕܲܡܝܲܬ݁ܲܪ ܡܸܢ ܟܽܠ ܫܡܵܗܝܼܢ̈܃
02:10 ܕܒܲܫܡܸܗ ܕܝܸܫܘ݂ܥ ܟܽܠ ܒܪܘ݂ܟ݂ ܬܸܟ݁ܘ݂ܦ݂܂ ܕܒܲܫܡܲܝܵܐ܂ ܘܒ݂ܲܐܪܥܵܐ܂ ܘܕ݂ܲܠܬ݂ܲܚܬ݁ ܡܸܢ ܐܲܪܥܵܐ܃
02:11 ܘܟ݂ܽܠ ܠܸܫܵܢ ܢܲܘܕܸ݁ܐ ܕܡܵܪܝܵܐ ܗܼܘ ܝܸܫܘ݂ܥ ܡܫܝܼܚܵܐ ܠܫܘ݂ܒ݂ܚܵܐ ܕܲܐܠܵܗܵܐ ܐܲܒ݂ܘ݂ܗܼܝ܀
02:12 ܡܸܟ݁ܝܼܠ ܚܲܒܝܼܒ݂ܲܝ̈܃ ܐܲܝܟ݁ܲܢܵܐ ܕܲܒ݂ܟ݂ܽܠܙܒ݂ܲܢ ܐܸܫܬ݁ܡܲܥܬ݁ܘ݂ܢ܃ ܠܵܐ ܟܲܕ݂ ܩܲܪܝܼܒ݂ ܐܼܢܵܐ ܠܟ݂ܘ݂ܢ ܒܲܠܚܘ݂ܕ݂܂ ܐܸܠܵܐ ܗܵܫܵܐ ܕܪܲܚܝܼܩ ܐܼܢܵܐ ܡܸܢܟ݂ܘ݂ܢ܃ ܝܲܬ݁ܝܼܪܵܐܝܼܬ݂ ܒܕܸܚܠܬ݂ܵܐ ܘܒ݂ܲܪܬ݂ܝܼܬ݂ܵܐ܃ ܦܠܘ݂ܚܘ ܦܘ݂ܠܚܵܢܵܐ ܕܚܲܝܲܝܟ݁ܘ݂ܢ̈܂
02:13 ܐܲܠܵܗܵܐ ܗܼܘ ܓܸܝܪ ܡܚܲܦܸ݁ܛ ܒܟܘ݂ܢ܃ ܐܵܦ݂ ܠܡܸܨܒ̇ܵܐ܂ ܐܵܦ݂ ܠܡܸܣܥܲܪ܃ ܗܲܘ ܕܨܵܒ݂ܸܝܢ ܐܢܼܬ݁ܘ݂ܢ܂
02:14 ܟܽܠܡܸܕܸܡ ܗܘܲܝܬ݁ܘ݂ܢ ܥܵܒ݂ܕܝܼܢ܃ ܕܠܵܐ ܪܸܛܢܵܐ ܘܲܕ݂ܠܵܐ ܦܘ݂ܠܵܓ݂܃
02:15 ܕܬܸܗܘܘ݂ܢ ܬܲܡܝܼܡܸܐ̈ ܘܲܕ݂ܠܵܐ ܡܘ݂ܡ܂ ܐܲܝܟ݂ ܒܢܲܝܵܐ ܕܟܲܝܵܐ̈ ܕܲܐܠܵܗܵܐ܃ ܕܥܵܡܪܝܼܢ ܒܕܵܪܵܐ ܥܲܣܩܵܐ ܘܲܡܥܲܩܡܵܐ܂ ܘܸܐܬ݂ܚܙܲܘ ܒܲܝܢܵܬ݂ܗܘ݂ܢ ܐܲܝܟ݂ ܢܲܗܝܼܪܸ̈ܐ ܒܥܵܠܡܵܐ܃
02:16 ܕܼܐܝܬ݂ܲܝܟ݁ܘ݂ܢ ܠܗܘ݂ܢ ܒܕܘ݂ܟ݁ܲܬ݂ ܚܲܝܸ̈ܐ ܠܫܘ݂ܒ݂ܗܵܪܝ ܕܝܼܠܝ ܒܝܲܘܡܸܗ ܕܲܡܫܝܼܚܵܐ܃ ܕܠܵܐ ܗܼܘܵܐ ܐܝܼܩܼܐ ܪܸܗܛܸܬ݂ ܘܠܵܐ ܣܪܝܼܩܵܐܝܼܬ݂ ܥܸܡܠܸܬ݂܂
