The Comprehensive Aramaic Lexicon

01:00	ܚܟܡܬܐ ܕܒܪ ܣܝܪܐ
01:01	ܟܠ ܚܟܡܐ ܡܢ ܩܕܡ ܡܪܝܐ ܗܝ܂ ܘܗܝ݂ ܥܡܗ ܗܝ݂ ܡܢ ܥܠܡܝܢ܂
01:02	ܚ݁ܠܐ ܕܝܡܐ ܘܢܘ̈ܛ݂ܦܬܐ ܕܡܛܪܐ܃ ܘܝܘ̈ܡܬܐ ܕܥܠܡܐ ܡܢ݂ܘ ܡܫܟܚ ܠܡܡܢ݂ܐ܂
01:03	ܪܘܡܐ ܕܫܡܝܐ ܘܦܬܝܐ ܕܐܪܥܐ܃ ܘܬܗܘܡܐ ܪܒܐ ܡܢ݂ܘ ܢܡܫܘܚ܂
01:04	ܡܢ ܟܠܗܝܢ ܗܠܝܢ ܣܓ݂ܝܬ ܚܟܡܬܐ ܘܥ݂ܫܢܬ ܗܝܡܢܘܬܐ܂ ܡܢ ܠܩܘܕܡܝܢ
01:06	ܫܪ̈ܫܝ ܗܝܡܢܘܬܐ ܠܡ݁ܢ ܐܬܓ݂ܠܝܘ܂ ܘܛܡ݂ܪ̈ܝ ܣܟܘ݂ܠܬ݂ܢܘܬܐ ܡܢ݂ܘ ܝܕܥ܂
01:08	ܚܕ ܗܘ ܘܕܚܝܠ ܒܠܚܘܕܘܗܝ܃ ܐܠܗܐ ܕܗܘܝܘ ܫܠܝܛ ܥܠ ܟܠ ܐܘܨܪ̈ܝܗ݀܂
01:09	ܒܕܩܗ݀ ܘܚܙܗ݀ ܘܡܢܗ݀ ܘܝܗܒܗ݀܃ ܘܦܠܓܗ݀ ܠܟܠ ܥ̈ܒ݁ܕܘܗܝ
01:10	ܥܡ ܟܠ ܒܣ݂ܪ ܐܝܟ ܨܒܝܢܗ ܝܗܒܗ݀܃ ܘܐܣܓܝܗ݀ ܠܟܠ ܕܚܠܘܗ̈ܝ܃
01:11	ܕܚܠܬܗ ܕܡܪܝܐ ܗܕܪܐ ܘܐܝܩܪܐ܂ ܘܪܒܘܬܐ ܘܟܠܝܠܐ܂ ܕܬܫܒܘܚܬܐ܂
01:12	ܕܚܠܬܗ ܕܡܪܝܐ ܡܚ݁ܕܝܐ ܠܒܐ܂ ܚܕܘܬܐ ܘܕܝ݁ܨܐ܂ ܘܚܝ̈ܐ ܕܠܥܠܡ܂
01:13	ܕܕܚ݁ܠ ܠܐܠܗܐ ܬܛ݂ܐܒ ܚܪܬܗ܂ ܘܒܐܚܪܝܬ ܝܘ̈ܡܬܗ݂ ܢܬܒܪܟ ܀
01:14	ܪܝܫ ܚܟܡܬܐ ܕܚܠܬܗ ܕܡܪܝܐ܃ ܘܥܡ ܡܗܝ̈ܡܢܐ ܡܢ ܟܪܣܐ ܕܐܡܗܘܢ ܐܬܒܪܝܬ܂
01:15	ܥܡ ܐܢܫܐ ܗܝ ܕܩܘܫ̈ܬܐ܂ ܘܗܝ݂ ܡܢ ܥܠܡ̈ܐ ܐܬܬܩ݂ܢܬ܂ ܘܥܡ ܙܪܥܗܘܢ ܐܬ݁ܩܝܡ ܚܣܕܗ݀܂
01:16	ܪܝܫ ܚܟܡܬܐ ܕܚܠܬܗ ܕܡܪܝܐ܂ ܘܛܘܒܐ ܡܪܘܝܐ܂ ܡܢ ܣܘܓܐܬ ܥ̈ܠܠܬܗ܂
01:17	ܟܘܠ ܐܘܨܪ̈ܝܗ݀ ܬܡ݂ܠܐ ܚܟܡܬܐ܂ ܘܣܝ̈ܡܬܐ ܡܢ ܥ̈ܠܠܬܗ݀܂
