The Comprehensive Aramaic Lexicon

10:01	ܘܗܘܐ ܕܟܕ ܫܠܝܬ ܝܗܘܕܝܬ܂ ܡܢ ܕܠܡܓܥܐ ܠܘܬ ܐܠܗܐ ܕܐܝܣܪܝܠ܂ ܃ ܘܫܠܡܬ ܟܠܗܘܢ ܦܬܓܡ̈ܐ ܗܠܝܢ܂
10:02	ܩܡܬ ܡܢ ܕܪܡܝܐ ܗܘܬ܂ ܘܩܪܬ ܠܛܠܝܬܗ܂ ܘܢܚܬܬ ܠܒܝܬܗ ܃ ܂ ܐܝܟܐ ܕܗܘܝܐ ܗܘܬ ܒܫܒ̈ܐ ܘܒܥܐܕ̈ܐ܂
10:03	ܘܫܪܬ ܣܩܐ ܕܠܒܝܫܐ ܗܘܬ܂ ܘܫܠܚܬ ܡܐܢ̈ܐ ܕܐܪܡܠܘܬܗ܂ ܘܐܫܝܓܬ ܦܘܡܗ ܒܡܝ̈ܐ܂ ܘܡܫܚܬ ܡܫܚܐ ܓܒܝܐ܂ ܘܡܫܚܬ ܣܥܪܐ ܕܪܫܗ܂ ܘܣܡܬ ܡܣ̈ܢܐ ܒܪ̈ܓܠܝܗ܂ ܘܠܒܫܬ ܡܐܢ̈ܐ ܕܚܐܪܘܬܗ܂ ܃ ܕܠܒܫܐ ܗܘܬ ܒܝܘ̈ܡܝ ܚܝܘ̈ܗܝ ܕܡܢܫܐ ܒܥܠܗ܂
10:04	ܘܣܡܬ ܣܒܟܐ ܒܪܝܫܗ܂ ܘܣܡܬ ܩܘܠܒ̈ܝܗ܂ ܘܐܩ̈ܠܢܝܗ ܘܥܙܩ̈ܬܗ ܘܩܕ̈ܫܝܗ܂ ܘܟܠܗ ܨܒܬܗ܂ ܘܐܨܛܒܬܬ ܕܛܒ ܐܝܟ ܠܡܚܛܦ ܥܝܢܐ ܕܐܢܫܐ ܕܚܙܝܢ ܠܗ܂
10:05	ܘܝܗܒܬ ܠܐܡܬܗ ܥܠܘܐ ܕܚܡܪܐ ܘܡܐܢܐ ܕܡܫܚܐ܂ ܘܡܠܬ ܬܪܡܠܐ ܫܚܬܝܬܐ܂ ܘܕܒܠ̈ܐ ܘܠܚܡܐ܂ ܘܐܪܡܝܬ ܬܡܢ ܓܒܬܐ܂ ܘܚܙܩܬ ܡܐܢ̈ܝܗ܂ ܘܣܡܬ ܥܠ ܐܡܬܗ܂ ܘܢܦܩ ܬܪ̈ܬܝܗܝܢ܂
10:06	ܘܐܬ̈ܝ ‍<‍ܠܬܪܥܐ#2#‍>‍ ܕܡܕܝܢܬܐ܂ ܘܐܫܟܚ ܬܡܢ ܠܥܘܙܝܐ܂ ܘܠܣ̈ܒܐ ܕܡܕܝܢܬܐ ܚܒܪܝ ܘܟܪܡܝ܂
10:07	ܘܚܙܘ ܫܘܚܠܦܐ ܕܐܦ̈ܝܗ܂ ܘܡܥܛܦܐ ܕܢܚܬܝܗ܂ ܘܬܡܗܘ ܛܒ ܥܠ ܫܘܦܪܗ܂ ܘܐܡܪܘ ܠܗ
10:08	ܐܠܗܗܘܢ ܕܐܒ̈ܗܝܢ ܢܬܠ ܠܟܝ ܪ̈ܚܡܐ܂ ܘܬܫܠܡܝܢ ܨܢܝܥܘܬܟܝ܂ ܠܫܘܒܚܐ ܕܒ̈ܢܝ ܐܝܣܪܝܠ ܘܠܪܘܡܐ ܕܐܪܫܠܡ܂ ܘܢܦܠܬ ܥܠ ܐ̈ܦܝܗ ܘܣܓܕܬ ܠܐܠܗܐ܂