02:17 ܐܸܠܵܐ ܐܵܦ݂ܸܢ ܡܸܬ݂ܢܲܩܸܐ ܐܼܢܵܐ ܥܲܠ ܕܸܒ݂ܚܬ݂ܵܐ ܘܬ݂ܸܫܡܸܫܬܵܐ ܕܗܲܝܡܵܢܘ݂ܬ݂ܟ݂ܘ݂ܢ܃ ܚܵܕ݂ܸܐ ܐܼܢܵܐ ܘܪܵܘܸܙ ܐܼܢܵܐ ܥܲܡ ܟܽܠܟ݂ܘ݂ܢ܂
02:18 ܗܵܟ݂ܲܢܵܐ ܐܵܦ݂ ܐܲܢܼܬ݁ܘ݂ܢ ܚܕ݂ܲܘ ܘܲܪܘܲܙܘ ܥܲܡܝ܂
02:19 ܡܣܲܒܲܪ ܐܼܢܵܐ ܕܸܝܢ ܒܡܵܪܲܢ ܝܸܫܘ݂ܥ܃ ܕܸܐܫܲܕ݁ܲܪ ܠܘܵܬ݂ܟ݂ܘ݂ܢ ܠܛܝܼܡܵܬ݂ܸܐܵܘܣ ܒܲܥܓ݂ܲܠ܃ ܕܵܐܦ݂ ܠܝܼ ܢܸܗܘܸܐ ܠܝܼ ܢܝܵܚܵܐ܃ ܟܲܕ݂ ܐܼܠܲܦ݂ ܡܸܛܽܠܵܬ݂ܟ݂ܘ݂ܢ܂
02:20 ܠܲܝܬ݁ ܠܝܼ ܓܸܝܪ ܐܼܚܪܝܼܢ ܗܵܪܟ̇ܵܐ ܕܲܐܝܟ݂ ܢܲܦ݂ܫܝ ܗܼܘ݂܃ ܕܲܐܟ݂ܝܼܦ݂ܵܐܝܼܬ݂ ܝܵܨܸܦ݂ ܕܝܼܠܟ݂ܘ݂ܢ܂
02:21 ܟܽܠܗܘ݂ܢ ܓܸܝܪ ܕܢܲܦ݂ܫܗܘ݂ܢ ܗܼܘ݂ ܒ̇ܵܥܸܝܢ܃ ܘܠܵܐ ܕܝܸܫܘ݂ܥ ܡܫܝܼܚܵܐ܂
02:22 ܒܘ݂ܩܝܸܗ ܕܸܝܢ ܕܗܵܢܵܐ ܝܵܕ݂ܥܝܼܬ݁ܘ݂ܢ܃ ܕܲܐܝܟ݂ ܒܪܵܐ ܥܲܡ ܐܲܒ݂ܘ݂ܗܼܝ܃ ܗܵܟ݂ܲܢܵܐ ܦܵܠܲܚ ܥܲܡܝ ܒܲܣܒ݂ܲܪܬ݂ܵܐ܂
02:23 ܠܗܵܢܵܐ ܡܣܲܒܲܪ ܐܼܢܵܐ܃ ܕܸܐܫܲܕ݁ܲܪ ܠܘܵܬ݂ܟ݂ܘ݂ܢ ܒܲܥܓ݂ܲܠ ܡܵܐ ܕܲܚܙܝܼܬ݂ ܡܵܐ ܕܲܠܘܵܬ݂ܝ܂
02:24 ܘܲܬ݂ܟ݂ܝܼܠ ܐܼܢܵܐ ܥܲܠ ܡܵܪܝ܃ ܕܵܐܦ݂ ܐܸܢܵܐ ܒܲܥܓ݂ܲܠ ܐܵܬ݂ܸܐ ܐܼܢܵܐ ܠܘܵܬ݂ܟ݂ܘ݂ܢ܂
