← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62065: Judith

Click on a word for lexical analysis
Click on a red-colored coordinate for comments and/or translations of the line

previous chapter


16:01 ܬܫܒܘܚܬܗ ܕܝܗܘܕܝܬ܀ ܘܐܡܪܬ ܝܗܘܕܝܬ܂ ܫܒܚܘ ܠܡܪܝܐ ܒܦ̈ܠܓܐ܂ ܙܡܪܘ ܠܗ ܒܨܨ̈ܠܐ܂ ܫܒܚܘ ܠܗ ܬܫܒܘܚܬܐ ܚܕܬܐ܂ ܘܪܡܪܡܘܗܝ ܘܩܪܘ ܒܫܡܗ܂
16:02 ܐܢܬ ܗܘ ܐܠܗܐ ܕܡܫܚܩ ܩܪ̈ܒܐ܂ ܡܪܝܐ ܕܣܡܬ ܡܫܪܝܬܐ ܒܓܘ ܥܡܟ܂ ܠܡܦܪܩ ܐܢܘܢ ܡܢ ܐܝܕܐ ܕܐܠܘܨ̈ܝܗܘܢ ܃
16:03 ܐܬܐ ܐܬܘܪܝܐ ܡܢ ܛܘܪ̈ܝ ܓܪܒܝܐ܂ ܐܬܐ ܒܪ̈ܒܘܬܐ ܕܚܝܠܗ܂ ܒܣܘܓܐܗܘܢ ܣܟܪܘ ܢܚ̈ܠܐ܂ ܘܪ̈ܟܫܗܘܢ ܟܣܝܘ ܪ̈ܡܬܐ܂
16:04 ܐܡܪܘ ܠܡܘܩܕܘ ܬܚܘ̈ܡܝ܂ ܘܠܓܕ̈ܘܕܝ ܢܩܛܠ ܒܚܪܒܐ܂ ܘܠܝܠܘ̈ܕܐ ܢܫܩܦ ܥܠ ܐܪܥܐ܂ ܘܛ̈ܠܝܐ ܢܬܠ ܠܫܒܝܐ܂ ܘܒܬܘ̈ܠܬܝ ܠܒܙܬܐ܂
16:05 ܡܪܝܐ ܚܝܠܬܢܐ ܛܠܡ ܐܢܘܢ ܃ ܒܐܝܕܐ ܕܢܩܒܬܐ ܐܒܗܬ ܐܢܘܢ ܃
16:06 ܡܛܠ ܕܠܐ ܗܘܐ ܡܢ ܓܕܘ̈ܕܐ ܢܦܠܘ ܚܝ̈ܠܬܢܝܗܘܢ ܃ ܘܐܦܠܐ ܡܢ ܒ̈ܢܝ ܥܫܝ̈ܢܐ ܡܚܐܘܗܝ܂ ܘܐܦܠܐ ܓܒܪ̈ܐ ܕܪܡܝܢ ܒܩܘܡ̈ܬܐ ܐܪܡܝܘ ܥܠܝܗܘܢ ܃ ܐܠܐ ܝܗܘܕܝܬ ܒܪܬ ܡܪܪܝ܂ ܒܫܘܦܪܐ ܕܐ̈ܦܝܗ ܫܕܠܬܗ܂
16:07 ܫܠܚܬ ܡܐ̈ܢܝ ܐܪܡܠܘܬܗ܂ ܠܬܫܒܘܚܬܐ ܕܟܐܒܘ̈ܗܝ ܕܐܝܣܪܝܠ܂ ܡܫܚܬ ܐܦܝ̈ܗ ܒܒܣܡܐ܂
