The Comprehensive Aramaic Lexicon

06:01	ܘܟܕ ܫܠܝ ܪܘܒܐ ܕܓܒܪ̈ܐ ܕܚܕܝܪܝܢ ܠܗܘܢ ܃ ܐܡܪ ܐܠܦܪܢܐ ܪܒ ܚܝܠܐ ܕܐܬܘܪ ܠܐܚܝܘܕ ܩܕܡ ܟܠܗ ܥܡܐ܂
06:02	ܡܢ ܐܢܬ ܐܚܝܘܕ܂ ܘܟܠܗܘܢ ܒ̈ܢܝ ܡܘܐܒ܂ ܘܐܓܝܪ̈ܐ ܕܥܡܘܢ ܃ ܕܐܬܢܒܝܘ ܠܢ ܐܝܟ ܕܝܘܡܢܐ܂ ܘܐܡܪܬ ܠܢ ܕܥܡ ܥܡܐ ܕܐܝܣܪܝܠ ܠܐ ܢܩܪܒ܂ ܡܛܠ ܕܐܠܗܗܘܢ ܡܣܝܥ ܠܗܘܢ ܃ ܘܡܢܘ ܐܠܗܐ ܐܠܐ ܢܒܘ ܟܕܢܨܪ ܡܠܟܐ ܕܟܠܗ ܐܪܥܐ܂
06:03	ܘܗܘ ܢܫܕܪ ܚܝܠܗ ܘܢܘܒܕ ܐܢܘܢ܂ ܡܢ ܐ̈ܦܝ ܐܪܥܐ܂ ܘܠܐ ܢܦܪܘܩ ܐܢܘܢ ܐܠܗܗܘܢ ܃ ܘܚܢܢ ܥܒܕ̈ܘܗܝ ܕܢܒܘܟܕܢܨܪ܂ ܢܡܚܐ ܐܢܘܢ ܐܝܟ ܕܠܚܕ ܓܒܪ܂ ܘܠܐ ܢܩܘܡܘܢ ܩܕܡ ܨܗܠܐ ܕܪ̈ܟܫܢ܂
06:04	ܡܛܠ ܕܢܘܒܕ ܐܢܘܢ܂ ܘܬܚܘ̈ܡܝܗܘܢ ܢܪܘܘܢ ܡܢ ܕܡܗܘܢ ܃ ܘܦܩ̈ܥܬܗܘܢ ܢܬܡ̈ܠܝܢ ܡܢ ܫ̈ܠܕܝܗܘܢ ܃ ܘܠܐ ܬܩܘܡ ܥܩܒܬܐ ܕܪ̈ܓܠܝܗܘܢ ܩܕܡܝܢ܂ ܐܠܐ ܡܐܒܕ ܢܐܒܕܘܢ ܐܡܪ ܢܒܘܟܕܢܨܪ ܡܪܐ ܕܟܠܗ ܐܪܥܐ܂ ܘܠܐ ܢܗܦܟܘܢ ܦܬܓܡ̈ܘܗܝ ܠܒܣܬܪܗܘܢ ܃
06:05	ܐܢܬ ܕܝܢ ܐܚܝܘܕ ܐܓܝܪܐ ܕܥܡܗܘܢ܂ ܃ ܕܡܠܠܬ ܦܬܓ̈ܡܐ ܗܠܝܢ܂ ܒܝܘܡܐ ܕܥܘܠܟ ܠܐ ܬܚܙܐ ܡܢ ܝܘܡܢܐ܂ ܥܕܡܐ ܕܐܥܒܕ ܬܒܥܬܐ ܡܢ ܥܡܐ ܕܣܠܩ ܡܢ ܡܨܪܝܢ܂
06:06	ܘܗܝܕܝܢ ܢܥܘܠ ܣܝܦܐ ܕܚܝܠܝ ܘܢܝܙܟܐ ܕܥ̈ܒܕܝ ܒܕܦܢܟ܂ ܘܬܦܠ ܥܡ ܩ̈ܛܝܠܝܗܘܢ ܡܐ ܕܗܦܟܬ܂
06:07	ܘܢܘܒܠܘܢܟ ܥܒ̈ܕܝ ܝܘܡܢܐ܂ ܘܢܫܒܩܘܢܟ ܒܚܕܐ ܡܢ ܡܕܝܢ̈ܬܐ ܕܐܝܣܪܝܠ܂
06:08	ܘܠܐ ܬܡܘܬ ܥܕܡܐ ܕܥܡܗܘܢ ܬܐܒܕ ܝܘܡܢܐ܂

06:09	ܡܛܠ ܕܣܒܪܬ ܒܠܒܟ܂ ܕܠܐ ܡܬܬܚܕܝܢ܂ ܘܠܐ ܢܚܙܝܟ ܐܦܝ̈ܟ ܒܛܒܬܐ܂ ܃ ܡܠܠܬ ܓܝܪ ܘܠܐ ܢܦܠ ܚܕ ܡܢ ܦܬ̈ܓܡܝ܂