10:09	ܘܐܡܪܬ ܠܗܘܢ ܃ ܦܩܘܕܘ ܦܬܚܝܢ ܬܪ̈ܥܐ ܕܡܕܝܢܬܐ܂ ܘܐܦܘܩ ܘܐܫܠܡ ܦܬܓ̈ܡܐ ܕܡܠܠܬܘܢ ܥܡܝ܂ ܘܦܩܕܘ ܠܥܠܝܡ̈ܐ ܕܢܦܬܚܘܢ ܠܗ݀ ܬܪܥܐ܂ ܐܝܟ ܕܐܡܪܬ܂
10:10	ܘܥܒܕܘ ܒ̈ܢܝ ܡܕܝܢܬܐ ܗܟܢܐ܂ ܘܢܦܩܬ ܝܗܘܕܝܬ ܗܝ ܘܛܠܝܬܗ ܥܡܗ܂ ܘܕܩܘ ܒ̈ܢܝ ܡܕܝܢܬܐ ܥܕܡܐ ܕܢܚܬܬ ܡܢ ܛܘܪܐ܂ ܘܟܕ ܐܬܝ ܠܐܘܠܘܢܐ܂ ܬܘܒ ܠܐ ܚܙܐܘܗ܂
10:11	ܘܐܙܠܬ ܒܓܘ ܐܘܠܘܢܐ ܬܪܝܨܐܝܬ ܘܦܓܥܬ ܒܡܛܪܬܐ ܩܕܡܝܬܐ ܕܒ̈ܢܝ ܐܬܘܪ܂
10:12	ܘܐܚܕܘܗ ܘܫܐܠܘܗ ܘܐܡܪܝܢ ܠܗ܂ ܡܐ ܛܒܟܝ ܘܡܢ ܐܝܡܟܐ ܐܬܝܬ܂ ܘܠܐܝܟܐ ܐܙܠܬܝ܂ ܘܐܡܪܬ ܠܗܘܢ ܒܪܬ ܥܒܪ̈ܝܐ ܐܢܐ܂ ܘܥܪܩܬ ܡܢܗܘܢ܂ ܡܛܠ ܕܥܬܝܕܝܢ ܐܢܘܢ ܠܡܫܬܠܡܘ ܠܟܘܢ ܠܡܐܟܘܠܬܐ܂
10:13	ܘܐܢܐ ܐܬܝܬ ܠܘܬ ܐܠܦܪܢܐ ܪܒ ܚܝܠܟܘܢ܂ ܕܐܘܕܥܗ ܦܬܓܡܐ ܕܩܘܫܬܐ ܘܐܚܘܝܘܗܝ ܐܘܪܚܐ ܕܢܐܙܠ ܒܗ܂ ܘܢܫܠܛ ܒܟܠܗ ܛܘܪܐ ܘܠܐ ܢܛܥܐ ܡܢܗ ܚܕ ܡܢ ܒ̈ܢܝ ܒܣܪܐ܂ ܘܐܦܠܐ ܪܘܚܐ ܕܚ̈ܝܐ܂
10:14	ܘܟܕ ܫܡܥܘ ܥܒ̈ܕܐ ܦܬܓܡ̈ܝܗ܂ ܚܪܘ ܒܐ̈ܦܝܗ ܘܬܡܝܗ ܗܘܐ ܫܘܦܪܗ ܒܥܝܢ̈ܝܗܘܢ ܛܒ܂
10:15	ܘܐܡܪܘ ܠܗ܂ ܐܚܝܬܝ ܢܦܫܟܝ ܠܛܒܬܐ܂ ܕܐܣܬܪܗܒܬ ܢܚܬܬܝ ܩܕܡ ܡܪܢ܂ ܡܟܝܠ ܩܪܘܒܝ ܠܘܬ ܡܫܟܢܗ܂ ܘܐܢܫܐ ܡܢܢ ܢܘܒܠܘܢܟܝ܂ ܥܕܡܐ ܕܢܫܠܡܘܢܟܝ ܒܐܝܕܘ̈ܗܝ܂