16:08 ܐܣܪܬ ܓܕ̈ܘܠܝܗ ܒܣܪܝܓܬܐ܂ ܘܠܒܫܬ ܢܚܬ̈ܝܗ ܠܡܛܥܝܘܬܗ܂
16:09 ܘܡܣ̈ܢܝܗ ܚܛܦ ܥܝܢ̈ܘܗܝ ܘܫܘܦܪܗ ܫܒܐ ܢܦܫܗ܂ ܦܣܩ ܢܐܢܪܗ ܨܘܪܗ܂
16:10 ܙܥܘ ܦܪ̈ܣܝܐ ܡܢ ܡܪܚܘܬܗ܂ ܘܡܕ̈ܝܐ ܡܢ ܥܘܫܢܗ ܐܬܒܪܘ܂
16:11 ܗܝܕܝܢ ܝܒܒܘ ܡܟ̈ܝܟܝ܂ ܘܩܥܘ ܟܪ̈ܝܗܝ ܘܢܦܠܘ܂ ܘܐܪܝܡܘ ܩܠܗܘܢ ܘܐܬܬܒܪܘ܂
16:12 ܐܝܟ ܕܠܥܠܝܡ̈ܬܐ ܕܓܫܘ ܐܢܘܢ ܃ ܘܐܝܟ ܕܠܥܒ̈ܕܐ ܡܪ̈ܘܕܐ ܩܛܠܘ ܐܢܘܢ ܃ ܐܒܕܘ ܐܝܟ ܕܡܢ ܡܫܪܝܬܗ ܕܡܪܝܐ ܐܠܗܢ ܃
16:13 ܐܫܒܚ ܠܐܠܗܝ ܬܫܒܘܚܬܐ ܚܕܬܐ܂ ܡܪܝܐ ܚܝܠܬܢܐ܂ ܪܒ ܐܢܬ ܘܫܒܝܚ܂ ܘܓܢܒܪ ܒܚܝܠܐ܂ ܘܠܐ ܡܙܕܟܐ ܐܢܬ܂
16:14 ܠܟ ܢܦܠܚܘܢ ܟܠܗܘܢ ܥܡܡ̈ܐ܂ ܘܠܟ ܬܫܬܥܒܕ ܟܠܗ ܐܪܥܐ ܒܪܝܬܟ܂ ܡܛܠ ܕܐܢܬ ܐܡܪܬ ܘܗܘܘ܂ ܘܣܕܪܬ ܐܢܘܢ ܘܐܬܩܝܡܘ܂ ܘܠܝܬ ܡܢ ܕܠܘܩܒܠ ܡܠܬܟ ܢܩܘܡ܂
16:15 ܛܘܪ̈ܐ ܡܢ ܫܬܐ̈ܣܝܗܘܢ ܥܡ ܡܝܝ̈ܗܘܢ ܢܙܘܥܘܢ ܃ ܘܫܘ̈ܥܐ ܐܝܟ ܫܥܘܬܐ ܢܬܦܫܪܘܢ ܡܢ ܩܕܡܝܟ܂ ܘܥܠ ܕܚܠܝܟ ܬܚܣܐ܂
16:16 ܡܛܘܠ ܕܙܥܘܪܝܐ ܗܝ ܟܠ ܕܒܚܬܐ ܠܪܝܚ ܣܘܬܐ܂ ܘܒܨܝܪ ܗܘ ܟܠ ܬܪܒܐ ܠܝܩ̈ܕܐ ܫܠܡ̈ܐ܂ ܘܐܝܢܐ ܕܕܚܠ ܠܡܪܝܐ܂ ܪܒ ܗܘ ܠܘܬܗ ܒܟܘܠ ܙܒܢ܂
16:17 ܘܝ ܠܥܡܐ ܕܩܐܡ ܥܠ ܥܡܝ܂ ܡܪܝܐ ܚܝܠܬܢܐ ܡܬܬܒܥ ܡܢܗܘܢ܂ ܒܝܘܡܐ ܕܕܝܢܐ ܢܬܒܥ ܐܢܘܢ ܘܢܣܥܘܪ ܐܢܘܢ ܃ ܘܢܬܠ ܒܣܪܗܘܢ ܠܢܘܪܐ ܘܠܬܘܠܥܐ܂ ܘܢܐܩܪܘܢ ܒܪܘܫܥܐ ܥܕܡܐ ܠܥܠܡ܂
