The Comprehensive Aramaic Lexicon

15:01	ܘܟܕ ܫܡܥܘ ܐܝܠܝܢ ܕܒܡܫ̈ܟܢܐ ܐܬܕܡܪܘ ܕܡܢܐ ܟܝ ܗܘܐ܂
15:02	ܘܢܦܠܬ ܥܠܝܗܘܢ ܕܚܠܬܐ ܘܪܬܝܬܐ܂ ܘܠܐ ܟܬܪܘ ܐܢܫ ܠܘܬ ܩܪܝܒܗ܂ ܐܠܐ ܐܬܗܦܟܘ ܘܥܪܩܘ ܐܟܚܕܐ܂ ܠܟܠ ܐܘܪ̈ܚܢ ܒܦܩܥ̈ܬܐ ܘܒܛܘܪ̈ܐ܂

15:03	ܘܐܝܠܝܢ ܕܫܪܝܢ ܗܘܘ ܒܛܘܪ̈ܐ ܘܟܪܝܟܝܢ ܣܡܘ ܠܡܥܪܩ܂ ܘܗܝܕܝܢ ܒܢܝ ܐܝܣܪܐܝܠ ܣܡܘ ܥܠܝܗܘܢ܂ ܟܠܗܘܢ ܓܒܪ̈ܐ ܩܪ̈ܒܬܢܐ܂ ܘܐܬܢܟܣܘ ܥܠܝܗܘܢ ܃