10:16	ܘܟܕ ܬܩܘܡܝܢ ܩܕܡܘܗܝ ܠܐ ܬܕܚܠܝܢ ܒܠܒܟܝ܂ ܐܠܐ ܚܘܐܝܘܗܝ ܦܬܓܡܝܟܝ ܘܢܛܐܒ ܠܟܝ܂
10:17	ܘܓܒܘ ܡܢܗܘܢ ܡܐܐ ܓܒܪ̈ܝܢ܂ ܘܐܫܠܡܘܗ ܠܗ ܘܠܥܠܝܡܬܗ܂ ܘܐܝܬܝܘ ܐ̈ܢܝܢ ܠܡܫܟܢܗ ܕܐܠܦܪܢܐ܂
10:18	ܘܗܘܐ ܪܗܛܐ ܒܟܠܗ ܡܫܪܝܬܐ܂ ܡܛܠ ܕܐܫܬܡܥܬ ܡܐܬܝܬܗ܂ ܠܐܝܠܝܢ ܕܒܡܫ̈ܟܢܐ܂ ܘܐܬܘ ܘܟܪܝܟܝܢ ܗܘܘ ܠܗ܂ ܟܕ ܩܝܡܐ ܠܒܪ ܡܢ ܡܫܟܢܐ ܕܐܠܦܪܢܐ܂ ܥܕܡܐ ܕܐܡܪܘ ܠܗ ܥܠܝܗ܂

10:19	ܘܬܡܗܘ ܒܫܘܦܪܗ܂ ܘܩܒܠܘ ܦܬܓ̈ܡܝܗ ܡܢ ܕܛܒܝܢ ܗܘܘ ܛܒ ܃ ܘܐܬܕܡܪܘ ܒܒ̈ܢܝ ܐܝܣܪܐܝܠ ܡܛܠܬܗ܂ ܘܐܡܪܘ ܓܒܪ ܠܚܒܪܗ܂ ܡܢ ܢܒܣܐ ܒܥܡܐ ܕܐܝܬ ܒܗ ܐܝܟ ܗܠܝܢ ܢܫ̈ܐ܂ ܠܐ ܘܠܐ ܕܢܫܬܚܪ ܡܢܗܘܢ ܐܢܫ܂ ܕܠܐ ܟܕ ܢܫܬܚܪܘܢ ܢܬܚܟܡܘܢ ܠܟܠܗ ܐܪܥܐ܂ ݂݂݁܂

10:20	ܘܢܦܩܘ ܟܠܗܘܢ ܦܠܚ̈ܘܗܝ ܕܐܠܦܪܢܐ ܘܟܠܗܘܢ ܥܒܕ̈ܘܗܝ܂ ܘܐܥܠܘܗ ܠܡܫܟܢܐ܂
10:21	ܘܐܠܦܪܢܐ ܪܡܐ ܗܘܐ ܘܢܝܚ ܒܥܪܣܗ ܒܓܘ ܟܠܬܗ܂ ܕܙܩܝܪܐ ܒܐܪܓܘܢܐ ܘܒܕܗܒܐ܂ ܘܒܐܙܡܪܓܕܐ܂ ܘܒܟܐ̈ܦܐ ܛܒܬ̈ܐ܂
10:22	ܘܐܡܪܘ ܠܗ ܥܠܝܗ܂ ܘܗܘ ܟܕ ܫܡܥ܂ ܢܦܩ ܠܕܪܬܐ ܕܡܫܟܢܐ܂ ܘܠܡܦ̈ܕܐ ܕܣܐܡܐ ܕܠܩܝܢ ܗܘܘ ܩܕܡܘܗܝ܂ ܘܐܥܠܘܗ ܠܘܬܗ ܃
10:23	ܘܟܕ ܩܡܬ ܝܗܘܕܝܬ ܩܕܡܘܗܝ ܘܩܕܡ ܥ̈ܒܕܘܗܝ܂ ܐܬܕܡܪܘ ܟܠܗܘܢ ܒܫܘܦܪܐ ܕܐ̈ܦܝܗ܂ ܘܢܦܠܬ ܥܠ ܐ̈ܦܝܗ ܘܣܓܕܬ ܠܗ܂ ܘܐܚܕܘܗ ܥܒܕܘ̈ܗܝ ܘܐܩܝܡܘܗ܂