The Comprehensive Aramaic Lexicon

03:01	ܡܸܟ݁ܝܼܠ ܐܲܚܲܝ̈ ܚܕ݂ܲܘ ܒܡܵܪܲܢ܂ ܗܸܢܸܝܢ ܟܲܕ݂ ܗܸܢܸܝܢ ܕܸܐܟ݂ܬܘ݂ܒ݂ ܠܟ݂ܘ݂ܢ܃ ܠܵܐ ܡܵܐܢܵܐ ܠܝܼ܃ ܡܸܛܽܠ ܕܲܠܟ݂ܘ݂ܢ ܡܙܲܗܪ̈ܵܢ܂

03:02	ܐܸܙܕ݁ܲܗܼܪܘ ܡܸܢ ܟܲܠܒܸ݁ܐ̈܂ ܐܸܙܕ݁ܲܗܼܪܘ ܡܸܢ ܦܵܥܠܸܐ̈ ܒܝܼܫܸܐ̈܂ ܐܸܙܕ݁ܲܗܼܪܘ ܡܸܢ ܦܣܵܩ ܒܸܣܪܵܐ܂

03:03	ܓܙܘ݂ܪܬܵܐ ܓܸܝܪ ܚܢܲܢ ܐܝܼܬ݂ܲܝܢ܃ ܐܲܝܠܸܝܢ ܕܦܵܠܚܝܼܢܲܢ ܠܲܐܠܵܗܵܐ ܒܪܘ݂ܚܵܐ܃ ܘܡܸܫܬ݁ܲܒ݂ܗܪܝܼܢܲܢ ܒܝܸܫܘ݂ܥ ܡܫܝܼܚܵܐ܃ ܘܠܵܐ ܬܟ݂ܝܼܠܝܼܢܲܢ ܥܲܠ ܒܸܣܪܵܐ܃
03:04	ܟܲܕ݂ ܠܝܼ ܐܝܼܬ݂ ܗܼܘܵܐ ܠܝܼ ܬܘ݂ܟ݂ܠܵܢܵܐ ܐܵܦ݂ ܥܲܠ ܒܸܣܪܵܐ܂ ܐܸܢ ܓܸܝܪ ܐܼܢܵܫ ܣܵܒ݂ܲܪ ܕܬܘ݂ܟ݂ܠܵܢܸܗ ܒܒ݂ܸܣܪܵܐ ܗܼܘ܃ ܝܲܬ݁ܝܼܪ ܡܸܢܸܗ ܐܸܢܵܐ܂
03:05	ܓܙܝܼܪܵܐ ܒܲܪ ܬܡܵܢܝܵܐ ܝܲܘܡܝܼܢ̈܂ ܡܸܢ ܛܘ݂ܗܡܵܐ ܕܼܐܝܣܪܵܝܸܠ܂ ܡܸܢ ܫܲܒ݂ܛܵܐ ܕܒ݂ܸܢܝܵܡܝܼܢ܂ܥܸܒ݂ܪܵܝܵܐ ܒܲܪ ܥܸܒ݂ܪ̈ܵܝܸܐ܂ ܒܢܵܡܘ݂ܣܵܐ ܦܪܝܼܫܵܝܵܐ܂
03:06	ܒܲܛܢܵܢܵܐ ܪܵܕ݂ܘ݂ܦ݂ܵܐ ܕܥܼܕܼ݁ܬܵܐ܂ ܘܲܒܙܲܕ݁ܝܼܩܘ݂ܬ݂ܵܐ ܕܢܵܡܘ݂ܣܵܐ ܕܠܵܐ ܪܸܫܝܵܢ ܗܼܘܝܼܬ݂܂
03:07	ܐܸܠܵܐ ܗܵܠܸܝܢ ܕܝܘ݂ܬ݂ܪܵܢܵܐ ܗܘܲܝ̈ ܠܝܼ܃ ܚܘ݂ܣܪܵܢܵܐ ܚܸܫܒܸ݁ܬ݂ ܐܸܢܸܝܢ̈ ܡܸܛܽܠ ܡܫܝܼܚܵܐ܂