16:18 ܘܗܘܐ ܕܟܕ ܐܬܬ ܠܐܪܫܠܡ ܘܣܓܕܘ ܠܡܪܝܐ܂ ܘܟܕ ܐܬܕܟܝ ܥܡܐ܂ ܃ ܘܐܝܬܝܘ ܝܩ̈ܕܝܗܘܢ ܫ̈ܠܡܐ ܠܡܪܝܐ܂ ܃ ܘܕܒ̈ܚܐ ܐܡܝܢܐܝܬ܂
16:19 ܘܐܝܬܝܬ ܝܗܘܕܝܬ ܡܐ̈ܢܘܗܝ ܕܐܠܦܪܢܐ܂ ܘܟܠܬܐ ܕܢܣܒܬ ܡܢ ܩܝܛܘܢܐ܂ ܘܝܗܒܬ ܐܢܘܢ ܚܪܡܐ ܠܡܪܝܐ܂ ܃
16:20 ܘܗܘܘ ܥܡܐ ܚܕܝܢ ܒܐܘܪܫܠܡ ܩܕܡ ܒܝܬ ܡܩܕܫܐ ܝܪܚ ܝܘܡ̈ܝܢ܂ ܘܝܗܘܕܝܬ ܩܘܝܬ ܥܡܗܘܢ ܬܡܢ ܒܐܘܪܫܠܡ܂ ܂
16:21 ܘܡܢ ܒܬܪ ܝܘܡ̈ܬܐ ܗܠܝܢ܂ ܗܦܟ ܐܢܫ ܠܡܫܟܢܗ܂ ܘܝܗܘܕܝܬ ܐܙܠܬ ܠܒܝܬ ܦܠܘ ܠܒܝܬ ܩܢܝܢܗ܂ ܘܗܘܬ ܡܝܩܪܐ ܠܟܠܗ ܐܪܥܐ܂
16:22 ܘܣܓ̈ܝܐܐ ܐܬܪܓܪܓܘ ܠܡܣܒܗ܂ ܘܠܐ ܚܟܡܗ ܓܒܪ ܟܘܠܗܘܢ ܝܘܡ̈ܬܐ ܕܚ̈ܝܝܗ܂ ܡܢ ܝܘܡܐ ܕܡܝܬ ܡܢܫܐ ܒܥܠܗ܂
16:23 ܘܟܡܐ ܕܐܬܝܐ ܡܐܪܒ ܝܪܒܐ ܗܘܬ܂ ܥܕܡܐ ܕܝܪܒܬ ܛܒ܂ ܘܣܐܒܬ ܒܒܝܬܗ ܕܡܢܫܐ ܒܥܠܗ܂ ܘܗܘܬ ܒܪܬ ܡܐܐ ܘܚܡܫ ܫ̈ܢܝܢ܂ ܘܡܝܬܬ ܒܝܬ ܦܠܘ܂ ܘܐܬܩܒܪܬ ܒܡܥܪܬܐ ܥܡ ܡܢܫܐ ܒܥܠܗ܂
16:24 ܘܐܬܐܒܠ ܥܠܝܗ ܟܠܗ ܒܝܬ ܐܝܣܪܝܠ ܫܒܥܐ ܝܘ̈ܡܝܢ܂ ܘܦܠܓܬ ܢܟܣ̈ܝܗ ܡܢ ܩܕܡ ܡܘܬܗ܂ ܠܟܠܗܘܢ ܩܪ̈ܝܒܘܗܝ ܕܡܢܫܐ ܒܥܠܗ܂ ܘܠܐܝܠܝܢ ܕܩܪܝܒܝܢ ܠܫܪܒܬܗ܂ ܘܫܒܩܬ ܠܐܡ̈ܬܗ ܒܢ̈ܬ ܚܐܪ̈ܐ܂
16:25 ܘܠܐ ܗܘܐ ܬܘܒ ܕܡܕܚܠ ܠܒ̈ܢܝ ܐܝܣܪܝܠ ܟܠܗܘܢ ܝܘܡ̈ܬܗ ܕܝܗܘܕܝܬ܂ ܘܐܦ ܡܢ ܒܬܪ ܡܘܬܗ ܝܘܡ̈ܬܐ ܣܓܝܐ̈ܐ܀ ܼܼ܀ ܫܠܡ ܟܬܒܐ ܕܝܗܘܕܝܬ܀