01:18	ܪܝܫ ܚܟܡܬܐ ܕܚܠܬܗ ܕܡܪܝܐ܂ ܘܡܣܓܝܐ ܫܠܡܐ ܘܚܝ̈ܐ ܘܐܣܝܘܬܐ܂ ܚܘܛܪܐ ܗܝ ܕܬܘܩܦܐ ܘܒܝܬ ܡܣ݂ܡܟ ܬܫܒܘܚܬܐ܂ ܘܐܝܩܪܐ ܕܠܥܠܡ ܠܟܠ ܡ݁ܢ ܕܐ݁ܙܠ ܒܬܪܗ݀܂
01:20	ܥܩܪ̈ܝܗ݀ ܚܝ̈ܐ ܕܠܥܠܡ܂ ܘܥܘܦ̈ܝܗ݀ ܢܘܓܪܐ ܕܝܘܡ̈ܬܐ܂ ܛ݁ܘܒܘܗܝ ܠܒܪܢܫܐ ܕܒܗ݀ ܢܪܢܐ܂ ܕܗܝ݂ ܛ݁ܒܐ ܠܗ݂ ܡܢ ܟܘܠ ܣܝܡ̈ܬܐ܂ ܛ݁ܘܒܘܗܝ ܠܒܪ ܐܢܫܐ ܕܢܬܩܪܒ ܠܘܬܗ݀܂ ܘܒܦܘܩ̈ܕܢܝܗ݀ ܢܫܬܡܫ܃ ܟܠܝܠܐ ܕܠܥܠܡ ܬܣܝ݂ܡܝܘܗܝ݂܂ ܘܙܟܘܬܐ ܕܠܥܠܡܝܢ ܒܝܬ ܩܕܝܫ̈ܐ܂ ܢܚܕܐ ܒܗ݀ ܘܬܚ݂ܕܐ ܒܗ܂ ܘܠܐ ܬܪܡܝ݂ܘܗܝ݂ ܠܥܠܡ ܥܠܡܝܢ܀ ܡܠܐܟ̈ܘܗܝ ܕܐܠܗܐ ܢܚܕܘܢ ܒܗ݀܂ ܘܢܡ݂ܢܘܢ ܟܠ ܬܫܒ̈ܚܬܗ ܕܡܪܝܐ܂ ܗܢܐ ܟܬܒܐ ܟܠܗ ܡܠܐ ܚܝ̈ܐ܂ ܛܘܒܘܗܝ ܠܒܪ ܐܢܫܐ ܕܢܫܡܥ ܘܢܥܒܕܝܘܗܝ܂܀ ܫܘܡܥܘܢ̈ܝ ܕܚܠܘ̈ܗܝ̈ ܕܐܠܗܐ܂ ܘܨܘܬܘ݂ ܘܐܬܒܝܢܘ ܒܡ̈ܠܝ܂ ܡܢ݂ܘ ܕܨܒ݁ܐ ܕܢܐܪܬ ܚܝ̈ܐ܂ ܝܘܪܬܢܐ ܕܠܥܠܡ ܘܚܕܘܬܐ ܪܒܬܐ܂ ܟܠ ܡ̈ܠܝ ܫܡ݂ܥ ܘܥ݂ܒ݁ܕ ܘܬܬܟܬܒ݂ ܒܣ݂ܦܪ̈ܐ ܕܚ̈ܝܐ܂ ܪܚ݂ܡ ܕܚܠܬܗ ܕܡܪܝܐ܂ ܘܐܫܪ ܒܗ݀ ܠܒܟ ܘܠܐ ܬܕܚܠ܂ ܩܪܘܒ ܘܠܐ ܬܬܡ݁ܬܢ܂ ܘܬܫܟܚ ܚܝ̈ܐ ܠܪܘܚܟ܂ ܘܟܕ ܬܗܘܐ ܩ݁ܪܒ݂܂ ܐܝܟ ܓܢܒܪܐ ܘܐܝܟ ܚܝܠܬܢܐ܂
01:28	ܒܪܝ ܠܐ ܬܟܕܒ ܒܕܚܠܬܗ ܕܡܪܝܐ܂ ܘܠܐ ܬܩܪܘܒ ܥܠܝܗ ܒܬܪܝܢ ܠܒܝ̈ܢ܂

01:29	ܘܠܐ ܬܬܝܩܪ ܒܗ ܠܥܝܢ ܒܢ̈ܝ ܐܢܫܐ܂ ܘܒܣܦ̈ܘܬܟ ܬܗܘܐ ܙܗܝܪ ܠܚܕܐ܂

01:30	ܠܐ ܬܣܢܐ ܡܐܡܪܗ܂ ܘܠܐ ܬܙܘܥ܂ ܘܠܐ ܬܣܓܐ ܠܢܦܫܟ ܩܠܠܐ܂ ܕܠܡܐ ܢܣܓܐ ܡܪܝܐ ܐܣܘܪ̈ܝܟ܂ ܘܒܓܘ ܟܢܘܫܬܐ ܢܪܡܝܟ܃ ܡܛܠ ܕܐܫܬܡܗܬ ܒܕܚܠܬܗ ܕܐܠܗܐ܂ ܘܓܘܗ ܕܠܒܟ ܡܠܐ ܢܟܠܐ܂