03:08	ܐܵܦ݂ ܚܵܫܸܒ݂ ܐܼܢܵܐ ܠܗܸܝܢ ܟܽܠܗܸܝܢ ܚܘ݂ܣܪܵܢܵܐ܃ ܡܸܛܽܠ ܪܲܒ݁ܘ݂ܬ݂ܵܐ ܕܝܼܕ݂ܲܥܬ݂ܸܗ ܕܝܸܫܘ݂ܥ ܡܫܝܼܚܵܐ ܡܵܪܝ܃ ܗܲܘ ܕܡܸܛܽܠܵܬ݂ܸܗ ܟܽܠܡܸܕܸܡ ܚܸܣܪܸܬ݂܂ ܘܲܐܝܟ݂ ܙܸܒ݂ܠܵܐ ܚܸܫܒܸ݁ܬ݂܃ ܕܠܲܡܫܝܼܚܵܐ ܐܼܬ݂ܲܪ܃
03:09	ܘܸܐܫܬ݁ܟ݂ܲܚ ܒܸܗ܃ ܟܲܕ݂ ܠܲܝܬ݁ ܠܝܼ ܙܲܕ݁ܝܼܩܘ݂ܬ݂ܵܐ ܕܢܲܦ݂ܫܝ ܗܵܝ ܕܡܸܢ ܢܵܡܘ݂ܣܵܐ܃ ܐܸܠܵܐ ܗܵܝ ܕܡܸܢ ܗܲܝܡܵܢܘ݂ܬ݂ܵܐ ܕܲܡܫܝܼܚܵܐ܃ ܕܼܐܝܬ݂ܸܝܗ ܙܲܕ݁ܝܼܩܘ݂ܬ݂ܵܐ ܕܡܸܢ ܐܲܠܵܗܵܐ܃
03:10	ܕܒܵܗ ܐܸܫܬܲܘܕ݁ܲܥ ܠܝܸܫܘ݂ܥ ܘܲܠܚܲܝܠܵܐ ܕܲܩܝܵܡܬܸ݁ܗ܃ ܘܸܐܫܬܲܘܬ݁ܲܦ݂ ܒܚܲܫܲܘܗܼܝ̈܂ ܘܸܐܬ݁ܕܲܡܸܐ ܒܡܲܘܬܸ݁ܗ܃
03:11	ܕܲܠܡܵܐ ܐܸܫܟ݁ܲܚ ܐܸܡܲܛܸܐ ܠܲܩܝܵܡܬܵܐ ܕܡܸܢ ܒܸܝܬ݂ ܡܝܼܬ݂ܸܐ̈܂
03:12	ܠܵܐ ܗܼܘܵܐ ܡܸܢ ܟܲܕ݁ܘ݂ ܢܸܣܒܸ݁ܬ݂܂ ܐܲܘ ܡܸܢ ܟܲܕ݁ܘ݂ ܐܸܬ݂ܓ݁ܲܡܪܸܬ݂܂ ܐܸܠܵܐ ܪܵܗܸܛ ܐܼܢܵܐ܃ ܕܲܠܡܵܐ ܐܲܕ݂ܪܸܟ݂ ܠܡܸܕܸܡ ܕܡܸܛܽܠܵܬ݂ܸܗ ܐܲܕ݂ܪܟ݂ܲܢܝ ܝܸܫܘ݂ܥ ܡܫܝܼܚܵܐ ݁܀݁܀݁
03:13	ܐܲܚܲܝ̈܃ ܐܸܢܵܐ ܥܲܠ ܢܲܦ݂ܫܝ ܠܵܐ ܪܵܢܸܐ ܐܼܢܵܐ ܕܲܐܕ݂ܪܟ݂ܸܬ݂܂ ܚܕ݂ܵܐ ܕܸܝܢ ܝܵܕ݂ܲܥ ܐܼܢܵܐ܃ ܕܲܕ݂ܒ݂ܸܣܬ݁ܲܪܝ ܛܵܥܸܐ ܐܼܢܵܐ܂ ܘܠܲܩܕ݂ܵܡܲܝ ܡܸܫܬܲܘܫܲܛ ܐܼܢܵܐ܂
03:14	ܘܪܵܗܸܛ ܐܼܢܵܐ ܠܘ݂ܩܒ݂ܲܠ ܢܝܼܫܵܐ܃ ܕܸܐܣܲܒ݂ ܙܵܟ݂ܘ݂ܬ݂ܵܐ ܕܩܸܪܝܵܢܵܐ ܕܲܠܥܸܠ ܕܲܐܠܵܗܵܐ܂ ܒܝܸܫܘ݂ܥ ܡܫܝܼܚܵܐ܂