15:04	ܘܫܕܪ ܥܘܙܝܐ ܠܟܠܗܘܢ ܬܚܘܡ̈ܐ ܕܐܝܣܪܝܠ܂ ܘܢܘܕܥܘܢ ܐܢܘܢ ܥܠ ܡܐ ܕܓܕܫ܂ ܘܢܦܩܘܢ ܟܠܗܘܢ ܥܠ ܒܥܠܕ̈ܒܒܐ ܘܢܚܪܒܘܢ ܐܢܘܢ ܃
15:05	ܘܟܕ ܫܡܥܘ ܒ̈ܢܝ ܐܝܣܪܝܠ ܟܠܗܘܢ ܐܟܚܕܐ܂ ܢܦܠܘ ܥܠܝܗܘܢ܂ ܘܡܩܛܠܝܢ ܗܘܘ ܒܗܘܢ ܥܕܡܐ ܠܚܘܒܐ܂ ܗܟܘܬ ܒ̈ܢܝ ܐܪܫܠܡ ܕܐܬܘ ܡܢ ܟܠ ܛܘܪ̈ܝܢ܂ ܡܛܠ ܕܐܫܬܡܥܘ ܠܗܘܢ ܟܠ ܡܐ ܕܐܬܥܒܕ ܠܡܫܪܝܬܐ ܕܒܥܠܕܒ̈ܒܝܗܘܢ ܃ ܘܐܝܠܝܢ ܕܒܓܠܥܕ ܘܒܓܠܝܠܐ ܢܦܩܘ ܥܠܝܗܘܢ ܘܡܚܘ ܐܢܘܢ ܡܚܘܬܐ ܪܒܬܐ ܥܕܡܐ ܕܥܒܪܘ ܕܪܡܣܘܩ ܘܬܚ̈ܘܡܝܗ܂
15:06	ܘܫܪܟܐ ܕܥܡܘܪ̈ܝܗ ܕܒܝܬ ܦܠܘ܂ ܢܦܠܘ ܥܠ ܡܫܪ̈ܝܬܐ ܕܐܬܘܪ܂ ܘܒܙܘ ܘܫܒܘ ܘܥܬܪܘ ܛܒ܂
15:07	ܘܗܦܟܘ ܒ̈ܢܝ ܐܝܣܪܝܠ ܡܢ ܩܪܒܐ܂ ܘܐܫܬܠܛܘ ܒܫܪܟܐ ܕܡܕ̈ܝܢܬܐ ܕܒܛܘܪ̈ܐ ܘܒܦܩܥܬܐ܂ ܘܢܣܒܘ ܒܙܬܐ ܣܓܝܐܬܐ܂
15:08	ܘܐܬܐ ܝܘܝܩܝܡ ܟܗܢܐ ܪܒܐ܂ ܘܣ̈ܒܐ ܕܐܝܣܪܝܐܝܠ ܐܝܠܝܢ ܕܥܡܪܝܢ ܒܐܪܫܠܡ ܠܡܡܠܠܘ ܫܠܡܐ ܥܡ ܝܗܘܕܝܬ܂
15:09	ܘܟܕ ܢܦܩܬ ܠܘܬܗܘܢ ܟܪܟܘܗ ܟܠܗܘܢ ܐܟܚܕܐ܂ ܘܐܡܪܘ܂ ܐܢܬܝ ܗܝ ܪܘܡܗ ܕܐܪܫܠܡ܂ ܘܫܘܒܗܪܗ ܕܐܝܣܪܝܠ܂ ܘܬܫܒܘܚܬܗ ܕܥܡܢ܂
15:10	ܕܥܒܕܬܝ ܗܠܝܢ ܟܠܗܝܢ ܒܐܝܕ̈ܝܟܝ܂ ܘܥܒܕܬܝ ܛܒ̈ܬܐ ܥܡ ܐܝܣܪܐܝܠ܂ ܘܐܨܛܒܝ ܒܗܘܢ ܡܪܝܐ܂ ܘܬܗܘܝܢ ܒܪܝܟܐ ܠܡܪܝܐ ܚܝܠܬܢܐ ܠܥܠܡ ܥܠܡܝܢ܂ ܘܐܡܪܘ ܟܠܗ ܥܡܐ ܐܡܝܢ܂
15:11	ܘܗܘܘ ܡܥܒܪܝܢ ܥܡܐ ܡܫܪ̈ܝܬܗܘܢ ܃ ܕܐܬܘܪ̈ܝܐ ܥܕܡܐ ܠܬܠܬܐ ܝܘܡ̈ܝܢ܂ ܘܝܗܒܘ ܠܝܗܘܕܝܬ ܡܫܟܢܗ ܕܐܠܦܪܢܐ܂ ܘܟܠܗܘܢ ܡ̈ܐܢܝ ܡܫܟܢܗ܂ ܘܥܪܣܗ ܘܒܥܝܪܗ ܘܡܐ̈ܢܘܗܝ܂ ܘܢܣܒܬ ܘܣܡܬ ܐܢܘܢ ܥܠ ܟܘܕܢ̈ܘܬܐ ܘܟܕܢܬ ܥܓܠܬܗ܂ ܘܣܡܬ ܐܢܘܢ ܒܗܝܢ܂
15:12	ܘܪܗܛ ܠܘܬܗ ܟܠܗܝܢ ܢܫ̈ܐ ܕܐܝܣܪܝܠ܂ ܘܟܪܟܗ܂ ܘܓܒ̈ܝܢ ܡܢܗܝܢ ܟܢܫ̈ܐ ܕܡܫܒܚܢܝ̈ܬܐ܂ ܘܢܣܒܬ ܣܘ̈ܟܐ ܕܕܩ̈ܠܐ ܒܐܝܕܗ܂ ܘܝܗܒܬ ܠܢܫ̈ܐ ܕܥܡܗ܂
15:13	ܘܣܡܬ ܟ̈ܠܝܠܐ ܕܙܝܬܐ ܒܪܝܫܗ܂ ܗܝ ܘܚܒܪܬܗ܂ ܘܐܬܘ ܟܠ ܪ̈ܘܪܒܢܐ ܕܒܝܬ ܐܝܣܪܝܠ܂ ܘܟܠ ܪ̈ܘܪܒܢܝܬܐ ܕܐܝܣܪܝܠ܂ ܘܐܬܝܢ ܗܘܘ ܥܡܗܝܢ ܟܘܠܗܘܢ ܒ̈ܢܝ ܐܝܣܪܝܠ܂ ܟܕ ܡܙܝܢܝܢ܂ ܘܣܝܡܝܢ ܟ̈ܠܝܠܐ ܘܬܫܒܘܚܬܐ ܒܦܘܡܗܘܢ ܃
15:14	ܘܡܥܢܝܐ ܗܘܬ ܝܗܘܕܝܬ܂ ܒܬܘܕܝܬܗ ܠܟܠܗ ܐܝܣܪܝܠ܂ ܘܥܢܐ ܗܘܐ ܟܠܗ ܥܡܐ ܬܫܒܘܚܬܗ ܕܡܪܝܐ܂ ܼܼܼ