02:25 ܗܵܫܵܐ ܕܸܝܢ ܐܸܠܲܨܬ݂ܲܢܝ ܨܒ݂ܘ݂ܬ݂ܵܐ܃ ܕܸܐܫܲܕ݁ܲܪ ܠܘܵܬ݂ܟ݂ܘ݂ܢ ܠܸܐܦ݁ܲܦ݂ܪܵܘܕ݂ܝܼܛܵܣ ܐܲܚܵܐ܃ ܕܼܐܝܬ݂ܲܘܗܼܝ ܡܥܲܕ݁ܪܵܢܵܐ܂ ܘܦ݂ܵܠܚܵܐ ܕܥܲܡܝ܃ ܕܝܼܠܟ݂ܘ݂ܢ ܕܸܝܢ ܫܠܝܼܚܵܐ܂ ܘܲܡܫܲܡܫܵܢܵܐ ܕܲܚܫܲܚܬ݂ܝ܃
02:26 ܡܸܛܽܠ ܕܲܣܘܸܐ ܗܼܘܵܐ ܠܡܸܚܙܵܐ ܠܟ݂ܽܠܟ݂ܘ݂ܢ܃ ܘܲܡܥܵܩ ܗܼܘܵܐ ܕܝܼܕ݂ܲܥ ܕܲܫܡܲܥܬ݁ܘ݂ܢ ܕܸܐܬ݂ܟ݁ܪܲܗ܂
02:27 ܐܵܦ݂ ܐܸܬ݂ܟ݁ܪܲܗ ܓܸܝܪ ܥܕ݂ܲܡܵܐ ܠܡܲܘܬܵܐ܃ ܐܸܠܵܐ ܐܲܠܵܗܵܐ ܪܲܚܸܡ ܥܠܲܘܗܼܝ܃ ܠܵܐ ܗܼܘܵܐ ܕܸܝܢ ܥܠܲܘܗܼܝ ܒܲܠܚܘ݂ܕ݂܃ ܐܸܠܵܐ ܐܵܦ݂ ܥܠܲܝ܃ ܕܠܵܐ ܬܸܗܘܸܐ ܠܝܼ ܥܵܩܵܐ ܥܲܠ ܥܵܩܵܐ܂
02:28 ܚܦ݂ܝܼܛܵܐܝܼܬ݂ ܗܵܟ݂ܝܼܠ ܫܲܕ݁ܲܪܬܸ݁ܗ ܠܘܵܬ݂ܟ݂ܘ݂ܢ܃ ܕܟܲܕ݂ ܬܸܚܙܘ݂ܢܵܝܗܼܝ܂ ܬܘ݂ܒ݂ ܬܸܚܕ݁ܘ݂ܢ܃ ܘܠܝܼ ܩܲܠܝܼܠ ܢܸܗܘܸܐ ܢܦ݂ܼܐܫܵܐ܂
02:29 ܩܲܒ݁ܠܘ݂ܗܼܝ ܗܵܟ݂ܝܼܠ ܒܡܵܪܝܵܐ ܒܟܽܠ ܚܲܕ݂ܘܵܐ܂ ܘܠܲܐܝܠܸܝܢ ܕܗܵܟ݂ܲܢܵܐ ܐܸܢܘ݂ܢ܃ ܒܼܐܝܩܵܪܵܐ ܐܲܚܘ݂ܕ݂ܘ ܐܸܢܘ݂ܢ܂
02:30 ܡܸܛܽܠ ܥܒ݂ܵܕ݂ܵܐ ܓܸܝܪ ܕܲܡܫܝܼܚܵܐ ܥܕ݂ܲܡܵܐ ܠܡܲܘܬܵܐ ܡܲܛܝܼ܂ ܘܒ݂ܲܣܲܪ ܥܲܠ ܢܲܦ݂ܫܸܗ܃ ܕܲܢܡܲܠܸܐ ܡܸܕܸܡ ܕܒܲܨܲܪܬ݁ܘ݂ܢ ܗܼܘܲܝܬ݁ܘ݂ܢ ܒܬܸܫܡܸܫܬܵܐ ܕܲܠܘܵܬ݂ܝ܀

next chapter