03:15	ܐܲܝܠܸܝܢ ܕܲܓ݂ܡܝܼܪܝܼܢ ܗܵܟ݂ܝܼܠ ܗܵܠܸܝܢ ܢܸܬ݂ܪܲܥܘ݂ܢ܂ ܘܸܐܢ ܡܸܕܸܡ ܐܼܚܪܵܢܝܵܐܝܼܬ݂ ܡܸܬ݂ܪܲܥܸܝܢ ܐܢܼܬ݁ܘ݂ܢ܃ ܐܵܦ݂ ܗܵܕ݂ܸܐ ܐܲܠܵܗܵܐ ܢܸܓ݂ܠܸܐ ܠܟ݂ܘ݂ܢ܂
03:16	ܒܪܲܡ ܠܗܵܕ݂ܸܐ ܕܡܲܛܝܼܢ܃ ܒܚܲܕ݂ ܫܒ݂ܝܼܠܵܐ ܢܸܫܠܲܡ܂ ܘܒ݂ܲܚܕ݂ܵܐ ܐܲܘܝܘ݂ܬ݂ܵܐ܀
03:17	ܐܸܬ݁ܕܲܡܲܘ ܒܝܼ ܐܲܚܲܝ̈܃ ܘܲܗܘܲܝܬ݁ܘ݂ܢ ܡܸܬ݂ܒ݁ܲܩܸܝܢ ܒܲܐܝܠܸܝܢ܂ ܕܗܵܟ݂ܲܢܵܐ ܡܗܲܠܟ݂ܝܼܢ܃ ܐܲܝܟ݂ ܕܡܘ݂ܬ݂ܵܐ ܕܒܲܢ ܚܵܙܸܝܬ݁ܘ݂ܢ܂
03:18	ܐܝܼܬ݂ ܓܸܝܪ ܣܲܓ݁ܝܼܸܐܐ̈܃ ܕܲܐܼܚܪܵܢܝܵܐܝܼܬ݂ ܡܗܲܠܟ݂ܝܼܢ܃ ܗܵܢܘ݂ܢ ܕܙܲܒ݂ܢܝܼܢ̈ ܣܲܓ݁ܝܼܵܐܢ̈ ܐܸܡܪܸܬ݂ ܠܟ݂ܘ݂ܢ ܥܠܲܝܗܘ݂ܢ܃ ܗܵܫܵܐ ܕܸܝܢ ܟܲܕ݂ ܒܵܟ݂ܸܐ ܐܼܢܵܐ ܐܵܡܲܪ ܐܼܢܵܐ܂ ܗܵܢܘ݂ܢ ܕܲܒ݂ܥܸܠܕ݁ܒ݂ܵܒ݂ܸܐ̈ ܕܲܙܩܝܼܦ݂ܸܗ ܕܲܡܫܝܼܚܵܐ܂
03:19	ܕܚܲܪܬ݂ܗܘ݂ܢ ܐܲܒ݂ܕܵܢܵܐ ܗܼܝ܂ ܗܵܢܘ݂ܢ ܕܲܐܠܵܗܗܘ݂ܢ ܟܲܪܣܗܘ݂ܢ ܘܬ݂ܸܫܒ݁ܘ݂ܚܬ݁ܗܘ݂ܢ ܒܸܗܬ݁ܲܬ݂ܗܘ݂ܢ܂ ܗܵܠܸܝܢ ܕܬܲܪܥܝܼܬ݂ܗܘ݂ܢ ܒܲܐܪܥܵܐ ܗܼܝ܂
03:20	ܕܝܼܠܲܢ ܕܸܝܢ ܦܘ݂ܠܚܵܢܲܢ ܒܲܫܡܲܝܵܐ ܗܼܘ܂ ܘܡܸܢ ܬܲܡܵܢ ܡܣܲܟܸ݁ܝܢܲܢ ܠܡܲܚܝܵܢܵܐ܂ ܠܡܵܪܲܢ ܝܸܫܘ݂ܥ ܡܫܝܼܚܵܐ܃
03:21	ܕܗܘ݂ ܢܚܲܠܸܦ݂ ܦܲܓ݂ܪܵܐ ܕܡܘ݂ܟ̇ܵܟ݂ܲܢ܃ ܕܢܸܗܘܸܐ ܒܲܕ݂ܡܘ݂ܬ݂ܵܐ ܕܦܲܓ݂ܪܵܐ ܕܫܘ݂ܒ݂ܚܸܗ܃ ܐܲܝܟ݂ ܚܲܝܠܸܗ ܪܲܒ̇ܵܐ ܗܲܘ ܕܒܸܗ ܟܽܠ ܐܸܫܬ݁ܲܥܒ݁ܲܕ݂ ܠܸܗ܀