06:10	ܘܦܩܕ ܐܠܦܪܢܐ ܠܥܒ̈ܕܘܗܝ܂ ܐܝܠܝܢ ܕܩܝܡܝܢ ܒܡܫܟܢܗ܂ ܕܢܐܚܕܘܢܗ ܠܐܚܝܘܕ ܘܢܘܒܠܘܢܗ ܠܒܝܬ ܦܠܘ܂ ܘܠܡܫܠܡܘܬܗ ܒܝܕ ܒ̈ܢܝ ܐܝܣܪܝܠ܂
06:11	ܘܐܚܕܗ ܓܒܪܐ ܘܐܦܩܗ ܠܒܪ ܡܢ ܡܫܪܝܬܐ ܠܚܝܠܐ܂ ܘܐܘܒܠܗ ܠܛܘܪܐ܂ ܘܐܙܠܘ ܠܥܝܢܐ ܕܡ̈ܝܐ ܕܐܝܬ ܬܚܝܬ ܡܕܝܢܬܐ܂
06:12	ܘܟܕ ܚܙܘ ܐܢܘܢ ܐܢܫ̈ܝ ܡܕܝܢܬܐ܂ ܢܣܒܘ ܙܝܢܗܘܢ ܘܢܦܩܘ ܠܒܪ ܡܢ ܡܕܝܢܬܐ܂ ܠܪܝܫ ܛܘܪܐ܂ ܟܠ ܓܒܪ ܕܫܕܐ ܒܩܠܥܐ܂ ܘܐܚܕܘ‍{‍ܢܗ‍}‍ ܡܣܩܬܐ܂ ܘܫܕܘ ܒܗܘܢ ܟܐ̈ܦܐ܂
06:13	ܘܫܢܝܘ ܠܗܘܢ ܡܢ ܬܡܢ܂ ܘܐܣܪܘܗܝ ܠܐܚܝܘܕ ܘܫܒܩܘܗܝ ܟܕ ܫܕܐ ܬܚܝܬ ܛܘܪܐ܂ ܘܐܙܠܘ ܠܘܬ ܡܪܗܘܢ ܃
06:14	ܘܢܚܬܘ ܒ̈ܢܝ ܐܝܣܪܝܠ ܡܢ ܡܕܝܢܬܐ܂ ܘܩܡܘ ܥܠܘܗܝ ܘܫܪܐܘܗܝ܂ ܘܐܣܩܘܗܝ ܠܡܕܝܢܬܐ܂ ܘܐܥܠܘܗܝ ܠܘܬ ܪ̈ܘܪܒܢܐ ܕܡܕܝܢܬܗܘܢ ܃
06:15	ܕܗܘܘ ܒܝܘ̈ܡܬܐ ܗܢܘܢ܂ ܥܘܙܝܐ ܒܪ ܡܝܟܐ ܡܢ ܫܒܛܐ ܕܫܡܥܘܢ ܃ ܘܚܒܪܝ ܒܪ ܥܬܢܐܝܠ܂ ܘܟܪܡܝ ܒܪ ܡܝܫܐܝܠ܂
06:16	ܘܩܪܘ ܠܣܒ̈ܐ ܕܡܕܝܢܬܐ܂ ܘܪܗܛܘ ܟܠ ܥܠܝܡ̈ܝܗܘܢ ܘܢܫ̈ܝܗܘܢ ܘܒܢ̈ܝܗܘܢ ܠܟܢܘܫܬܐ܂ ܘܐܩܝܡܘܗܝ ܠܐܚܝܘܕ ܡܨܥܬ ܥܡܐ ܟܠܗ ܘܫܐܠܗ ܥܘܙܝܐ ܕܡܢܐ ܓܕܫ܂
06:17	ܘܥܢܐ ܘܐܡܪ ܠܗܘܢ ܟܠܗܘܢ ܦܬܓܡ̈ܐ ܕܥܡܗ ܕܐܠܦܪܢܐ܂ ܘܟܘܠ ܕܡܠܠ ܠܥܝܢ ܪ̈ܘܪܒܢܐ ܕܐܬܘܪ܂ ܘܐܬܪܘܪܒ ܐܠܦܪܢܐ ܥܠ ܒܝܬ ܐܝܣܪܐܝܠ܂
06:18	ܘܢܦܠܘ ܟܘܠܗ ܥܡܐ ܥܠ ܐܦܝ̈ܗܘܢ ܘܣܓܕܘ ܠܐܠܗܐ܂ ܘܥܢܘ ܘܐܡܪܘ܂ ܂
06:19	ܡܪܝܐ ܐܠܗܐ ܕܫܡܝܐ ܃ ܚܘܪ ܒܫܘܒܗܪܗܘܢ ܘܪܚܡ ܥܠ ܡܘܟܟܗ ܕܥܡܟ܂ ܘܚܘܪ ܒܡܩܕܫܟ ܒܝܘܡܐ ܗܢܐ܂
06:20	ܘܒܝܐܘܘܗܝ ܠܐܚܝܘܕ ܘܫܒܚܘܗܝ ܛܒ܂
06:21	ܘܕܒܪܗ ܥܘܙܝܐ ܡܢ ܟܢܫܐ ܘܐܘܒܠܗ ܠܒܝܬܗ܂ ܘܥܒܕ ܐܬܪܐ ܠܣܒ̈ܐ܂ ܘܩܪܐ ܠܐܠܗܐ ܕܐܝܣܪܝܠ ܟܠܗ ܠܠܝܐ ܕܢܥܕܪ ܐܢܘܢ܃܃Â