The Comprehensive Aramaic Lexicon

04:01	ܘܫܡܥܘ ܒܢ̈ܝ ܐܝܣܪܐܝܠ ܕܥܡܪܝܢ ܒܝܗܘܕ܂ ܟܠ ܕܥܒܕ ܐܠܦܪܢܐ ܪܒ ܚܝܠܐ ܕܢܒܘ ܟܕܢܨܪ ܡܠܟܐ܂ ܕܐܬܘܪ ܒܥ̈ܡܡܐ܂ ܘܢܣܒܘ ܐܠܗ̈ܝܗܘܢ ܘܝܗܒܘ ܐܢܘܢ ܠܚܒܠܐ܂
04:02	ܘܕܚܠܘ ܛܒ ܡܢ ܩܕܡܘܗܝ܂ ܥܠ ܐܘܪܫܠܡ ܘܥܠ ܗܝܟܠܐ ܕܡܪܝܐ ܐܠܗܗܘܢ ܃ ܘܐܬܕܠܚܘ܂

04:03	ܡܛܠ ܕܗܟܝܠ ܗܘ ܣܠܩܘ ܗܘܘ ܡܢ ܫܒܝܬܐ܂ ܘܕܫܪܘܝܬܝܢ ܗܘ ܐܬܟܢܫܘ ܗܘܐ ܥܡܐ ܕܝܗܘ̈ܕܝܐ܂ ܘܡܐ̈ܢܐ ܘܡܕܒܚܐ܂ ܗܟܝܠ ܗܘ ܐܬܩܕܫܘ ܗܘܘ ܡܢ ܛܡܐܘܬܐ܂

04:04	ܘܫܕܪܘ ܠܬܚܘܡܐ ܕܫܡܪܝܢ ܘܠܩܘܪܝܐ ܕܒܝܬ ܚܘܪܢ ܘܠܐܒܠ ܡܚܘܠܐ܂ ܘܠܐܝܪܚܘ ܕܠܟܟܪ ܘܠܒܝܬ ܚܘܪܢ ܃ ܘܠܐܘܠܘܢܐ ܕܓܠܝܡ܂
04:05	ܘܐܚܕܘ ܟܠ ܪ̈ܝܫܝ ܛܘܪ̈ܐ ܪ̈ܡܐ܂ ܘܐܥܫܢܘ ܩܘܪ̈ܝܐ ܕܒܗܘܢ܂ ܘܐܣܩܘ ܐ̈ܢܝܢ ܐܝܟ ܕܠܩܪܒܐ܂ ܡܛܠ ܗܟܝܠ ܗܘ ܐܬܚܨܕ ܗ̈ܘܝ ܐܪ̈ܥܬܗܘܢ ܃
04:06	ܘܟܬܒ ܐܠܝܩܝܡ ܟܗܢܐ ܪܒܐ ܒܝܘܡ̈ܬܐ ܗܢܘܢ ܒܐܘܪܫܠܡ܂ ܠܥܡܘܪ̈ܐ ܕܒܝܬ ܦܠܘ܂ ܘܠܒܝܬ ܡܣܬܝܡ܂ ܕܠܥܠ ܡܢ ܡܣܪܐ ܕܠܘܩܒܠ ܐܝܙܪܥܝܠ ܘܠܘܩܒܠ ܦܩܥܬܐ ܪܒܬܐ܂ ܕܥܠ ܓܢܒ ܕܘܬܢ
04:07	ܠܡܐܡܪ܂ ܐܚܘܕܘ ܡܣܩܢܐ ܕܛܘܪܐ܂ ܕܡܢ ܬܡܢ ܗܘ ܡܥܠܢܐ ܠܝܗܘܕ܂ ܡܛܠ ܕܠܐ ܦܫܝܩ ܗܘܐ ܠܐܝܠܝܢ ܕܣܠܩܝܢ܂ ܡܛܠ ܕܩܛܝܢܐ ܗܘܬ ܡܣܩܬܐ܂ ܐܦ ܠܬܪ̈ܝܢ ܓܒܪ̈ܝܢ ܐܟܚܕܐ܂
04:08	ܘܥܒܕܘ ܒܢ̈ܝ ܐܝܣܪܝܠ ܐܝܟ ܕܐܡܪ ܐܠܝܩܝܡ ܟܗܢܐ ܪܒܐ܂ ܘܣܒ̈ܐ ܕܟܘܠܗ ܥܡܐ ܕܐܝܣܪܝܠ ܕܝܬܒܝܢ ܒܐܘܪܫܠܡ܂
04:09	ܘܓܥܘ ܟܠܗ ܐܝܣܪܐܝܠ ܠܘܬ ܡܪܝܐ ܒܟܠܗ ܠܒܗܘܢ ܃ ܘܡܟܟܘ ܢܦܫܗܘܢ ܒܨܘܡܐ ܪܒܐ܂
04:10	ܗܢܘܢ ܘܢܫ̈ܝܗܘܢ ܃ ܘܝܠܘܕ̈ܝܗܘܢ ܃ ܘܟܠ ܥܡܘܪܐ ܘܐܓܝܪܐ܂ ܘܙܒܝܢ ܟܣܦܐ܂ ܘܡܚܘ ܣܩ̈ܐ ܒܚܨ̈ܝܗܘܢ ܃
04:11	ܘܟܠ ܓܒܪܐ ܡܢ ܐܝܣܪܝܠ܂ ܃ ܘܐܢܬܬܐ ܘܛܠܝܐ ܐܝܠܝܢ ܕܥܡܪܝܢ ܒܐܘܪܫܠܡ܂ ܢܦܠܘ ܥܠ ܐܦܝ̈ܗܘܢ ܩܕܡ ܗܝܟܠܗ ܕܡܪܝܐ܂ ܘܚܙܩܘ ܣܩ̈ܐ ܥܠ ܡܕܒܚܐ܂
04:12	ܘܓܥܘ ܠܘܬ ܐܠܗܐ ܕܐܝܣܪܝܠ ܐܟܚܕܐ܂ ܕܠܐ ܢܬܠ ܝܠܕܝ̈ܗܘܢ ܠܒܙܬܐ܂ ܘܢܫܝ̈ܗܘܢ ܠܫܒ̈ܝܐ܂ ܘܡܕܝ̈ܢܬܗܘܢ ܠܚܒܠܐ ܘܩܘܕܫܐ ܠܛܡܐܘܬܐ ܘܠܚܣܕܐ܂ ܘܠܚܕܘܬܐ ܠܥܡܡ̈ܐ܂
04:13	ܘܫܡܥ ܡܪܝܐ ܘܚܙܐ ܐܘܠܨ̈ܢܝܗܘܢ ܃ ܘܗܘܘ ܥܡܐ ܨܝܡܝܢ ܝܘܡ̈ܬܐ ܣܓܝܐ̈ܐ܂ ܒܟܠܗ ܐܝܗܘܕ ܘܒܐܘܪܫܠܡ܂ ܘܢܦܠܘ ܩܕܡ ܒܝܬ ܩܘܕܫܐ ܕܡܪܝܐ ܚܝܠܬܢܐ܂
04:14	ܘܐܠܝܩܝܡ ܟܗܢܐ ܪܒܐ܂ ܘܟܠ ܐܝܠܝܢ ܕܩܝܡܝܢ ܩܕܡ ܡܪܝܐ܂ ܟܗܢ̈ܐ ܘܡܫܡ̈ܫܢܐ܂ ܟܕ ܐܣܝܪܝܢ ܣܩ̈ܐ ܒܚܨ̈ܝܗܘܢ ܃ ܘܡܩܪܒܝܢ ܗܘܘ ܝܩ̈ܕܐ ܫܠܡ̈ܐ ܐܡ̈ܝܢܐ܂ ܘܢܕܪ̈ܐ ܘܦܘܪ̈ܫܢܐ ܘܩܘܪ̈ܒܢܐ ܕܥܡܐ܂
04:15	ܘܩܛܡܐ ܐܪܡܐ ܥܠ ܟܠܘ̈ܝܗܘܢ܂ ܘܓܥܝܢ ܗܘܘ ܠܘܬ ܡܪܝܐ ܡܢ ܟܠܗ ܚܝܠܗܘܢ ܃ ܕܢܣܥܘܪ ܠܟܠܗ ܒܝܬ ܐܝܣܪܝܠ ܠܛܒ܂